ಷೇರು ಮಾರುಕಟ್ಟೆ ಪ್ರವೇಶಿಸಲಿದೆ ಜೊಮ್ಯಾಟೋ, ಬರೋಬ್ಬರಿ 8,250 ಕೋಟಿ ರೂ. ಸಂಗ್ರಹದ ಗುರಿ
2008ರಲ್ಲಿ ಆರಂಭವಾದ ಜೊಮ್ಯಾಟೋ ಭಾರತದ ಪ್ರಮುಖ ಸ್ಟಾರ್ಟಪ್‌ ಆಗಿ ಗುರುತಿಸಿಕೊಂಡಿದೆ. 24 ದೇಶಗಳಲ್ಲಿ ಕಂಪನಿ ಕಾರ್ಯಾಚರಿಸುತ್ತಿದ್ದು, ಆರಂಭಿಕ ಷೇರು ಕೊಡುಗೆ (ಐಪಿಒ) ಮೂಲಕ ಕಂಪನಿ 8,250 ಕೋಟಿ ರೂ. ಸಂಗ್ರಹಿಸಲು ಮುಂದಾಗಿದೆ.
Admin
0
9
ಮುಂಬಯಿ: ಮನೆ ಬಾಗಿಲಿಗೆ ಆಹಾರವನ್ನುತಲುಪಿಸುವ ಫುಡ್‌ ಡೆಲಿವರಿ ಸ್ಟಾರ್ಟಪ್‌ ಜೊಮ್ಯಾಟೋ ಪ್ರವೇಶಕ್ಕೆ ನಿರ್ಧರಿಸಿದ್ದು, (ಆರಂಭಿಕ ಷೇರು ಕೊಡುಗೆ)ಗೆ ಅರ್ಜಿ ಸಲ್ಲಿಸಿದೆ. ಚೀನಾದ ಆಂಟ್‌ ಗ್ರೂಪ್‌ ಬೆಂಬಲಿತ ಷೇರು ಮಾರಾಟದ ಮೂಲಕ 8,250 ಕೋಟಿ ರೂ. (1.11 ಬಿಲಿಯನ್‌ ಡಾಲರ್‌) ಸಂಗ್ರಹಿಸಲು ಮುಂದಾಗಿದೆ.
ಕೊರೊನಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ಜನರು ಹೆಚ್ಚೆಚ್ಚು ಆನ್‌ಲೈನ್‌ ಫುಡ್‌ ಡೆಲಿವರಿ ಆಪ್‌ಗಳನ್ನು ನೆಚ್ಚಿಕೊಂಡಿರುವ ಹೊತ್ತಲ್ಲೇ ದೊಡ್ಡ ಮೊತ್ತ ಷೇರುಗಳನ್ನು ಮಾರಾಟ ಮಾಡಿ ಹಣ ಸಂಗ್ರಹಿಸಲು ಕಂಪನಿ ಮುಂದಾಗಿದೆ.
2008ರಲ್ಲಿ ಆರಂಭವಾದ ಜೊಮ್ಯಾಟೋ ಭಾರತ ಪ್ರಮುಖ ಸ್ಟಾರ್ಟಪ್‌ ಆಗಿ ಗುರುತಿಸಿಕೊಂಡಿದೆ. 24 ದೇಶಗಳಲ್ಲಿ ಕಾರ್ಯಾಚರಿಸುತ್ತಿದ್ದು 5,000 ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿದೆ. ಕಳೆದ ಫೆಬ್ರವರಿಯಲ್ಲಿ ಐವರು ಹೂಡಿಕೆದಾರರಿಂದ ಕಂಪನಿ 1,860 ಕೋಟಿ ರೂ. ಸಂಗ್ರಹಿಸಿತ್ತು.
ಐಪಿಒದಲ್ಲಿ ಹೊಸದಾಗಿ 7,500 ಕೋಟಿ ರೂ. ಮೊತ್ತದ ಷೇರುಗಳನ್ನು ಜೊಮ್ಯಾಟೊ ಬಿಡುಗಡೆ ಮಾಡಲಿದ್ದರೆ, ಈಗಾಗಲೇ ಇರುವ ಹೂಡಿಕೆದಾರರು 750 ಕೋಟಿ ರೂ. ಮೊತ್ತದ ಷೇರುಗಳನ್ನು ಮಾರಲಿದ್ದಾರೆ. ಕಂಪನಿಯಲ್ಲಿ ಅತೀ ಹೆಚ್ಚು ಷೇರುಗಳನ್ನು ಹೊಂದಿರುವ ಇನ್ಫೋ ಎಡ್ಜ್‌ 750 ಕೋಟಿ ರೂ. ಮೊತ್ತದ ಷೇರುಗಳನ್ನು ಮಾರಲಿದೆ.
ಜೊಮ್ಯಾಟೋ ಮತ್ತು ಅದರ ಪ್ರತಿಸ್ಪರ್ಧಿ ಸ್ವಿಗ್ಗಿ ಭಾರತದ ಫುಡ್‌ ಡೆಲಿವರಿ ಮಾರುಕಟ್ಟೆಯಲ್ಲಿ ಹಿಡಿತ ಸಾಧಿಸಿವೆ. 2017-18ರಲ್ಲಿ 446 ಕೋಟಿ ರೂ. ಇದ್ದ ಜೊಮ್ಯಾಟೋ ಆದಾಯ 2019-20ರಲ್ಲಿ 2,604 ಕೋಟಿ ರೂ.ಗೆ ಏರಿಕೆಯಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ. 2020-21ರಲ್ಲಿ ಡಿಸೆಂಬರ್‌ 31ರವರೆಗೆ 1,301 ಕೋಟಿ ರೂ. ಆದಾಯ ಗಳಿಸಿರುವುದು ಜೊಮ್ಯಾಟೋ ಹೇಳಿದೆ.
ಇದೇ ವೇಳೆ ತಾನು 2018ನೇ ಆರ್ಥಿಕ ವರ್ಷದಲ್ಲಿ 106.9 ಕೋಟಿ ರೂ., 2019ರಲ್ಲಿ 1010 ಕೋಟಿ ರೂ., 2020 ರಲ್ಲಿ 2,385.6 ಕೋಟಿ ರೂ. ಮತ್ತು 2021ರ ಮೊದಲ 9 ತಿಂಗಳಲ್ಲಿ 682 ಕೋಟಿ ರೂ. ನಷ್ಟ ಅನುಭವಿಸಿದ್ದಾಗಿ ಜೊಮ್ಯಾಟೋ ಸೆಬಿಗೆ ಮಾಹಿತಿ ನೀಡಿದೆ. ಸದ್ಯ ಜೊಮ್ಯಾಟೋ ಮಾರುಕಟ್ಟೆ ಮೌಲ್ಯ 38,698 ಕೋಟಿ ರೂ. ಎಂದು ಅಂದಾಜು ಮಾಡಲಾಗಿದೆ.
