ಹಿಂದೂ ದೇವತೆಗಳ ಅಶ್ಲೀಲ ಚಿತ್ರಣ ಆರೋಪ: ಕಾಮ ಸೂತ್ರ ಪುಸ್ತಕ ಸುಟ್ಟುಹಾಕಿದ ಬಜರಂಗ ದಳ

ಅಹ್ಮದಾಬಾದ್: ಹಿಂದೂ ದೇವತೆಗಳನ್ನು 'ಅಶ್ಲೀಲ ಭಂಗಿ'ಗಳಲ್ಲಿ ಚಿತ್ರಿಸಲಾಗಿದೆ ಎಂದು ಆರೋಪಿಸಿ, ಗುಜರಾತ್‌ನ ಅಹ್ಮದಾಬಾದ್‌ನಲ್ಲಿನ ಪುಸ್ತಕ ಮಳಿಗೆಯೊಂದರ ಹೊರ ಭಾಗದಲ್ಲಿ ಕಾರ್ಯಕರ್ತರು ಪುಸ್ತಕದ ಪ್ರತಿಗಳನ್ನು ಸುಟ್ಟುಹಾಕಿದ್ದಾರೆ. ಅಹ್ಮದಾಬಾದ್‌ ರಾಜಪಥ ಕ್ಲಬ್ ಸಮೀಪದಲ್ಲಿರುವ ಉಡುಗೊರೆ ಹಾಗೂ ಪುಸ್ತಕಗಳ ಮಳಿಗೆಗೆ ಶನಿವಾರ ರಾತ್ರಿ ನುಗ್ಗಿದ್ದ ಬಜರಂಗ ದಳದ ಹತ್ತಾರು ಸದಸ್ಯರು ಕಾಮ ಸೂತ್ರದ ಪುಸ್ತಕಗಳನ್ನು ಹುಡುಕಿ ತೆಗೆದಿದ್ದಾರೆ. ಈ ಪುಸ್ತಕಗಳ ಮಾರಾಟವನ್ನು ಮುಂದುವರಿಸಿದರೆ, ಮುಂದಿನ ಬಾರಿ ಇಡೀ ಪುಸ್ತಕ ಮಳಿಗೆಯನ್ನೇ ಸುಟ್ಟುಹಾಕುವುದಾಗಿ ಅಂಗಡಿ ಮಾಲೀಕರಿಗೆ ಬಜರಂಗ ದಳ ಸದಸ್ಯರು ಬೆದರಿಕೆ ಹಾಕಿದ್ದಾರೆ. ಒಳಕ್ಕೆ ಬಜರಂಗ ದಳದ ಸದಸ್ಯನೊಬ್ಬ, ಪುಸ್ತಕದಲ್ಲಿರುವ ಚಿತ್ರಗಳನ್ನು ಪ್ರದರ್ಶಿಸುವ ವಿಡಿಯೋವನ್ನು ಮೊದಲು ಚಿತ್ರೀಕರಿಸಲಾಗಿತ್ತು. ಈ ರೇಖಾಚಿತ್ರಗಳು ಹಿಂದೂ ದೇವತೆಗಳನ್ನು ಅಶ್ಲೀಲ ಭಂಗಿಗಳಲ್ಲಿ ತೋರಿಸಿವೆ ಎಂದು ಆರೋಪಿಸಿದ್ದರು. ಬಳಿಕ ಅವರು ಹೊರನಡೆದು ಆ ಪುಸ್ತಕಕ್ಕೆ ಬೆಂಕಿ ಹಚ್ಚಿ ಸುಟ್ಟಿದ್ದಾರೆ. ಪುಸ್ತಕವನ್ನು ಸುಡುವಾಗ ಬಜರಂಗ ದಳದ ಸದಸ್ಯರು 'ಹರ ಹರ ಮಹಾದೇವ' ಮತ್ತು 'ಜೈ ಶ್ರೀರಾಮ್' ಘೋಷಣೆಗಳನ್ನು ಕೂಗುವುದು ವಿಡಿಯೋದಲ್ಲಿ ದಾಖಲಾಗಿದೆ. ಈ ಬಗ್ಗೆ ಬಜರಂಗ ದಳ ಅಥವಾ ಅಂಗಡಿ ಮಾಲೀಕರು ಪೊಲೀಸ್ ಠಾಣೆಗೆ ದೂರು ನೀಡಿಲ್ಲ. ಹಿಂದೂ ದೇವತೆಗಳನ್ನು