ಮಧ್ಯರಾತ್ರಿ ಸ್ಥಳಾಂತರದ ವೇಳೆ ತಾಲಿಬಾನ್‌ನಿಂದಲೇ ಭಾರತದ ರಾಯಭಾರ ಸಿಬ್ಬಂದಿಗೆ ಬೆಂಗಾವಲು!
ಅಫ್ಘಾನಿಸ್ತಾನದಲ್ಲಿನ ಭಾರತದ ರಾಯಭಾರ ಕಚೇರಿಯಲ್ಲಿದ್ದ ಸಿಬ್ಬಂದಿ ಹಾಗೂ ಪ್ರಜೆಗಳನ್ನು ಸೋಮವಾರ ರಾತ್ರಿ ಸಾಗಿಸುವಾಗ ತಾಲಿಬಾನ್ ಉಗ್ರರೇ ಅವರಿಗೆ ಬೆಂಗಾವಲಾಗಿ ತೆರಳಿದ್ದರು ಎಂಬ ಸಂಗತಿ ಬಹಿರಂಗವಾಗಿದೆ.
Admin
0
7
ಹೊಸದಿಲ್ಲಿ: ಆಕ್ರಮಿತ ಅಫ್ಘಾನಿಸ್ತಾನದಿಂದ ಭಾರತದ ಸಿಬ್ಬಂದಿಯನ್ನು ಕರೆತಂದ ಘಟನೆ ಸಾಕಷ್ಟು ರೋಚಕವಾಗಿತ್ತು. ಕಾಬೂಲ್‌ನಿಂದ ಮೊದಲ ಬಾರಿ ವಿಮಾನದಿಂದ ಕೆಲವು ಸಿಬ್ಬಂದಿಯನ್ನು ಕರೆತರುವಾಗ ತಾಲಿಬಾನ್ ಉಗ್ರರು ಅಡ್ಡಗಟ್ಟಿ ವಿಚಾರಿಸಿದ್ದರು ಎಂದು ವರದಿಯಾಗಿತ್ತು. ಅದರ ಬೆನ್ನಲ್ಲೇ ಭಾರತದ ಉದ್ಯೋಗಿಗಳಿಗೆ ಸ್ವತಃ ತಾಲಿಬಾನ್ ರಕ್ಷಣೆ ನೀಡಿದ್ದೂ ಬಹಿರಂಗವಾಗಿದೆ.
ಭಾರತದ ರಾಯಭಾರ ಕಚೇರಿ ಎದುರಿನ ಮುಖ್ಯ ದ್ವಾರದ ಹೊರಗೆ ಮೆಷಿನ್ ಗನ್‌ಗಳು ಹಾಗೂ ಗ್ರೆನೇಡ್ ಉಡಾವಣಾ ರಾಕೆಟ್‌ಗಳೊಂದಿಗೆ ತಾಲಿಬಾನ್ ಉಗ್ರರು ಕಾದುನಿಂತಿದ್ದರು. ರಾಯಭಾರ ಕಚೇರಿ ಆವರಣದಲ್ಲಿ ಭಾರತದ ಸುಮಾರು 150 ರಾಜತಾಂತ್ರಿಕ ಸಿಬ್ಬಂದಿ ಹಾಗೂ ಪ್ರಜೆಗಳಿದ್ದರು. ಆಗ ತಾಲಿಬಾನ್ ಇಡೀ ದೇಶದ ಅಧಿಕಾರವನ್ನು ತಮ್ಮ ಹಿಡಿತಕ್ಕೆ ಪಡೆದುಕೊಳ್ಳುವ ಸನಿಹದಲ್ಲಿದ್ದರು. ಇದರಿಂದ ಭಾರತದ ಸಿಬ್ಬಂದಿ ಕಚೇರಿ ಆವರಣದ ಒಳಗಿನಿಂದಲೇ ಇಡೀ ಸನ್ನಿವೇಶವನ್ನು ಭಯದಿಂದ ವೀಕ್ಷಿಸುವಂತಾಗಿತ್ತು.
ಭಾರತದ ಪ್ರಜೆಗಳನ್ನು ಅಲ್ಲಿಂದ ಹೊರಗೆ ಕರೆತರಲು ತಾಲಿಬಾನ್ ಅಡ್ಡಿಯಾಗುವ ಬಗ್ಗೆ ಆತಂಕ ವ್ಯಕ್ತವಾಗಿತ್ತು. ಪರಿಸ್ಥಿತಿ ಕೊಂಚ ವ್ಯತ್ಯಾಸವಾದರೂ ಹಿಂಸಾಚಾರದ ಅಪಾಯವಿತ್ತು. ಆದರೆ ಭಾರತೀಯ ರಾಯಭಾರ ಕಚೇರಿ ಎದುರು ನಿಂತಿದ್ದ ತಾಲಿಬಾನ್ ಉಗ್ರರು, ಪ್ರತೀಕಾರ ತೆಗೆದುಕೊಳ್ಳುವ ಉದ್ದೇಶ ಹೊಂದಿರಲಿಲ್ಲ. ಬದಲಾಗಿ ಭಾರತದ ಸಿಬ್ಬಂದಿಯನ್ನು ವಿಮಾನ ನಿಲ್ದಾಣದವರೆಗೂ ಸುರಕ್ಷಿತವಾಗಿ ತಮ್ಮ ಬೆಂಗಾವಲಿನಲ್ಲಿ ಕರೆದೊಯ್ದಿದ್ದರು ಎಂದು ಭಾರತಕ್ಕೆ ಮರಳಿದವರಲ್ಲಿ ಒಬ್ಬರಾದ ಎಎಫ್‌ಪಿ ಸುದ್ದಿ ಸಂಸ್ಥೆ ವರದಿಗಾರ ತಿಳಿಸಿದ್ದಾರೆ.
