ಅಂಚೆ ಬ್ಯಾಂಕ್‌ನಲ್ಲಿ ನಗದು ಜಮೆ, ಹಿಂತೆಗೆತಕ್ಕಿದೆ ಜಿಎಸ್‌ಟಿ ಸಹಿತ ಶುಲ್ಕ, ಜನತೆಗೆ ಸಂಕಷ್ಟ!

• ಎಸ್‌. ಜಿ. ಕುರ್ಯ, ಉಡುಪಿ

ಇಂಡಿಯ ಪೋಸ್ಟಲ್‌ ಪೇಮೆಂಟ್ಸ್‌ (ಐಪಿಪಿಬಿ) ಖಾತೆಗೆ ಹೊಸ ವರ್ಷದಿಂದ ನಗದು ಜಮೆ, ನಗದು ಹಿಂತೆಗೆದರೆ ಗ್ರಾಹಕರು ನಿಗದಿತ ಶುಲ್ಕ ಮಾತ್ರವಲ್ಲ ಅದರ ಮೇಲೆ ಜಿಎಸ್‌ಟಿಯನ್ನೂ ಪಾವತಿಸಬೇಕು! ಎಟಿಎಂ ಕಾರ್ಡ್‌, ಆನ್‌ಲೈನ್‌ ಸಹಿತವಾದ ಐಪಿಪಿಬಿ ವ್ಯವಹಾರವನ್ನು ಅಂಚೆ ಕಚೇರಿಯಲ್ಲಿ ಉಳಿತಾಯ ಖಾತೆ ತೆರೆದು ಅಥವಾ ತೆರೆಯದೆಯೂ ಮಾಡಬಹುದು. ದೇಶದಲ್ಲಿ ಪ್ರಸ್ತುತ 5.5 ಕೋಟಿ ಗ್ರಾಹಕರು 52,600 ಕೋಟಿ ರೂ. ಠೇವಣಿಯನ್ನು ಐಪಿಪಿಬಿಯಲ್ಲಿ ಹೊಂದಿದ್ದು ನಗದು ಬದಲು ಆನ್‌ಲೈನ್‌ ವ್ಯವಹಾರಕ್ಕೆ ಉತ್ತೇಜಿಸುವುದು ಡಿಜಿಟಲ್‌ ಇಂಡಿಯಾದ ನೆಲೆಯಲ್ಲಿ ಕೇಂದ್ರ ಸರಕಾರದ ಗುರಿಯಾಗಿದೆ. ಐಪಿಪಿಬಿಯಲ್ಲಿ ಮಕ್ಕಳು ಮತ್ತು ಬಡವರಿಗೆ ಉಳಿತಾಯ ಉತ್ತೇಜನದ ನಿಟ್ಟಿನಲ್ಲಿ ಬೇಸಿಕ್‌ ಸೇವಿಂಗ್ಸ್‌ ಅಕೌಂಟ್‌ ತೆರೆಯಲಾಗುತ್ತಿದ್ದು ತಿಂಗಳಿಗೆ ನಾಲ್ಕು ಬಾರಿ ನಗದು ಹಿಂತೆಗೆತ ಉಚಿತವಿದೆ. ತಿಂಗಳಿಗೆ ನಾಲ್ಕಕ್ಕಿಂತ ಹೆಚ್ಚಿನ ಪ್ರತಿ ವ್ಯವಹಾರಕ್ಕೆ 25 ರೂ. ಶುಲ್ಕ ವಿಧಿಸಲಾಗುತ್ತಿದ್ದು ಇದು ಜಿಎಸ್‌ಟಿ /ಸೆಸ್‌ ಒಳಗೊಂಡಿದೆ. ನಗದು ಠೇವಣಿ ಉಚಿತವಿದೆ. ಸೇವಿಂಗ್ಸ್‌ (ಬೇಸಿಕ್‌ ಸೇವಿಂಗ್ಸ್‌ ಅಕೌಂಟ್‌ ಹೊರತು) ಮತ್ತು ಕರೆಂಟ್‌ ಅಕೌಂಟ್‌ನಿಂದ ನಗದು ಹಿಂತೆಗೆತ ತಿಂಗಳಿಗೆ 25,000ರೂ. ತನಕ ಉಚಿತವಿದೆ. ತಿಂಗಳಲ್ಲಿ 25,000ರೂ. ಗಳಿಗಿಂತ ಮೇಲಿನ ಪ್ರತಿ ವ್ಯವಹಾರಕ್ಕೆ 25 ರೂ. ಶುಲ್ಕವಿದೆ. ನಗದು ಠೇವಣಿ ಪ್ರತಿ ತಿಂಗಳಿಗೆ ಗರಿಷ್ಠ 10,000ರೂ. ತನಕ ಉಚಿತವಿದ್ದು ಅದಕ್ಕಿಂತ ಹೆಚ್ಚಿನ ಪ್ರತಿ ವ್ಯವಹಾರಕ್ಕೆ 25 ರೂ. ಶುಲ್ಕ ವಿಧಿಸಲಾಗುತ್ತಿದೆ. ಐಪಿಪಿಬಿ ಮೂಲಕ ಪಿಪಿಎಫ್‌, ಆರ್‌ಡಿ, ಎಸ್‌ಎಸ್‌ಎ (ಸುಕನ್ಯಾ) ತಿಂಗಳ ಕಂತು ಪಾವತಿಸಬಹುದು. ಮೂರು ತಿಂಗಳಲ್ಲಿ ಪಿಎಲ್‌ಐ ಯೋಜನೆಯ ಕಂತು