Cyber Crime: ಜಮ್ತಾರಾ ಗ್ಯಾಂಗ್ ಕಿಂಗ್ ಪಿನ್ 'ರಾಕ್‌ ಸ್ಟಾರ್' & 'ಮಾಸ್ಟರ್‌ ಜೀ' ಖಾಕಿ ಬಲೆಗೆ..!

: ದೇಶಾದ್ಯಂತ ಜನರ ನಿದ್ರೆಗೆಡಿಸಿರುವ ಸೈಬರ್ ಕ್ರಿಮಿನಲ್‌ಗಳನ್ನು ದಿಲ್ಲಿ ಪೊಲೀಸರು ಹೆಡೆಮುರಿ ಕಟ್ಟಿದ್ದಾರೆ. ಸೈಬರ್‌ ಕ್ರೈಂನ ರಾಜಧಾನಿ ಎಂದೇ ಕುಖ್ಯಾತವಾಗಿರುವ ಜಾರ್ಖಂಡ್‌ ರಾಜ್ಯದ ಜಮ್ತಾರಾದಲ್ಲಿ ಖಾಕಿ ಪಡೆ ನಡೆಸಿದ ಕಾರ್ಯಾಚರಣೆ ವೇಳೆ ಲೋಕದ 14 ಘಟಾನುಘಟಿಗಳು ಬಲೆಗೆ ಬಿದ್ದಿದ್ದಾರೆ..! ಸೈಬರ್ ಪ್ರಹಾರ್ ಭಾಗ 2 ಎಂಬ ಹೆಸರಿನ ಕಾರ್ಯಾಚರಣೆ ಆರಂಭಿಸಿದ್ದ ದಿಲ್ಲಿ ಪೊಲೀಸ್‌ ಸೈಬರ್ ಕ್ರೈಂ ವಿಭಾಗ, ಭಾರತದ ಸೈಬರ್ ಕ್ರೈಂ ಹಾಟ್‌ಸ್ಪಾಟ್ ಎಂದೇ ಹೆಸರಾಗಿರುವ ಜಾರ್ಖಂಡ್‌ನ , ದಿಯೋಘರ್, ಗಿರಿಧಿಲ್ ಹಾಗೂ ಜಮುಯ್‌ನಲ್ಲಿ ಕಾರ್ಯಾಚರಣೆ ನಡೆಸಿ 14 ಆರೋಪಿಗಳನ್ನು ಬಂಧಿಸಿದ್ದು, ಭಾರೀ ದೊಡ್ಡ ದಂಧೆಯನ್ನೇ ಬಯಲು ಮಾಡಿದ್ದಾರೆ. ಈ ಕುರಿತಾಗಿ ಮಾಧ್ಯಮಗಳಿಗೆ ಮಾಹಿತಿ ನೀಡಿದ ದಿಲ್ಲಿ ಪೊಲೀಸ್‌ ಸೈಬರ್ ಕ್ರೈಂ ವಿಭಾಗದ ಡಿಸಿಪಿ ಅನ್ಯೇಶ್ ರಾಯ್, ಕಾರ್ಯಾಚರಣೆಯ ಇಂಚಿಂಚೂ ಮಾಹಿತಿ ಬಿಚ್ಚಿಟ್ಟರು. ಈ ಆರೋಪಿಗಳು ಯುಪಿಐ ಪೇಮೆಂಟ್‌ ಮಾಡುವ ಗ್ರಾಹಕರನ್ನೇ ಟಾರ್ಗೆಟ್‌ ಮಾಡಿಕೊಳ್ತಿದ್ದರು. ಕೆವೈಸಿ ಅಪ್‌ಡೇಟ್ ಹೆಸರಲ್ಲಿ ಮೋಸ ಮಾಡೋದು, ಬ್ಯಾಂಕ್ ಅಕೌಂಟ್ ಬ್ಲಾಕ್‌ ಆಗುತ್ತೆ ಎಂದು ಹೆದರಿಸಿ ಮೋಸ ಮಾಡೋದು, ಸಿಮ್ ಕಾರ್ಡ್‌ ಬ್ಲಾಕ್ ಆಗುತ್ತೆ ಎಂದು ಸುಳ್ಳು ಹೇಳಿ ವಂಚಿಸೋದು ಸೇರಿದಂತೆ ಹಲವು ಕಳ್ಳ ಮಾರ್ಗಗಳನ್ನು ಸೃಷ್ಟಿಸಿಕೊಂಡಿದ್ದರು ಎಂದು ಪೊಲೀಸರು ವಿವರಿಸಿದ್ದಾರೆ. ಮೊದಲು ಸೈಬರ್ ವಂಚಕರು ಜನರಿಗೆ ದೂರವಾಣಿ ಕರೆ ಮಾಡಿ ಬ್ಯಾಂಕ್ ಮಾಹಿತಿ ಪಡೆಯುತ್ತಿದ್ದರು. ಇದೀಗ ಖದೀಮರೂ ಅಪ್‌ಡೇಟ್‌ ಆಗಿದ್ದು, ತಮ್ಮದೇ ಆದ ಪ್ರತ್ಯೇಕ ವೆಬ್‌ಸೈಟ್‌ಗಳನ್ನು