ಗುಜರಾತ್‌ನಲ್ಲಿ ಮದ್ಯ ನಿಷೇಧ ತೆರವಾಗುತ್ತಾ..? ಹೈಕೋರ್ಟ್‌ ತೀರ್ಪಿಗೆ ಕ್ಷಣಗಣನೆ..!

ಅಹಮದಾಬಾದ್ (): ಮಹಾತ್ಮಾ ಗಾಂಧಿ ಅವರ ತವರು ನೆಲ ಗುಜರಾತ್‌ನಲ್ಲಿ ಸರಿಯೇ..? ತಪ್ಪೇ..? ಹೀಗೊಂದು ಚರ್ಚೆ ಇದೀಗ ಮತ್ತೆ ಶುರುವಾಗಿದೆ..! ಏಕೆಂದರೆ, ಮದ್ಯ ನಿಷೇಧದ ಕುರಿತು ದಾಖಲಾಗಿರುವ ಅರ್ಜಿಯ ವಿಚಾರಣೆ ಗುಜರಾತ್‌ ಹೈಕೋರ್ಟ್‌ನಲ್ಲಿ ಮುಕ್ತಾಯಗೊಂಡಿದ್ದು, ತೀರ್ಪಿಗೆ ಕ್ಷಣಗಣನೆ ಆರಂಭವಾಗಿದೆ. ಮದ್ಯ ನಿಷೇಧ ವಿರೋಧಿಸಿ ಸಲ್ಲಿಸಿರುವ ದೂರುದಾರರು ಗುಜರಾತ್ ಕೋರ್ಟ್‌ ಎದುರು ವಿಭಿನ್ನ ವಾದ ಮಂಡಿಸಿದ್ದಾರೆ. ಭಾರತದ ಪ್ರಜೆಗಳಿಗೆ ತಮ್ಮಿಷ್ಟದ ಆಹಾರ ಸೇವಿಸುವ, ಪಾನೀಯ ಕುಡಿಯುವ ಸ್ವಾತಂತ್ರ್ಯವಿದೆ. ಇಲ್ಲವಾದ್ರೆ ಸರ್ಕಾರವು ಪ್ರಜೆಗಳ ಮನೆಗೆ ಹೋಗಿ ನಾಳೆಯಿಂದ ಮಾಂಸಾಹಾರ ಸೇವನೆ ಮಾಡಬಾರದು ಎಂದು ಹೇಳುವ ದಿನ ಬರುವುದಿಲ್ಲವೇ? ಸರ್ಕಾರವನ್ನು ಆಗ ತಡೆಯುವವರು ಯಾರು? ಎಂದು ಪ್ರಶ್ನಿಸಿದ್ದಾರೆ. 2017ರಲ್ಲಿ ಜಾರಿಗೆ ಬಂದಿರುವ ಖಾಸಗಿತನ ಹಕ್ಕಿನ ಅನ್ವಯ ಈ ವಾದ ಮಂಡಿಸಲಾಗಿದೆ. ಹಾಗೆ ನೋಡಿದ್ರೆ ಗುಜರಾತ್‌ನಲ್ಲಿ ಮದ್ಯ ನಿಷೇಧ ಪ್ರಶ್ನಿಸಿ 1950ರಲ್ಲೇ ಅರ್ಜಿ ಸಲ್ಲಿಸಲಾಗಿತ್ತು. ದೇಶಕ್ಕೆ ಸ್ವಾತಂತ್ರ್ಯ ಸಿಕ್ಕ ಬೆನ್ನಲ್ಲೇ ನಿಷೇಧ..! ಗುಜರಾತ್‌ನಲ್ಲಿ ಮದ್ಯ ನಿಷೇಧ ಆದೇಶ ಮಾಡಬೇಕೆಂದು 1949ರಲ್ಲೇ ಕೋರ್ಟ್‌ ಮೊರೆ ಹೋಗಲಾಗಿತ್ತು. ಗಾಂಧಿ ನಾಡಿನಲ್ಲಿ ಮದ್ಯ ನಿಷೇಧಿಸಬೇಕೆಂಬ ಈ ಪ್ರಕರಣ, ಸ್ಟೇಟ್‌ ಆಫ್‌ ಬಾಂಬೆ ವರ್ಸಸ್ ಎಫ್‌. ಎನ್. ಬಲ್ಸರಾ ಕೇಸ್ ಎಂದೇ ಜನಪ್ರಿಯವಾಗಿತ್ತು. ಏಕೆಂದರೆ, ಆಗ ಮಹಾರಾಷ್ಟ್ರ ಹಾಗೂ ಗುಜರಾತ್‌ ಒಂದೇ ರಾಜ್ಯವಾಗಿತ್ತು. 1951ರಲ್ಲಿ ಪ್ರಕರಣದ ಕುರಿತಾಗಿ ಸುಪ್ರೀಂ ಕೋರ್ಟ್‌ ಆದೇಶ ಹೊರಡಿಸಿತ್ತು. ಮದ್ಯ ನಿಷೇಧಕ್ಕೆ ಸಮ್ಮತಿ ಸೂಚಿಸಿತ್ತು. 1960ರಲ್ಲಿ ಭಾಷಾವಾರು ಪ್ರಾಂತ್ಯ ವಿಭಜನೆಯಿಂದಾಗಿ ಅಸ್ಥಿತ್ವಕ್ಕೆ ಬಂದ ಗುಜರಾತ್ ರಾಜ್ಯವು ಈ ಕಾಯ್ದೆಯನ್ನೇ ತನ್ನ ರಾಜ್ಯಕ್ಕೆ ಅನ್ವಯ ಮಾಡಿಕೊಂಡಿತ್ತು. ಕರ್ನಾಟಕದ ಪ್ರಕರಣದ ನೆನಪು..! 1994ರಲ್ಲಿ ಖೋಡೇಸ್ ಡಿಸ್ಟೆಲ್ಲರೀಸ್ ಹಾಗೂ ಕರ್ನಾಟಕ ರಾಜ್ಯ ಸರ್ಕಾರದ ಪ್ರಕರಣವು ಸುಪ್ರೀಂ ಕೋರ್ಟ್‌ನ ಸಾಂವಿಧಾನಿಕ ಪೀಠದ ಎದುರು ವಿಚಾರಣೆಗೆ ಬಂದಿತ್ತು. ಖಾಸಗಿ ಸ್ಥಳಗಳಲ್ಲಿ ಮದ್ಯ ಮಾರಾಟ ನಿಷೇಧ ಪ್ರಶ್ನಿಸಿ ಅರ್ಜಿ ಸಲ್ಲಿಕೆಯಾಗಿತ್ತು. ಸಂವಿಧಾನದ ಆರ್ಟಿಕಲ್ 19 (1) (ಜಿ) ಅಡಿಯಲ್ಲಿ ಎಲ್ಲರಿಗೂ ಮೂಲಭೂತ ಹಕ್ಕು ಇದೆ. ಈ ಹಕ್ಕಿನ ಅಡಿಯಲ್ಲೇ ಮದ್ಯ ಮಾರಾಟವೂ ಬರುತ್ತದೆ ಎಂದು ಅರ್ಜಿದಾರರು ವಾದಿಸಿದ್ದರು. ಈ ಸಂದರ್ಭದಲ್ಲಿ ಸಂವಿಧಾನದ ಆರ್ಟಿಕಲ್ 47 ಪ್ರಸ್ತಾಪಿಸಿದ ಸುಪ್ರೀಂ ಕೋರ್ಟ್‌, ರಾಜ್ಯ ಸರ್ಕಾರಕ್ಕೆ ಇರುವ ಅಧಿಕಾರವನ್ನು ಪ್ರಸ್ತಾಪಿಸಿತ್ತು. ಸಾರ್ವಜನಿಕ ಆರೋಗ್ಯದ ಹಿತ ದೃಷ್ಟಿಯಿಂದ ಮದ್ಯ ನಿ‍ಷೇಧ ಮಾಡುವ ಅಧಿಕಾರ ಸರ್ಕಾರಕ್ಕೆ ಇದೆ ಎಂದು ಅಭಿಪ್ರಾಯಪಟ್ಟಿತ್ತು. ತನ್ನ ರಾಜ್ಯದಲ್ಲಿ ಯಾವ ಪ್ರಮಾಣದಲ್ಲಿ ಮದ್ಯ ಮಾರಾಟಕ್ಕೆ ನಿಷೇಧ ಹೇರಬೇಕು ಎಂದು ತೀರ್ಮಾನಿಸುವ ಅಧಿಕಾರ ರಾಜ್ಯ ಸರ್ಕಾರಕ್ಕೆ ಇದೆ ಎಂದು ಸುಪ್ರೀಂ ಕೋರ್ಟ್ ಹೇಳಿತ್ತು. ಆರೋಗ್ಯಕ್ಕೆ ಹಾನಿಕರವಾದ ಪಾನೀಯಗಳನ್ನು ನಿಷೇಧಿಸುವ ಅಧಿಕಾರ ಸಂವಿಧಾನದ ಆರ್ಟಿಕಲ್ 47ರ ಅಡಿ ರಾಜ್ಯ ಸರ್ಕಾರಕ್ಕೆ ದತ್ತವಾಗಿದೆ ಎಂದು ಸುಪ್ರೀಂ ಕೋರ್ಟ್‌ ಹೇಳಿತ್ತು.