ಟೊಮೇಟೊಗೂ ಬಂತು ಕೋಟಿ ಸಂಪಾದನೆ ಗರಿ: 15 ಕೆಜಿ ಬಾಕ್ಸ್‌ಗೆ ₹1200 ಬೆಲೆ!
ಯೋಜನಾಬದ್ಧ ಹಾಗೂ ಆಧುನಿಕ ಪದ್ಧತಿ ಅಳವಡಿಸಿಕೊಂಡ ಕೃಷಿಯಿಂದ ಅಧಿಕ ಲಾಭ ಗಳಿಸಬಹುದು ಎನ್ನುವುದನ್ನು ಮುಳಬಾಗಲು ತಾಲೂಕಿನ ಆಚಂಪಲ್ಲಿ ಗ್ರಾಮದ ರೈತ ಶ್ರೀನಿವಾಸ್‌ ಸಾಧಿಸಿ ತೋರಿಸಿದ್ದಾರೆ. ಈ ಬಾರಿ ಕೋಟಿ ರೂ. ಸಂಪಾದನೆ ನಿರೀಕ್ಷೆ ಹೊಂದಿದ್ದಾರೆ.
Admin
0
6
ಬಾಲವೆಂಕಟೇಶ್‌ ಕೆ.ಎಂ. ಕೆಜಿಎಫ್‌
ಕೃಷಿ ಉತ್ಪನ್ನಗಳ ಬೆಲೆ ಏರಿಳಿತ, ಪ್ರಕೃತಿ ವಿಕೋಪ, ರೋಗ-ರುಜಿನಗಳ ಕಾಟ, ಉತ್ಪಾದನಾ ವೆಚ್ಚ ಹೆಚ್ಚಳದಿಂದಾಗಿ ಕೃಷಿ ಕ್ಷೇತ್ರದಿಂದ ಬಹಳಷ್ಟು ಜನ ವಿಮುಖರಾಗುತ್ತಿದ್ದಾರೆ. ಆದರೆ ಯೋಜನಾಬದ್ಧ ಹಾಗೂ ಆಧುನಿಕ ಪದ್ಧತಿ ಅಳವಡಿಸಿಕೊಂಡ ಕೃಷಿಯಿಂದ ಅಧಿಕ ಲಾಭ ಗಳಿಸಬಹುದು ಎನ್ನುವುದನ್ನು ಮುಳಬಾಗಲು ತಾಲೂಕಿನ ಆಚಂಪಲ್ಲಿ ಗ್ರಾಮದ ಶ್ರೀನಿವಾಸ್‌ ಸಾಧಿಸಿ ತೋರಿಸಿದ್ದಾರೆ.
ಶ್ರೀನಿವಾಸ್‌ ಎಸ್ಸೆಸ್ಸೆಲ್ಸಿ ತನಕ ವಿದ್ಯಾಭ್ಯಾಸ ಮಾಡಿದ್ದು, ಕೃಷಿಯಲ್ಲಿ ಏನಾದರೂ ಸಾಧನೆ ಮಾಡಬೇಕೆಂಬ ಛಲದಿಂದ 14 ಎಕರೆ ಪ್ರದೇಶದಲ್ಲಿ ಟೊಮೇಟೊ ನಾಟಿ ಮಾಡಿದ್ದಾರೆ. ಹವಾಮಾನ ವೈಪರೀತ್ಯದ ನಡುವೆಯೂ ಶೇ.70ರಷ್ಟು ಫಸಲು ಬಂದಿರುವ ಸಂದರ್ಭದಲ್ಲಿ ಬೆಲೆಯೂ ಅವರ ಕೈಹಿಡಿದೆ.
