ಗುಜರಾತಿನಲ್ಲಿ ಅಬ್ಬರಿಸಿ ಸಂಜೆ ವೇಳೆ ದುರ್ಬಲಗೊಂಡ ಸೈಕ್ಲೋನ್‌, ತೌಕ್ತೆ ರುದ್ರ ನರ್ತನಕ್ಕೆ ರಾಜ್ಯದಲ್ಲಿ 8 ಬಲಿ

ಅಹಮದಾಬಾದ್‌: ಚಂಡಮಾರುತಕ್ಕೆ ಗುಜರಾತಿನಲ್ಲಿ ಮಂಗಳವಾರ ಕನಿಷ್ಠ ಎಂಟು ಮಂದಿ ಮೃತಪಟ್ಟಿದ್ದಾರೆ. ಮಹಾರಾಷ್ಟ್ರ ಕರಾವಳಿಯಿಂದ ಗಂಟೆಗೆ 180 ಕಿ.ಮೀ ವೇಗದಲ್ಲಿ ಸಾಗಿ ಮಧ್ಯರಾತ್ರಿ ವೇಳೆಗೆ ಸೌರಾಷ್ಟ್ರ ವಲಯದ ದಿಯು ಮತ್ತು ಉನ್ನ ಕರಾವಳಿ ತೀರಕ್ಕೆ ಅಪ್ಪಳಿಸಿದ , ಭಾರಿ ಮಳೆಗಾಳಿಯ ಆರ್ಭಟ ಸೃಷ್ಟಿಸಿತು. ''ಮಹಾ ಮಳೆಯ ರಭಸಕ್ಕೆ 16 ಸಾವಿರ ಮನೆಗಳು ಜಖಂಗೊಂಡಿವೆ. 40 ಸಾವಿರಕ್ಕಿಂತ ಹೆಚ್ಚು ಮರಗಳು ಮುರಿದು ಬಿದ್ದಿವೆ. ಕನಿಷ್ಠ 1000 ವಿದ್ಯುತ್‌ ಕಂಬಗಳು ತುಂಡಾಗಿದ್ದು, ವ್ಯಾಪಕ ನಷ್ಟ ಉಂಟಾಗಿದೆ,'' ಎಂದು ಮುಖ್ಯಮಂತ್ರಿ ವಿಜಯ್‌ ರೂಪಾನಿ ತಿಳಿಸಿದ್ದಾರೆ. ಸೌರಾಷ್ಟ್ರದ ಅಮ್ರೇಲಿ ಬಳಿ ಭೂ ಪ್ರವೇಶ ಮಾಡಿದಾಗ ರೌದ್ರಾವತಾರಿಯಾಗಿದ್ದ ತೌಕ್ತೆ, ಮಂಗಳವಾರ ಸಂಜೆ ವೇಳೆಗೆ ಗುಜರಾತಿನ ಕರಾವಳಿಯಿಂದ ನಿರ್ಗಮಿಸಿದ್ದು ಕ್ರಮೇಣ ದುರ್ಬಲಗೊಂಡಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಚಂಡಮಾರುತದ ಅಪಾಯಕಾರಿ ನಡೆಯನ್ನು ಮೊದಲೇ ಗ್ರಹಿಸಿದ್ದ ಹವಾಮಾನ ಇಲಾಖೆಗೆ ಸೂಕ್ತ ಮುನ್ನಚ್ಚರಿಕೆ ಕ್ರಮಗಳಿಗೆ ಸೂಚನೆ ನೀಡಿತ್ತು. 2 ಲಕ್ಷ ಜನರನ್ನು ಕರಾವಳಿ ತೀರಗಳಿಂದ ಸುರಕ್ಷಿತ ನೆಲೆಗಳಿಗೆ ಸ್ಥಳಾಂತರಿಸಲಾಗಿತ್ತು. ಸೌರಾಷ್ಟ್ರ ಪ್ರದೇಶದ ಏಷ್ಯಾಟಿಕ್‌ ಸಿಂಹಗಳ ಸುರಕ್ಷತೆ ಮೇಲೂ ನಿಗಾ ಇರಿಸಲಾಗಿತ್ತು. ಆದರೂ ಅನೇಕ ಕಡೆಗಳಿಂದ ದುರ್ಘಟನೆಗಳು ವರದಿಯಾಗಿವೆ. ಭಾವ್‌ನಗರ ಜಿಲ್ಲೆಯಲ್ಲಿ ಮೂವರು, ರಾಜ್‌ಕೋಟ್‌, ಪಟಾನ್‌, ಅಮ್ರೇಲಿ ಮತ್ತು ವಲ್ಸದ್‌ನಲ್ಲಿತಲಾ ಒಬ್ಬರು ಚಂಡಮಾರುತ ಸಂಬಂಧಿ ದುರಂತಗಳಲ್ಲಿ ಮಡಿದಿದ್ದಾರೆ. 177 ಮಂದಿ ರಕ್ಷಣೆಮಹಾರಾಷ್ಟ್ರದಲ್ಲಿ ಚಂಡಮಾರುತಕ್ಕೆ ಮಂಗಳವಾರ ಇನ್ನೂ ಐವರು ಬಲಿಯಾಗಿದ್ದಾರೆ. ಇದರೊಂದಿಗೆ ರಾಜ್ಯದಲ್ಲಿಎರಡು ದಿನಗಳಿಂದ ಚಂಡಮಾರುತಕ್ಕೆ ಬಲಿಯಾದವರ ಸಂಖ್ಯೆ 12ಕ್ಕೆ ಏರಿಕೆಯಾಗಿದೆ. ಏತನ್ಮಧ್ಯೆ, ತೌಕ್ತೆ ಅಪ್ಪಳಿಸುವ ಒಂದು ತಾಸು ಮೊದಲು ಅರಬ್ಬಿ ಸಮುದ್ರದ ಬಾರ್ಜ್‌ ಒಂದರಲ್ಲಿ ಸಿಲುಕಿದ್ದ 177 ಮಂದಿಯನ್ನು ನೌಕಾ ಪಡೆ ರಕ್ಷಣೆ ಮಾಡಿದೆ. ಮುಂಬಯಿನಿಂದ 70 ದೂರದಲ್ಲಿರುವ ತೈಲ ಕೊಳವೆ ಬಾವಿಗೆ ತೆರಳಿದ್ದ ಬಾರ್ಜ್‌, ಹಿಂದಿರುಗುವ ಮಾರ್ಗಮಧ್ಯೆ ಅಪಾಯಕ್ಕೆ ಸಿಲುಕಿತ್ತು.