ಕೋವಿಡ್ ಆಘಾತ: ಗ್ರಾಮೀಣ ಭಾಗಗಳಲ್ಲಿ ಕುಟುಂಬಕ್ಕೆ ಕುಟುಂಬಗಳೇ ನಿರ್ನಾಮ

ಹೊಸದಿಲ್ಲಿ: ಸೋಂಕು ಈಗ ದೇಶದ ಹಳ್ಳಿ ಹಳ್ಳಿಗಳಿಗೂ ತಲುಪುತ್ತಿದೆ. ನಗರಗಳಲ್ಲಿ ಕಾಣಿಸುತ್ತಿದ್ದ ಸ್ಥಿತಿ ಈಗ ಭಾಗದಲ್ಲಿಯೂ ಎದುರಾಗಿದೆ. ಆದರೆ ಆಸ್ಪತ್ರೆ ಹಾಗೂ ಮೂಲಸೌಕರ್ಯಗಳ ಕೊರತೆ ಇರುವ ಹಳ್ಳಿಗಳಲ್ಲಿನ ಸ್ಥಿತಿ ಬಿಗಡಾಯಿಸುತ್ತಿದೆ. ದೇಶದ ರಾಜಧಾನಿ ದೆಹಲಿಯಿಂದ 1.5 ಗಂಟೆ ಪ್ರಯಾಣದಷ್ಟು ದೂರವಿರುವ, ಉತ್ತರ ಪ್ರದೇಶದ ಬಾಸಿ ಎಂಬ ಗ್ರಾಮದಲ್ಲಿ ಬಹುಪಾಲು ಜನರು ಕೋವಿಡ್ ಸೋಂಕಿಗೆ ಒಳಗಾಗಿದ್ದಾರೆ. ಈ ಗ್ರಾಮದಲ್ಲಿ 5,400 ಜನರಿದ್ದು, ಅವರಲ್ಲಿ ಮೂರನೇ ಒಂದು ಭಾಗದಷ್ಟು ಮಂದಿ ಕೋವಿಡ್‌ಗೆ ತುತ್ತಾಗಿದ್ದಾರೆ. ಕಳೆದ ಮೂರು ವಾರಗಳಲ್ಲಿ 30 ಮಂದಿ ಜೀವ ಕಳೆದುಕೊಂಡಿದ್ದಾರೆ. ಬಾಸಿ ಗ್ರಾಮದಲ್ಲಿ ಯಾವುದೇ ಕೇಂದ್ರ ಸೌಲಭ್ಯಗಳಿಲ್ಲ. ವೈದ್ಯರು ಮತ್ತು ಆಕ್ಸಿಜನ್ ಸೌಲಭ್ಯಗಳಂತೂ ದೂರದ ಮಾತು. ಭಾರತದ ಕೆಲವು ಗ್ರಾಮಗಳಲ್ಲಿ ದೂರಸಂಪರ್ಕ ಸೌಲಭ್ಯಗಳಿದ್ದು, ಜನರು ಸಾಮಾಜಿಕ ಜಾಲತಾಣಗಳಲ್ಲಿ ಸಂವಹನ ನಡೆಸುವ ಬೆಳವಣಿಗೆಯಾಗಿವೆ. ಆದರೆ ಈ ಗ್ರಾಮದಲ್ಲಿ ಸಾಮಾಜಿಕ ಜಾಲತಾಣದ ಪರಿಚಯ ಇರುವವರೂ ಇಲ್ಲ! ಹೀಗಾಗಿ ಸಹಾಯಕ್ಕೆ ಯಾರನ್ನು ಕೋರುವುದೆಂದು ಅವರಿಗೆ ತಿಳಿಯದೆ ದಿಕ್ಕೆಟ್ಟಿದ್ದಾರೆ. 'ಗ್ರಾಮದ ಹೆಚ್ಚಿನ ಸಾವುಗಳು ಆಕ್ಸಿಜನ್ ಕೊರತೆಯಿಂದ ಸಂಭವಿಸಿವೆ' ಎನ್ನುತ್ತಾರೆ ಅಲ್ಲಿನ ರೈತ ಮುಖಂಡ ಸಂಜೀವ್ ಕುಮಾರ್. 'ಅನಾರೋಗ್ಯಕ್ಕೆ ತುತ್ತಾದವರು ಜಿಲ್ಲಾ ಕೇಂದ್ರಕ್ಕೆ ತೆರಳುತ್ತಿದ್ದಾರೆ. ಇನ್ನೂ ತೀವ್ರ ಅನಾರೋಗ್ಯಕ್ಕೆ ಒಳಗಾದವರು ಮತ್ತಷ್ಟು ಗಂಟೆಗಳ ಕಾಲ ಪ್ರಯಾಣಿಸಬೇಕಾದ ಸ್ಥಿತಿ ಇದೆ' ಎಂದು ಅವರು ವಿವರಿಸಿದ್ದಾರೆ. ಈ ಸ್ಥಿತಿ ಬಾಸಿ ಎಂಬ ಗ್ರಾಮದ್ದು ಮಾತ್ರವಲ್ಲ. ದೇಶದೆಲ್ಲೆಡೆ ಗ್ರಾಮಗಳಲ್ಲಿ ಇದೇ ಸ್ಥಿತಿ ಇದೆ. ಕೆಲವೆಡೆ ಇಡೀ ಕುಟುಂಬಕ್ಕೆ ಕುಟುಂಬಗಳೇ ಕೋವಿಡ್‌ಗೆ ಬಲಿಯಾಗಿವೆ. ಕೃಷಿ ಭೂಮಿಗಳು ಕೆಲಸಗಾರರಿಲ್ಲದ ಕಾರಣ ಕೃಷಿ ಕಾಣದೆ ಹಾಳು ಬೀಳುತ್ತಿವೆ. ಸರ್ಕಾರ ನೀಡುವ ಅಧಿಕೃತ ಅಂಕಿ ಅಂಶಗಳಿಗಿಂತಲೂ ಬಿಕ್ಕಟ್ಟಿನ ಪ್ರಮಾಣ ಅಧಿಕವಾಗಿದೆ. ಗ್ರಾಮಗಳಲ್ಲಿ ಜ್ವರವಿದ್ದರೂ ಜನರು ಮನೆಯಿಂದ ಹೊರಬರಲು ಹೆದರುತ್ತಿದ್ದಾರೆ. ಸ್ಥಳೀಯ ಅಧಿಕಾರಿಗಳು ಕೋವಿಡ್ ಸಾವುಗಳು ಮತ್ತು ಪ್ರಕರಣಗಳನ್ನು ಸಮರ್ಪಕವಾಗಿ ದಾಖಲಿಸಲು ವಿಫಲರಾಗುತ್ತಿದ್ದಾರೆ ಎಂದು 'ಬ್ಲೂಮ್‌ಬರ್ಗ್' ವರದಿ ಮಾಡಿದೆ. ಕರ್ನಾಟಕದಲ್ಲಿಯೂ ಇದೇ ಸ್ಥಿತಿ ಇದೆ. ಕೋಳಿಕೊಪ್ಪ ಎಂಬ ಗ್ರಾಮದಲ್ಲಿ 75 ಜನರಿಗೆ ಕೋವಿಡ್ ಬಂದಿರುವುದು ದೃಢಪಟ್ಟಿತ್ತು. ಇಡೀ ಗ್ರಾಮವನ್ನು ಸೀಲ್‌ಡೌನ್ ಮಾಡಲಾಗಿತ್ತು. ಬಾಸಿ ಗ್ರಾಮದಲ್ಲಿ ಇತ್ತೀಚೆಗೆ ಗ್ರಾಮದ ಮುಖ್ಯಸ್ಥರ ಆಯ್ಕೆಗಾಗಿ ಚುನಾವಣೆ ನಡೆದಿತ್ತು. ಇದರಲ್ಲಿ ಕೆಲಸ ಮಾಡಿದ್ದ ಅನೇಕರಿಗೆ ಕೋವಿಡ್ ತಗುಲಿದೆ. ಸೋಂಕು ತಗುಲಿದ್ದ 59 ವರ್ಷದ ಕುಮಾರ್‌ಸೈನ್ ನೈನ್ ಅವರಿಗೆ ಉಸಿರಾಟದ ಸಮಸ್ಯೆ ಉಂಟಾಗಿತ್ತು. ಸೂಕ್ತ ಸಮಯದಲ್ಲಿ ಆಕ್ಸಿಜನ್ ಹಾಗೂ ಆಂಬುಲೆನ್ಸ್ ಸಿಗದೆ, ಸಮೀಪದ ಆಸ್ಪತ್ರೆಗೆ ಕರೆದೊಯ್ದರು. 'ನಾವು ಆಸ್ಪತ್ರೆ ತಲುಪಿದಾಗ, ಅವರು ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದರು. ಆದರೆ ಅದನ್ನು ಕೋವಿಡ್ ಸಾವು ಎಂದು ನಮೂದಿಸುವ ಬದಲು ಹೃದಯಾಘಾತದಿಂದ ಸಾವು ಎಂಬುದಾಗಿ ವರದಿಯಲ್ಲಿ ನಮೂದಿಸಿದರು. ನನ್ನ ತಂದೆ ಆಗಲೇ ಮೃತಪಟ್ಟಿರುವುದರಿಂದ ಅವರು ಕೋವಿಡ್ ಪಾಸಿಟಿವ್ ಆಗಿದ್ದರೇ ಎಂಬುದನ್ನು ಪರೀಕ್ಷಿಸುವ ಅಗತ್ಯವಿಲ್ಲ ಎಂದು ವೈದ್ಯರು ಹೇಳಿದರು' ಎಂಬುದಾಗಿ ನೈನ್ ಅವರ ಮಗ ಪ್ರವೀಣ್ ಕುಮಾರ್ ತಿಳಿಸಿದರು. ತಂದೆ ಮೃತಪಟ್ಟ 30 ನಿಮಿಷದಲ್ಲಿ ಮತ್ತೊಂದು ಕ್ಲಿನಿಕ್‌ನಲ್ಲಿ ಪ್ರವೀಣ್ ಕುಮಾರ್ ಅವರ ಅಣ್ಣ ಕೂಡ ಕೊನೆಯುಸಿರೆಳೆದರು. ಅವರ ಜತೆ ಆಕ್ಸಿಜನ್ ಸಂಪರ್ಕ ಕಲ್ಪಿಸಿದ್ದ ಇನ್ನೂ ಆರು ಮಂದಿ ಜೀವ ಕಳೆದುಕೊಂಡರು. ಸೋಂಕು ಹೆಚ್ಚುತ್ತಿರುವ ಹಾಗೂ ವೈರಸ್ ವ್ಯಾಪಕವಾಗಿ ಹರಡುತ್ತಿರುವುದು ಸರ್ಕಾರಕ್ಕೆ ತಿಳಿದಿದ್ದರೂ ಚುನಾವಣೆ ನಡೆಸಿರುವುದು ಅಪರಾಧ ಕೃತ್ಯವೇ ಸರಿ ಎಂದು ಪ್ರವೀಣ್ ಕುಮಾರ್ ಆಕ್ರೋಶ ವ್ಯಕ್ತಪಡಿಸಿದರು.