14 ಎಕರೆ ಪ್ರದೇಶದ ಜಮೀನಿನಲ್ಲಿ ಸಿಜೆಂಟಾ 6242 ತಳಿಯ ಟೊಮೇಟೊ ಬೆಳೆದಿದ್ದು, 4 ತಿಂಗಳ ಅವಧಿಯಲ್ಲಿ ಕೊಯ್ಲಿಗೆ ಬಂದಿದೆ. ಹವಾಮಾನ ವೈಪರೀತ್ಯದಿಂದ ದೇಶದ ನಾನಾ ರಾಜ್ಯಗಳಿಂದ ಟೊಮೇಟೊಗೆ ಉತ್ತಮ ಬೇಡಿಕೆ ಬಂದಿರುವುದರಿಂದ ಮಾರುಕಟ್ಟೆಯಲ್ಲಿ 15 ಕೆಜಿ ಬಾಕ್ಸ್‌ ಟೊಮೇಟೊ 1050ರಿಂದ 1200 ರೂ. ತನಕ ಮಾರಾಟವಾಗುತ್ತಿದೆ.
ಹನಿ ನೀರಾವರಿಯಿಂದ ಉತ್ತಮ ಇಳುವರಿ: ನಾಲ್ಕೂವರೆ ಅಡಿ ಅಂತರದ ಸಾಲುಗಳಲ್ಲಿ ಆಗಸ್ಟ್‌ ಕೊನೆಯ ವಾರದಲ್ಲಿ ಸಸಿಗಳ ನಾಟಿ ಮಾಡಿದ್ದು, ಹನಿ ನೀರಾವರಿ ಮೂಲಕ ನೀರು ಕೊಟ್ಟಿದ್ದಾರೆ. ಎರಡು ತಿಂಗಳ ಬಳಿಕ ಟೊಮೇಟೊ ಕಾಯಿಗಳು ಶುರುವಾದವು, ಕಟಾವು ಆರಂಭಗೊಂಡಿದ್ದು, ನ.8 ರಂದು 120 ಬಾಕ್ಸ್‌ ಕಟಾವು ಮಾಡಿದ ಟೊಮೇಟೊ ಬಾಕ್ಸ್‌ ಒಂದಕ್ಕೆ 1050 ರೂ.ನಂತೆ ಮಾರಾಟ ಮಾಡಿದ್ದೇವೆ. ಮುಂದಿನ ದಿನಗಳಲ್ಲಿ ಒಂದು ಕೊಯ್ಲಿಗೆ ಒಂದು ಸಾವಿರ ಬಾಕ್ಸ್‌ ಸಿಗುವ ಸಾಧ್ಯತೆ ಇದ್ದು, ಟೊಮೇಟೊ ಬೆಲೆ ಇದೇ ರೀತಿ ಮುಂದುವರಿದರೆ ಅಂದಾಜು 14 ಎಕರೆ ಪ್ರದೇಶದಲ್ಲಿ ಒಂದು ಕೋಟಿ ರೂಪಾಯಿ ಆದಾಯ ಬರುವ ನೀರಿಕ್ಷೆ ಇಟ್ಟುಕೊಂಡಿದ್ದಾರೆ.
1200 ಟನ್‌ ಇಳುವರಿ: 14 ಎಕರೆ ಪ್ರದೇಶದಲ್ಲಿ 1200ರಿಂದ 1300 ಟನ್‌ ಇಳುವರಿ ಬರಲಿದ್ದು, ಪ್ರತಿ ಕೆಜಿ ಟೊಮೇಟೊಗೆ 70 ರಿಂದ 85 ರೂ. ದರ ಲಭಿಸಲಿದೆ. ಈಗಾಗಲೇ ಚೆನ್ನೈ, ದೆಹಲಿ, ಆಂಧ್ರ ಪ್ರದೇಶದ ವ್ಯಾಪಾರಿಗಳು ತೋಟದ ಬಳಿಯೇ ದರ ನಿಗದಿ ಮಾಡಿ ಟೊಮೇಟೊ ತೆಗೆದುಕೊಳ್ಳಲು ಮುಂದೆ ಬಂದಿರುವುದಾಗಿ ತೋಟದ ಮಾಲೀಕ ಶ್ರೀನಿವಾಸ್‌ ಹೇಳಿದರು.
