'ಮಿಷನ್‌ ಮಜ್ನು'ದಲ್ಲಿ ರೋಮ್ಯಾನ್ಸ್‌ಗೂ ಮೀರಿದ ಭಾವನೆಗಳಿವೆ: ನಟಿ ರಶ್ಮಿಕಾ ಮಂದಣ್ಣ!

ರಚನಾ ದುಬೇ ಕನ್ನಡತಿ ನಟನೆಯ ಮೊದಲ ಬಾಲಿವುಡ್‌ ಸಿನಿಮಾವಾಗಿರುವ 'ಮಿಷನ್‌ ಮಜ್ನು' ಅವರ ಅಭಿಮಾನಿಗಳಲ್ಲಿ ಈಗಾಗಲೇ ಸಾಕಷ್ಟು ಕುತೂಹಲ ಕೆರಳಿಸಿದೆ. ಸ್ಯಾಂಡಲ್‌ವುಡ್‌, ಟಾಲಿವುಡ್‌, ಕಾಲಿವುಡ್‌ನಲ್ಲಿ ಅವರಿಗೆ ಸಿಕ್ಕಿರುವ ಅಪಾರ ಜನಪ್ರಿಯತೆಯು ಈಗ ಬಾಲಿವುಡ್‌ ಸಿನಿಮಾದ ನಟನೆಯ ಮೇಲೆ ಒತ್ತಡ ಹಾಕುತ್ತಿದ್ದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿರುವ ರಶ್ಮಿಕಾ, 'ಇಲ್ಲ, ನನಗೆ ಯಾವುದೇ ಒತ್ತಡವಿಲ್ಲ. ಬಾಲಿವುಡ್‌ಗೆ ಬರುವ ಮುನ್ನ ನಾನು ಮೂರು ಭಾಷೆಗಳ ಸಿನಿಮಾಗಳಲ್ಲಿ ಸಕ್ರಿಯಳಾಗಿದ್ದೆ ಎಂದು ಬಹುತೇಕ ಜನರಿಗೆ ಗೊತ್ತಿದೆ. ನನ್ನ ಪ್ರಕಾರ, ನಾವು ಯಾವ ಭಾಷೆಯ ಚಿತ್ರೋದ್ಯಮದಿಂದ ಬಂದಿರುತ್ತೇವೆ ಎಂಬುದಕ್ಕಿಂತ ಸಿಕ್ಕಿರುವ ಪ್ರಾಜೆಕ್ಟ್ ಮುಖ್ಯ ಎಂದು ರಶ್ಮಿಕಾ ಹೇಳಿದ್ದಾರೆ. ಯಾವುದೇ ಹೊಸ ಭಾಷೆಯ ಸಿನಿಮಾದಲ್ಲಿ ನಟಿಸುವಾಗ ಆರಂಭದಲ್ಲಿ ನಾನು ಸ್ವಲ್ಪ ನರ್ವಸ್‌ ಆಗುತ್ತೇನೆ ಎಂಬುದೂ ನಿಜ. ಯಾಕೆಂದರೆ ಅಲ್ಲಿ ಜನರು ನನ್ನನ್ನು ನಟಿಯಾಗಿ ಸ್ವೀಕರಿಸುತ್ತಾರೋ, ಇಲ್ವೋ ಮತ್ತು ಹೇಗೆ ಪ್ರತಿಕ್ರಿಯೆ ನೀಡುತ್ತಾರೆ ಎಂಬುದರ ಬಗ್ಗೆ ನಮಗೆ ಖಚಿತತೆ ಇರುವುದಿಲ್ಲ. ಆದ್ದರಿಂದ ನಾನು ಯಾವ ಭಾಷೆಯ ಸಿನಿಮಾ ಎಂಬುದಕ್ಕಿಂತ ಆ ಸಿನಿಮಾದ ಕಥೆಗೆ ಮಾತ್ರ ಹೆಚ್ಚಿನ ಆದ್ಯತೆ ನೀಡುತ್ತೇನೆ' ಎಂದಿದ್ದಾರೆ ರಶ್ಮಿಕಾ. ರಶ್ಮಿಕಾ ಮಂದಣ್ಣರಿಗೆ 'ಮಿಷನ್‌ ಮಜ್ನು' ಸಿನಿಮಾಗಿಂತ ಮೊದಲು ಹಲವು ಬಾಲಿವುಡ್‌ ಸಿನಿಮಾ ಆಫರ್‌ಗಳು ಬಂದಿದ್ದವು. ಅವುಗಳನ್ನು ಒಪ್ಪಿಕೊಳ್ಳದೆ 'ಮಿಷನ್‌ ಮಜ್ನು'ಗೆ ತಕ್ಷಣ ಯಸ್‌ ಎಂದ ಕಾರಣವನ್ನು ವಿವರಿಸಿರುವ ಅವರು, 'ಕಳೆದ ವರ್ಷದ ಲಾಕ್‌ಡೌನ್‌ಗಿಂತ ಮೊದಲು ನನಗೆ ಹಿಂದಿ ಸಿನಿಮಾದ ಅನೇಕ ಆಫರ್‌ಗಳು ಬಂದಿದ್ದವು. ಆದರೆ ಡೇಟ್ಸ್‌ ಹೊಂದದೆ ಅವುಗಳನ್ನು ಒಪ್ಪಲಿಲ್ಲ. ಲಾಕ್‌ಡೌನ್‌ ಅವಧಿಯಲ್ಲಿ ನನ್ನ ಮುಂದೆ ಹಲವು ಸಿನಿಮಾಗಳ ಸ್ಕಿಪ್ಟ್‌ಗಳಿದ್ದವು. ಈ ಪೈಕಿ ಮಿಷನ್‌ ಮಜ್ನು ಸಿನಿಮಾದ ಸ್ಕ್ರಿಪ್ಟ್ ಒಂದು ರೀತಿಯಲ್ಲಿ ಆಸಕ್ತಿದಾಯಕವಾಗಿತ್ತು. ಅದರ ಮೊದಲ ನರೇಷನ್‌ನಲ್ಲಿಯೇ ನನಗೆ ಆ ಸಿನಿಮಾದ ಒಂದು ಭಾಗವಾಗುವ ಮನಸ್ಸಾಯಿತು. 1970ರ ಕಥೆಯನ್ನು ಹೊಂದಿರುವ ಈ ಸಿನಿಮಾದಲ್ಲಿ ರೋಮ್ಯಾನ್ಸ್‌ಗೂ ಮೀರಿದ ಭಾವನೆಗಳಿವೆ. ಸಿದ್ಧಾರ್ಥ್ ಮಲ್ಹೋತ್ರ ಕೂಡ ಉತ್ತಮ ನಟ. ಈ ಸಿನಿಮಾ ನನಗೆ ಪಾಲಿಗೆ ಬಂದ ಉಡುಗೊರೆ. ಅದನ್ನು ನಿರಾಕರಿಸಲು ಮನಸ್ಸಾಗಲಿಲ್ಲ' ಎಂದು ರಶ್ಮಿಕಾ ವಿವರಿಸಿದ್ದಾರೆ. 'ಮಿಷನ್‌ ಮಜ್ನು' ಸಿನಿಮಾಗಾಗಿ ನಾನು ಹಿಂದಿಯ ಕೆಲವು ಆಡುಭಾಷೆಗಳನ್ನು ಕಲಿಯಬೇಕಿತ್ತು. ಈ ರೀತಿ ಮಾಡಿದಾಗಲೇ ಯಾವುದೇ ಪಾತ್ರ ಸಹಜವಾಗಿ ಮೂಡಿ ಬರುತ್ತದೆ. ನನ್ನ ಪಾತ್ರದ ಬಗ್ಗೆ ಚೆನ್ನಾಗಿ ತಿಳಿದುಕೊಂಡೇ ನಾನು ನಟಿಸಿದ್ದೇನೆ. ಈ ಸಿನಿಮಾ ಬಿಡುಗಡೆಯಾದ ನಂತರ ಜನರು ನನ್ನನ್ನು ಆ ಪಾತ್ರದ ಹೆಸರಿನಲ್ಲಿಯೇ ಕರೆದರೆ ಆಶ್ಚರ್ಯವೇನಿಲ್ಲ ಎಂದು ರಶ್ಮಿಕಾ ಮಂದಣ್ಣ ಹೇಳಿದ್ದಾರೆ.