Namma Metro: ಎಡಿಬಿ ಜತೆ 3,643 ಕೋಟಿ ರೂ ಮೊತ್ತದ ಸಾಲ ಒಪ್ಪಂದಕ್ಕೆ ಬಿಎಂಆರ್‌ಸಿಎಲ್ ಸಹಿ

ಬೆಂಗಳೂರು: ಎರಡು ಪ್ರಮುಖ ಮೆಟ್ರೋ ರೈಲು ಮಾರ್ಗಗಳನ್ನು ಪೂರ್ಣಗೊಳಿಸಲು ಮೆಟ್ರೋ ರೈಲು ನಿಗಮ ನಿಯಮಿತ () ಏಷ್ಯನ್ ಅಭಿವೃದ್ಧಿ ಬ್ಯಾಂಕ್ () ಜತೆ 3,643 ಕೋಟಿ ಮೊತ್ತದ ಒಪ್ಪಂದಕ್ಕೆ ಗುರುವಾರ ಸಹಿ ಹಾಕಿದೆ. ಹೊರ ವರ್ತುಲ ರಸ್ತೆ ಹಾಗೂ ವಿಮಾಣ ನಿಲ್ದಾಣ ಮೆಟ್ರೋ ಕಾರಿಡಾರ್ ಮಾರ್ಗಗಳನ್ನು ಪೂರ್ಣಗೊಳಿಸುವ ಯೋಜನೆಗಾಗಿ ಈ ಒಪ್ಪಂದ ನಡೆದಿದೆ. ಬಿಎಂಆರ್‌ಸಿಎಲ್ ವ್ಯವಸ್ಥಾಪಕ ಅಂಜುಂ ಪರ್ವೇಜ್, ವಸತಿ ಮತ್ತು ಗ್ರಾಮೀಣ ವ್ಯವಹಾರಗಳ ಸಚಿವಾಲಯದ ನಿರ್ದೇಶಕ ಜನಾರ್ದನ್ ಪ್ರಸಾದ್ ಹಾಗೂ ಎಡಿಬಿ ಭಾರತ ಶಾಖೆಯ ನಿರ್ದೇಶಕ ಟಕೆಯೊ ಕೊನಿಶಿ ಒಪ್ಪಂದಕ್ಕೆ ಸಹಿ ಹಾಕಿದರು. ಇದರೊಂದಿಗೆ ಯೋಜನೆಯ 2ಎ ಹಂತ ಮತ್ತು 2ಬಿ ಹಂತಗಳಿಗೆ ಹಣಕಾಸು ವ್ಯವಸ್ಥೆ ಮಾಡಲಾಗಿದೆ ಎಂದು ಬಿಎಂಆರ್‌ಸಿಎಲ್ ಹೇಳಿಕೆ ತಿಳಿಸಿದೆ. ನಮ್ಮ ಮೆಟ್ರೋ ಎರಡನೆಯ ಹಂತದಲ್ಲಿನ ಸಿಲ್ಕ್ ಬೋರ್ಡ್- ಕೆಆರ್ ಪುರ ಮತ್ತು ಕಸ್ತೂರಿನಗರ-ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮಾರ್ಗ ನಿರ್ಮಾಣಕ್ಕಾಗಿ ಈ ಒಪ್ಪಂದ ಮಾಡಲಾಗಿದೆ. ಒಟ್ಟು 58.19 ಕಿಮೀ ಉದ್ದದ ಈ ಮಾರ್ಗ ನಿರ್ಮಾಣಕ್ಕೆ ಒಟ್ಟು 14,788 ಕೋಟಿ ರೂ ವೆಚ್ಚವಾಗಲಿದೆ. 2021ರ ಜೂನ್ ತಿಂಗಳಲ್ಲಿ ಈ ಮಾರ್ಗ ಯೋಜನೆಗೆ ಕೇಂದ್ರ ಸರ್ಕಾರ ಅನುಮೋದನೆ ನೀಡಿತ್ತು. ಕೇಂದ್ರ ಮತ್ತು ರಾಜ್ಯ ಸರ್ಕಾರವು ಈಕ್ವಿಟಿ ಹಾಗೂ ಅಧೀನ ಸಾಲದ ರೂಪದಲ್ಲಿ 3,973 ಕೋಟಿ ರೂ ಮೊತ್ತವನ್ನು ಯೋಜನೆಗೆ ವಿನಿಯೋಗಿಸಲಿದೆ. ಜಪಾನ್ ಅಂತಾರಾಷ್ಟ್ರೀಯ ಸಹಕಾರ ಸಂಸ್ಥೆ (ಜೈಕಾ) ಜತೆ ಮಾರ್ಚ್ ತಿಂಗಳಲ್ಲಿ 2,317 ಕೋಟಿ ರೂ ಮೊತ್ತದ ಸಾಲ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಇನ್ನು ರಾಜ್ಯ ಸರ್ಕಾರವು 2,762 ಕೋಟಿ ರೂ ಭೂಸ್ವಾಧೀನ ವೆಚ್ಚ ಭರಿಸಲಿದೆ. ಇನ್ನು ಉಳಿದ 5,960 ಕೋಟಿ ರೂ ಹಾಗೂ ಇತರೆ ವೆಚ್ಚವನ್ನು ಬಹುಪಕ್ಷೀಯ ಮತ್ತು ದ್ವಿಪಕ್ಷೀಯ ಹಣ ಹೂಡಿಕೆ ಸಂಸ್ಥೆಗಳೊಂದಿಗೆ ಸಾಲ ಒಪ್ಪಂದದ ಮೂಲಕ ಭರಿಸಲು ಬಿಎಂಆರ್‌ಸಿಎಲ್ ಉದ್ದೇಶಿಸಿದೆ. ಈ ಎರಡು ಮಾರ್ಗಗಳಲ್ಲಿ ಒಟ್ಟು 30 ನಿಲ್ದಾಣಗಳನ್ನು ಕೂಡ ನಿರ್ಮಿಸಬೇಕಾಗಲಿದೆ.