ಡಿಸೆಂಬರ್ ವೇಳೆಗೆ ಬೆಂಗಳೂರು ಜಗಮಗ; 4.85 ಲಕ್ಷ ಎಲ್‌ಇಡಿ ಬೀದಿ ದೀಪಗಳ ಅಳವಡಿಕೆ!

ನಾಗಪ್ಪ ನಾಗನಾಯಕನಹಳ್ಳಿ ಬೆಂಗಳೂರು: ರಾಜಧಾನಿಯಲ್ಲಿ ಸಾಂಪ್ರದಾಯಿಕ ಗಳ ಬದಲಿಗೆ ಎಲ್‌ಇಡಿ ದೀಪಗಳು ಝಗಮಗಿಸುವ ಕಾಲ ಕೊನೆಗೂ ಕೂಡಿ ಬಂದಿದೆ. ಬಿಬಿಎಂಪಿಗೆ ವಾರ್ಷಿಕ ನೂರಾರು ಕೋಟಿ ರೂ. ವಿದ್ಯುತ್‌ ಬಿಲ್‌ ಉಳಿಸುವಂತಹ ಮಹತ್ವಾಕಾಂಕ್ಷಿ ಯೋಜನೆಯು 3 ವರ್ಷಗಳ ಬಳಿಕ ಅನುಷ್ಠಾನಗೊಳ್ಳುತ್ತಿದೆ. '' ವ್ಯಾಪ್ತಿಯಲ್ಲಿ ಈ ವರ್ಷಾಂತ್ಯದೊಳಗೆ 1 ಲಕ್ಷ ಎಲ್‌ಇಡಿ ಬೀದಿ ದೀಪಗಳನ್ನು ಅಳವಡಿಸಲು ಗುತ್ತಿಗೆ ಪಡೆದ ಕಂಪನಿಯು ವಿಫಲವಾದಲ್ಲಿ ಟೆಂಡರ್‌ ರದ್ದುಪಡಿಸಬೇಕು. ಬಳಿಕ ಚಿಕ್ಕ ಪ್ಯಾಕೇಜ್‌ಗಳಲ್ಲಿ ಟೆಂಡರ್‌ ಆಹ್ವಾನಿಸಲು ಕ್ರಮ ಕೈಗೊಳ್ಳಬೇಕು'' ಎಂದು ಆ. 10 ನಡೆದ ಸಭೆಯಲ್ಲಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಪಾಲಿಕೆಯ ಮುಖ್ಯ ಆಯುಕ್ತ ಗೌರವ್‌ ಗುಪ್ತ ಅವರಿಗೆ ಸೂಚಿಸಿದ್ದರು. ಮುಖ್ಯಮಂತ್ರಿಗಳ ಖಡಕ್‌ ಸೂಚನೆ ಬೆನ್ನಲ್ಲೇ ಎಲ್‌ಇಡಿ ಬೀದಿ ದೀಪಗಳ ಅಳವಡಿಕೆ ಕಾರ್ಯ ಚುರುಕುಗೊಂಡಿದೆ. ಇದುವರೆಗೆ ಸುಮಾರು 2 ಸಾವಿರ ಎಲ್‌ಇಡಿ ದೀಪಗಳನ್ನು ಅಳವಡಿಸಲಾಗಿದೆ. ಹೊರವಲಯದ ರಾಜರಾಜೇಶ್ವರಿನಗರ, ಬೊಮ್ಮನಹಳ್ಳಿ ಮತ್ತು ದಾಸರಹಳ್ಳಿ ವಲಯದಲ್ಲಿ ಸ್ಮಾರ್ಟ್‌ ಎಲ್‌ಇಡಿ ಬೀದಿ ದೀಪದ ಯೋಜನೆಯನ್ನು ಜಾರಿಗೊಳಿಸಲಾಗುತ್ತಿದೆ. ಉಳಿದ ಹಂತಗಳಲ್ಲಿಇತರೆ ವಲಯಗಳಲ್ಲಿನ ವಾರ್ಡ್‌ಗಳಿಗೂ ವಿಸ್ತರಿಸಲು ನಿರ್ಧರಿಸಲಾಗಿದೆ. 