ಕೋವಿನ್‌ ಡಾಟಾ ಎಂಟ್ರಿ ದೋಷ ತಡೆಗೆ 4 ಅಂಕಿಗಳ ಸುರಕ್ಷತಾ ಕೋಡ್‌!

ಹೊಸದಿಲ್ಲಿ: ಕೊರೊನಾ ನಿರೋಧಕ ಲಸಿಕೆ ಪಡೆಯಲು ಸಾರ್ವಜನಿಕರು ಕೋವಿನ್‌ನಲ್ಲಿ ಸ್ಲಾಟ್‌ ಬುಕ್‌ ಮಾಡಿದ ಬಳಿಕ ಲಸಿಕೆ ಪಡೆಯಲು ತೆರಳದಿದ್ದರೂ, ಅವರ ಹೆಸರಿನಲ್ಲಿ ಲಸಿಕೆ ನೀಡಲಾಗಿದೆ ಎಂಬ ಸಂದೇಶ ಹಲವರಿಗೆ ಬರುತ್ತಿದೆ. ಕೋವಿನ್‌ನಲ್ಲಿನ ಈ ದೋಷವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದು, ಅರ್ಹ ಮತ್ತು ಅಗತ್ಯ ಜನರಿಗೆ ಲಸಿಕೆ ಸಿಗುತ್ತಿಲ್ಲ ಎಂಬ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ನಾಲ್ಕು ಅಂಕಿಗಳ ಸುರಕ್ಷತಾ ಕೋಡ್‌ (ಒಟಿಪಿ) ಬಳಸಲು ಕೇಂದ್ರ ಸರಕಾರ ಮುಂದಾಗಿದೆ. ಈ ಬಗ್ಗೆ ಪ್ರಕಟಣೆ ಹೊರಡಿಸಿರುವ ಕೇಂದ್ರ ಆರೋಗ್ಯ ಸಚಿವಾಲಯವು, ಹೊಸ ಪರಿಶೀಲನಾ ವ್ಯವಸ್ಥೆ ಶನಿವಾರದಿಂದ ಜಾರಿಗೆ ಬರಲಿದೆ. ಇದರ ಅಡಿಯಲ್ಲಿಅರ್ಹ ಸಾರ್ವಜನಿಕರು ಲಸಿಕೆ ಕೇಂದ್ರ/ಆಸ್ಪತ್ರೆಗಳಲ್ಲಿ ಕೊರೊನಾ ನಿರೋಧಕ ಲಸಿಕೆ ಪಡೆದ ಬಳಿಕ ನರ್ಸ್‌ ಅಥವಾ ಸಿಬ್ಬಂದಿಗೆ ಮುಂಚಿತವಾಗಿಯೇ ಮೊಬೈಲ್‌ ಬಂದಿರುವ 4 ಅಂಕಿಯ ಕೋಡ್‌ ತಿಳಿಸುವುದು ಕಡ್ಡಾಯವಾಗಿದೆ. ಈ ಕೋಡ್‌ ಇದ್ದವರಿಗೆ ಮಾತ್ರ ಲಸಿಕೆ ನೀಡಿದ್ದೇವೆ ಎಂದು ಲಸಿಕಾ ಕೇಂದ್ರಗಳು ವೆಬ್‌ಸೈಟ್‌ನಲ್ಲಿ ಖಾತ್ರಿಪಡಿಸಬೇಕಿದೆ. ಲಸಿಕೆ ಪಡೆದಾತ ನೀಡುವ ಕೋಡ್‌ಅನ್ನು ಕೋವಿನ್‌ನಲ್ಲಿ ನಮೂದಿಸುವ ಮೂಲಕ ಇದು ಸಾಧ್ಯವಾಗಲಿದೆ ಎಂದು ತಿಳಿಸಿದೆ. ಈ ಮುನ್ನ ಸ್ಲಾಟ್‌ ಬುಕ್‌ ಮಾಡಿದ ಅರ್ಹ ಸಾರ್ವಜನಿಕರು ಲಸಿಕೆ ಪಡೆಯಲು ಬರದಿದ್ದರೂ , ಅವರ ಮೊಬೈಲ್‌ ಸಂಖ್ಯೆ ಬಳಸಿಕೊಂಡು ಇತರರು ಲಸಿಕೆ ಪಡೆಯುತ್ತಿದ್ದರು. ಈ ದೋಷವನ್ನು ಸರಿಪಡಿಸಲು ಕೋಡ್‌ ಸಹಕಾರಿ ಆಗಿದೆ ಎಂದು ಸಚಿವಾಲಯ ಹೇಳಿದೆ. ಫೋನ್‌ ಒಯ್ಯಿರಿ ನೋಂದಾಯಿತ ಮೊಬೈಲ್‌ ಸಂಖ್ಯೆಯುಳ್ಳ ಫೋನ್‌ಗಳನ್ನು ಕೂಡ ಲಸಿಕೆ ಪಡೆಯುವವರು ಲಸಿಕೆ ನೀಡುವಿಕೆ ಕೇಂದ್ರ/ಆಸ್ಪತ್ರೆಗಳಿಗೆ ಒಯ್ಯುವುದು ಕಡ್ಡಾಯವಾಗಿದೆ. ಅದರಲ್ಲಿಮುಂಚಿತವಾಗಿ ಸ್ವೀಕೃತವಾಗಿರುವ ಕೋಡ್‌ ಇರುವ ಎಸ್‌ಎಂಎಸ್‌ ಅನ್ನು ಲಸಿಕೆ ಪಡೆದ ಬಳಿಕ ನರ್ಸ್‌ಗೆ ತೋರಿಸಬೇಕಿದೆ. ಬಳಿಕ ಲಸಿಕೆ ಪಡೆದಿರುವ ಖಾತ್ರಿ ಬಗ್ಗೆಯೂ ಸೂಕ್ತ ವ್ಯಕ್ತಿಗೆ ಕೋವಿನ್‌ ವೆಬ್‌ಸೈಟ್‌ನಿಂದ ಮತ್ತೊಂದು ಎಸ್‌ಎಂಎಸ್‌ ಬರಲಿದೆ. ಈ ಮೂಲಕ ಲಸಿಕೆ ಪಡೆಯುವ ಪದ್ಧತಿ ಪೂರ್ಣಗೊಳ್ಳಲಿದೆ. ಒಂದು ವೇಳೆ ಖಾತ್ರಿ ಎಸ್‌ಎಂಎಸ್‌ ಬಂದಿಲ್ಲವಾದರೇ ಕೂಡಲೇ ಲಸಿಕೆ ಪಡೆದವರು ನರ್ಸ್‌ಗಳು/ಲಸಿಕೆ ಕೇಂದ್ರ ಉಸ್ತುವಾರಿ ಗಮನಕ್ಕೆ ತರಬೇಕು ಎಂದು ಸಚಿವಾಲಯ ಸೂಚಿಸಿದೆ. ಡೋಸ್‌ ಅಂತರ ಹೆಚ್ಚಳ?ಕೊರೊನಾ ನಿರೋಧಕ ಲಸಿಕೆಯ ಎರಡು ಡೋಸ್‌ಗಳ ನಡುವಿನ ಅವಧಿ ಹೆಚ್ಚಿದ್ದಷ್ಟು ಲಸಿಕೆ ಪರಿಣಾಮ ಅಧಿಕವಾಗಿರಲಿದೆ ಎಂದು ಅಂತಾರಾಷ್ಟ್ರೀಯ ಅಧ್ಯಯನಗಳು ವರದಿ ನೀಡುತ್ತಿರುವ ಹಿನ್ನೆಲೆಯಲ್ಲಿ, ಎರಡು ಡೋಸ್‌ಗಳ ನಡುವಿನ ಅಂತರ ಹೆಚ್ಚಿಸಲು ಸರಕಾರದ ತಜ್ಞರ ಸಮಿತಿ ಗಂಭೀರ ಚಿಂತನೆ ನಡೆಸಿದೆ. ಪ್ರಮುಖವಾಗಿ ದೇಶಾದ್ಯಂತ ಹೆಚ್ಚಿನ ಪ್ರಮಾಣದಲ್ಲಿ ನೀಡಲಾಗುತ್ತಿರುವ ಪುಣೆಯ ಎಸ್‌ಐಐ ಉತ್ಪಾದಿತ 'ಕೋವಿಶೀಲ್ಡ್‌' ಲಸಿಕೆಯ ಎರಡು ಡೋಸ್‌ಗಳ ನಡುವಿನ ಅವಧಿಯನ್ನು ಹೆಚ್ಚಿಸಲು ಆಲೋಚನೆ ನಡೆದಿದೆ. ಸದ್ಯ 6 ವಾರಗಳ ಅಂತರವನ್ನು ಎರಡು ಡೋಸ್‌ಗಳ ನಡುವೆ ಸರಕಾರ ಘೋಷಿಸಿದೆ. ಇದನ್ನು 10-12 ವಾರಗಳ ಅವಧಿಗೆ ಹೆಚ್ಚಿಸಿ ಸರಕಾರ ಮುಂದಿನ ವಾರ ಘೋಷಣೆ ಮಾಡುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ. ಕಳೆದ ಮಾರ್ಚ್‌ನಲ್ಲಿ ಲ್ಯಾನ್ಸೆಟ್‌ ವೈದ್ಯಕೀಯ ಜರ್ನಲ್‌ನಲ್ಲಿ ಪ್ರಕಟವಾದ ಅಧ್ಯಯನವೊಂದರಲ್ಲಿ ಕೋವಿಶೀಲ್ಡ್‌ ಲಸಿಕೆಯ ಎರಡು ಡೋಸ್‌ಗಳ ನಡುವೆ 12 ವಾರಗಳ ಅಂತರ ಕಾಯ್ದುಕೊಂಡಲ್ಲಿ ಅದರ ಪರಿಣಾಮಕಾರಿ ಸಾಮರ್ಥ್ಯ ಶೇ.81.3ರಷ್ಟು ಇರಲಿದೆ ಎನ್ನಲಾಗಿತ್ತು. ಅದೇ ಆರು ವಾರಗಳ ಅಂತರದಲ್ಲಿ ಲಸಿಕೆ ಕೇವಲ ಶೇ.55.1ರಷ್ಟು ಪರಿಣಾಮಕಾರಿ ಎನ್ನಲಾಗಿತ್ತು. ಅದೇ ರೀತಿ ಬ್ರಿಟನ್‌, ಬ್ರೆಜಿಲ್‌ನಲ್ಲಿ ನಡೆದ ಪ್ರಯೋಗದಲ್ಲಿಮೊದಲು ಅರ್ಧ ಡೋಸ್‌ ಲಸಿಕೆ ನೀಡಿ, ಬಳಿಕ 30 ದಿನಗಳ ಅಂತರ ಕಾಯ್ದುಕೊಂಡು ಒಂದು ಪೂರ್ಣ ಡೋಸ್‌ ಪಡೆದವರಲ್ಲಿ ಶೇ.90 ಪರಿಣಾಮಕಾರಿಯಾಗಿ ವೈರಾಣು ವಿರುದ್ಧ ಲಸಿಕೆ ಹೋರಾಡಿರುವುದು ವರದಿಯಾಗಿದೆ. ಒತ್ತಡ ಕಡಿಮೆಲಸಿಕೆಯ ಎರಡು ಡೋಸ್‌ಗಳ ನಡುವೆ ಅವಧಿ ಹೆಚ್ಚಿಸುವುದರಿಂದ ಲಸಿಕೆ ಉತ್ಪಾದಕರ ಮೇಲೆ ಸದ್ಯ ಇರುವ ಒತ್ತಡವೂ ಇಳಿಕೆಯಾಗಲಿದೆ. ಲಸಿಕಾ ಕೇಂದ್ರಗಳಲ್ಲಿ ನೂಕುನುಗ್ಗಲು, ಆನ್‌ಲೈನ್‌ ಬುಕ್ಕಿಂಗ್‌ ದೌಡಾಯಿಸುವುದು ಕೂಡ ಕಡಿಮೆಯಾಗಲಿದೆ ಎಂದು ತಜ್ಞರು ಲೆಕ್ಕಾಚಾರ ಹಾಕಿದ್ದಾರೆ. ಅಗತ್ಯ ಪ್ರಮಾಣದ ಲಸಿಕೆಗಳ ಕೊರತೆ ಎಂಬ ಆರೋಪವು ದೂರವಾಗಲಿದೆ ಎಂದು ಚಿಂತಿಸಲಾಗಿದೆ. ಮತ್ತೊಂದೆಡೆ, ಅವಧಿ ಹೆಚ್ಚಳದಿಂದಾಗಿ ಮೊದಲ ಡೋಸ್‌ಗಳನ್ನು ಹೆಚ್ಚು ಜನರಿಗೆ ದೇಶದಲ್ಲಿ ನೀಡಲು ಸಾಧ್ಯವಾಗಲಿದೆ. ಸದ್ಯ 18-45 ವರ್ಷದವರಿಗೆ ಸಿಗದಂತಾಗಿರುವ ಲಸಿಕೆಗಳು ಮುಂದೆ ಲಭ್ಯವಾಗಲಿವೆ. ಆ ಮೂಲಕ ಲಸಿಕೆ ಪಡೆದವರ ಸಂಖ್ಯೆ ಮುಂದಿನ ತಿಂಗಳ ವೇಳೆಗೆ ಭಾರಿ ಹೆಚ್ಚಳವಾಗಿ ರೋಗ ನಿರೋಧಕತೆ ಅಭಿವೃದ್ಧಿಗೆ ಸಹಕಾರಿಯಾಗಲಿದೆ ಎಂದು ತಜ್ಞರು ಅಂದಾಜಿಸಿದ್ದಾರೆ. ಕೊರಿಯಾದ ರೋಗ ನಿಯಂತ್ರಣ ಏಜೆನ್ಸಿ (ಕೆಡಿಸಿಎ) ಕೂಡ ಡೋಸ್‌ಗಳ ನಡುವಿನ ಅಂತರ ಹೆಚ್ಚಿಸಿ ಲಸಿಕೆ ಅಧಿಕ ಪರಿಣಾಮಕಾರಿ ಆಗುವುದನ್ನು ಅಧ್ಯಯನ ಮಾಡಿದೆ.