ಐಸಿಸ್ ನಂಟು: ಭಟ್ಕಳದ ಸೋಷಿಯಲ್ ಮೀಡಿಯಾ ನಕಲಿ ವೀರ ಎನ್‌ಐಎ ಬಲೆಗೆ..!
ಆರೋಪಿಯು ಹಲವು ಸಾಮಾಜಿಕ ಜಾಲತಾಣ ಗುಂಪುಗಳಲ್ಲಿ ವ್ಯವಹರಿಸುತ್ತಿದ್ದ. ಐಸಿಸ್‌ಗೆ ಹಣಕಾಸಿನ ನೆರವು ಸಂಗ್ರಹಿಸುವ ಕಾರ್ಯದಲ್ಲೂ ತೊಡಗಿದ್ದ ಎಂದು ಆರೋಪಿಸಲಾಗಿದೆ. ಈ ಕುರಿತಾಗಿ ಇನ್ನಷ್ಟು ತನಿಖೆ ನಡೆಯಬೇಕಿದೆ.
Admin
0
9
: ಐಸಿಸ್ ನಂಟು ಹೊಂದಿದ್ದ ಆರೋಪದ ಮೇಲೆ ಭಟ್ಕಳದಲ್ಲಿ ವ್ಯಕ್ತಿಯೊಬ್ಬನನ್ನು ರಾಷ್ಟ್ರೀಯ ತನಿಖಾ ದಳ (ಎನ್‌ಐಎ) ಬಂಧಿಸಿದೆ. ಝುಫ್ರಿ ಜವಹರ್ ದಾಮ್ದಿ ಎಂಬಾತನನ್ನು ಎನ್‌ಐಎ ಬಂಧಿಸಿದ್ದು, ಈತ ಸಾಮಾಜಿಕ ಜಾಲತಾಣಗಳಲ್ಲಿ ನಕಲಿ ಖಾತೆಗಳನ್ನು ಸೃಷ್ಟಿಸಿ ವ್ಯವಹರಿಸುತ್ತಿದ್ದ ಎಂದು ತಿಳಿದುಬಂದಿದೆ.
ಕೇರಳದಲ್ಲಿ ಐಸಿಸ್ ಜಾಲದ ಜೊತೆ ನಂಟು ಹೊಂದಿರುವ ಆರೋಪದ ಮೇಲೆ ಈತನನ್ನು ಬಂಧಿಸಲಾಗಿದೆ ಎಂದು ಎನ್‌ಐಎ ತಿಳಿಸಿದೆ.
ಜನರೊಂದಿಗೆ ವ್ಯವಹರಿಸಲು ಆರೋಪಿ ಝುಫ್ರಿ ಜವಹರ್ ದಾಮ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ನಕಲಿ ಖಾತೆಗಳನ್ನು ಸೃಷ್ಟಿಸಿದ್ದ. ಅಷ್ಟೇ ಅಲ್ಲ, ಯುವಕರನ್ನು ಧರ್ಮಾಂಧ ಸಂಘಟನೆಗಳಿಗೆ ಸೆಳೆಯುವ ಸಂಬಂಧ ಸಾಮಾಜಿಕ ಜಾಲತಾಣದ ಗ್ರೂಪ್‌ಗಳಲ್ಲಿ ಸೇರುವಂತೆ ಆಹ್ವಾನ ನೀಡುತ್ತಿದ್ದ ಎಂದೂ ತಿಳಿದುಬಂದಿದೆ.
ಜಮ್ಮು-ಕಾಶ್ಮೀರ, ಬೆಂಗಳೂರು ಹಾಗೂ ಮಂಗಳೂರು ಸೇರಿದಂತೆ ದೇಶದ 5 ಕಡೆ ಸರಣಿ ದಾಳಿ ನಡೆಸಿದ್ದ ಎನ್‌ಐಎ, ಈ ವೇಳೆ ನಾಲ್ವರನ್ನು ಬಂಧಿಸಿತ್ತು. ಇದಾದ 2 ದಿನಗಳ ಬಳಿಕ ದಾಮ್ದಿ ಬಂಧನ ಸುದ್ದಿ ಹೊರಬಿದ್ದಿದೆ.
ಬಂಧಿತ ಆರೋಪಿ ದಾಮ್ದಿಯು ಮತ್ತೊಬ್ಬ ಬಂಧಿತ ಆರೋಪಿ ಮೊಹಮ್ಮದ್ ಆಮೀನ್ ಜೊತೆಗೆ ನಿಕಟ ಸಂಪರ್ಕ ಹೊಂದಿದ್ದ ಎಂದು ತಿಳಿದುಬಂದಿದೆ. ಈತನ ಬಂಧನದ ವೇಳೆ, ಈತ ನೆಲೆಸಿದ್ದ ಸ್ಥಳದಲ್ಲೂ ಪರಿಶೀಲನೆ ನಡೆಸಲಾಗಿದೆ.
