4ನೇ ತ್ರೈಮಾಸಿಕದಲ್ಲಿ ಎಚ್‌ಡಿಎಫ್‌ಸಿ ಬ್ಯಾಂಕ್‌ಗೆ ಬರೋಬ್ಬರಿ 8,186 ಕೋಟಿ ರೂ. ಲಾಭ
ಎಚ್‌ಡಿಎಫ್‌ಸಿ ಬ್ಯಾಂಕ್‌ ಮಾರ್ಚ್‌ಗೆ ಅಂತ್ಯಗೊಂಡ 4ನೇ ತ್ರೈಮಾಸಿಕದಲ್ಲಿ ಬರೋಬ್ಬರಿ 8,186.5 ಕೋಟಿ ರೂ. ನಿವ್ವಳ ಲಾಭ ಗಳಿಸಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಬ್ಯಾಂಕ್‌ ಲಾಭ ಶೇ. 18.2ರಷ್ಟು ಹೆಚ್ಚಾಗಿದೆ.
Admin
0
6
ಮುಂಬಯಿ: ದೇಶದ ಅತೀ ದೊಡ್ಡ ಖಾಸಗಿ ಎಚ್‌ಡಿಎಫ್‌ಸಿ ಬ್ಯಾಂಕ್‌ ಮಾರ್ಚ್‌ಗೆ ಅಂತ್ಯಗೊಂಡ 4ನೇ ತ್ರೈಮಾಸಿಕದಲ್ಲಿ ಬರೋಬ್ಬರಿ 8,186.5 ಕೋಟಿ ರೂ. ನಿವ್ವಳ ಲಾಭ ಗಳಿಸಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಬ್ಯಾಂಕ್‌ ಲಾಭ ಶೇ. 18.2ರಷ್ಟು ಹೆಚ್ಚಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಬ್ಯಾಂಕ್‌ 6,927.69 ಕೋಟಿ ರೂ. ಲಾಭ ಗಳಿಸಿತ್ತು.
ನಿವ್ವಳ ಬಡ್ಡಿ ಆದಾಯ, ಅಂದರೆ ಸಾಲಕ್ಕೆ ವಸೂಲಿ ಮಾಡಿದ ಬಡ್ಡಿ ಹಾಗೂ ಠೇವಣಿಗಳಿಗೆ ನೀಡಿದ ಬಡ್ಡಿಯ ನಡುವಿನ ವ್ಯತ್ಯಾಸ ಶೇ. 12.6ರಷ್ಟು ಹೆಚ್ಚಾಗಿದ್ದು 17,120.15 ಕೋಟಿ ರೂ.ಗೆ ಹೆಚ್ಚಳವಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಬಡ್ಡಿ ಆದಾಯ 15,204.06 ಕೋಟಿ ರೂ. ಇತ್ತು.
ದೇಶೀಯ ಚಿಲ್ಲರೆ ಸಾಲಗಳ ಪ್ರಮಾಣ ಶೇ. 6.7ರಷ್ಟು ಹೆಚ್ಚಾಗಿದ್ದರೆ, ಸಗಟು ಸಾಲಗಳ ಪ್ರಮಾಣ ಶೇ. 21.7ಕ್ಕೆ ಏರಿಕೆಯಾಗಿದೆ. ಇನ್ನು ಒಟ್ಟು ಠೇವಣಿಗಳ ಮೊತ್ತವೂ 13,35,060 ಕೋಟಿ ರೂ.ಗೆ ಹೆಚ್ಚಳವಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಠೇವಣಿ ಪ್ರಮಾಣವೂ ಶೇ.16.3ರಷ್ಟು ವೃದ್ಧಿಸಿದೆ.
ನಿಬಂಧನೆ ಪೂರ್ವ ಕಾರ್ಯಾಚರಣೆಗಳಿಂದ ಗಳಿಸಿದ ಒಟ್ಟು ಲಾಭ 15,532.77 ಕೋಟಿ ರೂ.ಗಳಾಗಿವೆ. ಕಂಪನಿಯ ಬಡ್ಡಿಯೇತರ ಆದಾಯ 7,593.91 ಕೋಟಿ ರೂ. ತಲುಪಿದ್ದು, ಶೇ. 25.9ರಷ್ಟು ಬೆಳವಣಿಗೆ ಸಾಧಿಸಿದೆ. ತೆರಿಗೆ ಖರ್ಚುಗಳೂ ಶೇ. 18.1ರಷ್ಟು ಹೆಚ್ಚಳವಾಗಿದ್ದು 2,652.56 ಕೋಟಿ ರೂ.ಗೆ ಏರಿಕೆಯಾಗಿದೆ.