ಒಂದು ಎಕರೆ 2.25 ಲಕ್ಷ ವೆಚ್ಚ: ಕಳೆದ ಐದು ವರ್ಷಗಳಿಂದ ಟೊಮೇಟೊ ಬೆಳೆಯುತ್ತಿದ್ದೇನೆ. ಪ್ರಸಕ್ತ ವರ್ಷದಲ್ಲಿ ಒಂದು ಎಕರೆಗೆ 2.5 ಲಕ್ಷ ವೆಚ್ಚವಾಗುತ್ತದೆ. ಸಸಿಗಳ ನಾಟಿ ಹಾಗೂ ಗೊಬ್ಬರಕ್ಕಾಗಿ 1.30 ಲಕ್ಷ, 80 ಸಾವಿರ ಖರ್ಚಿನಲ್ಲಿ ಔಷಧೋಪಚಾರ, 30 ಸಾವಿರದಲ್ಲಿ ಟೊಮೇಟೊ ಗಿಡಗಳನ್ನು ತಂತಿಗೆ ಕಟ್ಟಲು ಸುತಲಿ ದಾರ ಖರೀದಿ ಹಾಗೂ ಕೂಲಿ, ಕಾರ್ಮಿಕರ ಸಂಬಳ, ಇತರೆ ಖರ್ಚು ಒಟ್ಟು 2.5 ಲಕ್ಷ ಬರುತ್ತದೆ. ಋುತುಮಾನಕ್ಕೆ ತಕ್ಕಂತೆ ಯೋಜನಾಬದ್ಧವಾಗಿ ಕೃಷಿ ಕೈಗೊಂಡರೆ ಹೆಚ್ಚಿನ ಲಾಭ ಪಡೆಯಬಹುದು ಎಂದು ಶ್ರೀನಿವಾಸ್‌ ತಮ್ಮ ಅನುಭವ ಹಂಚಿಕೊಂಡರು.
ಉತ್ತಮ ಬೆಳೆ, ಬಂಪರ್‌ ಬೆಲೆ
ದೇಶದ ಬಹುತೇಕ ಭಾಗಗಳಲ್ಲಿ ಮಳೆಯಿಂದ ಟೊಮೇಟೊ ಬೆಳೆಗಳು ನಾಶವಾಗಿರುವ ಹಿನ್ನೆಲೆಯಲ್ಲಿ ದೆಹಲಿ, ಕೊಲ್ಕತಾ, ಒಡಿಶಾ, ವಿಜಯವಾಡ, ಚೆನ್ನೈ, ಗೋವಾ, ಮಧ್ಯಪ್ರದೇಶದ, ಗುಜರಾತ್‌ ರಾಜ್ಯಗಳಿಂದ ವ್ಯಾಪಾರಿಗಳು ಬಂದಿರುವುದರಿಂದ ಟೊಮೇಟೊಗೆ ಉತ್ತಮ ಬೇಡಿಕೆ ಬಂದಿದೆ. ಕಳೆದ ಎರಡು ವಾರಗಳಿಂದ ಮಧ್ಯಮ ಗುಣಮಟ್ಟದ ಬಾಕ್ಸ್‌ ಟೊಮೇಟೊ ಒಂದಕ್ಕೆ 600ರಿಂದ 800 ರೂಪಾಯಿಗಳಿಗೆ ಮಾರಾಟವಾಗುತ್ತಿದ್ದು, ಉತ್ತಮ ಗುಣಮಟ್ಟದ ಟೊಮೇಟೊ ಬಾಕ್ಸ್‌ ಒಂದಕ್ಕೆ 800 ರಿಂದ 1200 ರೂ. ತನಕ ಸಗಟು ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ. ಉತ್ತಮ ಬೆಳೆ ಬೆಳೆದಿರುವ ರೈತರಿಗೆ ಬಂಪರ್‌ ಬೆಲೆ ಬಂದಿದೆ ಎಂದರೆ ತಪ್ಪಗಲಾರದು ಎಂದು ಸಗಟು ವ್ಯಾಪಾರಿ ವಸಂತ್‌ಕುಮಾರ್‌ ಹೇಳಿದರು.
