ಕೋವಿಡ್‌ನಿಂದ ನೆಲಕಚ್ಚಿದ ಉದ್ಯಮ: ಆಸ್ಪತ್ರೆಗಳಾಗುತ್ತಿವೆ ಬೆಂಗಳೂರಿನ ಹೋಟೆಲ್‌ಗಳು..!
ಕಟ್ಟಡ ಬಾಡಿಗೆ, ತೆರಿಗೆ, ಕಾರ್ಮಿಕರಿಗೆ ವೇತನ ಕಟ್ಟಲಾಗದೆ ನಷ್ಟದಲ್ಲಿರುವ ಒಂದು ಸಾವಿರ ಹೋಟೆಲ್‌ಗಳು ಮಾರಾಟಕ್ಕಿವೆ. ಆದರೂ ಖರೀದಿದಾರರಿಲ್ಲ. ಈ ಪೈಕಿ ತೀವ್ರ ಹೊಡೆತ ಬಿದ್ದಿರುವುದು ವಸತಿ ಗೃಹಗಳಿಗೆ..
Admin
0
6
ಎಚ್‌. ಪಿ. ಪುಣ್ಯವತಿ : ಕೋವಿಡ್‌ ಹಿನ್ನೆಲೆಯಲ್ಲಿ ಕಳೆದ ಒಂದೂವರೆ ವರ್ಷದಿಂದ ಹೋಟೆಲ್‌ ಉದ್ಯಮ ತೀವ್ರ ಸಂಕಷ್ಟಕ್ಕೆ ಸಿಲುಕಿದೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರಿನ ಸುಮಾರು ಒಂದು ಸಾವಿರಕ್ಕೂ ಹೆಚ್ಚು ಹೋಟೆಲ್‌ಗಳು ಮಾರಾಟಕ್ಕೆ ಅಣಿಯಾಗಿವೆ. ಈ ಪೈಕಿ ಕೆಲವು ಹೋಟೆಲ್‌ಗಳು ಆಸ್ಪತ್ರೆಗಳಾಗಿಯೂ ಮಾರ್ಪಾಡಾಗಿವೆ.
2020ರ ಮಾರ್ಚ್ ಅಂತ್ಯದಲ್ಲಿ ಲಾಕ್‌ಡೌನ್‌ ಆರಂಭವಾಯಿತು. ಆ ವೇಳೆ ಬಹುತೇಕ ಐಟಿ ಸಂಸ್ಥೆಗಳು, ಸರಕಾರಿ, ಅರೆ ಸರಕಾರಿ ಕಚೇರಿಗಳು, ಶಾಲಾ- ಕಾಲೇಜುಗಳು, ಪ್ರವಾಸಿ ತಾಣಗಳು ಎಲ್ಲವೂ ಬಂದ್‌ ಆದವು. ಇವುಗಳಿಂದಲೇ ಲಾಭ ಕಾಣುತ್ತಿದ್ದ ಹೋಟೆಲ್‌ ಉದ್ಯಮಕ್ಕೆ ದೊಡ್ಡ ಹೊಡೆತ ಬೀಳಲಾರಂಭಿಸಿತು.
ಬಳಿಕ ಅನ್‌ಲಾಕ್‌ ಆದರೂ ಬಂದ್‌ ಆಗಿದ್ದ ಐಟಿ-ಬಿಟಿ, ಪ್ರವಾಸೋದ್ಯಮ ಕೇಂದ್ರಗಳು, ಶಾಲಾ- ಕಾಲೇಜುಗಳು ಮತ್ತಿತರ ಸಂಸ್ಥೆಗಳು ಪುನಾರಂಭವಾಗಲಿಲ್ಲ. ಇದರ ಪರಿಣಾಮ ಸಹಸ್ರಾರು ಹೋಟೆಲ್‌ಗಳು ನೆಲಕಚ್ಚುವಂತಾಯಿತು. ಹೀಗಾಗಿ, ಅನ್‌ಲಾಕ್‌ ಅವಧಿಯಲ್ಲೂ ಹಲವು ಹೋಟೆಲ್‌ಗಳು ಆರಂಭವಾಗಲೇ ಇಲ್ಲ. ಆರಂಭವಾದ ಹಲವು ಹೋಟೆಲ್‌ಗಳು ಲಾಭವಿಲ್ಲದಿದ್ದರೂ ಖರ್ಚು ಸರಿದೂಗುವಷ್ಟು ಮಾತ್ರ ಗಳಿಸುತ್ತಿವೆ.