ಆರೋಪಿಯು ಹಲವು ಸಾಮಾಜಿಕ ಜಾಲತಾಣ ಗುಂಪುಗಳಲ್ಲಿ ವ್ಯವಹರಿಸುತ್ತಿದ್ದ. ಐಸಿಸ್‌ಗೆ ಹಣಕಾಸಿನ ನೆರವು ಸಂಗ್ರಹಿಸುವ ಕಾರ್ಯದಲ್ಲೂ ತೊಡಗಿದ್ದ ಎಂದು ಆರೋಪಿಸಲಾಗಿದೆ. ಈ ಕುರಿತಾಗಿ ಇನ್ನಷ್ಟು ತನಿಖೆ ನಡೆಯಬೇಕಿದೆ.
ಎನ್‌ಐಎ ನಡೆಸಿದ ಪರಿಶೀಲನೆ ವೇಳೆ ಆರೋಪಿ ಬಳಸುತ್ತಿದ್ದ ಲ್ಯಾಪ್‌ಟಾಪ್, ಮೊಬೈಲ್ ಫೋನ್, ಹಾರ್ಡ್‌ ಡಿಸ್ಕ್, ಪೆನ್ ಡ್ರೈವ್ ಹಾಗೂ ಹಲವು ಸಿಮ್‌ ಕಾರ್ಡ್‌ಗಳನ್ನು ವಶಕ್ಕೆ ಪಡೆಯಲಾಗಿದೆ. ಅಷ್ಟೇ ಅಲ್ಲ, ಪ್ರಚೋದನಕಾರಿ ಬರಹಗಳನ್ನೂ ಎನ್‌ಐಎ ವಶಕ್ಕೆ ಪಡೆದಿದೆ.
ಭಟ್ಕಳದ ದಾಮ್ದಿ ಅಲ್ಲದೆ ಇನ್ನೂ ನಾಲ್ವರನ್ನು ವಶಕ್ಕೆ ಪಡೆಯಲಾಗಿದೆ. ಜಮ್ಮು ಕಾಶ್ಮೀರದ ಶ್ರೀನಗರ ನಿವಾಸಿ ಒಬೈದ್ ಹಮೀದ್, ಬಂಡೀಪೋರ ನಿವಾಸಿ ಮುಜಾಮಿಲ್ ಹಸನ್ ಭಟ್, ಮಂಗಳೂರಿನ ಹಮ್ಮರ್ ಅಬ್ದುಲ್ ರೆಹಮಾನ್ ಹಾಗೂ ಬೆಂಗಳೂರಿನ ಶಂಕರ್ ವೆಂಕಟೇಶ್ ಪೆರುಮಾಳ್ ಅಲಿಯಾಸ್ ಅಲಿ ಮುಹಾವಿಯಾ ಇದೀಗ ಎನ್‌ಐಎ ವಶದಲ್ಲಿ ಇದ್ದಾರೆ.
ಇವರೆಲ್ಲರೂ ಐಸಿಸ್‌ಗೆ ಧನ ಸಂಗ್ರಹ ಕಾರ್ಯ ನಡೆಸುವ ಜೊತೆಯಲ್ಲೇ ಯುವಕರನ್ನು ಧರ್ಮಾಂಧ ಸಂಘಟನೆಗಳತ್ತ ಸೆಳೆಯುವ ಯತ್ನ ಮಾಡುತ್ತಿದ್ದರು ಎಂದು ತಿಳಿದುಬಂದಿದೆ.
ಇದೇ ವರ್ಷ ಮಾರ್ಚ್‌ 5ರಂದು ಪ್ರಕರಣ ಸಂಬಂಧ ಸ್ವಯಂ ಪ್ರೇರಿತ ಕೇಸ್ ದಾಖಲಿಸಿಕೊಂಡಿದ್ದ ಎನ್‌ಐಎ, ಕೇರಳ ನಿಆಸಿ ಅಮೀನ್ ಅಲಿಯಾ ಅಬು ಯಾಹ್ಯಾನ ಚಲನ ವಲನಗಳ ಮೇಲೆ ನಿಗಾ ಇರಿಸಿತ್ತು. ಈತನ ಸಾಮಾಜಿಕ ಜಾಲತಾಣಗಳ ಮೂಲಕ ಐಸಿಸ್ ಪರ ಸಹಾನುಭೂತಿ ಇರುವವರ ಜೊತೆ ವ್ಯವಹರಿಸುತ್ತಿದ್ದ. ಹೂಪ್, ಟೆಲಿಗ್ರಾಂ ಹಾಗೂ ಇನ್‌ಸ್ಟಾ ಗ್ರಾಂ ಮೂಲಕ ಈತ ಜಿಹಾದಿ ಧರ್ಮಾಂದತೆಯನ್ನು ಬಿತ್ತುತ್ತಿದ್ದ ಹಾಗೂ ಹೊಸಬರನ್ನು ಸಂಘಟನೆಗೆ ಸೇರಿಸಿಕೊಳ್ಳಲು ಪ್ರೇರೇಪಿಸುತ್ತಿದ್ದ.
