ಚಿತಾಗಾರದಲ್ಲಿ ಮೃತದೇಹಕ್ಕೆ ಟೋಕನ್‌ ಗುರುತು..! ಏಕಕಾಲಕ್ಕೆ 20 ಶವಗಳ ದಹನ..

: ತಾವರೆಕೆರೆಯ ಬಯಲು ಚಿತಾಗಾರದಲ್ಲಿ ಮೃತದೇಹಗಳಿಗೆ ಯಾವುದೇ ಹೆಸರು ಅಥವಾ ಗುರುತು ಇಲ್ಲ, ಕೇವಲ ಟೋಕನ್‌ ನಂಬರ್‌ಗಳು. ಒಮ್ಮೆಗೆ ಇಲ್ಲಿ 20 ಶವಗಳಿಗೆ ಕೊಳ್ಳಿ ಇಡಲಾಗುತ್ತದೆ. ನಂತರ ಇದರ ಬೂದಿಯನ್ನು ಟೋಕನ್‌ ನಂಬರ್‌ಗಳನ್ನು ಬರೆದ ಮಣ್ಣಿನ ಮಡಕೆಗಳಲ್ಲಿ ಇಡಲಾಗುತ್ತದೆ. ನಂತರ ಈ ಮಡಕೆಗಳನ್ನು ಮೃತರ ಕುಟುಂಬಸ್ಥರಿಗೆ ಹಸ್ತಾಂತರಿಸಲಾಗುತ್ತದೆ. ಮೃತದೇಹಗಳ ಅಂತ್ಯಕ್ರಿಯೆ ಸರಾಗವಾಗಿ ನಡೆಯಲು ನೋಂದಣಿ ವ್ಯವಸ್ಥೆ ಮಾಡಲಾಗಿದೆ. ಕೋವಿಡ್‌ನಿಂದ ಮೃತಪಟ್ಟ ಕುಟುಂಬದ ಸದಸ್ಯರು ಕೌಂಟರ್‌ನಲ್ಲಿ ಮೊದಲು ನೋಂದಣಿ ಮಾಡಿಕೊಳ್ಳಬೇಕು. ಅವರಿಗೆ ಟೋಕನ್‌ ನಂಬರ್‌ ನೀಡಲಾಗುತ್ತದೆ. ಟೋಕನ್‌ ಆಧಾರದಲ್ಲಿ ಶವಗಳನ್ನು ಹೊತ್ತ ಆಂಬ್ಯುಲೆನ್ಸ್‌ಗಳು ಮತ್ತು ಶ್ರದ್ಧಾಂಜಲಿ ವಾಹನಗಳು ಸಾಲಿನಲ್ಲಿ ನಿಲ್ಲಬೇಕು. ನಂತರ ಟೋಕನ್‌ ಆಧಾರದಲ್ಲಿ ಮೃತದೇಹಗಳ ಅಂತ್ಯಕ್ರಿಯೆ ನೆರವೇರುತ್ತದೆ. 'ಮೃತರ ಕುಟುಂಬಗಳಿಗೆ ಯಾವುದೇ ತೊಂದರೆಯಾಗದ ರೀತಿಯಲ್ಲಿ ಎಲ್ಲ ವ್ಯವಸ್ಥೆಗಳನ್ನು ಕೈಗೊಳ್ಳಲಾಗಿದೆ. ಮೃತರ ಕುಟುಂಬ ಸದಸ್ಯರಿಗೆ ಕುಳಿತುಕೊಳ್ಳಲು ಆಸನದ ವ್ಯವಸ್ಥೆ ಮತ್ತು ಉಚಿತ ಊಟದ ವ್ಯವಸ್ಥೆ ಮಾಡಲಾಗಿದೆ. ಆದರೆ ಅವರು ತಮ್ಮ ಪ್ರೀತಿ ಪಾತ್ರರನ್ನು ಕಳೆದುಕೊಂಡಿದ್ದರಿಂದ ಆಗಿರುವ ನಷ್ಟವನ್ನು ಭರಿಸಲು ಯಾವುದರಿಂದಲೂ ಸಾಧ್ಯವಿಲ್ಲ' ಎಂದು ಸ್ಥಳೀಯ ತಹಸೀಲ್ದಾರ್‌ ಶಿವಪ್ಪ ಹೇಳಿದರು. ಅಂತ್ಯಕ್ರಿಯೆಗಾಗಿ ಪಾಲಿಕೆ ಆನ್‌ಲೈನ್‌ ವ್ಯವಸ್ಥೆ ಜಾರಿಗೊಳಿಸಿದ್ದು, ಮೃತರ ಕುಟುಂಬ ಸದಸ್ಯರು ಆನ್‌ಲೈನ್‌ ಮೂಲಕ ನೋಂದಣಿ ಮಾಡಿಕೊಳ್ಳಬೇಕು ಮತ್ತು ಸ್ಲಾಟ್‌ಗಳ ಆಧಾರದಲ್ಲಿ ಅಂತ್ಯಕ್ರಿಯೆಗೆ ಸಮಯ ನಿಗದಿಪಡಿಸಲಾಗುತ್ತದೆ. 'ಆನ್‌ಲೈನ್‌ ವ್ಯವಸ್ಥೆ ಜಾರಿಯಾದ ನಂತರ ಅಂತ್ಯಕ್ರಿಯೆ ಕಾರ್ಯ ಸರಾಗವಾಗಿ ನಡೆಯುತ್ತಿದೆ. ಆಂಬ್ಯುಲೆನ್ಸ್‌ಗಳಿಗೆ ಸಮಯ ನಿಗದಿಪಡಿಸಿ ನೀಡಲಾಗುತ್ತಿದೆ. ಅಲ್ಲದೇ ಇದರಿಂದ ಮೃತ ಕುಟುಂಬ ಸದಸ್ಯರ ಕಾಯುವಿಕೆ ಅವಧಿ ಕಡಿತಗೊಂಡಿದೆ' ಎಂದು ಪಿಡಿಒ ನಾಗವೇಣಿ ತಿಳಿಸಿದರು. 