ಬಂಗಾಳದಲ್ಲಿ ಬಿಜೆಪಿಯ ಮತ್ತೊಂದು ವಿಕೆಟ್‌ ಪತನ, ಟಿಎಂಸಿಯತ್ತ ಶಾಸಕರ ಮಹಾವಲಸೆ

ಕೋಲ್ಕೊತ್ತಾ: ಶಾಸಕ ಬಿಸ್ವಜಿತ್‌ ದಾಸ್‌ ಮಂಗಳವಾರ ಪಕ್ಷ ತೊರೆದು ತೃಣಮೂಲ ಕಾಂಗ್ರೆಸ್‌ (ಟಿಎಂಸಿ) ಸೇರಿದ್ದಾರೆ. ಏಪ್ರಿಲ್‌-ಮೇನಲ್ಲಿ ಮಮತಾ ಬ್ಯಾನರ್ಜಿ ನೇತೃತ್ವದ ಪಶ್ಚಿಮ ಬಂಗಾಳದಲ್ಲಿ ಭರ್ಜರಿ ಗೆಲುವ ಸಾಧಿಸಿದ ಬಳಿಕ ಮಾತೃ ಪಕ್ಷಕ್ಕೆ ಮರಳುತ್ತಿರುವ ಮೂರನೇ ಶಾಸಕರು ಇವರಾಗಿದ್ದಾರೆ. ರಾಜ್ಯ ವಿಧಾನಸಭೆ ಚುನಾವಣೆಗೂ ಸ್ವಲ್ಪ ಮುಂಚೆ ಬಿಸ್ವಜಿತ್‌ ದಾಸ್‌ ಟಿಎಂಸಿ ತೊರೆದು ಬಿಜೆಪಿ ಸೇರಿದ್ದರು. ಹಾಗೆ ಕಮಲ ಪಾಳಯ ಸೇರಿದವರು ಚುನಾವಣೆಯಲ್ಲಿ ಸ್ಪರ್ಧಿಸಿ ಜಯವನ್ನೂ ಸಾಧಿಸಿದರು. ಆದರೆ ಇದೀಗ ಮತ್ತೆ ಮಾತೃ ಪಕ್ಷಕ್ಕೆ ಮರಳಿದ್ದಾರೆ. ಟಿಎಂಸಿಗೆ ಮರಳುತ್ತಿರುವ ಹೆಚ್ಚಿನವರು 'ತಮ್ಮ ತಪ್ಪಿನ ಅರಿವಾಗಿದೆ' ಎಂದು ಹೇಳಿಕೊಂಡಿದ್ದು, ಒಬ್ಬೊಬ್ಬರಾಗಿ ಮತ್ತೆ ತೃಣಮೂಲ ಕಾಂಗ್ರೆಸ್‌ಗೆ ವಾಪಸಾಗುತ್ತಿದ್ದಾರೆ. ಸೋಮವಾರ ಇನ್ನೋರ್ವ ಬಿಜೆಪಿ ಶಾಸಕ ತನ್ಮಯ್‌ ಘೋಷ್‌ ಬಿಜೆಪಿ ತೊರೆದು ಟಿಎಂಸಿಗೆ ಮರಳಿದ್ದರು. ಇವರೂ ಚುನಾವಣೆಗೆ ಮೊದಲು ಟಿಎಂಸಿಯಿಂದ ಕೇಸರಿ ಪಕ್ಷಕ್ಕೆ ಹಾರಿ, ಚುನಾವಣೆಯಲ್ಲಿ ಜಯಗಳಿಸಿದ್ದರು. ಹೀಗೆ ಬಿಜೆಪಿಯಿಂದ ತೃಣಮೂಲ ಕಾಂಗ್ರೆಸ್‌ಗೆ ಮರಳಿದ ಮೇರು ನಾಯಕ ಎಂದರೆ ಮುಕುಲ್‌ ರಾಯ್‌. ರಾಯ್‌ ಟಿಎಂಸಿಯಿಂದ ಬಿಜೆಪಿ ಹಾರಿದ್ದ ಮೊದಲ ನಾಯಕರೂ ಹೌದು. ಅವರು ಕಮಲ ಹಿಡಿದು, ಚುನಾವಣೆಯಲ್ಲಿ ಗೆಲುವು ಸಾಧಿಸಿದ ಬಳಿಕ ಜೂನ್‌ನಲ್ಲಿ ಟಿಎಂಸಿಗೆ ವಾಪಸಾಗಿದ್ದರು. ಬರೋಬ್ಬರಿ ನಾಲ್ಕು ವರ್ಗಳ ನಂತರ ಅವರು ಮಾತೃ ಪಕ್ಷಕ್ಕೆ ಹಿಂದಿರುಗಿದ್ದರು. ಬಂಗಾಳದ ರಾಜಕಾರಣವನ್ನು ನೋಡುವಾಗ ಮುಕುಲ್‌ ರಾಯ್‌ ಮರು ಪ್ರವೇಶ ಟಿಎಂಸಿ ಎಷ್ಟು ಪ್ರಬಲವಾಗಿದೆ ಎಂಬ ಸಂದೇಶವನ್ನು ನೀಡಿದೆ. ಇದಕ್ಕೀಗ ಮತ್ತಷ್ಟು ಹೆಸರುಗಳು ಸೇರ್ಪಡೆಯಾಗುತ್ತಿದ್ದು, ಪಕ್ಷದ ಪ್ರಾಬಲ್ಯ ಹೆಚ್ಚುತ್ತಲೇ ಇದೆ. ಈ ವರ್ಷ ರಾಜ್ಯ ವಿಧಾನಸಭೆಗೆ ನಡೆದ ಚುನಾವಣೆಯಲ್ಲಿ ಭರ್ಜರಿ ಜಯ ಸಾಧಿಸಿರುವ ತೃಣಮೂಲ ಕಾಂಗ್ರೆಸ್‌ 2024ರ ಲೋಕಸಭೆ ಚುನಾವಣೆಗೆ ಸಿದ್ಧವಾಗುತ್ತಿದ್ದು, ಪಕ್ಷ ಬಿಟ್ಟವರು ಮರಳಿ ಬರುತ್ತಿರುವುದು ದೀದಿಗೆ ಹೊಸ ಭರವಸೆ ಹಾಗೂ ಶಕ್ತಿ ನೀಡಿದೆ. 2019ರ ಲೋಕಸಭೆ ಚುನಾವಣೆಯಲ್ಲಿ ಪಕ್ಷ ಬಿಟ್ಟವರಿಂದ ಟಿಎಂಸಿಗೆ ಭಾರಿ ನಷ್ಟವಾಗಿತ್ತು. ಅದು ಈ ಬಾರಿ ಪುನರಾವರ್ತನೆ ಆಗದೇ ಇರುವಂತೆ ನೋಡಿಕೊಳ್ಳಲು ತೃಣಮೂಲ ಕಾಂಗ್ರೆಸ್‌ ನಿರ್ಧರಿಸಿದೆ. ಆದರೆ ಲೋಕಸಭೆ ಚುನಾವಣೆಯಲ್ಲಿ ತನ್ನ ಸೀಟು ಗಳಿಕೆಯನ್ನು ಬಿಜೆಪಿ ದೊಡ್ಡ ಪ್ರಮಾಣದಲ್ಲಿ ಹೆಚ್ಚಿಸಿಕೊಂಡರೂ, ವಿಧಾನಸಭೆ ಚುನಾವಣೆಯಲ್ಲಿ ಆ ಮ್ಯಾಜಿಕ್‌ ಮಾಡಲು ಸಾಧ್ಯವಾಗಲಿಲ್ಲ ಎಂನ್ನುವುದೂ ಗಮನಾರ್ಹ. 294 ಸದಸ್ಯ ಬಲದ ವಿಧಾನಸಭೆಗೆ ನಡೆದ ಚುನಾವಣೆಯಲ್ಲಿ ಮಮತಾ ಬ್ಯಾನರ್ಜಿ 213 ಸೀಟು ಗೆಲ್ಲುವುದರೊಂದಿಗೆ ಸತತ ಮೂರನೇ ಬಾರಿಗೆ ಅಧಿಕಾರದ ಗದ್ದುಗೆ ಏರಿದ್ದರು. ಶತಾಯ ಗತಾಯ ಹೋರಾಟಕ್ಕಿಳಿದಿದ್ದ ಬಿಜೆಪಿ ಕೇವಲ 77 ಸೀಟು ಗೆಲ್ಲಲಷ್ಟೇ ಶಕ್ತವಾಗಿತ್ತು. ಇದೀಗ ಶಾಸಕರ ರಾಜೀನಾಮೆಯಿಂದ ಬಿಜೆಪಿ ಬಲ 72ಕ್ಕೆ ಕುಸಿದಿದೆ.