ಕೊರೊನಾ ಹಿನ್ನೆಲೆ, ದ್ವಿಚಕ್ರ ವಾಹನ ಉತ್ಪಾದನೆ ಸ್ಥಗಿತಗೊಳಿಸಿದ ಹೀರೋ
ಏಪ್ರಿಲ್‌ 22 ರಿಂದ ಮೇ 1ರ ತನಕ ಸ್ಥಳೀಯ ಪರಿಸ್ಥಿತಿ ನೋಡಿಕೊಂಡು 4 ದಿನಗಳ ಕಾಲ ಎಲ್ಲಾ ಉತ್ಪಾದನಾ ಘಟಕಗಳಲ್ಲಿ ವಾಹನ ಉತ್ಪಾದನೆ ಸ್ಥಗಿತಗೊಳಿಸುತ್ತಿರುವುದಾಗಿ ಹೀರೊ ಮೊಟೊ ಕಾರ್ಪ್‌ ತಿಳಿಸಿದೆ.
Admin
0
15
ಹೊಸದಿಲ್ಲಿ: ದೇಶದ ಅತಿ ದೊಡ್ಡ ಉತ್ಪಾದಕ ಸಂಸ್ಥೆ ಹೀರೊ ಮೊಟೊ ಕಾರ್ಪ್‌ ತನ್ನ ಎಲ್ಲಾ ಉತ್ಪಾದನಾ ಘಟಕಗಳಲ್ಲಿ ವಾಹನ ಉತ್ಪಾದನಾ ಚಟುವಟಿಕೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ. ಕೋವಿಡ್‌-19 ಎರಡನೇ ಅಲೆಯ ಹಿನ್ನೆಲೆಯಲ್ಲಿ ಉತ್ಪಾದನೆಯನ್ನು ತಾತ್ಕಾಲಿಕವಾಗಿ ನಿಲ್ಲಿಸಲಾಗುವುದು ಎಂದು ಕಂಪನಿ ತಿಳಿಸಿದೆ.
ಉದ್ಯೋಗಿಗಳ ಸುರಕ್ಷತೆ ದೃಷ್ಟಿಯಿಂದ ಈ ನಿರ್ಧಾರ ಕೈಗೊಂಡಿರುವುದಾಗಿ ಸಂಸ್ಥೆ ತಿಳಿಸಿದೆ. ಇದೇ ಅವಧಿಯನ್ನು ಸದುಪಯೋಗಪಡಿಸಿಕೊಂಡು ಉತ್ಪಾದನಾ ಘಟಕಗಳ ಅಗತ್ಯ ನಿರ್ವಹಣೆಯ ಕೆಲಸಗಳನ್ನು ಕೈಗೊಳ್ಳಲಿರುವುದಾಗಿ ಕಂಪನಿ ಹೇಳಿದೆ. ಏ. 22 ರಿಂದ ಮೇ 1ರ ತನಕ ಸ್ಥಳೀಯ ಪರಿಸ್ಥಿತಿ ನೋಡಿಕೊಂಡು 4 ದಿನಗಳ ಕಾಲ ಉತ್ಪಾದನೆ ಬಂದ್‌ ಮಾಡುವುದಾಗಿ ಹೀರೊ ಮೊಟೊ ಕಾರ್ಪ್‌ ತಿಳಿಸಿದೆ.
ಈ ತಾತ್ಕಾಲಿಕ ಬಂದ್‌ ಬಳಿಕ ವಾಹನ ಉತ್ಪಾದನೆ ಎಂದಿನಂತೆ ಆರಂಭವಾಗಲಿದೆ ಎಂದು ಸಂಸ್ಥೆ ಹೇಳಿದ್ದು, ಈಗಾಗಲೇ ಕಾರ್ಪೊರೇಟ್‌ ಕಚೇರಿಯಲ್ಲಿ ವರ್ಕ್‌ ಫ್ರಂ ಹೋಮ್‌ ನಡೆಯುತ್ತಿದೆ ಎಂದು ತಿಳಿಸಿದೆ. ಅಗತ್ಯ ಕೆಲಸಗಳಿಗಾಗಿ ರೊಟೇಷನ್‌ ಆಧಾರದಲ್ಲಿ ಕೆಲವೇ ಸಿಬ್ಬಂದಿ ಮಾತ್ರ ಕಚೇರಿಗೆ ಹಾಜರಾಗುತ್ತಿದ್ದಾರೆ ಎಂದು ಸಂಸ್ಥೆ ಮಾಹಿತಿ ನೀಡಿದೆ.
ಕಳೆದ ವರ್ಷ ಇದೇ ಅವಧಿಯಲ್ಲಿ ಆರು ವಾರಗಳ ಲಾಕ್‌ಡೌನ್‌ ಹೇರಿದ್ದರಿಂದ ಆಟೋಮೊಬೈಲ್‌ ಉದ್ಯಮದಲ್ಲಿ ಉತ್ಪಾದನೆ ಸಂಪೂರ್ಣ ಸ್ಥಗಿತಗೊಂಡಿತ್ತು. ಈ ಅವಧಿಯಲ್ಲಿ ಯಾವುದೇ ವಾಹನಗಳ ಮಾರಾಟವೂ ನಡೆದಿರಲಿಲ್ಲ. ನಂತರ ಆಟೋಮೊಬೈಲ್‌ ಕ್ಷೇತ್ರ ಶೀಘ್ರ ಚೇತರಿಕೆ ಕಂಡಿತಾದರೂ ವಾಹನ ಮಾರಾಟದ ಸಂಖ್ಯೆ ಇನ್ನೂ ಕೋವಿಡ್‌ ಪೂರ್ವ ಮಟ್ಟಕ್ಕೆ ತಲುಪಿಲ್ಲ. ಇದೀಗ ಮತ್ತೆ ಲಾಕ್‌ಡೌನ್‌ ಕರಿ ನೆರಳು ಉದ್ಯಮದ ಮೇಲೆ ಬಿದ್ದಿದ್ದು, ಕಂಪನಿಗಳ ವಹಿವಾಟಿನ ಮೇಲೆ ಪರಿಣಾಮ ಬೀರುವ ಎಲ್ಲಾ ಸಾಧ್ಯತೆ ಇದೆ.
