₹2000 ಮುಖಬೆಲೆಯ ನೋಟು ಮುದ್ರಣವನ್ನು ತಾತ್ಕಾಲಿಕವಾಗಿ ನಿಲ್ಲಿಸಿದ ಆರ್‌ಬಿಐ!

ಹೊಸದಿಲ್ಲಿ: 2021-22ರ ಆರ್ಥಿಕ ವರ್ಷದಲ್ಲಿ 2 ಸಾವಿರ ರೂಪಾಯಿ ಮುಖಬೆಲೆಯ ಒಂದೇ ಒಂದು ನೋಟನ್ನೂ ಮುದ್ರಣ ಮಾಡಿಲ್ಲ ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ () ತಿಳಿಸಿದೆ. ಭದ್ರತಾ ಕಾರಣಗಳಿಂದಾಗಿ ಹೆಚ್ಚಿನ ಮೌಲ್ಯದ ಮುಖಬೆಲೆಯ ನೋಟುಗಳ ಮುದ್ರಣವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ ಎಂದು ವರದಿ ಹೇಳಿದೆ. ಹಿಂದಿನ ವರ್ಷ ಕೂಡ 2000 ರೂ ಮೌಲ್ಯದ ನೋಟುಗಳ ಪೂರೈಕೆ ಮಾಡಿರಲಿಲ್ಲ. 2020ರ ಮಾರ್ಚ್‌ನಲ್ಲಿ ಶೇ.2.4 ರಷ್ಟಿದ್ದ 2,000 ರೂ. ಮೌಲ್ಯದ ನೋಟುಗಳು, 2021ರರಲ್ಲಿ ಶೇ.2ರಷ್ಟು ಕುಸಿದಿದೆ ಎಂದು ವರದಿ ತಿಳಿಸಿದೆ. ರಿಸರ್ವ್ ಬ್ಯಾಂಕ್ 2018-19ರಲ್ಲಿ 2,000 ರೂ. ಮೌಲ್ಯ 467 ಲಕ್ಷ ನೋಟುಗಳನ್ನು ಪೂರೈಸಿದೆ. ಚಲಾವಣೆಯಲ್ಲಿರುವ 2000 ರೂ.ಗಳ ಕರೆನ್ಸಿ ನೋಟುಗಳ ಸಂಖ್ಯೆ 2018ರ ಮಾರ್ಚ್ ಅಂತ್ಯದಲ್ಲಿ 33,632 ಲಕ್ಷ ಇತ್ತು. 2019ರ ಮಾರ್ಚ್ ಅಂತ್ಯದಲ್ಲಿ 32,910 ಲಕ್ಷಗಳಿಗೆ ಮತ್ತು 2020ರ ಮಾರ್ಚ್ ಅಂತ್ಯದಲ್ಲಿ 27,398 ಲಕ್ಷಗಳಿಗೆ ಇಳಿದಿದೆ ಎಂದು ಆರ್ ಬಿಐ ನ ವಾರ್ಷಿಕ ವರದಿ ತಿಳಿಸಿದೆ. ಚಲಾವಣೆಯಲ್ಲಿರುವ ಕರೆನ್ಸಿಯ ಒಟ್ಟು ಪ್ರಮಾಣವು ಮಾರ್ಚ್ 2021ರ ಅಂತ್ಯದಲ್ಲಿ ಶೇಕಡಾ 7.2 ರಷ್ಟು ಏರಿಕೆಯಾಗಿ 12,436,71 ಕೋಟಿಗಳಿಗೆ ಏರಿತು. ಆದರೆ, ಮೌಲ್ಯವು ಸುಮಾರು ಶೇ.17 ರಷ್ಟು ಏರಿಕೆಯಾಗಿ 28,27 ಲಕ್ಷ ಕೋಟಿ ರೂಪಾಯಿ ಏರಿತು. ರೂ.500 ಮುಖಬೆಲೆಯ ನೋಟು ಮತ್ತು ರೂ.2,000 ಮುಖಬೆಲೆಯ ನೋಟುಗಳು ಆರ್ಥಿಕತೆಯಲ್ಲಿ ಚಲಾವಣೆಯಲ್ಲಿರುವ ಕರೆನ್ಸಿಯ ಅತಿ ಹೆಚ್ಚಿನ ಮೌಲ್ಯವನ್ನ ಹೊಂದಿವೆ. ಇದು ಬ್ಯಾಂಕ್ ಚಲಾವಣೆಯಲ್ಲಿರುವ ಎಲ್ಲ ಮೌಲ್ಯದ 85.7 ಪ್ರತಿಶತವಾಗಿದೆ. ಈ ಸಂಖ್ಯೆ ಕಳೆದ ವರ್ಷದ 83.4 ಪ್ರತಿಶತಕ್ಕಿಂತ ಸ್ವಲ್ಪ ಹೆಚ್ಚಾಗಿದೆ. 10 ರೂ.ಗಳ ನೋಟುಗಳು, 500 ರೂ.ಗಳ ನೋಟಿನ ನಂತರ ಎರಡನೇ ಅತಿ ಹೆಚ್ಚು ಪಾಲು ಹೊಂದಿದ್ದು, ಇದು ಚಲಾವಣೆಯಲ್ಲಿರುವ ಎಲ್ಲಾ ನೋಟುಗಳಲ್ಲಿ ಶೇ. 23.6 ರಷ್ಟು ಇವೆ. ಆದರೆ, ಹಿಂದಿನ ವರ್ಷದ ಶೇ. 26.2 ಕ್ಕಿಂತ ಕಡಿಮೆಯಾಗಿದೆ. 2021 ರ ಆರ್ಥಿಕ ವರ್ಷದಲ್ಲಿ ಪತ್ತೆಯಾದ ನಕಲಿ ನೋಟುಗಳ ಸಂಖ್ಯೆ ಹಿಂದಿನ ವರ್ಷಕ್ಕಿಂತ ಶೇ. 30ರಷ್ಟು ಕಡಿಮೆಯಾಗಿ 2.09 ಲಕ್ಷಕ್ಕೆ ಇಳಿದಿದೆ. ಬ್ಯಾಂಕಿಂಗ್ ವಲಯದಲ್ಲಿ ಪತ್ತೆಯಾದ ಒಟ್ಟು ನಕಲಿ ನೋಟುಗಳ ಪೈಕಿ ಆರ್‌ಬಿಐ ಶೇ.3.9 ಮತ್ತು ಇತರ ಬ್ಯಾಂಕುಗಳು ಶೇ. 96.1ರಷ್ಟು ನಕಲಿ ನೋಟುಗಳನ್ನು ಪತ್ತೆ ಹಚ್ಚಿವೆ ಎಂದು ವಾರ್ಷಿಕ ವರದಿಯಲ್ಲಿ ತಿಳಿಸಿದೆ.