ಜವಳಿ, ಎಲೆಕ್ಟ್ರಾನಿಕ್ಸ್‌ ಉತ್ಪನ್ನಗಳ ಬೆಲೆ ಶೇ.8-10 ಹೆಚ್ಚಳ ಸಂಭವ; ಮದ್ಯ ಪ್ರಿಯರಿಗೂ ದರ ಏರಿಕೆ ಬಿಸಿ

ಹೊಸದಿಲ್ಲಿ: ಉತ್ಪನ್ನಗಳು, ಮತ್ತು ಮದ್ಯದ ದರಗಳಲ್ಲಿ ಶೀಘ್ರದಲ್ಲೇ ಶೇ.8 ರಿಂದ ಶೇ. 10ರಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ. ಈ ವಲಯದ ಉತ್ಪಾದಕ ಕಂಪನಿಗಳು ಹೆಚ್ಚುವರಿ ಉತ್ಪಾದನಾ ವೆಚ್ಚವನ್ನು ಗ್ರಾಹಕರಿಗೆ ವರ್ಗಾಯಿಸಲು ನಿರ್ಧರಿಸಿವೆ. ದಿನಸಿ ವಸ್ತುಗಳು, ಪರ್ಸನಲ್‌ ಕೇರ್‌ ಉತ್ಪನ್ನಗಳು, ಪ್ಯಾಕೇಜ್ಡ್‌ ಫುಡ್ಸ್‌ ದರಗಳು ಈಗಾಗಲೇ ಏರಿಕೆಯಾಗಿವೆ. ಹೀಗಿದ್ದರೂ ಹೊಸ ವರ್ಷ ಮತ್ತೊಂದು ಸುತ್ತಿನ ಏರಿಕೆಯನ್ನು ನಿರೀಕ್ಷಿಸಲಾಗಿದೆ. ಕಚ್ಚಾ ವಸ್ತುಗಳ ದರ ಹೆಚ್ಚಳ, ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚುತ್ತಿರುವುದು ಕೂಡ ಇದಕ್ಕೆ ಕಾರಣವಾಗಿದೆ. ಹಲವಾರು ವಲಯಗಳಲ್ಲಿ ವಹಿವಾಟು ಕೋವಿಡ್‌ ಪೂರ್ವ ಮಟ್ಟವನ್ನೂ ಮೀರಿದೆ. ಕಳೆದ 6 ತಿಂಗಳಿನಿಂದ ಸಗಟು ಹಣದುಬ್ಬರ ಎರಡಂಕಿಗೆ ಸನಿಹದಲ್ಲಿದೆ. ಅಕ್ಟೋಬರ್‌ನಲ್ಲಿ ಇದು ಶೇ.8.6 ಇತ್ತು. ಆದರೆ ಸೆಪ್ಟೆಂಬರ್‌ನಲ್ಲಿ ರಿಟೇಲ್‌ ಹಣದುಬ್ಬರ ಶೇ. 4.35ರ ಕೆಳಮಟ್ಟದಲ್ಲಿದೆ. ಸಗಟು ದರ ಮತ್ತು ರಿಟೇಲ್‌ ದರಗಳ ವ್ಯತ್ಯಾಸವನ್ನು ಇದುವರೆಗೆ ಗ್ರಾಹಕರಿಗೆ ವರ್ಗಾಯಿಸಿಲ್ಲ. ಮತ್ತೊಂದು ಕಡೆ ಗ್ಲಾಸ್‌, ಹತ್ತಿ, ಉಕ್ಕು, ಚಿಪ್‌, ರಾಸಾಯನಿಕಗಳ ದರದಲ್ಲಿ ಭಾರಿ ಏರಿಕೆಯಾಗಿದ್ದು, ಮಾರಾಟಗಾರರ ಲಾಭಾಂಶದ ಮೇಲೆ ಪ್ರಭಾವ ಬೀರುತ್ತಿವೆ. ಹತ್ತಿಯ ದರ ಹೆಚ್ಚಳವಾಗಿರುವುದು ಅಪಾರೆಲ್‌ ಮತ್ತು ಗಾರ್ಮೆಂಟ್‌ ವಲಯದಲ್ಲಿ ಪ್ರಭಾವ ಬೀರಿದೆ. ಕಳೆದ ಅಕ್ಟೋಬರ್‌ನಲ್ಲಿ ಸಗಟು ಹಣದುಬ್ಬರ ಶೇ. 