ಎಕರೆ ಗಟ್ಟಲೆ ಕೃಷಿ ಭೂಮಿ ಮುಳುಗಿಸುತ್ತಿದೆ ಬೆಂಗಳೂರು-ಮಂಗಳೂರು ರೈಲ್ವೆ ಟ್ರ್ಯಾಕ್‌!

ತಿ.ನಾ.ಪದ್ಮನಾಭ ಮಾಗಡಿ ಗ್ರಾಮಾಂತರ ಒಳನಾಡಿನಿಂದ ಕರಾವಳಿಗೆ ತೆರಳುವ ಪ್ರಯಾಣಿಕರಿಗೆ ಕಾಮಗಾರಿ ವರವಾದರೆ, ಕೃಷಿಯೇ ಜೀವನಾಧಾರವಾಗಿದ್ದ ನೂರಾರು ರೈತ ಕುಟುಂಬಗಳಿಗೆ ಶಾಪವಾಗಿದೆ. ಮಳೆಯಾದರೆ ಸಾವಿರಾರು ಎಕರೆ ಕೃಷಿ ಭೂಮಿ ಮುಳುಗಿಸುವ ಬೆಂಗಳೂರು-ಮಂಗಳೂರು ರೈಲ್ವೆ ಟ್ರ್ಯಾಕ್‌ ಸಮಸ್ಯೆ ಬಗೆಹರಿಸಲು ಜನಪ್ರತಿನಿಧಿಗಳಾದಿಯಾಗಿ ಅಧಿಕಾರಿಗಳು ವೈಫಲ್ಯ ಕಂಡಿದ್ದಾರೆ. ಮಾಗಡಿ ತಾಲೂಕಿನ ತಿಪ್ಪಸಂದ್ರ, ಕುದೂರು, ಸೋಲೂರು ಹೋಬಳಿಯ ರೈಲ್ವೆ ಟ್ರ್ಯಾಕ್‌ ಬಳಿಯ ಸಾವಿರಾರು ಎಕರೆ ಕೃಷಿ ಭೂಮಿ ಕಳೆದ ಎರಡು ವಾರದಿಂದ ಸುರಿದ ಮಳೆಗೆ ಜಲಾವೃತವಾಗಿದೆ. 5 ವರ್ಷದ ಪಜೀತಿ ಇದು: ಈ ಸಮಸ್ಯೆ ಕೇವಲ ಒಂದೆರಡು ದಿನಗಳದ್ದಲ್ಲ. ಕಳೆದ ಐದು ವರ್ಷಗಳಿಂದಲೂ ಇಲ್ಲಿನ ಭಾಗದ ರೈತರು ಈ ಸಮಸ್ಯೆಯನ್ನು ಎದುರಿಸುತ್ತಿದ್ದಾರೆ. ರೈಲ್ವೆ ಟ್ರ್ಯಾಕ್‌ ನಿರ್ಮಾಣವಾದಾಗಿನಿಂದ ಟ್ರ್ಯಾಕ್‌ ಪಕ್ಕದಲ್ಲಿನೀರು ಹರಿದುಹೋಗಲು ವೈಜ್ಞಾನಿಕ ರೀತಿಯಲ್ಲಿಕಾಮಗಾರಿ ಮಾಡದಿರುವುದೇ ಸಮಸ್ಯೆಗೆ ಮೂಲ ಕಾರಣ ಎನ್ನಲಾಗುತ್ತಿದೆ. ಆದರೆ ಈ ಸಮಸ್ಯೆಗೆ ಯಾವೊಬ್ಬ ಜನಪ್ರತಿನಿಧಿ ಅಥವಾ ಕೇಂದ್ರ ಸರಕಾರದ ಅಧಿಕಾರಿಗಳು ಪರಿಹರಿಸಿಲ್ಲ. ಅವೈಜ್ಞಾನಿಕ ಕಾಮಗಾರಿ ಕಾರಣ: ಭೂ ಮೇಲ್ಮೈನಿಂದ 70 ಅಡಿ ಎತ್ತರಕ್ಕೆ ಮಣ್ಣು ಹಾಕಿ ಅದರ ಮೇಲೆ ರೈಲ್ವೆ ಹಳಿಗಳ ಕಾಮಗಾರಿ ಮಾಡಿದ್ದಾರೆ. ಆದರೆ ರೈಲ್ವೆ ಹಳಿ ಹಾದುಹೋಗಿರುವ ಇಕ್ಕೆಲಗಳಲ್ಲಿರೈತರ ಜಮೀನಿಗೆ ಮಳೆ ನೀರು ಹರಿದು ಹೋಗದಂತೆ ಯಾವುದೇ ಕ್ರಮ ಕೈಗೊಂಡಿಲ್ಲ. ಮಾಗಡಿ ತಾಲೂಕಿನ ಸೋಲೂರು, ತಿಪ್ಪಸಂದ್ರ, ಬಗೀನಗೆರೆ ಹಾಗೂ ರಾಮನಗರ ಜಿಲ್ಲೆಯ ರೈತರ ಸಮಸ್ಯೆ ಮಾತ್ರವಲ್ಲದೆ ನೆರೆಯ ಜಿಲ್ಲೆಗಳಾದ ತುಮಕೂರು ಜಿಲ್ಲೆಯ ಕುಣಿಗಲ್‌ ತಾಲೂಕಿನ ಗೊಟ್ಟೀಕೆರೆ, ಕಗ್ಗರೆ ಮುಖ್ಯರಸ್ತೆ ಬಳಿ ಇರುವ ರೈತರ ಜಮೀನು