90 ಕೋಟಿ ರೂ. ಆಸ್ತಿ ಕೇವಲ 9 ಕೋಟಿಗೆ ಮಾರಾಟ..! ತೆರಿಗೆ ವಂಚಿಸಿದ್ರಾ ಜಮೀರ್ ಅಹ್ಮದ್ ಖಾನ್..?
ಐಎಂಎ ಹಗರಣಕ್ಕೆ ಸಂಬಂಧಿಸಿದಂತೆ ಜಮೀರ್ ಅಹ್ಮದ್ ಖಾನ್ ಅವರಿಗೆ ಗುರುವಾರ ಬೆಳಗ್ಗೆ ಐಟಿ ಹಾಗೂ ಇಡಿ ತನಿಖಾ ಸಂಸ್ಥೆಗಳು ಶಾಕ್‌ ನೀಡಿವೆ. 90 ಕೋಟಿ ರೂಪಾಯಿ ಮೌಲ್ಯದ ನಿವೇಶನ ಕೇವಲ 9 ಕೋಟಿ ರೂಪಾಯಿಗೆ ಮನ್ಸೂರ್ ಖಾನ್‌ಗೆ ಮಾರಾಟ ಮಾಡಿರುವುದು ಇಡಿ ದಾಳಿಗೆ ಕಾರಣವಾಗಿದೆ ಎನ್ನಲಾಗಿದೆ.
Admin
0
8
ಐಎಂಎ ಹಗರಣಕ್ಕೆ ಸಂಬಂಧಿಸಿದಂತೆ ಗುರುವಾರ ಬೆಳ್ಳಂಬೆಳಗ್ಗೆಯೇ ಐಟಿ ಮತ್ತು ಇಡಿ ತನಿಖಾ ಸಂಸ್ಥೆಗಳು ಜಮೀರ್ ಅಹ್ಮದ್ ಖಾನ್ ಮತ್ತು ರೋಷನ್ ಬೇಗ್ ಅವರಿಗೆ ಶಾಕ್‌ ನೀಡಿವೆ. ಐಎಂಎ ಮಾಲೀಕ ಮನ್ಸೂರ್ ಖಾನ್ ಅವರಿಗೆ ಜಮೀರ್ ಖಾನ್ ತಮ್ಮ ರಿಚ್ಮಂಡ್ ಟೌನ್‌ನಲ್ಲಿರುವ ಆಸ್ತಿಯನ್ನು ಮಾರುಕಟ್ಟೆ ಮೌಲ್ಯಕ್ಕಿಂತ ಭಾರೀ ಕಡಿಮೆ ಬೆಲೆಗೆ ಮಾರಾಟ ಮಾಡಿರುವುದು ಇಡಿ ದಾಳಿಗೆ ಕಾರಣ ಎಂದು ಹೇಳಲಾಗುತ್ತಿದೆ.
ರಿಚ್ಮಂಡ್ ಟೌನ್ನಲ್ಲಿ ಶಾಸಕ ಜಮೀರ್ ಖಾನ್ ಅವರಿಗೆ ಸೇರಿದ 14,924 ಚದರ ಅಡಿ ನಿವೇಶನ ಇತ್ತು. ಐ ಮಾನಿಟರಿ ಅಡ್ವೈಸರಿ ಕಂಪನಿಯ ಮಾಲೀಕರಾಗಿದ್ದ ಮನ್ಸೂರ್ ಖಾನ್ ಅವರಿಗೆ ಇದನ್ನು 9.38 ಕೋಟಿ ರೂ.ಗೆ ಮಾರಾಟ ಮಾಡಿದ್ದರು. ಸರ್ಪೆಂಟೈನ್ ರಸ್ತೆಯಲ್ಲಿರುವ ಈ ಆಸ್ತಿಯ ಮಾರುಕಟ್ಟೆ ಮೌಲ್ಯ ಆಗ ಭರ್ತಿ 90 ಕೋಟಿ ರೂ. ಇತ್ತು ಎಂದು ಹೇಳಲಾಗಿದೆ.