3 ವರ್ಷಗಳ ಬಳಿಕ ಎಲ್‌ಇಡಿ ಬೆಳಕು ಪಾಲಿಕೆಯು 2018ರ ಜ. 11ರಂದು ಎಲ್‌ಇಡಿ ಬೀದಿ ದೀಪಗಳ ಅಳವಡಿಕೆ ಯೋಜನೆಗೆ ಟೆಂಡರ್‌ ಕರೆದಿತ್ತು. ಅದೇ ವರ್ಷದ ಆಗಸ್ಟ್‌ನಲ್ಲಿ ಕೌನ್ಸಿಲ್‌ ಸಭೆಯಲ್ಲಿ ಟೆಂಡರ್‌ಗೆ ಅನುಮೋದನೆ ನೀಡಲಾಯಿತು. ನಗರದಲ್ಲಿರುವ ಸೋಡಿಯಂ ದೀಪಗಳ ಬದಲಿಗೆ ಎಲ್‌ಇಡಿ ಬೀದಿ ದೀಪಗಳನ್ನು ಅಳವಡಿಸಲು ಶಾಪೂರ್ಜಿ ಪಲ್ಲೋಂಜಿ, ಎಸ್‌ಎಂಎಸ್‌ ಇನ್‌ಫ್ರಾಸ್ಟ್ರಕ್ಚರ್‌ ಮತ್ತು ಸಮುದ್ರ ಎಲೆಕ್ಟ್ರಾನಿಕ್ಸ್‌ ಸಿಸ್ಟಂ ಪ್ರೈವೆಟ್‌ ಲಿಮಿಟೆಡ್‌ಗಳ ಒಕ್ಕೂಟಕ್ಕೆ (ಎಸ್ಕೊ) ಗುತ್ತಿಗೆ ನೀಡಲಾಗಿದೆ. ಗುತ್ತಿಗೆ ಸಂಸ್ಥೆಗೆ ಹೊಸ ಎಲ್‌ಇಡಿ ಬೀದಿ ದೀಪಗಳ ಅಳವಡಿಕೆಗೆ 30 ತಿಂಗಳು ಗಡುವು ನೀಡಲಾಗಿತ್ತು. ಮೊದಲ ನಾಲ್ಕು ಹಂತಗಳಲ್ಲಿ ತಲಾ ಒಂದು ಲಕ್ಷ ಮತ್ತು ಐದನೇ ಹಂತದಲ್ಲಿ 85 ಸಾವಿರ ಎಲ್‌ಇಡಿ ಬಲ್ಬ್ ಗಳನ್ನು ಅಳವಡಿಸಬೇಕಿತ್ತು. ಎಲ್‌ಇಡಿ ದೀಪ ಅಳವಡಿಕೆ ಕಾರ್ಯ ಕೈಗೊಳ್ಳುವಂತೆ ಪಾಲಿಕೆಯು ಹಲವು ಸಲ ಸೂಚಿಸಿ, ಗಡುವು ನೀಡಿದ್ದರೂ ಒಂದೇ ಒಂದು ದೀಪವನ್ನೂ ಬೆಳಗಿಸಿರಲಿಲ್ಲ. ಸಿಎಂ ಅವರು ಕಟ್ಟುನಿಟ್ಟಿನ ಸೂಚನೆ ನೀಡಿದ ಬಳಿಕ ದೀಪ ಅಳವಡಿಕೆಯು ವೇಗ ಪಡೆದುಕೊಂಡಿದೆ. ನಗರದಲ್ಲಿ 4.85 ಲಕ್ಷ ಬೀದಿ ದೀಪ ಬೆಂಗಳೂರು ನಗರದಲ್ಲಿ 4.85 ಲಕ್ಷ ಬೀದಿ ದೀಪಗಳಿದ್ದು, ಇವುಗಳ ಬದಲಿಗೆ ಎಲ್‌ಇಡಿ ದೀಪಗಳನ್ನು ಅಳವಡಿಸಲಾಗುತ್ತಿದೆ. ಗುತ್ತಿಗೆ ಪಡೆದಿರುವ ಸಂಸ್ಥೆಗೆ ಈ ವರ್ಷಾಂತ್ಯದೊಳಗೆ 1 ಲಕ್ಷ ಎಲ್‌ಇಡಿ ದೀಪಗಳನ್ನು ಅಳವಡಿಸುವ ಗುರಿ ನೀಡಲಾಗಿದೆ. 