ಆಮ್ಲಜನಕ ಬೇಡಿಕೆ ಇಳಿಮುಖ, ಕೈಗಾರಿಕೆಗಳಿಗೆ 400 ಮೆ. ಟನ್‌ ಆಕ್ಸಿಜನ್‌ - ಶೆಟ್ಟರ್‌

ಹುಬ್ಬಳ್ಳಿ: ರಾಜ್ಯಕ್ಕೆ 1200 ಮೆಟ್ರಿಕ್‌ ಟನ್‌ ಆಕ್ಸಿಜನ್‌ ಕೋಟಾ ನಿಗದಿಯಾಗಿದೆ. ಇದರಲ್ಲಿ500 ಮೆಟ್ರಿಕ್‌ ಟನ್‌ ಆಕ್ಸಿಜನ್‌ ಕೋವಿಡ್‌ ನಿರ್ವಹಣೆಗಾಗಿ ಇಟ್ಟುಕೊಂಡು, 400 ಮೆಟ್ರಿಕ್‌ ಟನ್‌ ಆಕ್ಸಿಜನ್‌ ಕೈಗಾರಿಕೆಗಳಿಗೆ ನೀಡಲು ಆದೇಶಿಸಲಾಗಿದೆ ಎಂದು ಬೃಹತ್‌ ಸಚಿವ ಜಗದೀಶ ಶೆಟ್ಟರ ತಿಳಿಸಿದ್ದಾರೆ. ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ''ಜಿಲ್ಲಾಧಿಕಾರಿಗಳು ಆದ್ಯತೆ ಮೇರೆಗೆ ಆಕ್ಸಿಜನ್‌ ಹಂಚಿಕೆ ಮಾಡಲಿದ್ದಾರೆ. ಈವರೆಗೂ ಯಾವ ಕೈಗಾರಿಕೆಗಳು ಆಕ್ಸಿಜನ್‌ ಕೊರತೆ ಕುರಿತು ದೂರು ನೀಡಿಲ್ಲ. ಎಲ್ಲಾ ಕೈಗಾರಿಕೆಗಳಿಗೂ ಆಕ್ಸಿಜನ್‌ ಸರಬರಾಜು ಆಗುತ್ತಿದೆ'' ಎಂದರು. ''ಇನ್ವೆಸ್ಟ್‌ ಕರ್ನಾಟಕ ಸಮ್ಮೇಳನದ ನಿರ್ಣಯದಂತೆ ಯಪ್ಲೇಕ್ಸ್‌ ಕಂಪನಿಗೆ ಮಮ್ಮಿಗಟ್ಟಿ ಬಳಿ 50 ಎಕರೆ ಜಮೀನು ಮಂಜೂರು ಮಾಡಲಾಗಿದೆ. ಲಾಕ್‌ಡೌನ್‌ ಮಧ್ಯೆಯೂ ಕಂಪನಿ ಜಮೀನು ಅಭಿವೃದ್ಧಿ ಕಾರ್ಯ ಕೈಗೊಂಡಿದ್ದು, ಶೀಘ್ರದಲ್ಲೇ ಕಂಪನಿ ತನ್ನ ಕಾರ್ಯಾಚರಣೆ ಆರಂಭಿಸಲಿದೆ'' ಎಂದರು. ''ಏಕಸ್‌ ಸಂಸ್ಥೆಗೆ 358 ಎಕರೆ ಜಮೀನು ನೀಡಲಾಗಿದೆ. ರಾಜೇಶ್‌ ಎಕ್ಸ್‌ಪೋರ್ಟ್‌ಗೆ 150 ಎಕರೆ ಜಮೀನನ್ನು ಬೇಲೂರು ಕೈಗಾರಿಕಾ ಪ್ರದೇಶದಲ್ಲಿ ಮಂಜೂರು ಮಾಡಲಾಗಿದೆ. ಈ ಕಂಪನಿಗಳಿಂದ 25 ಸಾವಿರ ಕೋಟಿ ಬಂಡವಾಳ ಹೂಡಿಕೆ ಆಗಲಿದೆ. ಇದಕ್ಕೆ ಪೂರಕವಾಗಿ ಹಲವು ಕೈಗಾರಿಕೆಗಳು ಚಿಗುರೊಡೆಯಲಿವೆ," ಎಂದು ತಿಳಿಸಿದರು. ''ಎಫ್‌ಎಂಸಿಜಿ ವಲಯಕ್ಕೆ ನೀಡಬೇಕಾದ ವಿನಾಯಿತಿಗಳ ಕುರಿತು ಹಣಕಾಸು ಇಲಾಖೆಯೊಂದಿಗೆ ಚರ್ಚಿಸಲಾಗುತ್ತಿದೆ. ಇನ್ಫೋಸಿಸ್‌ 230 ಕೋಟಿ ವೆಚ್ಚದಲ್ಲಿ ಕ್ಯಾಂಪಸ್‌ ಅಭಿವೃದ್ಧಿ ಪಡಿಸಿದ್ದು, ಕಾರ್ಯಾಚರಣೆ ಆರಂಭಿಸಿದರೆ ಹುಬ್ಬಳ್ಳಿಯಲ್ಲಿಐಟಿ ಕಂಪನಿಗಳ ಹೂಡಿಕೆ ಹೆಚ್ಚಲಿದೆ," ಎಂದು ಶೆಟ್ಟರ್‌ ಮಾಹಿತಿ ನೀಡಿದರು.