ಗೊಂದಲ ಹೆಚ್ಚಿಸಿದ 'ಭಾಗ್ಯಲಕ್ಷ್ಮಿ' ಯೋಜನೆ: ​ವರ್ಷ ಕಳೆದರೂ ಸಿಗದ ಬಾಂಡ್‌, ಪಾಸ್‌ ಬುಕ್‌

ಸಲೀಮ್‌ ಬಳಬಟ್ಟಿ ಗದಗ ರಾಜ್ಯ ಸರಕಾರವು ಭಾಗ್ಯಲಕ್ಷ್ಮೀ ಬಾಂಡ್‌ ಸ್ಕೀಮ್‌ ಅನ್ನು ಅಂಚೆ ಇಲಾಖೆಯ ಸುಕನ್ಯಾ ಸಮೃದ್ಧಿ ಯೋಜನೆಯ ಮೂಲಕ ಜಾರಿಗೊಳಿಸುವ ನಿರ್ಧಾರ ಕೈಗೊಂಡು ವರ್ಷ ಕಳೆಯುತ್ತ ಬಂದಿದೆ. ಆದರೆ ಈವರೆಗೆ ಸುಕನ್ಯಾ ಸಮೃದ್ಧಿ ಯೋಜನೆಯ ಪಾಸ್‌ಬುಕ್‌ ಸಿಕ್ಕಿಲ್ಲ. ಹಿಂದಿನ ವರ್ಷಗಳ ಬಾಂಡ್‌ ವಿತರಣೆಯೂ ಆಗಿಲ್ಲ. ಬಿಪಿಎಲ್‌ ಕುಟುಂಬದಲ್ಲಿ ಜನಿಸುವ ಹೆಣ್ಣು ಮಗುವಿನ ಹೆಸರಿನಲ್ಲಿ ಸರಕಾರವು ಈ ಹಿಂದೆ ಭಾರತೀಯ ಜೀವ ವಿಮಾ ನಿಗಮದಲ್ಲಿ (ಎಲ್‌ಐಸಿ) 19,300 ರೂ. ಠೇವಣಿ ಮಾಡುತ್ತಿತ್ತು. 18 ವರ್ಷ ತುಂಬಿದ ನಂತರ ಆ ಹೆಣ್ಣು ಮಗುವಿಗೆ 1 ಲಕ್ಷ ರೂ. ಸಿಗುತ್ತಿತ್ತು. ಆದರೆ, ಪ್ರೀಮಿಯಂ ವಿಷಯದಲ್ಲಿ ಎಲ್‌ಐಸಿ ಮತ್ತು ಸರಕಾರದ ನಡುವಿನ ಗುದ್ದಾಟದಿಂದ ಭಾಗ್ಯಲಕ್ಷ್ಮಿ ಯೋಜನೆಯನ್ನು ಅಂಚೆ ಇಲಾಖೆಯ ಸುಕನ್ಯಾ ಸಮೃದ್ಧಿಗೆ ವರ್ಗಾಯಿಸಲಾಯಿತು. ಕಳೆದ ವರ್ಷದ ಜುಲೈ ತಿಂಗಳಲ್ಲೆ ಸರಕಾರ ಈ ನಿರ್ಧಾರ ಕೈಗೊಂಡಿದ್ದರೂ ಹೆಣ್ಣು ಮಗುವಿನ ಪಾಲಕರಿಗೆ ಈವರೆಗೆ ಭಾಗ್ಯಲಕ್ಷ್ಮಿಯೂ ಇಲ್ಲ, ಸುಕನ್ಯಾ ಸಮೃದ್ಧಿಯೂ ಇಲ್ಲದಂತಾಗಿದೆ ಎಂದು ಫಲಾನುಭವಿಗಳು ಆರೋಪಿಸಿದ್ದಾರೆ. ಗದಗ ಜಿಲ್ಲೆಯೊಂದರಲ್ಲೆ 3,765 ಫಲಾನುಭವಿಗಳಿಗೆ ಬಾಂಡ್‌ ಸಿಕ್ಕಿಲ್ಲ. ಏಕೆ ವಿಳಂಬ?: 2020ರ ಜುಲೈ ತಿಂಗಳಲ್ಲೆ ಭಾಗ್ಯಲಕ್ಷ್ಮಿ ಯೋಜನೆಯನ್ನು