8.6ಕ್ಕೆ ಏರಿಕೆಯಾಗಿತ್ತು. ಇಂಧನ ದರ ಹೆಚ್ಚಳ, ಕಚ್ಚಾ ಸಾಮಾಗ್ರಿಗಳ ಪ್ರಭಾವ ಬೀರಿತ್ತು. ಮದ್ಯದ ಉದ್ಯಮ ವಲಯದಲ್ಲಿ ಗ್ಲಾಸ್‌ ಬಾಟಲಿಗಳ ದರ ಏರಿಕೆ, ಲಿಕ್ಕರ್‌ ತಯಾರಿಕೆಯ ವೆಚ್ಚದಲ್ಲಿ ಏರಿಕೆಯಾಗಿದೆ. ಆದರೆ ಇದು ಉತ್ಪಾದಕರಿಗೆ, ಹೋಲ್‌ಸೇಲ್‌ ವರ್ತಕರ ಲಾಭಾಂಶವನ್ನು ಕಡಿತಗೊಳಿಸುತ್ತದೆ. ಹೀಗಿದ್ದರೂ ಗ್ರಾಹಕರ ಮೇಲೆ ಪ್ರಭಾವ ಬೀರುವ ಚಿಲ್ಲರೆ ಹಣದುಬ್ಬರ ಮಾತ್ರ ಶೇ. 4.32ರ ಸುರಕ್ಷಿತ ಮಟ್ಟದಲ್ಲಿ ಇತ್ತು. ಸಗಟು ವಹಿವಾಟುದಾರರು ಹೋಲ್‌ಸೇಲ್‌ ಹಾಗೂ ರಿಟೇಲ್‌ ದರದ ನಡುವಣ ವ್ಯತ್ಯಾಸವನ್ನು ಗ್ರಾಹಕರಿಗೆ ವರ್ಗಾಯಿಸದೆ ತಡೆದಿಟ್ಟುಕೊಂಡಿದ್ದರು. ಆದರೆ ಅವರಿಗೂ ದೀರ್ಘಕಾಲ ತಡೆದುಕೊಳ್ಳುವುದು ಕಷ್ಟ. ಹೀಗಾಗಿ ಹೊಸ ವರ್ಷದ ವೇಳೆಗೆ ಮತ್ತೊಂದು ಸುತ್ತಿನ ದರ ಏರಿಕೆಯಾಗಬಹುದು. ಹೀಗಾಗಿ ಉತ್ಪಾದನೆ ಹೆಚ್ಚಬೇಕು. ಇಂಧನ ದರಗಳು ನಿಯಂತ್ರಣದಲ್ಲಿರಬೇಕು ಎನ್ನುತ್ತಿವೆ ವರದಿಗಳು. ಕಂಪನಿಗಳಿಗೆ ಹಣದುಬ್ಬರದ ಕಳವಳ ಹಿಂದುಸ್ತಾನ್‌ ಯುನಿಲಿವರ್‌ ಲಿ.ನಿಂದ ನೆಸ್ಲೆ ಇಂಡಿಯಾದ ತನಕ ಹಲವಾರು ಕಂಪನಿಗಳು ಉತ್ಪಾದನಾ ವೆಚ್ಚ ಏರುತ್ತಿರುವ ಬಗ್ಗೆ ಮತ್ತು ಪೂರೈಕೆಯ ಸರಣಿಯಲ್ಲಿ ಕೊರತೆ ಆಗಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿವೆ. ಡಾಬರ್‌ ಇಂಡಿಯಾ, ಬ್ರಿಟಾನಿಯಾ ಮುಂತಾದ ಕಂಪನಿಗಳು ಉತ್ಪಾದನಾ ವೆಚ್ಚದ ಕೆಲ ಭಾಗವನ್ನು ಗ್ರಾಹಕರಿಗೆ ವರ್ಗಾಯಿಸಿವೆ. ಹಣದುಬ್ಬರ ಪರಿಣಾಮ ಕಂಪನಿಗಳ ಲಾಭಾಂಶ ಕಡಿಮೆಯಾಗುತ್ತದೆ.