ಕೊರೊನಾ ಹಿನ್ನೆಲೆ, ಮೇ 11 ರವರೆಗೆ ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆ ಸ್ಥಗಿತ
ಕೋವಿಡ್‌ ಹಿನ್ನೆಲೆಯಲ್ಲಿ ಮೊದಲು ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆಗೆ ಮೇ 4 ರವರೆಗೆ ರಜೆ ಘೋಷಿಸಲಾಗಿತ್ತು. ಆದರೆ ಸೋಂಕು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ, ಸರಕಾರದ ನಿರ್ದೇಶನದಂತೆ ಮೇ 11 ರವರೆಗೆ ರಜೆ ವಿಸ್ತರಿಸಲಾಗಿದೆ.
Admin
0
14
(ಹಾವೇರಿ): ಕೋವಿಡ್‌ ಎರಡನೇ ಅಲೆ ಹಿನ್ನೆಲೆಯಲ್ಲಿ ಇಲ್ಲಿನ ಮಾರುಕಟ್ಟೆಗೆ ಮೇ 11 ರವರೆಗೆ ರಜೆ ಘೋಷಿಸಿದ್ದು, ಯಾವುದೇ ವ್ಯಾಪಾರ ವಹಿವಾಟು ನಡೆಯುವುದಿಲ್ಲ. ಕಾರಣ ರೈತರು ಮಾರಾಟಕ್ಕೆ ಮೆಣಸಿನಕಾಯಿ ತರದಂತೆ ಕಾರ್ಯದರ್ಶಿ ನ್ಯಾಮಗೌಡ ಮನವಿ ಮಾಡಿದ್ದಾರೆ.
ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ಅವರು, ಕೋವಿಡ್‌ ಹಿನ್ನೆಲೆಯಲ್ಲಿ ಈ ಮೊದಲು ಮಾರುಕಟ್ಟೆಗೆ ಮೇ 4 ರವರೆಗೆ ರಜೆ ಘೋಷಿಸಲಾಗಿತ್ತು. ಆದರೆ ವೈರಸ್‌ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಮತ್ತು ಸರಕಾರದ ನಿರ್ದೇಶನದಂತೆ ಮೇ 11 ರವರೆಗೆ ರಜೆ ವಿಸ್ತರಿಸಿರುವುದಾಗಿ ತಿಳಿಸಿದ್ದಾರೆ.
ಸಹಕಾರ ಅಗತ್ಯ
ಸದರಿ ವಿಷಯದಲ್ಲಿ ರೈತರು ಮತ್ತು ಸ್ಥಳೀಯ ಮೆಣಸಿನಕಾಯಿ ವರ್ತಕರ ಸಂಘದ ಸಹಕಾರ ಕೋರಿರುವ ಅವರು, ರಜೆ ಘೋಷಿಸುವ ಮೂಲಕ ಜನಸಂದಣಿ ತಡೆಗಟ್ಟಲು ನಿರ್ಧರಿಸಲಾಗಿದೆ. ವರ್ತಕರು ದೂರವಾಣಿ ಮೂಲಕ ರಾಜ್ಯ ಸೇರಿದಂತೆ ದೂರದ ಆಂಧ್ರ ಮತ್ತು ತೆಲಂಗಾಣ ರಾಜ್ಯದ ರೈತರಿಗೆ ತಿಳಿಸಲು ಮನವಿ ಮಾಡಿದ್ದಾರೆ. ಇದೇ ವೇಳೆ, ಕಳೆದ ವರ್ಷ ಕೋವಿಡ್‌ಗೆ ಇಬ್ಬರು ಖರೀದಿದಾರರ ಬಲಿಯಾಗಿದ್ದನ್ನು ಸ್ಮರಿಸಿಕೊಂಡರು.
ಸರಕಾರದ ನಿರ್ದೇಶನ ಪಾಲಿಸಿ
ಪೇಟೆ ಕಾರ್ಯಕರ್ತರು, ರೈತರು, ಗುಮಾಸ್ತರು, ಕೂಲಿ ಕಾರ್ಮಿಕರು ಕೋವಿಡ್‌ ಲಸಿಕೆ ಪಡೆಯಬೇಕು. ಕಡ್ಡಾಯವಾಗಿ ಮಾಸ್ಕ್‌ಗಳನ್ನು ಧರಿಸಿಕೊಂಡು, ದಿನಕ್ಕೆ ಹತ್ತಾರು ಬಾರಿ ಸ್ಯಾನಿಟೈಸರ್‌ ಬಳಸುವಂತೆ ಅವರು ಮನವಿ ಮಾಡಿದ್ದಾರೆ.
ಹಾಗೆ ನೋಡಿದರೆ ಕೊರೊನಾ ಮಾರ್ಗಸೂಚಿಯಲ್ಲಿ ಬೆಳಿಗ್ಗೆ 6 ಗಂಟೆಯಿಂದ ಮಧ್ಯಾಹ್ನ 12 ಗಂಟೆವರೆಗೆ ಎಪಿಎಂಸಿಗಳನ್ನು ತೆರೆಯಲು ಅವಕಾಶ ನೀಡಲಾಗಿದೆ. ಹೀಗಿದ್ದೂ ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆಗೆ ರಜೆ ಘೋಷಿಸಲಾಗಿದೆ.