ಸುಕನ್ಯಾ ಸಮೃದ್ಧಿಗೆ ವರ್ಗಾಯಿಸುವ ನಿರ್ಣಯ ಕೈಗೊಳ್ಳಲಾಯಿತು. ಅಕ್ಟೋಬರ್‌ನಲ್ಲಿ ಸಚಿವ ಸಂಪುಟದ ಒಪ್ಪಿಗೆಯೂ ದೊರೆಯಿತು. ಆದರೂ ಈವರೆಗೆ ಸೌಲಭ್ಯ ದೊರೆಯದಿರುವುದು ಅನುಮಾನ ಮೂಡಿಸಿದೆ ಎನ್ನುತ್ತಾರೆ ಪೋಷಕರು. ಗೊಂದಲದ ಗೂಡು 2020ರ ಏಪ್ರಿಲ್‌ 1ರ ನಂತರ ಜನಿಸುವ ಹೆಣ್ಣು ಮಕ್ಕಳನ್ನು ಕಡ್ಡಾಯವಾಗಿ ಸುಕನ್ಯಾ ಸಮೃದ್ಧಿ ಯೋಜನೆಯಲ್ಲಿ ನೋಂದಣಿ ಮಾಡಿಕೊಳ್ಳುವಂತೆ ಸರಕಾರ ಸೂಚಿಸಿದೆ. ಆದರೆ ಈಗಾಗಲೇ ನೋಂದಣಿ ಪೂರ್ಣಗೊಂಡಿರುವ ಹೆಣ್ಣು ಮಕ್ಕಳಿಗೆ ಸುಕನ್ಯಾ ಸಮೃದ್ಧಿ ಪಾಸ್‌ ಬುಕ್‌ ದೊರೆಯದಿರುವುದು ಸರಕಾರದ ಮಹತ್ವಾಕಾಂಕ್ಷಿ ಯೋಜನೆ ಬಗ್ಗೆ ಅನುಮಾನ ಮೂಡುವಂತಾಗಿದೆ. ಈಗಾಗಲೇ ಸುಕನ್ಯಾ ಸಮೃದ್ಧಿ ಖಾತೆ ಹೊಂದಿದ್ದರೆ ಅದೇ ಖಾತೆಗೆ ಸರಕಾರವೂ ಪ್ರತಿ ವರ್ಷ 3 ಸಾವಿರ ರೂ. ಗಳಂತೆ 15 ವರ್ಷ ಪ್ರಿಮಿಯಂ ಪಾವತಿಸುತ್ತದೆ ಎನ್ನಲಾಗುತ್ತಿದೆ. ಆದರೆ ಈ ಬಗ್ಗೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ. ಭಾಗ್ಯಲಕ್ಷ್ಮಿ ಬಾಂಡ್‌ ವಿತರಣೆಯಾಗಿಲ್ಲ ಎಂದ ಮಾತ್ರಕ್ಕೆ ಯೋಜನೆಯಿಂದ ಹೊರಗುಳಿಯುವುದಿಲ್ಲ. ಸರಕಾರ ಬಾಂಡ್‌ ವಿತರಿಸಿದ ತಕ್ಷಣ ಫಲಾನುಭವಿಗಳಿಗೆ ಹಂಚಿಕೆ ಮಾಡಲಾಗುವುದು. ಇನ್ನು ಸುಕನ್ಯಾ ಸಮೃದ್ಧಿ ವ್ಯಾಪ್ತಿಗೆ ತರುವ ಪ್ರಕ್ರಿಯೆ ಸರಕಾರದ ಹಂತದಲ್ಲಿದೆ. - ಎಸ್‌.ಉಸ್ಮಾನ್‌ ಉಪನಿರ್ದೇಶಕರು, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಗದಗ