ನಮ್ಮ ಮುಖ್ಯಮಂತ್ರಿ ನಿತೀಶ್‌ಗೆ ಪ್ರಧಾನಿ ಮೋದಿ ಅವಮಾನ ಮಾಡಿದ್ದಾರೆ: ತೇಜಸ್ವಿ ಯಾದವ್
ಬಿಹಾರದಲ್ಲಿ ನಡೆಸಲು ಉದ್ದೇಶಿಸಲಾಗಿರುವ ಜಾತಿ ಜನಗಣತಿಯ ಕುರಿತಾಗಿ ಚರ್ಚಿಸಲು ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ಸಮಯ ಕೋರಿದ್ದರೂ ಅದಕ್ಕೆ ಸ್ಪಂದಿಸದೆ ಪ್ರಧಾನಿ ಮೋದಿ ಅವಮಾನಿಸಿದ್ದಾರೆ ಎಂದು ತೇಜಸ್ವಿ ಯಾದವ್ ಆರೋಪಿಸಿದ್ದಾರೆ.
Admin
0
6
ಪಾಟ್ನಾ: ಜಾತಿ ಆಧಾರಿತ ಗಣತಿಯ ಕುರಿತು ಭೇಟಿ ಮಾಡಲು ಹಾಗೂ ಅಗತ್ಯ ಚರ್ಚೆ ನಡೆಸಲು ಸಮಯ ನೀಡದೆ ಪ್ರಧಾನಿ ಅವರು ಮುಖ್ಯಮಂತ್ರಿ ಅವರನ್ನು ಅವಮಾನಿಸಿದ್ದಾರೆ ಎಂದು ವಿರೋಧಪಕ್ಷದ ನಾಯಕ, ಆರ್‌ಜೆಡಿ ಮುಖಂಡ ಆರೋಪಿಸಿದ್ದಾರೆ.
ರಾಜ್ಯದಲ್ಲಿ ಜಾತಿ ಆಧಾರಿತ ಜನ ಗಣತಿ ನಡೆಸುವ ಸಲುವಾಗಿ ನಿರ್ಣಯ ಕೈಗೊಳ್ಳಲಾಗಿತ್ತು. ಇದರ ಬಗ್ಗೆ ಚರ್ಚಿಸಲು ಪ್ರಧಾನಿ ಭೇಟಿಗಾಗಿ ನಿತೀಶ್ ಕುಮಾರ್ ಪತ್ರ ಬರೆದಿದ್ದರು. ಆಗಸ್ಟ್ 4ರಂದು ಪ್ರಧಾನಿ ಕಚೇರಿಗೆ ಪತ್ರ ತಲುಪಿದ್ದರೂ, ಇದುವರೆಗೂ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ ಎಂದು ನಿತೀಶ್ ಕುಮಾರ್ ಹೇಳಿದ್ದರು.
'ಕೇಂದ್ರ ಮತ್ತು ಬಿಹಾರ ಎರಡೂ ಕಡೆ ಎನ್‌ಡಿಎ ಸರ್ಕಾರಗಳಿವೆ. ಬಿಹಾರ ವಿಧಾನಸಭೆ ವಿರೋಧಪಕ್ಷದ ನಾಯಕರಾದ ನಾವು, ಯಾವುದೇ ಪಕ್ಷಪಾತವಿಲ್ಲದೆ ಗೌರವಾನ್ವಿತ ಮುಖ್ಯಮಂತ್ರಿಯನ್ನು ಅವರ ಕಚೇರಿಯಲ್ಲಿ ಭೇಟಿ ಮಾಡಿದ್ದೆವು. ನೀವು ಪ್ರಧಾನಿ ಭೇಟಿಗೆ ಸಮಯ ಕೇಳಿ. ನಾವೂ ಬರುತ್ತೇವೆ, ಅವರನ್ನು ಭೇಟಿ ಮಾಡೋಣ ಎಂದು ಹೇಳಿದ್ದೆವು.
ಈಗ ವಾರ ಕಳೆದರೂ ಅವರಿಗೆ ಸಮಯ ನೀಡಿಲ್ಲ ಎಂದಾದರೆ, ಅದು ಮುಖ್ಯಮಂತ್ರಿಗೆ ಮಾಡಿದ ಅವಮಾನ' ಎಂದು ತೇಜಸ್ವಿ ಹೇಳಿದ್ದಾರೆ.
'ಪ್ರಧಾನಿಯ ಟ್ವಿಟ್ಟರ್ ಖಾತೆಯನ್ನು ನಾವು ನೋಡಿದಾಗ, ಅವರಿಗೆ ಬೇರೆಯವರನ್ನು ಭೇಟಿ ಮಾಡಲು ಸಾಕಷ್ಟು ಸಮಯ ಇದೆ ಎನಿಸುತ್ತದೆ. ಆದರೆ ಅವರಿಗೆ ಒಂದು ಮಹತ್ವದ ವಿಷಯದ ಕುರಿತು ನಿತೀಶ್ ಕುಮಾರ್ ಮತ್ತು ಬಿಹಾರ ವಿಧಾನಸಭೆಯ ಸಂಪೂರ್ಣ ನಾಯಕರನ್ನು ಒಳಗೊಂಡ ನಿಯೋಗವನ್ನು ಭೇಟಿ ಮಾಡಲು ಸಮಯ ಇಲ್ಲ ಅಂದರೆ ಬೇರೇನೂ ಹೇಳಲು ಆಗೊಲ್ಲ. ಆದರೆ ಅವರು ಈಗಲಾದರೂ ಸಮಯ ಮಾಡಿಕೊಳ್ಳಬೇಕು' ಎಂದಿದ್ದಾರೆ.