ಆಸ್ಪತ್ರೆಗಳಾಗಿರುವ ಹೋಟೆಲ್‌ಗಳು: ನೃಪತುಂಗ ರಸ್ತೆಯಲ್ಲಿದ್ದ ಮಿಂಟ್‌ ಮಸಾಲಾ ಹೋಟೆಲ್‌ ಅನ್ನು ಸ್ಪರ್ಶ್ ಆಸ್ಪತ್ರೆಯ ಆಡಳಿತ ಮಂಡಳಿ ಖರೀದಿಸಿ ನವೀಕರಿಸುತ್ತಿದೆ. ಶೇಷಾದ್ರಿಪುರಂ ವೃತ್ತದ ಪೊಲೀಸ್‌ ಸ್ಟೇಷನ್‌ ಎದುರಿನಲ್ಲಿದ್ದ ಹೋಟೆಲ್‌ ಒಂದು ಟ್ರಿನಿಟಿ ಆಸ್ಪತ್ರೆಯಾಗಿ ಪರಿವರ್ತನೆಯಾಗಿದೆ.
ಮಲ್ಲೇಶ್ವರಂನ ಮಂತ್ರಿ ಮಾಲ್‌ ಬಳಿ ಇದ್ದ ಎಂಟಿಆರ್‌ ಹೋಟೆಲ್‌ ಪಕ್ಕದ ವಸತಿ ಗೃಹವನ್ನು ಆಸ್ಪತ್ರೆಯಾಗಿ ಪರಿವರ್ತಿಸಲಾಗುತ್ತಿದೆ. ಇದಲ್ಲದೆ, ಇನ್ನೂ ಸುಮಾರು ಹತ್ತು ಹೋಟೆಲ್‌ಗಳು ಆಸ್ಪತ್ರೆಗಳಾಗಲು ಸಿದ್ಧವಾಗಿವೆ ಎನ್ನುತ್ತಾರೆ ಬೃಹತ್‌ ಮಹಾನಗರ ಹೋಟೆಲ್‌ ಮಾಲೀಕರ ಸಂಘ ಪಿ.ಸಿ. ರಾವ್‌.
ಐಟಿ ಕಚೇರಿಗಳ ಬಳಿಯಿದ್ದ ಹೋಟೆಲ್‌ಗಳು ಸ್ಥಗಿತ: ವೈಟ್ಫೀಲ್ಡ್, ಎಲೆಕ್ಟ್ರಾನಿಕ್‌ ಸಿಟಿ, ಸರ್ಜಾಪುರ ಬಳಿಯ ಸಣ್ಣ ಹೋಟೆಲ್‌ಗಳಿಂದ ಹಿಡಿದು, ದೊಡ್ಡ ಹೋಟೆಲ್‌ಗಳವರೆಗೆ ಬಹುತೇಕ ಸ್ಥಗಿತಗೊಂಡಿವೆ. ಐಟಿ ಕಂಪನಿಗಳು ವರ್ಕ್ ಫ್ರಂ ಹೋಂ ಇರುವುದರಿಂದ ವೈಟ್ಫೀಲ್ಡ್ ರಸ್ತೆಯ ಉಡುಪಿ ಪಾರ್ಕ್ ಸೇರಿದಂತೆ ಹಲವು ಹೋಟೆಲ್‌ಗಳಿಗೆ ಗ್ರಾಹಕರೇ ಇಲ್ಲದಂತಾಗಿದೆ.
ಇನ್‌ಫೋಸಿಸ್‌ ಪಕ್ಕದಲ್ಲೇ ಇದ್ದ 15-20 ಹೋಟೆಲ್‌ಗಳು, ವಿಪ್ರೋ ಕಂಪನಿ ಬಳಿಯಿದ್ದ ಸುಮಾರು 15 ಹೋಟೆಲ್‌ಗಳು ಇದೀಗ ಸ್ಥಗಿತಗೊಂಡಿವೆ.
'ಕಟ್ಟಡ ಬಾಡಿಗೆ, ತೆರಿಗೆ, ಕಾರ್ಮಿಕರಿಗೆ ವೇತನ ಕಟ್ಟಲಾಗದೆ ನಷ್ಟದಲ್ಲಿರುವ ಒಂದು ಸಾವಿರ ಹೋಟೆಲ್‌ಗಳು ಮಾರಾಟಕ್ಕಿವೆ. ಆದರೂ ಖರೀದಿದಾರರಿಲ್ಲ. ಇದರಲ್ಲಿ ತೀವ್ರ ಹೊಡೆತ ಬಿದ್ದಿರುವುದು ವಸತಿ ಗೃಹಗಳಿಗೆ. ಪ್ರವಾಸಿ ತಾಣಗಳು ಪುನಾರಂಭವಾಗಬೇಕು. ಮದುವೆ, ಸಭೆ- ಸಮಾರಂಭಗಳು ನಡೆದರೆ ಮಾತ್ರ ಇವುಗಳಿಗೆ ಬೇಡಿಕೆ' ಎನ್ನುತ್ತಾರೆ, ಬೃಹತ್‌ ಬೆಂಗಳೂರು ಮಹಾನಗರ ಹೋಟೆಲ್‌ ಮಾಲೀಕರ ಸಂಘದ ಅಧ್ಯಕ್ಷ ಪಿ.ಸಿ. ರಾವ್‌.
