ಕಬ್ಬನ್‌ ಪಾರ್ಕ್‌ನಲ್ಲಿ ಪ್ರತಿ ಮರಕ್ಕೂ ನೋಂದಣಿ ಸಂಖ್ಯೆ..! ಮರಗಳ ವಿಶೇಷತೆ ವಿವರಿಸುವ ಬೋರ್ಡ್ ಅಳವಡಿಕೆ..!
ಸ್ಮಾರ್ಟ್‌ಸಿಟಿ ಯೋಜನೆಯಡಿ ಮರಗಳಿಗೆ ಫಲಕದೊಂದಿಗೆ ಜಿಪಿಎಸ್‌ ಸಹ ಅಳವಡಿಸಲಾಗುವುದು. ಫಲಕದಲ್ಲಿ ಒಂದು ಕ್ಯೂಆರ್‌ ಕೋಡ್‌ ಇರಲಿದೆ. ಅದನ್ನು ಸ್ಕ್ಯಾ‌ನ್‌ ಮಾಡಿಯೂ ಮರದ ವಿವರ ಪಡೆದುಕೊಳ್ಳಬಹುದು.
Admin
0
5
: ಕಬ್ಬನ್‌ ಉದ್ಯಾನದಲ್ಲಿರುವ ಮರಗಳ ಸಂಪೂರ್ಣ ವಿವರಗಳನ್ನು ಜನರಿಗೆ ತಲುಪಿಸುವ ಉದ್ದೇಶದಿಂದ ಸ್ಮಾರ್ಟ್‌ಸಿಟಿ ಯೋಜನೆ ಅಡಿ ಉದ್ಯಾನದ ಎಲ್ಲ ಮರಗಳ , ಅವುಗಳ ಮೂಲ ಮತ್ತು ವೈಶಿಷ್ಟ್ಯ ಸಾರುವ ಅಳವಡಿಸುವ ಯೋಜನೆಗೆ ತೋಟಗಾರಿಕೆ ಇಲಾಖೆ ಮುಂದಾಗಿದೆ.
ಉದ್ಯಾನದಲ್ಲಿ ತರಹೇವಾರಿ ಮರಗಳಿದ್ದು, ಅವುಗಳ ಬಗ್ಗೆ ಜನರಿಗೆ ಸೂಕ್ತ ಮಾಹಿತಿ ಇಲ್ಲ. ಹಾಗಾಗಿ, ಐಡೆಂಟಿಫಿಕೇಷನ್‌ ಆ್ಯಂಡ್‌ ಟ್ರೇಸಿಂಗ್‌ ಹೆಸರಿನಲ್ಲಿ ಪ್ರತಿ ಮರದ ಪೂರ್ಣ ವಿವರಗಳನ್ನು ಪತ್ತೆ ಮಾಡಲಿದ್ದು, ಉದ್ಯಾನಕ್ಕೆ ಬರುವವರು ಈ ಮರಗಳ ಮಾಹಿತಿ ಪಡೆದುಕೊಳ್ಳಬಹುದು.
ಇದಕ್ಕಾಗಿ ಒಂದು ಸಂಖ್ಯೆಯನ್ನು ನೀಡಲಾಗುವುದು. ಗಾಢ ಹಸಿರು ಬಣ್ಣದ ಲೇಪನ ಮಾಡಿ, ಅದರ ಮೇಲೆ ಬಿಳಿಯ ಬಣ್ಣದಲ್ಲಿ ಸಂಖ್ಯೆಯನ್ನು ನಮೂದಿಸಲಾಗುತ್ತದೆ. ಉದ್ಯಾನದಲ್ಲಿ ಸುಮಾರು 8 ಸಾವಿರಕ್ಕೂ ಹೆಚ್ಚು ಮರಗಳಿವೆ. ಮರಗಳ ಗಣತಿ, ನೋಂದಣಿ ಸಂಖ್ಯೆ ಅಳವಡಿಕೆ ಮತ್ತಿತರ ಕಾರ್ಯಗಳನ್ನು 23 ಲಕ್ಷ ರೂ. ವೆಚ್ಚದಲ್ಲಿ ಕೈಗೊಳ್ಳಲಾಗಿದೆ ಎಂದು ರಾಜ್ಯ ತೋಟಗಾರಿಕೆ ಇಲಾಖೆಯ ಉಪನಿರ್ದೇಶಕ ಎಚ್‌.ಪಿ. ಬಾಲಕೃಷ್ಣ ತಿಳಿಸಿದರು.