ಅಷ್ಟು ದುಬಾರಿ ಆಸ್ತಿಯನ್ನು ಜಮೀರ್ ಖಾನ್ ಕೇವಲ 9.38 ಕೋಟಿ ರೂ.ಗೆ ಮಾರಾಟ ಮಾಡಿದ್ದು ಏಕೆ ಎಂಬ ಪ್ರಶ್ನೆಗೆ ಮಾತ್ರ ಉತ್ತರ ಸಿಕ್ಕಿಲ್ಲ. ತೆರಿಗೆ ವಂಚನೆಗಾಗಿ ಜಮೀರ್ ಖಾನ್ ಕಡಿಮೆ ಮೊತ್ತದ ಮಾರಾಟವನ್ನು ತೋರಿಸಿರಬಹುದು ಎಂಬುದು ತನಿಖಾ ಸಂಸ್ಥೆಗಳ ಸಂಶಯವಾಗಿದೆ. ಉಳಿದ 80 ಕೋಟಿ ರೂಪಾಯಿ ಅನ್ನು ಮನ್ಸೂರ್ ಖಾನ್ ಅವರಿಂದ ಹವಾಲಾ ರೂಪದಲ್ಲಿ ಜಮೀರ್ ಪಡೆದಿರಬಹುದು ಎನ್ನಲಾಗಿದೆ.
ಹವಾಲಾ ಮೂಲಕ ಜಮೀರ್ ಅವರು 80 ಕೋಟಿ ರೂ. ಹಣವನ್ನು ಪಡೆದಿರುವುದು ಸತ್ಯವಾಗಿದ್ದರೆ, ಆ ಹಣವನ್ನು ಎಲ್ಲೆಲ್ಲಿ ಹೂಡಿದ್ದಾರೆ ಎಂಬ ಮಾಹಿತಿಯನ್ನು ಇಡಿ ಅಧಿಕಾರಿಗಳು ಪಡೆಯುತ್ತಿದ್ದಾರೆ. ಐಎಂಎ ಹಗರಣದ ತನಿಖೆ ನಡೆಸುವ ವೇಳೆ ಪ್ರಮುಖ ಆರೋಪಿ ಮನ್ಸೂರ್ ಖಾನ್, ಜಮೀರ್ ಅಹಮದ್‌ ಖಾನ್, ರೋಷನ್ ಬೇಗ್ ಮತ್ತಿತರರ ಜೊತೆ ವ್ಯವಹಾರ ಹೊಂದಿದ್ದ ವಿಚಾರವನ್ನು ಒಪ್ಪಿಕೊಂಡಿದ್ದರು. ಈ ಹಿನ್ನೆಲೆ ಜಮೀರ್ ಖಾನ್ ಮೇಲೆ ಐಟಿ ಮತ್ತು ಇಡಿ ಅಧಿಕಾರಿಗಳ ರೇಡ್ ನಡೆದಿದೆ.
ಬೆಳಗ್ಗೆ ಆರು ಗಂಟೆ ಸುಮಾರಿಗೆ ಜಮೀರ್ ಅವರ ಮನೆಗೆ ಐಟಿ ಅಧಿಕಾರಿಗಳು ದಾಳಿ ನಡೆಸಿದ್ದು, ಇನೋವಾ ಕಾರ್‌ನಲ್ಲಿ ಬಂದಿರುವ ಆರು ಮಂದಿ ಅಧಿಕಾರಿಗಳು ಜಮೀರ್ ಮನೆಯಲ್ಲಿ ಶೋಧ ನಡೆಸುತ್ತಿದ್ದಾರೆ. ದಾಳಿ ವೇಳೆ ಜಮೀರ್ ಅಹ್ಮದ್‌ಖಾನ್‌ ಅವರು ಮನೆಯಲ್ಲೇ ಇದ್ದರು ಎಂದು ತಿಳಿದು ಬಂದಿದೆ. ಬೆಂಗಳೂರಿನಲ್ಲಿರುವ ಜಮೀರ್ ಅವರ ಮನೆ ಮತ್ತು ಕಚೇರಿಗಳ ಮೇಲೆ ದಾಳಿ ನಡೆಸಲಾಗಿದ್ದು, ಇದರ ಜೊತೆಗೆ ಯುಬಿ ಸಿ.ಟಿಯಲ್ಲಿರುವ ಜಮೀರ್ ಅವರ ಫ್ಲ್ಯಾಟ್‌ನಲ್ಲೂ ಅಧಿಕಾರಿಗಳು ಶೋಧ ನಡೆಸಿದ್ದಾರೆ.