ಪಾವತಿಯೂ ಸಾಧ್ಯವಾಗಲಿದೆ. ಆರ್‌ಬಿಐ ಮಾರ್ಗದರ್ಶಿ ಸೂತ್ರದ ನೆಪದಲ್ಲಿ ಕೆಲ ರಾಷ್ಟ್ರೀಕೃತ ಬ್ಯಾಂಕ್‌, ಖಾಸಗಿ ಬ್ಯಾಂಕುಗಳು ಈಗಾಗಲೇ ನಿಗದಿಗಿಂತ ಹೆಚ್ಚಿನ ನಗದು ಠೇವಣಿ, ಹಿಂತೆಗೆತಕ್ಕೆ ಸದ್ದಿಲ್ಲದೆ ಶುಲ್ಕ ವಿಧಿಸುತ್ತಿವೆ. ಐಪಿಪಿಬಿ ಸ್ಥಾಪನೆಗೆ ಕೇಂದ್ರ ಸರಕಾರ 1,435 ಕೋಟಿ ರೂ. ವಿನಿಯೋಗಿಸಿದ್ದು 650 ಶಾಖೆ, 3,250 ಅಂಚೆ ಕಚೇರಿಗಳಲ್ಲಿ ಮೊದಲ ಹಂತದ ಬ್ಯಾಂಕಿಂಗ್‌ ಯೋಜನೆ ಜಾರಿಗೆ ಬಂದಿದ್ದು 10,000 ಪೋಸ್ಟ್‌ಮನ್‌ಗಳು ಬ್ಯಾಂಕಿಂಗ್‌ ಸೇವಾ ವ್ಯಾಪ್ತಿಯಲ್ಲಿದ್ದಾರೆ. ಐಪಿಪಿಬಿ ಇಟ್ಟ ಹೆಜ್ಜೆ ಮುಂದಿನ ದಿನಗಳಲ್ಲಿ ನಗದು ಜಮೆ, ಹಿಂತೆಗೆತಕ್ಕೆ ಶುಲ್ಕ ಅಳವಡಿಸದ ರಾಷ್ಟ್ರೀಕೃತ, ವಾಣಿಜ್ಯ, ಖಾಸಗಿ ಬ್ಯಾಂಕ್‌ಗಳಿಗೆ ಮಾದರಿಯಾಗಲಿದೆ. ಮೊಬೈಲ್‌, ಆನ್‌ಲೈನ್‌ ಬ್ಯಾಂಕಿಂಗ್‌ನಲ್ಲಿ ಪಳಗದವರು, ಅನಕ್ಷರಸ್ಥರು ಸಂಕಷ್ಟಕ್ಕೀಡಾಗಲಿದ್ದಾರೆ. ಐಪಿಪಿಬಿಯಲ್ಲಿ ನಿಗದಿಗಿಂತ ಹೆಚ್ಚಿನ ನಗದು ಠೇವಣಿ, ಹಿಂತೆಗೆತ ಹೊರತು ಉಳಿದ ವ್ಯವಹಾರಕ್ಕೆ ಯಾವುದೇ ಶುಲ್ಕವಿಲ್ಲ. ನಗದು ಅವಲಂಬನೆ ಬದಲು ಆನ್‌ಲೈನ್‌ ವ್ಯವಹಾರವನ್ನು ಜನರು ಹೆಚ್ಚೆಚ್ಚು ಮಾಡಲು ಪ್ರೋತ್ಸಾಹ ನೀಡುವ ನಿಟ್ಟಿನಲ್ಲಿ ಹೊಸ ನೀತಿ ಹೊಸ ವರ್ಷದಿಂದ ಜಾರಿಗೆ ತರಲಾಗುತ್ತಿದೆ ಎನ್ನುತ್ತಾರೆ ಉಡುಪಿ ಅಂಚೆ ವಿಭಾಗದ ಐಪಿಪಿಬಿ ಅಧಿಕಾರಿ. ಆರ್‌ಬಿಐ ನೀತಿಯಂತೆ ಬ್ಯಾಂಕುಗಳಲ್ಲಿ ನಗದು ಠೇವಣಿ, ಹಿಂತೆಗೆತಕ್ಕೆ ಸಂಬಂಧಿಸಿ ವಿಭಿನ್ನ ಸೂತ್ರವಿದೆ. ಪಿಎಂಜೆಡಿವೈ (ಜನಧನ್‌) ಖಾತೆ ತೆರೆದು ವ್ಯವಹರಿಸುವವರು ನಿಗದಿತ ಮೊತ್ತ ಇಡಬೇಕು. ತಿಂಗಳಲ್ಲಿ ನಾಲ್ಕು ವಿದ್‌ಡ್ರಾ ಮಾಡಬಹುದು. ಇನ್ನು ಎಫ್‌ಡಿ ಅಕೌಂಟಲ್ಲಿ ಒಂದು ಲಕ್ಷ ರೂ. ದಿನಕ್ಕೆ ಕಟ್ಟೋದಾದರೆ ಉಚಿತ, ಒಂದು ಲಕ್ಷ ರೂ. ಮೇಲೆ ಪ್ರತಿ ಬಂಡಲಿಗೆ 20ರೂ. ಶುಲ್ಕವಿದೆ ಎಂದು ಮಾಹಿತಿ ನೀಡುತ್ತಾರೆ ಉಡುಪಿಯ ಲೀಡ್‌ ಡಿಸ್ಟ್ರಿಕ್ಟ್ ಕೆನರಾ ಬ್ಯಾಂಕ್‌ನ ಮುಖ್ಯ ಪ್ರಬಂಧಕರಾದ ಪಿ. ಎಂ. ಪಿಂಜಾರ.