ಈ ರೀತಿ ಅಶ್ಲೀಲ ಭಂಗಿಗಳಲ್ಲಿ ಚಿತ್ರಿಸಿರುವುದು ಹಿಂದೂ ಧರ್ಮ ಹಾಗೂ ಸಂಸ್ಕೃತಿಗೆ ಅಪಮಾನ ಎಸಗಿದಂತೆ ಎಂದು ಅವರು ಆರೋಪಿಸಿದ್ದಾರೆ. ರಾಧೆ ಮತ್ತು ಕೃಷ್ಣನನ್ನು ಅಶ್ಲೀಲ ರೀತಿಯಲ್ಲಿ ಚಿತ್ರಿಸಲಾಗಿದೆ. ಹಿಂದೂ ಪುರಾಣಗಳಲ್ಲಿ ರಾಧೆ ಕೃಷ್ಣರ ಸರಸ ಸಲ್ಲಾಪಗಳ ಬಗ್ಗೆ ಉಲ್ಲೇಖವಿದೆ. ಆದರೆ ಅದರಲ್ಲಿ ಲೈಂಗಿಕತೆಯನ್ನು ಬಿಂಬಿಸುವ ಅಂಶಗಳಿಲ್ಲ. ಆದರೆ ಈ ಪುಸ್ತಕವು ರಾಧೆ ಮತ್ತು ಕೃಷ್ಣರನ್ನು ಕೆಟ್ಟದಾಗಿ ಚಿತ್ರಿಸಿದೆ ಎಂದು ಆರೋಪಿಸಿದ್ದಾರೆ. ಕಾಮಸೂತ್ರವನ್ನು ಭಾರತದ ಪ್ರಾಚೀನ ತತ್ವಶಾಸ್ತ್ರಜ್ಞ ರಚಿಸಿದ್ದು, ಪ್ರೀತಿ ಹಾಗೂ ಕಾಮದ ಮಹತ್ವ, ಅದನ್ನು ನಡೆಸುವ ವಿಧಾನ ಮುಂತಾದವುಗಳ ಮಾಹಿತಿಗಳನ್ನು ಒಳಗೊಂಡಿದೆ. ವಾತ್ಸಾಯನ ಕಾಮಸೂತ್ರವು ಜಗತ್ತಿನಾದ್ಯಂತ ಖ್ಯಾತಿ ಗಳಿಸಿದೆ. ಅದರ ಆಧಾರದಲ್ಲಿ ನೂರಾರು ಕಾಮಸೂತ್ರ ಪುಸ್ತಕಗಳು ರಚನೆಯಾಗಿವೆ. ಇದು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಒಳಗಾಗಿದೆ. ಈ ರೀತಿಯ ಕಾಮದ ಭಂಗಿಗಳಿರುವ ಕೆತ್ತನೆಗಳು ಭಾರತದಾದ್ಯಂತ ಸಾವಿರಾರು ದೇವಾಲಯಗಳಲ್ಲಿವೆ. ಇದನ್ನು ಕೂಡ ಸುಟ್ಟು ಹಾಕುತ್ತಾರೆಯೇ ಎಂದು ಅನೇಕರು ಪ್ರಶ್ನಿಸಿದ್ದಾರೆ. ರೇಖಾ ಚಿತ್ರಗಳನ್ನು ದೇವತೆಗಳ ಚಿತ್ರ ಎಂದು ಭಾವಿಸಿ ಅದನ್ನು ಸುಡುವುದಾದರೆ ಚಿತ್ರಗಳನ್ನೇ ಬಿಡಿಸಲು ಸಾಧ್ಯವಾಗುವುದಿಲ್ಲ ಎಂದು ಟೀಕಿಸಿದ್ದಾರೆ. ವಾತ್ಸಾಯನ ಋಷಿಯ ಹೆಸರಿಗೂ ಬಹಿಷ್ಕಾರ ಹಾಕುತ್ತಾರೆಯೇ? ಖುಜುರಾಹೋದ ದೇವಾಲಯವನ್ನು ಉರುಳಿಸುತ್ತಾರೆಯೇ? ಎಂದು ಕೇಳಿದ್ದಾರೆ.