ಪ್ರತಿಕ್ಷಣವೂ ಭಯರಾಯಭಾರ ಕಚೇರಿಯಿಂದ ಸುಮಾರು ಹನ್ನೆರಡು ವಾಹನಗಳು ಸೋಮವಾರ ರಾತ್ರಿ ಕಾಬೂಲ್ ವಿಮಾನ ನಿಲ್ದಾಣದವರೆಗೂ ತೆರಳಿದ್ದವು. ತಾಲಿಬಾನ್ ಆಕ್ರಮಣದಿಂದ ಭಯಗೊಂಡ ಅಲ್ಲಿನ ಜನರು ಕಳುಹಿಸಿದ್ದ ವಿಮಾನದೊಳಗೆ ನುಗ್ಗುವ ಭೀತಿ ಎದುರಾಗಿತ್ತು. ಇನ್ನೊಂದೆಡೆ ಹಿಂಸಾಚಾರ ಭುಗಿಲೇಳುವ ಭಯ ಕೂಡ ಕಾಡುತ್ತಿತ್ತು.
'ನಾವು ಎರಡನೆಯ ತಂಡವನ್ನು ಸ್ಥಳಾಂತರಿಸುವಾಗ ವಿಮಾನ ನಿಲ್ದಾಣದ ಗ್ರೀನ್ ಜೋನ್‌ನಿಂದ ಹೊರ ಹೋಗಲು ಬಿಡದೆ ತಾಲಿಬಾನ್ ಉಗ್ರರು ಅಡ್ಡಗಟ್ಟಿದ್ದರು. ಹೀಗಾಗಿ ನಾವೇ ತಾಲಿಬಾನ್ ಅನ್ನು ಸಂಪರ್ಕಿಸಿ ನಮ್ಮ ಸಿಬ್ಬಂದಿಗೆ ಬೆಂಗಾವಲು ಒದಗಿಸಲು ಮನವಿ ಮಾಡಿದ್ದೆವು' ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಜನರನ್ನು ಬೆದರಿಸಿ ದಾರಿಮಾಡಿಕೊಟ್ಟರುರಾಯಭಾರ ಕಚೇರಿಗೂ ವಿಮಾನ ನಿಲ್ದಾಣಕ್ಕೂ ಐದು ಕಿಮೀ ಅಂತರವಿದ್ದು, ಅಲ್ಲಿಗೆ ನಿರ್ಗಮಿಸುವವರೆಗೂ ಗೃಹಬಂಧನಕ್ಕೆ ಒಳಗಾದ ಸ್ಥಿತಿಯಲ್ಲಿ ಸಮಯ ಕಳೆಯಬೇಕಾಗುತ್ತು. ವಿಮಾನ ನಿಲ್ದಾಣಕ್ಕೆ ಸಾಗುವ ರಸ್ತೆಗಳಲ್ಲಿ ಜನರು, ವಾಹನಗಳು ಅಡ್ಡಾದಿಡ್ಡಿ ತುಂಬಿದ್ದರಿಂದ ಐದು ಕಿಮೀ ಸಾಗಲು ಐದು ಗಂಟೆ ಬೇಕಾಗಿತ್ತು. ಅದರಲ್ಲಿ ಪ್ರತಿಕ್ಷಣವೂ ದಾಳಿ ನಡೆಯುವ ಭಯ ಕಾಡುತ್ತಲೇ ಇತ್ತು.
ಕೊನೆಗೆ ತಮ್ಮ ವಾಹನಗಳಿಂದ ರಸ್ತೆಗೆ ಜಿಗಿದ ತಾಲಿಬಾನಿಗಳು, ರಸ್ತೆಯಲ್ಲಿ ನಿಂತಿದ್ದ ಜನರತ್ತ ಬಂದೂಕು ತೋರಿಸಿ, ಬೆದರಿಸಿ ಅಲ್ಲಿಂದ ಓಡುವಂತೆ ಮಾಡಿದ್ದಾರೆ. ಗಾಳಿಯಲ್ಲಿ ಗುಂಡು ಹಾರಿಸಿದ್ದಾರೆ. ತಲುಪಿದ ಬಳಿಕ ತಾಲಿಬಾನ್ ಬೆಂಗಾವಲು ಅಲ್ಲಿಂದ ನಿರ್ಗಮಿಸಿದೆ. ಬಳಿಕ ಭಾರತದ ಸಿಬ್ಬಂದಿಗೆ ಅಮೆರಿಕನ್ ಸೇನಾ ಪಡೆ ಅಲ್ಲಿ ರಕ್ಷಣೆ ನೀಡಿ, ವಿಮಾನ ಏರುವವರೆಗೂ ಬೆಂಗಾವಲಾಗಿತ್ತು.
