ಆದಾಯ ತೆರಿಗೆದಾರರಿಗೆ ಬಿಗ್‌ ರಿಲೀಫ್‌: 15CA, 15CB ಫಾರ್ಮ್‌ ಸಲ್ಲಿಕೆಗೆ ಗಡುವು ವಿಸ್ತರಣೆ!

ಹೊಸದಿಲ್ಲಿ: ಆದಾಯ ತೆರಿಗೆದಾರರಿಗೆ ಕೇಂದ್ರೀಯ ನೇರ ತೆರಿಗೆ ಮಂಡಳಿ (ಸಿಬಿಡಿಟಿ) ಮಂಗಳವಾರ ಬಿಗ್‌ ರಿಲೀಫ್‌ ನೀಡಿದೆ. ಫಾರ್ಮ್ ನಂಬರ್‌ 15 ಸಿಎ ಮತ್ತು 15 ಸಿಬಿ ಮೂಲಕ ಸಲ್ಲಿಕೆಯ ಗಡುವನ್ನ ಆಗಸ್ಟ್‌ 15ಕ್ಕೆ ವಿಸ್ತರಿಸಲಾಗಿದೆ. ಈ ಮೊದಲು ಜುಲೈ 15 ಕಡೇ ದಿನಾಂಕವಾಗಿತ್ತು. ಆದಾಯ ತೆರಿಗೆ ಕಾಯ್ದೆ, 1961 ರ ಪ್ರಕಾರ, ಈ ಎರಡೂ ನಮೂನೆ (ಫಾರಂ)ಗಳನ್ನ ಡಿಜಿಟಲ್‌ ರೂಪದಲ್ಲಿ ಸಲ್ಲಿಸಬೇಕಾಗುತ್ತದೆ. ಯಾವುದೇ ವಿದೇಶಿ ಡೀಲರ್‌ಗೆ ಆದಾಯ ತೆರಿಗೆ ಪ್ರತಿಯನ್ನು ಕಳಿಸುವ ಮೊದಲು ಫಾರ್ಮ್ 15 ಸಿಎ ಅನ್ನು ಅಪ್‌ಲೋಡ್ ಮಾಡಬೇಕಾಗುತ್ತದೆ. ಅಗತ್ಯವಿದ್ದರೆ ಚಾರ್ಟರ್ಡ್ ಅಕೌಂಟೆಂಟ್‌ನ ಪ್ರಮಾಣಪತ್ರದೊಂದಿಗೆ ಫಾರ್ಮ್ 15 ಸಿಬಿಯನ್ನು ಅಪ್ಲೋಡ್‌ ಮಾಡಬೇಕು. ಫಾರ್ಮ್ 15 ಸಿಎ ಮತ್ತು 15 ಸಿಬಿ ಎಂದರೇನು? ವಿದೇಶಕ್ಕೆ ಹಣವನ್ನ ಕಳುಹಿಸುವ ವ್ಯಕ್ತಿಯು ಸ್ವೀಕರಿಸುವವರಿಂದ ಪಡೆದ ಪಾವತಿಯ ಮೇಲಿನ ತೆರಿಗೆ ಹೊಣೆಗಾರಿಕೆಯನ್ನ ಖಚಿತಪಡಿಸಿಕೊಳ್ಳಲು ಫಾರ್ಮ್ 15 ಸಿಎ ಅನ್ನು ಭರ್ತಿ ಮಾಡಬೇಕು. ಫಾರ್ಮ್ 15 ಸಿಬಿಯಲ್ಲಿ ಚಾರ್ಟರ್ಡ್ ಅಕೌಂಟೆಂಟ್ ಸಹಿ ಅಗತ್ಯವಿದೆ. ಈ ಡಾಕ್ಯುಮೆಂಟ್ ನೀವು ಯಾವ ರೀತಿಯ ತೆರಿಗೆಯನ್ನ ಪಾವತಿಸುತ್ತಿದ್ದೀರಿ ಮತ್ತು ನಿಮ್ಮ ತೆರಿಗೆ ದರ ಎಷ್ಟು ಎಂಬುದನ್ನ ತೋರಿಸುತ್ತದೆ. ಫಾರ್ಮ್ 15 ಸಿಎ ಭರ್ತಿ ಮಾಡುವಾಗ ಫಾರ್ಮ್ 15 ಸಿಬಿಯ ಕೆಲವು ವಿವರಗಳು ಅಗತ್ಯವಿದೆ. 