ಉದ್ಯೋಗ, ಆರ್ಥಿಕ ಪ್ರಗತಿಗೆ ದೇಶದಲ್ಲೇ ಬೆಂಗಳೂರು ಬೆಸ್ಟ್‌ - ನೀತಿ ಆಯೋಗ ವರದಿ

ಹೊಸದಿಲ್ಲಿ: ಉದ್ಯೋಗ ಮತ್ತು ಅರ್ಥಿಕ ಪ್ರಗತಿಯ ದೃಷ್ಟಿಯಿಂದ ಬೆಂಗಳೂರು ದೇಶದಲ್ಲೇ ಅತ್ಯುತ್ತಮ ನಗರವಾಗಿದೆ ಎಂದು ನೀತಿ ಆಯೋಗದ ಸಮೀಕ್ಷೆ ತಿಳಿಸಿದೆ. ಮೊಟ್ಟ ಮೊದಲ ಬಾರಿಗೆ ಬಿಡುಗಡೆಗೊಳಿಸಿರುವ ಎಸ್‌ಡಿಜಿ (ಸಸ್ಟೇನೇಬಲ್‌ ಡೆವಲಪ್‌ಮೆಂಟ್‌ ಗೋಲ್ಸ್‌) ಸೂಚ್ಯಂಕದಲ್ಲಿ ಬೆಂಗಳೂರು 'ಉದ್ಯೋಗ ಮತ್ತು ಆರ್ಥಿಕ ಬೆಳವಣಿಗೆ' ವಿಭಾಗದಲ್ಲಿ ಅಗ್ರ ಸ್ಥಾನದಲ್ಲಿದೆ. ಹೀಗಿದ್ದರೂ ಒಟ್ಟಾರೆಯಾಗಿ ಸೂಚ್ಯಂಕದಲ್ಲಿ ಹಿಮಾಚಲ ಪ್ರದೇಶದ ರಾಜಧಾನಿ ಶಿಮ್ಲಾ ಮೊದಲ ಸ್ಥಾನದಲ್ಲಿದೆ. ಕೊಯಮತ್ತೂರು ಎರಡನೇ ಮತ್ತು ಚಂಡೀಗಢ ಮೂರನೇ ಸ್ಥಾನ ಗಳಿಸಿದೆ. ತಿರುವನಂತಪುರಂ 4ನೇ ಸ್ಥಾನದಲ್ಲಿದೆ. ಕೊಚ್ಚಿ, ಪಣಜಿ, ಪುಣೆ, ತಿರುಚಿರಪಳ್ಳಿ, ಅಹಮದಾಬಾದ್‌, ನಾಗ್ಪುರ ನಂತರದ ಸ್ಥಾನಗಳಲ್ಲಿವೆ. ಜಾರ್ಖಂಡ್‌ನ ಧನ್‌ಬಾದ್‌ ಮತ್ತು ಉತ್ತರ ಪ್ರದೇಶದ ಮೀರತ್‌ ಪಟ್ಟಿಯಲ್ಲಿ ಕೊನೆಯ ಸ್ಥಾನ ಗಳಿಸಿವೆ. ಉದ್ಯೋಗ ಸೃಷ್ಟಿಯಲ್ಲಿ ಬೆಂಗಳೂರು ಶ್ರೇಷ್ಠ ನೀತಿ ಆಯೋಗದ ಎಸ್‌ಡಿಜಿ ಸಮೀಕ್ಷೆ ಪ್ರಕಾರ, ಇಡೀ ದೇಶದಲ್ಲಿ ಉತ್ತಮ ಉದ್ಯೋಗ ಸೃಷ್ಟಿ ಮತ್ತು ಆರ್ಥಿಕ ಬೆಳವಣಿಗೆಯಲ್ಲಿ ಬೆಂಗಳೂರು ಗರಿಷ್ಠ 79 ಅಂಕ ಗಳಿಸಿ ಮೊದಲ ಸ್ಥಾನ ಗಳಿಸಿದೆ. ಒಟ್ಟು 56 ನಗರಗಳನ್ನು ಸಮೀಕ್ಷೆ ಮಾಡಲಾಗಿತ್ತು. ಈ ನಿಟ್ಟಿನಲ್ಲಿ ಛತ್ತೀಸ್‌ಗಢ ರಾಜಧಾನಿ ರಾಯ್ಪುರ ಎರಡನೇ ಸ್ಥಾನದಲ್ಲಿದ್ದು 64 ಅಂಕ ಗಳಿಸಿದೆ. ಉತ್ತರಾಖಂಡ್‌ ರಾಜಧಾನಿ ಡೆಹರಾಡೂನ್‌ ( 59) ಗೋವಾ ರಾಜಧಾನಿ ಪಣಜಿ (59) ನಂತರದ ಸ್ಥಾನದಲ್ಲಿದೆ. ಬೆಂಗಳೂರು ಹೊರತುಪಡಿಸಿ ಇತರ ದೊಡ್ಡ ನಗರಗಳು ಈ ಕೆಟಗರಿಯಲ್ಲಿ ವಿಫಲವಾಗಿವೆ. ಕೋಲ್ಕತಾ ಕೇವಲ 100ರಲ್ಲಿ 3 ಉತ್ತಮ ಉದ್ಯೋಗ ನೀಡಿದ್ದು, ಕಡಿಮೆ ಸ್ಕೋರ್‌ ಗಳಿಸಿದೆ. ಮುಂಬಯಿ 17ನೇ ಶ್ರೇಯಾಂಕ ಗಳಿಸಿದೆ. ಬಡತನದಲ್ಲಿ ಬಿಹಾರವೇ ಇಂದಿಗೂ ಮುಂದು, ಕರ್ನಾಟಕ ಮಧ್ಯಮ! ಹೊಸದಿಲ್ಲಿ: ದೇಶದಲ್ಲಿ ಅತಿ ಹೆಚ್ಚು ಪ್ರಮಾಣದ ಬಡವರು ಬಿಹಾರದಲ್ಲಿ ಇದ್ದಾರೆ ಎಂದು ನೀತಿ ಆಯೋಗದ ರಾಷ್ಟ್ರೀಯ ಬಹು ಆಯಾಮದ ಬಡತನ ಸೂಚ್ಯಂಕ (ಎಂಪಿಐ) ವರದಿ ತಿಳಿಸಿದೆ. ರಾಜ್ಯದ ಶೇ. 51.91ರಷ್ಟು ಜನಸಂಖ್ಯೆಯು ಬಡತನ ರೇಖೆಗಿಂತ ಕೆಳಗಿದ್ದು, ವಾರ್ಷಿಕ ಆದಾಯವು ಬಹಳ ಕಡಿಮೆಯಿದೆ. ಅತಿ ಹೆಚ್ಚು ಬಡವರು ಇರುವ ಎರಡನೇ ರಾಜ್ಯ ಜಾರ್ಖಂಡ್‌ ಆಗಿದ್ದು, ಶೇ. 42.16 ರಷ್ಟು ಜನರು ಬಡತನ ರೇಖೆ ಕೆಳಗಿದ್ದಾರೆ. ಮೂರನೇ ಸ್ಥಾನದಲ್ಲಿ ಉತ್ತರ ಪ್ರದೇಶವಿದೆ. ಇಲ್ಲಿ ಶೇ. 37.79ರಷ್ಟು ಜನರು ಬಡತನದ ಬೇಗೆಯಲ್ಲಿದ್ದಾರೆ. ನಂತರದ ಸ್ಥಾನಗಳಲ್ಲಿ ಮಧ್ಯಪ್ರದೇಶ, ಮೇಘಾಲಯ, ಅಸ್ಸಾಂ, ಛತ್ತೀಸ್‌ಗಢ, ರಾಜಸ್ಥಾನ ಹಾಗೂ ಒಡಿಶಾ ಇದೆ. ಕರ್ನಾಟಕದಲ್ಲಿ ಶೇ.13ರಷ್ಟು ಬಡವರು ನೀತಿ ಆಯೋಗದ ಸೂಚ್ಯಂಕದಲ್ಲಿ 19ನೇ ಸ್ಥಾನ ಪಡೆದಿರುವ ಕರ್ನಾಟಕದಲ್ಲಿ ಒಟ್ಟಾರೆ ಶೇ. 13.16ರಷ್ಟು ಜನಸಂಖ್ಯೆ ಬಡತನದಲ್ಲಿ ಬೇಯುತ್ತಿದೆ. ಆಯೋಗದ ವರದಿ ಪ್ರಕಾರ ಕೇವಲ ಹಣಗಳಿಕೆ, ಆಸ್ತಿಪಾಸ್ತಿಗಳನ್ನು ಮಾತ್ರವೇ ಬಡತನ ಎಂದು ಪರಿಗಣಿಸಲಾಗಿಲ್ಲ. ಬಹು ಆಯಾಮದ ಆಧಾರದಲ್ಲಿ ಜನರ ಜೀವನಶೈಲಿಯ ಅಧ್ಯಯನ ನಡೆಸಿ ಮಾಹಿತಿ ಕಲೆಹಾಕಿ ವರದಿ ಸಿದ್ಧಪಡಿಸಲಾಗಿದೆ.