ಕೋವಿಡ್ ಪ್ರಕರಣಗಳ ಏರಿಕೆ: ಪ್ರೀಮಿಯಂ ರೈಲುಗಳ ಸಂಚಾರ ರದ್ದು
ಉತ್ತರ ರೈಲ್ವೆಯು ಶತಾಬ್ದಿ, ರಾಜಧಾನಿ ಮತ್ತು ದುರೊಂತೊ ಎಕ್ಸ್‌ಪ್ರೆಸ್ ರೈಲುಗಳ ಸಂಚಾರವನ್ನು ಮುಂದಿನ ಆದೇಶದವರೆಗೂ ರದ್ದುಗೊಳಿಸಿದೆ. ಒಟ್ಟು 28 ರೈಲುಗಳ ಓಡಾಟವನ್ನು ಅದು ಸ್ಥಗಿತಗೊಳಿಸಿದೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ರೈಲುಗಳ ಓಡಾಟ ಸ್ಥಗಿತಗೊಳ್ಳುವ ಸಾಧ್ಯತೆ ಇದೆ.
Admin
0
5
ಹೊಸದಿಲ್ಲಿ: ಕೆಲವು ಎಕ್ಸ್‌ಪ್ರೆಸ್ ರೈಲುಗಳ ಸಂಚಾರವನ್ನು ಉತ್ತರ ರೈಲ್ವೇಸ್ ಸ್ಥಗಿತಗೊಳಿಸಿದೆ. ಕೋವಿಡ್ ಪ್ರಕರಣಗಳಲ್ಲಿ ಹೆಚ್ಚಳವಾಗುತ್ತಿರುವ ಹಿನ್ನೆಲೆಯಲ್ಲಿ ಮತ್ತು ರಾಜಧಾನಿ, ಶತಾಬ್ದಿ ಮತ್ತು ದುರೊಂತೊ ಎಕ್ಸ್‌ಪ್ರೆಸ್ ರೈಲುಗಳಲ್ಲಿ ಜನರ ಓಡಾಟ ಕಡಿಮೆಯಾಗಿರುವುದರಿಂದ ಈ ಕ್ರಮ ತೆಗೆದುಕೊಳ್ಳಲಾಗಿದೆ.
ಎಂಟು ಶತಾಬ್ದಿ ಎಕ್ಸ್‌ಪ್ರೆಸ್ ರೈಲುಗಳು, ಎರಡು ರಾಜಧಾನಿ ಎಕ್ಸ್‌ಪ್ರೆಸ್, ಎರಡು ದುರೊಂತೊ ಎಕ್ಸ್‌ಪ್ರೆಸ್ ಮತ್ತು ಒಂದು ವಂದೇ ಭಾರತ್ ಎಕ್ಸ್‌ಪ್ರೆಸ್ ಸೇರಿದಂತೆ ಒಟ್ಟು 28 ರೈಲುಗಳನ್ನು ಉತ್ತರ ರೈಲ್ವೇಸ್‌ನ ಮುಂದಿನ ಸೂಚನೆಯವರೆಗೂ ರದ್ದುಗೊಳಿಸಲಾಗಿದೆ.
ದೆಹಲಿಯಿಂದ ಕಲ್ಕಾ, ಹಬೀಬ್‌ಗಂಜ್, ಅಮೃತಸರ, ಚಂಡೀಗಡಗಳಿಗೆ ತೆರಳವು ಶತಾಬ್ದಿ, ದೆಹಲಿಯಿಂದ ಚೆನ್ನೈ, ಬಿಲಾಸ್ಪುರಕ್ಕೆ ತೆರಳವು ರಾಜಧಾನಿ ರೈಲುಗಳು ಹಾಗೂ ಜಮ್ಮು ತಾವಿ ಮತ್ತು ಪುಣೆಗೆ ತೆರಳುವ ದುರೊಂತೊ ರೈಲುಗಳು ರದ್ದುಗೊಂಡಿವೆ.
ಕೊರೊನಾ ವೈರಸ್ ಪ್ರಕರಣಗಳಲ್ಲಿನ ಏರಿಕೆಯ ನಡುವೆ ಜನರು ಕಡಿಮೆ ಸಂಖ್ಯೆಯಲ್ಲಿ ಓಡಾಡುತ್ತಿರುವುದರಿಂದ ಬಹು ಜನಪ್ರಿಯ ರೈಲುಗಳ ನಿರ್ವಹಣೆಯ ಕೊರತೆ ಉಂಟಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕೇಂದ್ರ ರೈಲ್ವೆಯು 23 ಪ್ರಯಾಣಿಕ ರೈಲುಗಳನ್ನು ರದ್ದುಗೊಳಿಸಿದೆ. ಜೂನ್ 29ರವರೆಗೂ ನಾಗಪುರ-ಕೊಲ್ಹಾಪುರ ವಿಶೇಷ ರೈಲು, ಜುಲೈ 1ರವರೆಗೂ ಸಿಎಸ್‌ಎಂಟಿ-ಕೊಲ್ಹಾಪುರ ವಿಶೇಷ ಮತ್ತು ಜೂನ್ 30ರವರೆಗೂ ಸಿಎಸ್‌ಎಂಟಿ-ಪುಣೆ ವಿಶೇಷ ರೈಲುಗಳನ್ನು ಸ್ಥಗಿತಗೊಳಿಸಲಾಗಿದೆ.
