ಕ್ರೈಸ್ತ ಧರ್ಮಕ್ಕೆ ಮತಾಂತರವಾಗಿದ್ದ ಹಿಂದೂ ವ್ಯಕ್ತಿಗೆ ಭಾರತದ ಮೊದಲ ಸಂತ ಪದವಿ

ತಿರುವನಂತಪುರಂ: 18ನೇ ಶತಮಾನದಲ್ಲಿ ಕ್ರೈಸ್ತ ಧರ್ಮಕ್ಕೆ ಮತಾಂತರಗೊಂಡ ಕಾರಣಕ್ಕೆ ಚಿತ್ರಹಿಂಸೆಗೆ ಒಳಗಾಗಿ ಮೃತಪಟ್ಟಿದ್ದ ಕೇರಳದ ದೇವಸಹಾಯಂ ಪಿಳ್ಳೈ, ಭಾರತದ ಮೊದಲ ಲೇಮ್ಯಾನ್ (ಚರ್ಚ್‌ನ ದೀಕ್ಷೆ ಪಡೆದಿಲ್ಲದ ಸದಸ್ಯ) ಎಂಬ ಸಂತ ಪದವಿಗೆ ಪಾತ್ರರಾಗಲಿದ್ದಾರೆ. 2022ರ ಮೇ 15ರಂದು ವ್ಯಾಟಿಕನ್‌ನ ಸೇಂಟ್ ಪೀಟರ್ಸ್ ಬಸಿಲಿಕಾದಲ್ಲಿ ಕ್ಯಾನನೈಸೇಷನ್ ಮಾಸ್‌ ವೇಳೆ ಇತರೆ ಆರು ಮಂದಿಯ ಜತೆಗೆ ದೇವಸಹಾಯಂ ಪಿಳ್ಳೈ ಅವರಿಗೆ ಸಂತ ದೀಕ್ಷೆ ನೀಡಲಿದ್ದಾರೆ ಎಂದು ತಿರುವನಂತಪುರಂನ ಚರ್ಚ್ ಅಧಿಕಾರಿಗಳು ಬುಧವಾರ ತಿಳಿಸಿದ್ದಾರೆ. ಪಿಳ್ಳೈ ಅವರಿಗೆ ಮರಣೋತ್ತರವಾಗಿ 2020ರ ಫೆಬ್ರವರಿ 21ರಂದೇ ನೀಡುವ ನಿರ್ಧಾರವನ್ನು ಘೋಷಿಸಿತ್ತು. ಆದರೆ ಅದನ್ನು ಪ್ರದಾನ ಮಾಡುವ ದಿನಾಂಕವನ್ನು ಮಂಗಳವಾರವಷ್ಟೇ ಪ್ರಕಟಿಸಲಾಗಿದೆ. ಪಿಳ್ಳೈ ಅವರ ಮೂಲ ಹೆಸರು ನೀಲಕಂಠ ಪಿಳ್ಳೈ. ಮಾರ್ತಾಂಡಂ ಸಮೀಪದ ನಟ್ಟಲಂನಲ್ಲಿನ ಶ್ರೀಮಂತ ಹಿಂದೂ ನಾಯರ್ ಕುಟುಂಬದಲ್ಲಿ ಜನಿಸಿದ್ದರು. ಈ ಕುಟುಂಬವು 1712ರ ವೇಳೆ ತಿರುವಿಥಂಕೂರ್ ರಾಜಮನೆತನದ ಭಾಗವಾಗಿತ್ತು. ಅವರು 1745ರ ಮೇ 17ರಂದು ಕ್ರೈಸ್ತ ಧರ್ಮಕ್ಕೆ ಹೊಂದಿದ್ದರು. ರಾಜ ಮಾರ್ತಾಂಡ ವರ್ಮನ ಅರಮನೆಯಲ್ಲಿ ಉದ್ಯೋಗಿಯಾಗಿದ್ದ ಪಿಳ್ಳೈ, ಅನೇಕ ಡಚ್ ಅಧಿಕಾರಿಗಳ ಜತೆಗೆ ಸಮೀಪದ ಸಂಪರ್ಕ ಹೊಂದಿದ್ದರು. ಅದರಲ್ಲಿ ಐತಿಹಾಸಿಕ ಕೊಲಾಚೆಲ್ ಕದನದ ಬಳಿಕ ಮಾರ್ತಾಂಡ ವರ್ಮಾ ಜೀವಂತ ಬಂಧಿಸಿದ್ದ ಡಿ ಲನ್ನೊಯ್ ಜತೆಗಿನ ಆಪ್ತ ಒಡನಾಟ ಪಿಳ್ಳೈ ಅವರು ಸ್ವೀಕರಿಸಲು ಕಾರಣವಾಯಿತು ಎನ್ನಲಾಗಿದೆ. ಕ್ರೈಸ್ತ ಧರ್ಮಕ್ಕೆ ಮತಾಂತರವಾದ ಬಳಿಕ ಪಿಳ್ಳೈ ಧರ್ಮದ ಪ್ರಚಾರ ನಡೆಸಿದ್ದರು. ಅವರ ವಿರುದ್ಧ ರಾಜಾಡಳಿತವು ರಾಜದ್ರೋಹ ಹಾಗೂ ಇತರೆ ಗಂಭೀರ ಆಪಾದನೆಗಳನ್ನು ಹೊರಿಸಿ ಜೈಲಿನಲ್ಲಿ ಇರಿಸಿತ್ತು. ಅವರನ್ನು ಕನ್ಯಾಕುಮಾರಿ ಜಿಲ್ಲೆಯ ಅರಲ್ವೈಮೊಳಿ ಬೆಟ್ಟಗಳತ್ತ ಗಡಿಪಾರು ಮಾಡಿದ ಬಳಿಕ 1752ರ ಜನವರಿ 14ರಂದು ಗುಂಡಿಕ್ಕಿ ಕೊಲ್ಲಲಾಗಿತ್ತು ಎನ್ನಲಾಗಿದೆ. 2012ರ ಡಿಸೆಂಬರ್ 2ರಂದು ಪಿಳ್ಳೈ ಅವರನ್ನು ಕನ್ಯಾಕುಮಾರಿಯ ಕೊಟ್ಟಾರ್‌ನಲ್ಲಿ 'ದೇವರು ಕೊಟ್ಟ ಕಾಣಿಕೆ' (ಬೆಸ್ಡ್) ಎಂದು ಘೋಷಿಸಲಾಗಿತ್ತು. ಪೋಪ್ ಫ್ರಾನ್ಸಿನ್ ಅವರು ದೇವಸಹಾಯಂ ಪಿಳ್ಳೈ ಮತ್ತು ಇತರೆ ಆರು ಮಂದಿಗೆ ಮೇ 15ರಂದು ವ್ಯಾಟಿಕನ್‌ನಲ್ಲಿ ನಡೆಯಲಿರುವ ಸಮಾರಂಭದಲ್ಲಿ ಸಂತ ಪದವಿ ನೀಡಲಿದ್ದಾರೆ.