10 ವರ್ಷಗಳ ಕಾಲ ಈ ಬೀದಿ ದೀಪಗಳ ಕಾರ್ಯಾಚರಣೆ ಮತ್ತು ನಿರ್ವಹಣೆ ಮಾಡಲಿದೆ. ಈ ಯೋಜನೆಗೆ ಪಾಲಿಕೆಯು ನಯಾಪೈಸೆ ಖರ್ಚು ಮಾಡುತ್ತಿಲ್ಲ. ಬದಲಿಗೆ ಗುತ್ತಿಗೆ ಪಡೆದ ಕಂಪೆನಿಯೇ ಎಲ್‌ಇಡಿ ದೀಪಗಳ ಅಳವಡಿಕೆ, ನಿರ್ವಹಣೆಗೆ 830 ಕೋಟಿ ರೂ. ಹೂಡಿಕೆ ಮಾಡುತ್ತಿದೆ. ಈ ಬಲ್ಬ್ ಗಳ ಬಳಕೆಯಿಂದ ಶೇ 85.50ರಷ್ಟು ವಿದ್ಯುತ್‌ ಉಳಿತಾಯವಾಗಲಿದೆ. ಇದರಿಂದ ಪಾಲಿಕೆಗೆ ಪ್ರತಿ ತಿಂಗಳ ವಿದ್ಯುತ್‌ ಬಿಲ್‌ನಲ್ಲಿ 17 ಕೋಟಿ ರೂ. ಉಳಿಯಲಿದೆ. ಈ ಪೈಕಿ 13.50 ಕೋಟಿ ರೂ.ಗಳನ್ನು ಕಂಪನಿಗೆ ಪಾವತಿಸಲಿದೆ. ವಿದ್ಯುತ್‌ ಶುಲ್ಕಕ್ಕಾಗಿ 204 ಕೋಟಿ ರೂ. ವೆಚ್ಚ ಬಿಬಿಎಂಪಿಯು ಬೀದಿ ದೀಪಗಳಿಗೆ ಪ್ರತಿ ತಿಂಗಳು 17 ಕೋಟಿ ರೂ.ನಂತೆ ವರ್ಷಕ್ಕೆ 204 ಕೋಟಿ ರೂ. ವಿದ್ಯುತ್‌ ಶುಲ್ಕ ಪಾವತಿ ಮಾಡುತ್ತಿದೆ. ಇದಲ್ಲದೆ, ಬೀದಿ ದೀಪಗಳ ನಿರ್ವಹಣೆಗೆ 50 ಕೋಟಿ ರೂ. ವ್ಯಯಿಸುತ್ತಿದೆ. ಶೇ 85.50ರಷ್ಟು ವಿದ್ಯುತ್‌ ಉಳಿತಾಯದ ಷರತ್ತಿನ ಮೇಲೆ ಗುತ್ತಿಗೆ ನೀಡಿದ್ದು, ಇದರಲ್ಲಿ ವಿಫಲವಾದರೆ ದಂಡ ವಿಧಿಸಲಾಗುತ್ತದೆ. ಕೇಂದ್ರೀಕೃತ ನಿಯಂತ್ರಣ ಕೊಠಡಿಯಿಂದಲೇ ಬೀದಿ ದೀಪಗಳ ನಿರ್ವಹಣೆ ಮಾಡಲಾಗುತ್ತದೆ. ಯಾವುದೇ ದೀಪದಲ್ಲಿ ಲೋಪ ಕಾಣಿಸಿಕೊಂಡರೂ ತಕ್ಷಣವೇ ತಿಳಿಯುತ್ತದೆ. ಇದರಿಂದ ತಕ್ಷಣ ದುರಸ್ತಿ ಸಾಧ್ಯವಾಗಲಿದೆ. ವಿದ್ಯುತ್‌ ಕಂಬಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳ ಅಳವಡಿಕೆಗೂ ವ್ಯವಸ್ಥೆ ಮಾಡಿಕೊಡಲಾಗುತ್ತಿದೆ. ''ಈಗಾಗಲೇ ಗುತ್ತಿಗೆ ಕಂಪನಿಯು 2 ಸಾವಿರ ಎಲ್‌ಇಡಿ ದೀಪಗಳನ್ನು ಅಳವಡಿಸಿದೆ. ಈ ವರ್ಷಾಂತ್ಯದೊಳಗೆ 1 ಲಕ್ಷ ಎಲ್‌ಇಡಿ ಬಲ್ಬ್ ಅಳವಡಿಸಬೇಕೆಂಬ ಗುರಿ ನೀಡಲಾಗಿದೆ. 2022ರ ಅಂತ್ಯದೊಳಗೆ ಎಲ್ಲ4.85 ಲಕ್ಷ ಬೀದಿ ದೀಪಗಳು ಎಲ್‌ಇಡಿ ದೀಪಗಳಾಗಿ ಬದಲಾಗಲಿವೆ,''. ಮನೋಜ್‌ ಜೈನ್‌, ವಿಶೇಷ ಆಯುಕ್ತ (ಯೋಜನೆ), ಬಿಬಿಎಂಪಿ