ತನ್ನದೇ ರಾಕೆಟ್‌ನಲ್ಲಿ ಬಾಹ್ಯಾಕಾಶ ಯಾತ್ರೆ ನಡೆಸಿದ ವಿಶ್ವದ ಸಿರಿವಂತ ಜೆಫ್‌ ಬಿಜೋಸ್‌!
ಜಗತ್ತಿನ ಅತ್ಯಂತ ಸಿರಿವಂತ ವ್ಯಕ್ತಿ, ಅಮೆಜಾನ್‌ನ ಜೆಫ್‌ ಬಿಜೋಸ್‌ ತಮ್ಮ ಬ್ಲ್ಯೂ ಒರಿಜಿನ್‌ ರಾಕೆಟ್‌ನಲ್ಲಿ ಬಾಹ್ಯಾಕಾಶಕ್ಕೆ ತೆರಳಿ 11 ನಿಮಿಷಗಳ ಯಾತ್ರೆ ಮುಗಿಸಿ ಮಂಗಳವಾರ ಸುರಕ್ಷಿತವಾಗಿ ಭೂಮಿಗೆ ಮರಳಿ ಹೊಸ ದಾಖಲೆಯೊಂದನ್ನು ನಿರ್ಮಿಸಿದ್ದಾರೆ.
Admin
0
7
ವಾಷಿಂಗ್ಟನ್‌: ಜಗತ್ತಿನ ಅತ್ಯಂತ ಸಿರಿವಂತ ವ್ಯಕ್ತಿ ಅಮೆಜಾನ್‌ನ ಮಂಗಳವಾರ ತಮ್ಮ ರಾಕೆಟ್‌ನಲ್ಲಿ ಬಾಹ್ಯಾಕಾಶಕ್ಕೆ ತೆರಳಿ 11 ನಿಮಿಷಗಳ ಯಾತ್ರೆ ಮುಗಿಸಿ ಸುರಕ್ಷಿತವಾಗಿ ಭೂಮಿಗೆ ಮರಳಿದ್ದಾರೆ.
ಇದು ಬ್ಲ್ಯೂ ಒರಿಜಿನ್‌ನ ಮೊದಲ ಮಾನವ ಸಹಿತ ಉಡಾವಣೆಯಾಗಿದ್ದು, ಮೊದಲ ಯತ್ನದಲ್ಲೇ ಯಶಸ್ವಿಯಾಗಿದೆ.
ವೆಸ್ಟ್‌ ಟೆಕ್ಸಾಸ್‌ ಮರುಭೂಮಿಯಲ್ಲಿರುವ ಉಡಾವಣಾ ಕೇಂದ್ರದಿಂದ ಸ್ಥಳೀಯ ಕಾಲಮಾನ ಬೆಳಿಗ್ಗೆ 8.12ಕ್ಕೆ ರಾಕೆಟ್‌ ನಭದತ್ತ ಚಿಮ್ಮಿತು. ಗಂಟೆಗೆ 3,700 ಕಿಲೋ ಮೀಟರ್‌ ವೇಗದಲ್ಲಿ ಜೆಫ್‌ ಬಿಜೋಸ್‌, ಅವರ ಸಹೋದರ ಮಾರ್ಕ್‌ ಬೆಜೋಸ್‌ ಹಾಗೂ ಹಿರಿಯ ಪೈಲಟ್‌ ವಲ್ಲಿ ಫಂಕ್‌ ಹಾಗೂ ಡಚ್‌ ವಿದ್ಯಾರ್ಥಿ ಒಲಿವರ್‌ ಡೀಮನ್‌ರನ್ನು ಹೊತ್ತ ರಾಕೆಟ್‌ ಬಾಹ್ಯಾಕಾಶಕ್ಕೆ ತೆರಳಿ 11 ನಿಮಿಷಗಳ ಬಳಿಕ ಭೂಮಿಗೆ ಮರಳಿತು.
ಈ ರಾಕೆಟ್‌ ಕರ್ಮನ್‌ ಲೈನ್‌ ದಾಟಿ ಮುನ್ನುಗ್ಗಿತ್ತು. ಕರ್ಮನ್‌ ಲೈನ್‌ ಎನ್ನುವುದು ಭೂಮಿ ಮತ್ತು ಬಾಹ್ಯಾಕಾಶವನ್ನು ವಿಭಜಿಸುವ ಗಡಿಯಾಗಿದೆ. ಅಂತಾರಾಷ್ಟ್ರೀಯ ಮಾನ್ಯತೆ ಪಡೆದಿರುವ ಈ ಗಡಿ 100 ಕಿಲೋ ಮೀಟರ್‌ ಎತ್ತರದಲ್ಲಿದೆ.
ನಿಗದಿತ ಗುರಿ ಮುಟ್ಟಿದ ನಂತರ ರಾಕೆಟ್‌ ವೆಸ್ಟ್‌ ಟೆಕ್ಸಾಸ್‌ನ ಮರುಭೂಮಿಯಲ್ಲಿ ಬಂದಿಳಿಯಿತು. ಮೂರು ಬೃಹತ್‌ ಪ್ಯಾರಾಶೂಟ್‌ಗಳು ಹಾಗೂ ರೆಟ್ರೋ ಥ್ರಸ್ಟರ್‌ಗಳು ಜೆಫ್‌ ಬಿಜೋಸ್‌ ಹಾಗೂ ಇತರರನ್ನು ಸುರಕ್ಷಿತವಾಗಿ ಭೂಮಿಗೆ ಇಳಿಸಿದವು.
