RBI ಮಹತ್ವದ ನಿರ್ಧಾರ: ರೆಪೋ, ರಿವರ್ಸ್ ರೆಪೋ ದರಗಳಲ್ಲಿ ಯಥಾಸ್ಥಿತಿ

ಹೊಸದಿಲ್ಲಿ: ಭಾರತಿಐ ರಿಸರ್ವ್ ಬ್ಯಾಂಕ್ ರೆಪೋ ದರದಲ್ಲಿ ಯಾವುದೇ ಬದಲಾವಣೆ ಮಾಡದೆ ಇರಲು ನಿರ್ಧರಿಸಿದೆ. ಕೋವಿಡ್ 19 ಎರಡನೆಯ ಅಲೆಯ ಕಾರಣದಿಂದ ದೇಶದ ಆರ್ಥಿಕತೆಯಲ್ಲಿ ಚೇತರಿಕೆ ಉಂಟಾಗದ ಹಿನ್ನೆಲೆಯಲ್ಲಿ ಅನುಕೂಲಕರ ನಿಲುವನ್ನು ಉಳಿಸಿಕೊಳ್ಳಲು ರೆಪೋ ದರವನ್ನು ಶೇ 4ರಲ್ಲಿಯೇ ಮುಂದುವರಿಸುತ್ತಿರುವುದಾಗಿ ಶುಕ್ರವಾರ ತಿಳಿಸಿದೆ. ಹಣಕಾಸು ನೀತಿ ಸಮಿತಿ (ಎಂಪಿಸಿ) ಜತೆ ಬುಧವಾರ ಆರಂಭಿಸಿದ್ದ ದ್ವೈಮಾಸಿಕ ಪರಾಮರ್ಶನಾ ಸಭೆಯ ಅಂತ್ಯದ ಬಳಿಕ ಗವರ್ನರ್ ಈ ಘೋಷಣೆ ಮಾಡಿದ್ದಾರೆ. ರಿವರ್ಸ್ ರೆಪೋವನ್ನು ಕೂಡ ಶೇ 3.35ರಲ್ಲಿ ಉಳಿಸಿಕೊಳ್ಳಲಾಗಿದ್ದು, ಯಾವುದೇ ಬದಲಾವಣೆ ಮಾಡಿಲ್ಲ. 'ದೇಶದ ಕೆಲವು ಭಾಗಗಳಲ್ಲಿ ಸೋಂಕಿನ ಪ್ರಮಾಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಮೂರನೇ ಅಲೆಯ ಸಾಧ್ಯತೆಯ ಕುರಿತು ನಾವು ಹೆಚ್ಚು ಜಾಗರೂಕತೆಯಿಂದ ಇರಬೇಕಿದೆ. ನಮ್ಮ ರಕ್ಷಣೆಯ ಗುರಾಣಿಯನ್ನು ಕೆಳಕ್ಕಿಳಿಸದೆ ಇರುವುದು ಈ ಸಮಯದ ಅಗತ್ಯವಾಗಿದೆ' ಎಂದು ಶಕ್ತಿಕಾಂತ ದಾಸ್ ಹೇಳಿದ್ದಾರೆ. ಈ ನಿರ್ಧಾರದೊಂದಿಗೆ ಆರ್‌ಬಿಐ ತನ್ನ ಪ್ರಮುಖ ಮಾನದಂಡದ ದರವನ್ನು ಏಳನೇ ಬಾರಿಗೆ ಬದಲಾವಣೆ ಮಾಡದೆ ಉಳಿಸಿಕೊಂಡಿದೆ. 2020ರ ಮೇ 22ರಂದು ಆರ್‌ಬಿಐ, ತನ್ನ ನೀತಿ ದರದಲ್ಲಿಕೊನೆಯ ಕಡಿತ ಮಾಡಿತ್ತು. ಕಳೆದ ವರ್ಷ ಮೇ ತಿಂಗಳಿನಿಂದ ಶೇ 4ರಲ್ಲಿ ಸ್ಥಗಿತಗೊಂಡಿರುವ ರೆಪೋ ದರದಲ್ಲಿ ಬದಲಾವಣೆ ಮಾಡುವ ಅಗತ್ಯ ತಮಗೆ ಕಾಣಿಸುತ್ತಿಲ್ಲ ಎಂದು ಕಳೆದ ತಿಂಗಳು ಎಲ್ಲ 61 ಆರ್ಥಿಕ ತಜ್ಞರು ಅಭಿಪ್ರಾಯಪಟ್ಟಿದ್ದರು. ಕೊರೊನಾ ವೈರಸ್‌ ನೀಡಿದ ಆರಂಭಿಕ ಆಘಾತದಿಂದ ಆರ್ಥಿಕತೆ ತತ್ತರಿಸಿದ ಸಂದರ್ಭದಲ್ಲಿ 2020ರ ಮಾರ್ಚ್ ತಿಂಗಳಿನಿಂದ ರೆಪೋ ದರವನ್ನು 115 ಆಧಾರ ಅಂಶಗಳಷ್ಟು ಕಡಿತಗೊಳಿಸಲಾಗಿದೆ. ಅಲ್ಪ ಕಾಲದ ಹೊಡೆತದ ಬಳಿಕ ಆರ್ಥಿಕತೆ ನಿಧಾನವಾಗಿ ಚೇತರಿಸಿಕೊಳ್ಳುತ್ತಿದೆ. ಕೆಲವು ಅಧಿಕ ಆವರ್ತನ ಸಂಕೇತಗಳು ಚೇತರಿಕೆಯನ್ನು ಸೂಚಿಸುತ್ತಿವೆ ಎಂದು ಗವರ್ನರ್ ತಿಳಿಸಿದ್ದಾರೆ. 5-1ರ ಬಹುಮತ ಮತ್ತು ರಿವರ್ಸ್ ರೆಪೋ ದರ ಬದಲಾವಣೆ ಮಾಡದಂತೆ ಎಂಪಿಸಿ ಸಭೆಯಲ್ಲಿ 5-1ರ ಬಹುಮತ ವ್ಯಕ್ತವಾಯಿತು. ಒಬ್ಬ ಸದಸ್ಯರು ಮಾತ್ರ ಬದಲಾವಣೆ ಪರ ಮತ ಚಲಾಯಿಸಿದರು. ಪ್ರಸ್ತುತದ ಹಣಕಾಸು ವರ್ಷದಲ್ಲಿ ದರದಲ್ಲಿ ಶೇ 9.5ರ ಗುರಿಯನ್ನು ಆರ್‌ಬಿಐ ಉಳಿಸಿಕೊಂಡಿದೆ. ಸಿಪಿಐ ಹಣದುಬ್ಬರ ಅಂದಾಜನ್ನು ಶೇ 5.1ರಿಂದ ಶೇ 5.7ಕ್ಕೆ ಹೆಚ್ಚಿಸಲಾಗಿದೆ. ಟಿಎಲ್‌ಟಿಆರ್‌ಒ ಮೂರು ತಿಂಗಳು ವಿಸ್ತರಣೆ ಟಾರ್ಗೆಟೆಡ್ ಲಾಂಗ್ ಟರ್ಮ್ ರೆಪೋ ಕಾರ್ಯಾಚರಣೆ (ಟಿಎಲ್‌ಟಿಆರ್‌ಒ) ಅನ್ನು ಮೂರು ತಿಂಗಳವರೆಗೆ, ಅಂದರೆ 2021ರ ಡಿಸೆಂಬರ್ 31ರವರೆಗೆ ವಿಸ್ತರಿಸಲು ನಿರ್ಧರಿಸಲಾಗಿದೆ. ಆಗಸ್ಟ್ 12 ಮತ್ತು ಆಗಸ್ಟ್ 26ರಂದು 25,000 ಕೋಟಿ ರೂ ಮೌಲ್ಯದ ಜಿಎಸ್‌ಎಪಿ ಹರಾಜುಗಳನ್ನು ನಡೆಸಲಿದೆ. ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಕಳೆದ ವಾರ, ಭಾರತದ ಬೆಳವಣಿಗೆ ಅಂದಾಜು 2021-22ರ ಹಣಕಾಸು ವರ್ಷದಲ್ಲಿ ಶೇ 12.5 ರಿಂದ ಶೇ 9.5ಕ್ಕೆ ಕುಸಿಯಲಿದ್ದು, ಶೇ 3ರಷ್ಟು ಇಳಿಕೆಯಾಗಲಿದೆ ಎಂದು ಹೇಳಿತ್ತು. ಆದರೆ 2022-23ನೇ ಹಣಕಾಸು ವರ್ಷಕ್ಕೆ ಭಾರತದ ಆರ್ಥಿಕ ಪ್ರಗತಿಯನ್ನು ಶೇ 6.9ರಿಂದ ಶೇ 8.5ಕ್ಕೆ ಅಂದಾಜಿಸಿತ್ತು.