ಕಬ್ಬನ್‌ ಉದ್ಯಾನದಲ್ಲಿ ತುಂಬಾ ಹಳೆಯದಾದ ಸಾವಿರಾರು ಮರಗಳಿವೆ. ಪ್ರತಿ ಮರವೂ ಭಿನ್ನ ಗುಣಲಕ್ಷಣಗಳನ್ನು ಹೊಂದಿದೆ. ಹಲವು ಅಪರೂಪದ ಹಾಗೂ ಪಾರಂಪರಿಕ ಮರಗಳೂ ಉದ್ಯಾನದಲ್ಲಿದ್ದು, ಅವುಗಳ ಸಂಪೂರ್ಣ ವಿವರಗಳುಳ್ಳ ಫಲಕ ಅಳವಡಿಸುವ ಯೋಜನೆ ರೂಪಿಸಲಾಗಿದೆ.
ಬೆಂಗಳೂರು ಕೃಷಿ ವಿವಿ ಸಸ್ಯಶಾಸ್ತ್ರಜ್ಞರು ಪ್ರತಿ ಮರದ ಹೆಸರು, ವಯಸ್ಸು, ಅದರ ಗುಣ, ಮೂಲ, ಉಪಯೋಗ ಹಾಗೂ ವಿಶೇಷತೆಗಳನ್ನು ಸೂಚಿಸಲಿದ್ದಾರೆ. ಅವರಿಂದ ಮಾಹಿತಿ ಪಡೆದು ಎಲ್ಲ ಮರಗಳಿಗೆ ಸ್ವವಿವರವುಳ್ಳ ಫಲಕ ಅಳವಡಿಸಲಾಗುವುದು. ಇದರಿಂದ ಮುಂದಿನ ದಿನಗಳಲ್ಲಿ ಸಸ್ಯಗಳ ಬಗ್ಗೆ ಆಸಕ್ತಿ ಉಳ್ಳವರು, ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರಿಗೂ ಅಧ್ಯಯನ ಹಾಗೂ ಸಂಶೋಧನೆಗೆ ಅನುಕೂಲವಾಗಲಿದೆ' ಎಂದು ಅವರು ಮಾಹಿತಿ ನೀಡಿದರು.
ಮರಗಳಿಗೆ ಜಿಪಿಎಸ್‌, ಕ್ಯೂಆರ್‌ ಕೋಡ್‌: 'ಸ್ಮಾರ್ಟ್‌ಸಿಟಿ ಯೋಜನೆಯಡಿ ಮರಗಳಿಗೆ ಫಲಕದೊಂದಿಗೆ ಜಿಪಿಎಸ್‌ ಸಹ ಅಳವಡಿಸಲಾಗುವುದು. ಫಲಕದಲ್ಲಿ ಒಂದು ಕ್ಯೂಆರ್‌ ಕೋಡ್‌ ಇರಲಿದೆ. ಅದನ್ನು ಸ್ಕ್ಯಾ‌ನ್‌ ಮಾಡಿಯೂ ಮರದ ವಿವರ ಪಡೆದುಕೊಳ್ಳಬಹುದು. ಇದಕ್ಕಾಗಿ ಪ್ರತ್ಯೇಕವಾಗಿ ಮೊಬೈಲ್‌ ಆ್ಯಪ್‌ ಅಭಿವೃದ್ಧಿಪಡಿಸಲಾಗುವುದು. ಮರದ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿಯಲು ಆಪ್‌ ಸಹಾಯವಾಗಲಿದೆ. ಯೋಜನೆಯ ರೂಪರೇಷೆ ಸಿದ್ಧಪಡಿಸಲಾಗುತ್ತಿದೆ' ಎಂದು ಬಾಲಕೃಷ್ಣ ತಿಳಿಸಿದರು.