ಬಹುತೇಕ ಇಂತಹುದೇ ಸಮಸ್ಯೆಯಲ್ಲಿ ಮುಳುಗಿದೆ. ಕೃಷಿಯನ್ನೇ ಕೈ ಬಿಟ್ಟರು: ತಿಪ್ಪಸಂದ್ರ, ನಾರಸಂದ್ರ, ಮರೂರು, ಬಗಿನಗೆರೆ ಮುಂತಾದ ಹಳ್ಳಿಗಳಲ್ಲಿ ಭೂಮಿಯ ಮಟ್ಟಕ್ಕಿಂತ ಹೆಚ್ಚು ಮಣ್ಣನ್ನು ಕತ್ತರಿಸಿ ಕಾಮಗಾರಿ ಮಾಡುವುದರಿಂದ ರೈತರು ಆ ಭಾಗದ ಸಾವಿರಾರು ಹೆಕ್ಟೇರ್‌ ಪ್ರದೇಶದಲ್ಲಿ ಬೆಳೆ ಇಡಲು ಸಾಧ್ಯವಾಗುತ್ತಿಲ್ಲ. ಸ್ವಲ್ಪ ಮಳೆಯಾದರೆ ಸಾಕು ನೀರು ಸಲೀಸಾಗಿ ರೈತರ ಭೂಮಿಯನ್ನು ಜಲಾವೃತ ಗೊಳಿಸುತ್ತದೆ. ಸಂಸದರ ಮಾತಿಗೂ ಬೆಲೆ ಸಿಗಲಿಲ್ಲ: ಸಂಸದ ಡಿ.ಕೆ.ಸುರೇಶ್‌ ಇದೇ ವಿಚಾರವಾಗಿ ರೈಲ್ವೆ ಅಧಿಕಾರಿಗಳಿಗೆ ತಿಳಿಸಿ ಕ್ರಮ ಕೈಗೊಳ್ಳಿ ಎಂದು ಸೂಚಿಸಿದರು. ಸಂಸದರ ಸೂಚನೆ ಮೇಲೆ ಆಗಮಿಸಿದ ಅಧಿಕಾರಿಗಳು ಪರಿವೀಕ್ಷಣೆ ಮಾಡಿ ವರದಿ ರೆಡಿ ಮಾಡಿಕೊಂಡು ಹೋದರೆ ಹೊರತು ಕೆಲಸ ಮಾಡಿ ರೈತರ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡಲಿಲ್ಲ. ತೆಂಗು, ಅಡಿಕೆ, ರಾಗಿ, ಜೋಳ, ದ್ವಿ ದಳ ಧಾನ್ಯಗಳನ್ನು ಬೆಳೆಯುವ ನೂರಾರು ರೈತರು ರೈಲ್ವೆ ಇಲಾಖೆ ಮಾಡಿಟ್ಟಿರುವ ಕೆಲಸಕ್ಕೆ ಸಿಟ್ಟಾಗಿದ್ದಾರೆ. ರೈಲ್ವೆಗೆ ಕಗ್ಗಂಟಾದ ಸಮಸ್ಯೆ ರೈಲ್ವೆ ಇಲಾಖೆಗೆ ಈ ಸಮಸ್ಯೆಯ ಯಕ್ಷ ಪ್ರಶ್ನೆಯಾಗಿಯೇ ಉಳಿದಿದೆ. ರೈಲ್ವೆ ಇಲಾಖೆ ರೈತರಿಂದ ವಶಪಡಿಸಿಕೊಂಡ ಜಮೀನಿನಲ್ಲಿ ಒಂದು ಸ್ವಲ್ಪವೂ ಜಾಗ ಉಳಿಸದೆ ಈಗಾಗಲೇ ರೈಲ್ವೆ ಕಾಮಗಾರಿ ಮಾಡಿ ಮುಗಿಸಿದೆ. ಆದರೆ ಎತ್ತರದ ರೈಲ್ವೆ ಹಳಿಗಳ ಮೇಲಿಂದ ಹರಿದು ಬರುವ ನೀರನ್ನು ಎತ್ತಿ ಬಿಡಬೇಕು ಎಂಬುದಕ್ಕೆ ಆಯ್ಕೆಗಳೇ ಇಲ್ಲದಾಗಿದೆ. ಒಂದು ವೇಳೆ ರೈಲ್ವೆ ಹಳಿಯ ಪಕ್ಕದಲ್ಲಿಯೇ ಇಂಗು ಕಾಲುವೆ ಮಾಡಿದರೆ ಅದು ರೈಲ್ವೆ ಹಳಿಗಳಿಗೇ ಅಪಾಯ ತಂದೊಡ್ಡಲಿದೆ. ರೈಲ್ವೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದೆವು. ನೀರು ನಿಲ್ಲದಂತೆ ಎಚ್ಚರ ವಹಿಸಿ ಎಂದು ಮತ್ತೆ ಅವರಿಗೆ ಸೂಚನೆ ನೀಡುವ ಕೆಲಸ ಮಾಡುತ್ತೇವೆ. - ಡಿ.ಕೆ ಸುರೇಶ್‌, ಸಂಸದರು