ಸುಪ್ರೀಂಕೋರ್ಟ್ ನ್ಯಾಯಮೂರ್ತಿ ರೋಹಿಂಗ್ಟನ್ ನಾರಿಮನ್ ನಿವೃತ್ತಿ: ಒಂದು ಸಿಂಹವನ್ನು ಕಳೆದುಕೊಂಡಿದ್ದೇವೆ ಎಂದ ಸಿಜೆಐ
ಸುಪ್ರೀಂಕೋರ್ಟ್‌ನ ನ್ಯಾಯಮೂರ್ತಿಯಾಗಿ ಸೇವೆ ಸಲ್ಲಿಸುತ್ತಿದ್ದ ರೋಹಿಂಗ್ಟನ್ ಫಾಲಿ ನಾರಿಮನ್ ಅವರು ಗುರುವಾರ ಹುದ್ದೆಯಿಂದ ನಿವೃತ್ತರಾದರು. ಸುಪ್ರೀಂಕೋರ್ಟ್ ನ್ಯಾಯಮೂರ್ತಿಗಳು ಹಾಗೂ ವಕೀಲರ ಬಳಗ ಅವರಿಗೆ ಬೀಳ್ಕೊಡುಗೆ ನೀಡಿತು.
Admin
0
6
ಹೊಸದಿಲ್ಲಿ: ಅನೇಕ ಮಹತ್ವದ ತೀರ್ಪುಗಳನ್ನು ನೀಡಿದ್ದ ನ್ಯಾಯಮೂರ್ತಿ ರೋಹಿಂಗ್ಟನ್ ಅವರು ಗುರುವಾರ ನಿವೃತ್ತರಾದರು. ಕರ್ತವ್ಯದ ಕೊನೆಯ ದಿನದಂದು ಅವರು ನಿವೃತ್ತ ನ್ಯಾಯಮೂರ್ತಿಗಳಿಗೆ ಇರುವ ಸಂಪ್ರದಾಯದಂತೆ ಮುಖ್ಯ ಎನ್‌ವಿ ರಮಣ ಅವರೊಂದಿಗೆ ಕೋರ್ಟ್ ಸಂಖ್ಯೆ 1 ರಲ್ಲಿ ಕುಳಿತುಕೊಂಡರು.
'ನ್ಯಾಯಾಂಗ ಸಂಸ್ಥೆಯನ್ನು ರಕ್ಷಿಸಿದ್ದ ಸಿಂಹಗಳಲ್ಲಿ ಒಂದನ್ನು ಇಂದು ಕಳೆದುಕೊಳ್ಳುತ್ತಿರುವ ಅನುಭವವಾಗುತ್ತಿದೆ. ನಾರಿಮನ್ ಅವರು ತಮ್ಮ ಪಾಂಡಿತ್ಯ, ಸ್ಪಷ್ಟತೆ ಹಾಗೂ ವಿದ್ವತ್ ಕೆಲಸಗಳಿಗೆ ಹೆಸರಾಗಿದ್ದಾರೆ. ಅವರ ಜ್ಞಾನ ಹಾಗೂ ಬುದ್ಧಿವಂತಿಕೆಯನ್ನು ನ್ಯಾಯಾಂಗ ತಪ್ಪಿಸಿಕೊಳ್ಳಲಿದೆ. ನಮ್ಮ ಪ್ರಬಲ ನ್ಯಾಯಾಂಗ ವ್ಯವಸ್ಥೆಯ ಸ್ತಂಭಗಳಲ್ಲಿ ಅವರೂ ಒಬ್ಬರು. ಯಾವುದು ಸರಿಯೋ ಅದರ ಪರ ಅವರು ಯಾವಾಗಲೂ ನಿಲ್ಲುತ್ತಿದ್ದರು' ಎಂದು ಬೀಳ್ಕೊಡುಗೆ ಭಾಷಣದಲ್ಲಿ ಸಿಜೆಐ ಶ್ಲಾಘಿಸಿದರು.
ಖ್ಯಾತ ಫಾಲಿ ನಾರಿಮನ್ ಅವರ ಮಗನಾದ ನ್ಯಾಯಮೂರ್ತಿ ನಾರಿಮನ್, 37ನೇ ವಯಸ್ಸಿನಲ್ಲಿ ಸುಪ್ರೀಂಕೋರ್ಟ್‌ನ ಹಿರಿಯ ನ್ಯಾಯವಾದಿಯಾಗಿ ನೇಮಕವಾಗಿದ್ದರು. 35 ವರ್ಷ ವಕೀಲಿಕೆ ನಡೆಸಿರುವ ಅವರು ಹಾರ್ವರ್ಡ್ ವಿವಿಯಲ್ಲಿ ಅಧ್ಯಯನ ಮಾಡಿದ್ದರು.
2011ರಲ್ಲಿ ಸಾಲಿಸಿಟರ್ ಜನರಲ್ ಆಗಿ ನೇಮಕಗೊಂಡಿದ್ದರು. 2014ರಲ್ಲಿ ಅವರು ಸುಪ್ರೀಂಕೋರ್ಟ್ ನ್ಯಾಯಮೂರ್ತಿಯಾಗಿ ನೇರವಾಗಿ ನೇಮಕವಾದ ದೇಶದ ಐದನೇ ವಕೀಲ ಎನಿಸಿಕೊಂಡಿದ್ದರು. ನ್ಯಾಯಮೂರ್ತಿಯಾಗಿ ಅವರು 13,565 ಪ್ರಕರಣಗಳನ್ನು ನಿರ್ವಹಿಸಿದ್ದಾರೆ.
