ಬೆಂಗಳೂರು: ಸಾಲ ತೀರಿಸಲು ಮಗು ಕದ್ದು ₹15 ಲಕ್ಷಕ್ಕೆ ಮಾರಾಟ ಮಾಡಿದ್ದ ಮನೋವೈದ್ಯೆಯ ಬಂಧನ

ಬೆಂಗಳೂರು: ಮನೋವೈದ್ಯೆ ರಶ್ಮಿ ತನ್ನ ವಿದ್ಯಾಭ್ಯಾಸಕ್ಕೆ ಮಾಡಿದ ಸಾಲ ತೀರಿಸಲು ಹಾಗೂ ಪತಿ ಜತೆ ಐಷಾರಾಮಿ ಜೀವನ ನಡೆಸಲು ಶಿಶು ಅಪಹರಣ ಮಾಡಿದ್ದಳು ಎಂಬುದು ಪೊಲೀಸ್‌ ವಿಚಾರಣೆ ವೇಳೆ ತಿಳಿದು ಬಂದಿದೆ. ರಶ್ಮಿ ಆರ್ಥಿಕವಾಗಿ ಸಂಕಷ್ಟದಲ್ಲಿದ್ದರು. ಆಕೆಯ ಶಿಕ್ಷಣಕ್ಕಾಗಿ ಬ್ಯಾಂಕ್‌ನಿಂದ ಪಡೆದಿದ್ದ 7 ಲಕ್ಷ ರೂ. ಮರು ಪಾವತಿಸಬೇಕಿತ್ತು. ಜತೆಗೆ ಪತಿ ತಮ್ಮ ಸಂಬಂಧಿಕರು ಹಾಗೂ ಸ್ನೇಹಿತರ ಬಳಿ ಮಾಡಿದ್ದ ಮೂರು ಲಕ್ಷ ರೂ. ಸಾಲ ತೀರಿಸಲು ಶಿಶು ಅಪಹರಿಸಿ ಕೊಪ್ಪಳದ ದಂಪತಿಗೆ 15 ಲಕ್ಷ ರೂ.ಗೆ ಮಾರಾಟ ಮಾಡಲಾಗಿತ್ತು ಎಂಬುದನ್ನು ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಬನ್ನೇರುಘಟ್ಟ ರಸ್ತೆಯಲ್ಲಿರುವ ಆಸ್ಪತ್ರೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ರಶ್ಮಿ, 2020ರ ಮೇ 29 ರಂದು ಚಾಮರಾಜಪೇಟೆಯ ಬಿಬಿಎಂಪಿ ಹೆರಿಗೆ ಆಸ್ಪತ್ರೆಯಿಂದ ಶಿಶು ಅಪಹರಣ ಮಾಡಿದ್ದಳು. ಹುಟ್ಟು ಹಬ್ಬದಂದೇ ಮಗು ಪತ್ತೆ: 2020ರ ಮೇ 29 ರಂದು ಮಗು ಕಳವಾಗಿತ್ತು. ಅದೇ ಒಂದು ವರ್ಷಕ್ಕೆ ಸರಿಯಾಗಿ 2021ರ ಮೇ 29 ರಲ್ಲಿ ಮೊದಲನೇ ವರ್ಷದ ಹುಟ್ಟುಹಬ್ಬ ಆಚರಣೆಯ ವೇಳೆ ಮಗುವನ್ನು ಪೊಲೀಸರು ಪತ್ತೆ ಹಚ್ಚಿದ್ದಾರೆ. ಈ ನಡುವೆ, ಪ್ರಕರಣ ದಾಖಲಾದರೂ ಶಿಶುವನ್ನು ಪೊಲೀಸರು ಪತ್ತೆ ಹಚ್ಚಿಲ್ಲವೆಂದು ಆರೋಪಿಸಿ ಪೋಷಕರು ಹೈಕೋರ್ಟ್‌ ಮೆಟ್ಟಿಲೇರಿದ್ದರು. ವಿಚಾರಣೆ ನಡೆಸಿದ ಹೈಕೋರ್ಟ್‌, ಶಿಶುವನ್ನು ತ್ವರಿತವಾಗಿ ಹುಡುಕುವಂತೆ ನಿರ್ದೇಶನ ನೀಡಿತ್ತು. ಹೈಕೋರ್ಟ್‌ನ ಮಧ್ಯ ಪ್ರವೇಶದಿಂದಾಗಿ ತನಿಖೆ ಮತ್ತಷ್ಟು ಚುರುಕುಗೊಳಿಸಿದ್ದ ಪೊಲೀಸರು, ಘಟನಾ ಸ್ಥಳದ ಸಿಸಿ ಕ್ಯಾಮೆರಾ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದರು. ಬಳಿಕ ಪೊಲೀಸರು 35 ಸಾವಿರಕ್ಕೂ ಅಧಿಕ ಮೊಬೈಲ್‌ ನಂಬರ್‌ ಜಾಲಾಡಿ 800 ಮಂದಿಯನ್ನು ವಿಚಾರಣೆಗೊಳಪಡಿಸಿದ ಬಳಿಕ ಆರೋಪಿ ಮನೋವೈದ್ಯೆಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಸುಳಿವು ನೀಡಿದ್ದ ಗೂಗಲ್‌: ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿದ ಪೊಲೀಸರು ವಿಶೇಷ ತಂಡ ರಚಿಸಿ ಸ್ಥಳೀಯ ಸಿಸಿ ಕ್ಯಾಮೆರಾ, ಕರೆಗಳ ಪರಿಶೀಲನೆ ನಡೆಸಿದರೂ ಮಗುವಿನ ಸುಳಿವು ಸಿಕ್ಕಿರಲಿಲ್ಲ. ಟವರ್‌ ಲೊಕೇಷನ್‌ ಮೂಲಕ ಕಳೆದ ಒಂದು ವರ್ಷದಿಂದ ಪೊಲೀಸರು 35 ಸಾವಿರಕ್ಕೂ ಹೆಚ್ಚು ಮೊಬೈಲ್‌ ನಂಬರ್‌ ಟ್ರ್ಯಾಕ್‌ ಮಾಡಿದ್ದರು. ಅನುಮಾನ ಬಂದ ಪ್ರತಿ ನಂಬರ್‌ ಪರಿಶೀಲಿಸಿದಾಗ ಶಿಶು ಅಪಹರಣವಾದ ದಿನ ರಶ್ಮಿ ತನ್ನ ಮೊಬೈಲ್‌ನಲ್ಲಿ ಗೂಗಲ್‌ ಮೂಲಕ ಹಲವು ಹೆರಿಗೆ ಆಸ್ಪತ್ರೆಗಳ ಮಾಹಿತಿ ಜಾಲಾಡಿದ್ದು ಸಿಕ್ಕಿತ್ತು. ಈ ಆಧಾರದ ಮೇಲೆ ಇತ್ತೀಚೆಗೆ ಅವರ ಚಲನವಲನ ಪರಿಶೀಲಿಸಿ ಮೇ.29 ರಂದು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಕೃತ್ಯ ಬೆಳಕಿಗೆ ಬಂದಿದೆ.