ಸರಕಾರಿ ಆಸ್ಪತ್ರೆಯ ಕೊರೊನಾ ಲಸಿಕೆಯನ್ನು 300 ರೂ.ಗೆ ಮಾರಿ ಸಿಕ್ಕಿ ಬಿದ್ದ ಬೆಂಗಳೂರಿನ ನರ್ಸ್‌!

ಆನೇಕಲ್‌: ಸರಕಾರಿ ಆಸ್ಪತ್ರೆಗೆ ಸರಬರಾಜು ಮಾಡಿದ ಕೋವಿಡ್‌ ಲಸಿಕೆಯನ್ನು ಒಬ್ಬರು ಮನೆಗೆ ಕೊಂಡೊಯ್ದು ಅಕ್ರಮವಾಗಿ ಜನರಿಗೆ ನೀಡುತ್ತಿದ್ದ ಪ್ರಕರಣ ಹೆಬ್ಬಗೋಡಿಯಲ್ಲಿ ಬಯಲಾಗಿದ್ದು, ಆರೋಪಿ ನರ್ಸ್‌ ಅನ್ನು ಸೇವೆಯಿಂದ ಅಮಾನತುಗೊಳಿಸಲಾಗಿದೆ. ಹೆಬ್ಬಗೋಡಿ ಸರಕಾರಿ ಆಸ್ಪತ್ರೆಯ ನರ್ಸ್‌ ರೇಖಾ ಅಮಾನತಾದಾಕೆ. ಜನರಿಂದ 300 ರೂ. ಪಡೆದು ರಾತ್ರಿ ವೇಳೆ ಕದ್ದುಮುಚ್ಚಿ ಲಸಿಕೆ ಹಾಕುತ್ತಿದ್ದಳು ಎಂದು ಆರೋಪಿಸಲಾಗಿದೆ. ಆಸ್ಪತ್ರೆಯಲ್ಲಿ ಜನರಿಗೆ ನಿಗದಿಪಡಿಸಿದಂತೆ ಪೂರ್ಣ ಪ್ರಮಾಣದಲ್ಲಿ ಲಸಿಕೆ ನೀಡುತ್ತಿರಲಿಲ್ಲ. ಪ್ರತಿ ಲಸಿಕೆಯಲ್ಲೂ ಸ್ವಲ್ಪ ಸ್ವಲ್ಪ ಪ್ರಮಾಣದಲ್ಲಿ ಉಳಿಸಿಕೊಳ್ಳುತ್ತಿದ್ದಳು. ಇದರಿಂದ ವಯಲ್‌ನಲ್ಲಿ ಉಳಿದ ಲಸಿಕೆಯನ್ನು ಮನೆಗೆ ಕೊಂಡೊಯ್ದು ನೀಡುತ್ತಿದ್ದಳು. ಪ್ರತಿ ಲಸಿಕೆಗೆ 300 ರೂ. ಪಡೆಯುತ್ತಿದ್ದಳು ಎನ್ನಲಾಗಿದೆ. ಅಧಿಕಾರಿಗಳ ಭೇಟಿ : ನರ್ಸ್‌ ರೇಖಾ ಮನೆಯಲ್ಲಿ ಲಸಿಕೆ ಕೊಡುತ್ತಿರುವ ವಿಡಿಯೊ ಆರೋಗ್ಯ ಇಲಾಖೆ ಅಧಿಕಾರಿಗಳ ಕೈಸೇರಿತ್ತು. ಈ ಹಿನ್ನೆಲೆಯಲ್ಲಿ ಮಂಗಳವಾರ ಆರೋಗ್ಯ ಇಲಾಖೆಯ ನೋಡಲ್‌ ಅಧಿಕಾರಿ ಮಹೇಶ್‌ ಹಾಗೂ ತಾಲೂಕು ವೈದ್ಯಾಧಿಕಾರಿ ವಿನಯ್‌ ಆಸ್ಪತ್ರೆಗೆ ಭೇಟಿ ನೀಡಿ ಮಾಹಿತಿ ಸಂಗ್ರಹಿಸಿದ್ದಾರೆ. ಆರೋಪಿತ ನರ್ಸ್‌ಅನ್ನು ಅಮಾನತು ಮಾಡಿ ಆದೇಶ ಹೊರಡಿಸಲಾಗಿದೆ. ಬೇರೆ ಯಾರಾದರೂ ಈ ಪ್ರಕರಣದಲ್ಲಿ ಭಾಗಿಯಾಗಿದ್ದಾರೆಯೇ ಎಂಬುದರ ಬಗ್ಗೆಯೂ ತನಿಖೆ ಮಾಡಿಸಲಾಗುವುದು. - ಶ್ರೀನಿವಾಸ್‌, ಡಿಎಚ್‌ಒ, ನಗರ ಜಿಲ್ಲೆ ಈ ಹಿಂದೆಯೂ ನಡೆದಿತ್ತು ಆರೋಗ್ಯ ಸಿಬ್ಬಂದಿ ಲಸಿಕೆ ಮಾರಿ ಸಿಕ್ಕಿ ಬಿದ್ದಿರುವ ಪ್ರಕರಣ ಈ ಹಿಂದೆಯೂ ನಡೆದಿತ್ತು. ಮಂಜುನಾಥ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರದ ಗುತ್ತಿಗೆ ವೈದ್ಯೆ ಡಾ.ಪುಷ್ಪಿತಾ ಎಂಬಾಕೆ ಕೋವಿಡ್‌ ಲಸಿಕೆ ಮಾರಿಕೊಂಡು ಸಿಕ್ಕಿ ಬಿದ್ದಿದ್ದಳು. ಪುಷ್ಪಿತಾ ತನ್ನ ಪರಿಚಯದ ಪ್ರೇಮಾ ಎಂಬಾಕೆಯ ಮನೆಯಲ್ಲಿಅಕ್ರಮವಾಗಿ ಲಸಿಕೆ ನೀಡುತ್ತಿದ್ದಳು. ಲಸಿಕೆಗೆ 500 ರೂ. ಪಡೆಯುತ್ತಿದ್ದಳು. ಬಳಿಕ ಆಕೆಯನ್ನು ಸೇವೆಯಿಂದ ಬಿಡುಗಡೆಗೊಳಿಸಲಾಗಿತ್ತು.