ಚಂದ್ರನ ಮೇಲೆ ನೀರಿನ ಕಣ ಖಚಿತಪಡಿಸಿದ ಚಂದ್ರಯಾನ -2, ಮಹತ್ವದ ಅನ್ವೇಷಣೆ
2019ರ ಆಗಸ್ಟ್‌ನಲ್ಲಿ 'ಚಂದ್ರಯಾನ-2' ಮಿಷನ್‌ ಮೂಲಕ ಕಳುಹಿಸಲಾದ ರೋವರ್‌ ನಿರೀಕ್ಷೆಯಂತೆ ಲ್ಯಾಂಡ್‌ ಆಗದೆ ತಾಂತ್ರಿಕವಾಗಿ ವಿಫಲವಾಗಿದ್ದರೂ, ಈಗ ಚಂದ್ರನ ಅಂಗಳದಲ್ಲಿ 'ಹೈಡ್ರೋಕ್ಸೈಲ್‌' ಮತ್ತು ನೀರಿನ ಕಣಗಳನ್ನು ಪತ್ತೆ ಮಾಡಿದೆ.
Admin
0
5
ಹೊಸದಿಲ್ಲಿ: ಚಂದ್ರನ ಅಂಗಳದಲ್ಲಿ ನೀರಿನ ಕಣಗಳು ಇರುವುದನ್ನು ಚಂದ್ರಯಾನ-2 ಮಿಷನ್‌ ಮೂಲಕ ಕಳುಹಿಸಲಾದ ಆರ್ಬಿಟರ್‌ ಪತ್ತೆ ಮಾಡಿದೆ.
2019ರ ಆಗಸ್ಟ್‌ನಲ್ಲಿ 'ಚಂದ್ರಯಾನ-2' ಮಿಷನ್‌ ಮೂಲಕ ಕಳುಹಿಸಲಾದ ರೋವರ್‌ ನಿರೀಕ್ಷೆಯಂತೆ ಲ್ಯಾಂಡ್‌ ಆಗದೆ ತಾಂತ್ರಿಕವಾಗಿ ವಿಫಲವಾದರೂ, ಈ ವೇಳೆ ಚಂದ್ರನ ಕಕ್ಷೆಗೆ ಸೇರಿಸಲಾದ ಆರ್ಬಿಟರ್‌ ಶಶಿಯ ಮೇಲೆ ಹೊಸ ಸಂಶೋಧನೆಗಳನ್ನು ಮುಂದುವರಿಸಿದೆ. ಈಗ ಚಂದ್ರನ ಅಂಗಳದಲ್ಲಿ 'ಹೈಡ್ರೋಕ್ಸೈಲ್‌' ಮತ್ತು ನೀರಿನ ಕಣಗಳನ್ನು ಪತ್ತೆ ಮಾಡಿದೆ.
ಚಂದ್ರನ ಮೇಲಿನ ವಿದ್ಯುದಯಸ್ಕಾಂತೀಯ ತರಂಗಗುಚ್ಛದ ಮಾಹಿತಿ ಸಂಗ್ರಹಿಸುವ ಚಂದ್ರಯಾನ-2 ಆರ್ಬಿಟರ್‌ನ 'ಇಮೇಜಿಂಗ್‌ ಇನ್‌ಫ್ರಾರೆಡ್‌ ಸ್ಪೆಕ್ಟೋಮೀಟರ್‌' (ಐಐಆರ್‌ಎಸ್‌)ಮೂಲಕ ಪಡೆದ ದತ್ತಾಂಶವನ್ನು ವಿಶ್ಲೇಷಿಸಿದಾಗ ಈ ವಿಷಯ ಬಯಲಾಗಿದೆ. ಚಂದ್ರನ ಮೇಲ್ಮೈ ಹಾಗೂ ಒಡಲಾಳದಲ್ಲಿ ಇರುವ ಲೋಹಗಳ ಸಂಯೋಜನೆಯನ್ನು ಅಳೆಯಲು 'ಐಐಆರ್‌ಎಸ್‌' ಬಳಸಲಾಗುತ್ತದೆ. ಈ ವೇಳೆ ನೀರಿನ ಕಣಗಳಿಗಾಗಿ ಶೋಧಿಸಿದಾಗ, 'ಹೈಡ್ರಾಕ್ಸೈಲ್‌'(ಎಚ್‌ಒ) ಮತ್ತು ನೀರಿನ ಕಣಗಳು ಸ್ಪಷ್ಟವಾಗಿ ಪತ್ತೆಯಾಗಿವೆ.
'ಕರೆಂಟ್‌ ಸೈನ್ಸ್‌' ನಿಯತಕಾಲಿಕೆಯಲ್ಲಿ ಈ ಸಂಶೋಧನಾ ವರದಿ ಪ್ರಕಟಗೊಂಡಿದೆ. ಚಂದ್ರನ ಮೇಲ್ಮೈನ ಎಲ್ಲೆಡೆ ವಿವಿಧ ತೀವ್ರತೆಯಲ್ಲಿ ಈ ಕಣಗಳು ವ್ಯಾಪಿಸಿವೆ. ಇದು ಚಂದ್ರನ ಮೇಲ್ಮೈ ಮೇಲೆ ನೀರಿನ ಕಣಗಳ ಇರುವಿಕೆಯನ್ನು ದೃಢಪಡಿಸಿದೆ. ಚಂದ್ರನ ಉತ್ತರಕ್ಕೆ 29 ಡಿಗ್ರಿ ಮತ್ತು 62 ಡಿಗ್ರಿ ಅಕ್ಷಾಂಶದಲ್ಲಿ ಹೆಚ್ಚಿನ ಕಣಗಳು ಕಂಡುಬಂದಿವೆ ಎಂದು ಸಂಶೋಧಕರು ಹೇಳಿದ್ದಾರೆ.