ತಾತ್ಕಾಲಿಕವಾಗಿ ಸೃಷ್ಟಿಸಿಕೊಳ್ಳುತ್ತಿದ್ದರು. ಆ ವೆಬ್‌ಸೈಟ್‌ನ ಶಾರ್ಟ್‌ ಯುಆರ್‌ಎಲ್‌ಗಳನ್ನು ಬಲ್ಕ್‌ ಮೆಸೇಜ್‌ ಮೂಲಕ ಎಲ್ಲರಿಗೂ ಕಳಿಸುತ್ತಿದ್ದರು. ಇದೀಗ ಬಲೆಗೆ ಬಿದ್ದಿರುವ ಆರೋಪಿಗಳ ಮೇಲೆ 36 ಪ್ರಕರಣಗಳಿವೆ. ಬರೋಬ್ಬರಿ 9 ರಾಜ್ಯಗಳಲ್ಲಿ ಈ ವಂಚಕರು ಮೋಸ ಮಾಡಿದ್ದಾರೆ. ಸುಮಾರು 1 ಕೋಟಿ 20 ಲಕ್ಷ ರೂ ಹಣವನ್ನು ಈ ವಂಚಕರು ಲಪಟಾಯಿಸಿದ್ದಾರೆ. ಪ್ರತಿ ದಿನ 4 ರಿಂದ 5 ಮಂದಿಗೆ ಮೋಸ ಮಾಡುತ್ತಿದ್ದೆವು ಎಂದು ಈ ಖದೀಮರು ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಮಾಸ್ಟರ್‌ ಮೈಂಡ್ ರಾಕ್‌ಸ್ಟಾರ್..!: ಈ ದಂಧೆಯ ಮಾಸ್ಟರ್‌ ಮೈಂಡ್ ಅಲ್ತಾಫ್‌ ಅನ್ಸಾರಿ ‘ರಾಕ್‌ ಸ್ಟಾರ್’ ಎಂದೇ ಹೆಸರಾಗಿದ್ದ. ಮತ್ತೊಬ್ಬ ಕಿಂಗ್ ಪಿನ್ ಗುಲಾಂ ಅನ್ಸಾರಿ ‘ಮಾಸ್ಟರ್ ಜೀ’ ಎಂದೇ ಜನಜನಿತವಾಗಿದ್ದ..! ತನ್ನ ಗ್ಯಾಂಗ್‌ನ ಹುಡುಗರು ಯಾರು ಎಲ್ಲಿ ಕೆಲಸ ಮಾಡಬೇಕು ಎಂದು ‘ರಾಕ್ ಸ್ಟಾರ್’ ನಿರ್ಧರಿಸುತ್ತಿದ್ದ. ಅಷ್ಟೇ ಅಲ್ಲ, ಪೊಲೀಸರ ಚಲನ ವಲನಗಳ ಮೇಲೂ ನಿಗಾ ಇರಿಸುತ್ತಿದ್ದ..! ಇನ್ನು ‘ಮಾಸ್ಟರ್ ಜೀ’ ನಕಲಿ ವೆಬ್‌ಸೈಟ್ ತಯಾರಿಸೋದ್ರಲ್ಲಿ ಎತ್ತಿದ ಕೈ..! ತನ್ನ ವೆಬ್‌ಸೈಟ್‌ಗಳನ್ನು ಗೂಗಲ್ ಆಡ್ಸ್‌ ಮೂಲಕ ಆನ್‌ಲೈನ್‌ನಲ್ಲಿ ಬಿಡುತ್ತಿದ್ದ. ತನ್ನ ವೆಬ್‌ಸೈಟ್‌ಗಳ ಪ್ರಚಾರಕ್ಕಾಗಿಯೇ ಪ್ರತಿ ದಿನ 40 ರಿಂದ 50 ಸಾವಿರ ರೂ ಹಣ ನೀಡುತ್ತಿದ್ದ ‘ಮಾಸ್ಟರ್‌ ಜೀ’..! ತಮ್ಮ ಈ ಎಲ್ಲಾ ಕಾರ್ಯಾಚರಣೆಗಳನ್ನು ಒಂದೇ ಕಡೆ ನಡೆಸಿದರೆ ಎಲ್ಲರೂ ಸಿಕ್ಕಿಬೀಳ್ತೇವೆ ಎಂದು ಮನಗಂಡಿದ್ದ ಆರೋಪಿಗಳು, ವಿಕೇಂದ್ರೀಕೃತ ವ್ಯವಸ್ಥೆಯ ಅಡಿ ಹಲವೆಡೆ ಸಣ್ಣ ಸಣ್ಣ ಗುಂಪುಗಳಲ್ಲಿ ಈ ದಂಧೆ ನಡೆಸುತ್ತಿದ್ದರು ಎಂದು ದಿಲ್ಲಿ ಸೈಬರ್ ಕ್ರೈಂ ವಿಭಾಗದ ಪೊಲೀಸರು ತಿಳಿಸಿದ್ದಾರೆ.