15 ಸಿಎ ಮತ್ತು 15 ಸಿಬಿ ಸಲ್ಲಿಸಲು ಹೊಸ ಗಡುವು..! ಆದಾಯ ತೆರಿಗೆ ಇಲಾಖೆ www.incometax.gov.in ನ ಹೊಸ ಪೋರ್ಟಲ್‌ನಲ್ಲಿ ಫಾರ್ಮ್ 15 ಸಿಎ / 15 ಸಿಬಿ ಇ-ಫೈಲಿಂಗ್‌ ಮಾಡುವಲ್ಲಿ ಹಲವು ತೊಂದರೆಗಳು ಕಾಣಿಸಿಕೊಂಡಿದ್ದವು. ಈ ಹಿನ್ನೆಲೆಯಲ್ಲಿ ಸಿಬಿಡಿಟಿ ಪರಿಹಾರ ನೀಡಿದೆ. ಇದೀಗ ಕಡೇ ದಿನಾಂಕವನ್ನು ಆಗಸ್ಟ್ 15 ಕ್ಕೆ ವಿಸ್ತರಿಸಲಾಗಿದೆ. ಗಡುವು ವಿಸ್ತರಿಸಿದ್ದು ಏಕೆ? ಆದಾಯ ತೆರಿಗೆ ಇಲಾಖೆಯ ಹೊಸ ಇ-ಫೈಲಿಂಗ್ ವೆಬ್‌ಸೈಟ್ https://incometax.gov.in ಅನ್ನು ಪ್ರಾರಂಭಿಸಿದಾಗಿನಿಂದ, ತೆರಿಗೆದಾರರು ಇದರ ಬಗ್ಗೆ ದೂರು ನೀಡುತ್ತಿದ್ದಾರೆ ಎಂದು ತೆರಿಗೆ ತಜ್ಞರು ಹೇಳುತ್ತಾರೆ. ಅದಕ್ಕಾಗಿಯೇ ಅದರ ಗಡುವನ್ನು ಹೆಚ್ಚಿಸುವುದಾಗಿ ಘೋಷಿಸಲಾಗಿದೆ. ಆದಾಯ ತೆರಿಗೆ ಕಾಯ್ದೆ 1961 ರ ಪ್ರಕಾರ, ಫಾರ್ಮ್ 15 ಸಿಎ / 15 ಸಿಬಿ ಅನ್ನು ಆನ್‌ಲೈನ್‌ನಲ್ಲಿ ಭರ್ತಿ ಮಾಡಬೇಕಾಗುತ್ತದೆ. ಪ್ರಸ್ತುತ, ತೆರಿಗೆದಾರರು ವಿದೇಶಿ ರವಾನೆಯ ಸಂದರ್ಭದಲ್ಲಿ ಇ-ಫೈಲಿಂಗ್ ಪೋರ್ಟಲ್‌ನಲ್ಲಿ ಫಾರ್ಮ್ 15 ಸಿಎ ಮತ್ತು ಫಾರ್ಮ್ 15 ಸಿಬಿಯಲ್ಲಿ ಚಾರ್ಟರ್ಡ್ ಅಕೌಂಟೆಂಟ್ ಪ್ರಮಾಣಪತ್ರವನ್ನು (ಅಗತ್ಯವಿರುವ ಕಡೆ) ಅಪ್‌ಲೋಡ್ ಮಾಡಬೇಕಾಗುತ್ತದೆ. ಇದರ ನಂತರ, ಈ ನಕಲನ್ನು ಅಧಿಕೃತ ವ್ಯಾಪಾರಿಗಳಿಗೆ ಸಲ್ಲಿಸಬೇಕು.