'ಮೃತರ ರಕ್ತಸಂಬಂಧಿಗಳು ಚಿತೆಗೆ ಬೆಂಕಿ ಇಟ್ಟ ನಂತರ, ನಾವು ಡೀಸೆಲ್‌ ಸುರಿಯತ್ತೇವೆ. ಸಂಪೂರ್ಣ ಬೂದಿಯಾಗಲು ಕನಿಷ್ಠ ಮೂರು ಗಂಟೆಗಳು ಹಿಡಿಯುತ್ತದೆ. ನಂತರ ನಾವು ನೋಂದಣಿ ಸಂಖ್ಯೆ ಮತ್ತು ಅಂತ್ಯಕ್ರಿಯೆ ದಿನಾಂಕ ಬರೆದ ಮಣ್ಣಿನ ಮಡಕೆಯಲ್ಲಿ ಬೂದಿ ಇಡುತ್ತೇವೆ. ನಂತರದ ದಿನಗಳಲ್ಲಿ ಇದನ್ನು ಮೃತರ ಕುಟುಂಬಸ್ಥರು ಬಂದು ಪಡೆಯುತ್ತಾರೆ. ಕೆಲವೊಮ್ಮೆ 8-10 ದಿನಗಳು ಕಳೆದರೂ ಕುಟುಂಬಸ್ಥರು ಬೂದಿ ಪಡೆಯಲು ಬರುವುದಿಲ್ಲ. ಅವರು ಹೋಮ್‌ ಐಸೋಲೇಶನ್‌ನಲ್ಲಿರುವ ಸಾಧ್ಯತೆ ಇರುತ್ತದೆ. ನಾವು ಆ ಮಡಕೆಗಳನ್ನು ಜೋಪಾನವಾಗಿ ರಕ್ಷಿಸಿ, ಅವರು ಬಂದ ನಂತರ ಅದನ್ನು ಹಸ್ತಾಂತರಿಸುತ್ತೇವೆ' ಎಂದು ಸಿಬ್ಬಂದಿ ಸುರೇಶ್‌ ತಿಳಿಸಿದರು. ಒಮ್ಮೆಗೆ 20 ದಹನ: 'ಒಟ್ಟು 41 ಚಿತೆಗಳು ಇದ್ದರೂ, ಶಾಖ ಹೆಚ್ಚಾಗುವ ಕಾರಣ ಒಮ್ಮೆಗೆ 20 ಶವಗಳನ್ನು ಸುಡಲಾಗುತ್ತದೆ. ಟೋಕನ್‌ ಸಂಖ್ಯೆ ಕರೆಯುತ್ತಿದ್ದಂತೆಯೇ ಆಂಬ್ಯುಲೆನ್ಸ್‌ಗಳು ಚಿತೆಯ ಸಮೀಪ ಬರುತ್ತದೆ ಮತ್ತು ಇಲ್ಲಿನ ಸಿಬ್ಬಂದಿ ಅಂತ್ಯಕ್ರಿಯೆಗೆ ಎಲ್ಲಾ ರೀತಿಯ ಸಿದ್ಧತೆ ಮಾಡುತ್ತಾರೆ. ಪ್ರತಿ ದಿನ ಮೂರು ಪಾಳಿಯಲ್ಲಿ ಶವಗಳ ಅಂತ್ಯಕ್ರಿಯೆ ನಡೆಸಲಾಗುತ್ತದೆ. ಕಳೆದ ಬುಧವಾರ 59 ಮೃತದೇಹಗಳ ಅಂತ್ಯಕ್ರಿಯೆ ನಡೆಯಿತು. ಅದೇ ರೀತಿ ಗುರುವಾರ 48, ಶುಕ್ರವಾರ 32 ಮತ್ತು ಶನಿವಾರ 30 ಮೃತದೇಹಗಳ ಅಂತಿಮ ಕಾರ್ಯ ನೆರವೇರಿತು. ಮೇ 7ರಂದು ಈ ಚಿತಾಗಾರದಲ್ಲಿ ಅತ್ಯಂತ ಹೆಚ್ಚಿನ 84 ಮೃತದೇಹಗಳ ಅಂತ್ಯಕ್ರಿಯೆ ನಡೆಯಿತು' ಎಂದು ವಿವರಿಸಿದರು. ಸಾವಿರಕ್ಕೂ ಹೆಚ್ಚು ಚಿತಾಭಸ್ಮ ಬಾಕಿ: ವಾರಸುದಾರರಿಲ್ಲದ ಚಿತಾಭಸ್ಮವನ್ನು ಸರಕಾರದಿಂದಲೇ ಧಾರ್ಮಿಕ ವಿಧಿ ವಿಧಾನಗಳ ಮೂಲಕ ವಿಸರ್ಜಿಸಲು ನಿರ್ಧರಿಸಲಾಗಿದೆ. ಕೆಲ ದಿನ ಚಿತಾಭಸ್ಮವನ್ನು ಸಂರಕ್ಷಿಸಿಕೊಟ್ಟು, ಬಳಿಕ ಸೂಕ್ತ ಕ್ರಮ ಕೈಗೊಳ್ಳಲು ಉದ್ದೇಶಿಸಲಾಗಿದೆ.