'ಹೊಂಬಾಳೆ ಫಿಲ್ಮ್ಸ್‌' ಜೊತೆ ಸೇರಿಕೊಂಡು 'ರಾಘವೇಂದ್ರ ಸ್ಟೋರ್ಸ್' ಆರಂಭಿಸಿದ ನಟ ಜಗ್ಗೇಶ್!
'ನವರಸ ನಾಯಕ' ಜಗ್ಗೇಶ್ ಅವರು ಮಂತ್ರಾಲಯದ ರಾಘವೇಂದ್ರ ಸ್ವಾಮಿಗಳ ಪರಮ ಭಕ್ತರು. ಇದೀಗ ಅವರು 'ಹೊಂಬಾಳೆ ಫಿಲ್ಮ್ಸ್‌' ಜೊತೆ ಸೇರಿಕೊಂಡು 'ರಾಘವೇಂದ್ರ ಸ್ಟೋರ್ಸ್' ಆರಂಭಿಸಲಿದ್ದಾರೆ! ಆ ಕುರಿತು ಇಲ್ಲಿದೆ ಮಾಹಿತಿ.
Admin
0
7
'ನವರಸ ನಾಯಕ' ಅವರು ರಾಯರ ಭಕ್ತರು ಅನ್ನೋದು ಎಲ್ಲರಿಗೂ ಗೊತ್ತಿರುವ ವಿಚಾರ. ಸದ್ಯ ಅವರೀಗ 'ಹೊಂಬಾಳೆ ಫಿಲ್ಮ್ಸ್‌'ನ ವಿಜಯ್ ಕಿರಗಂದೂರು ಅವರ ಜೊತೆ ಸೇರಿಕೊಂಡು '' ಆರಂಭಿಸಿದ್ದಾರೆ. ನಟನೆ ಜೊತೆಗೆ ಹೊಸ ಉದ್ಯಮಕ್ಕೂ ಜಗ್ಗೇಶ್ ಕಾಲಿಟ್ಟರ ಎಂದುಕೊಳ್ಳಬೇಡಿ. 'ರಾಘವೇಂದ್ರ ಸ್ಟೋರ್ಸ್' ಅನ್ನೋದು 'ಹೊಂಬಾಳೆ ಫಿಲ್ಮ್ಸ್‌' ನಿರ್ಮಾಣದ ಮುಂದಿನ ಸಿನಿಮಾದ ಶೀರ್ಷಿಕೆ. ಇದರಲ್ಲಿ ಜಗ್ಗೇಶ್ ಹೀರೋ ಆಗಿದ್ದರೆ, 'ರಾಜಕುಮಾರ', 'ಯುವರತ್ನ' ಸಿನಿಮಾಗಳ ಖ್ಯಾತಿಯ ಸಂತೋಷ್ ಆನಂದ್ರಾಮ್ ಇದರ ನಿರ್ದೇಶಕ.
ಇದು ಹೊಂಬಾಳೆ ಫಿಲ್ಮ್ಸ್‌ ನಿರ್ಮಾಣದ 12ನೇ ಸಿನಿಮಾವಾಗಿದೆ. ಈ ಬಗ್ಗೆ ಮಾಹಿತಿ ನೀಡುವ ಚಿತ್ರತಂಡ, 'ನಿಮ್ಮೆಲ್ಲರ ಸಹಕಾರದಿಂದ ಮನೆಮಾತಾಗಿರುವ ಹೊಂಬಾಳೆ ಫಿಲ್ಮ್ಸ್‌ ತಂಡದಿಂದ ಸಹಜವಾಗಿ ಚಿತ್ರರಸಿಕರಿಗೆ ಹೆಚ್ಚು ನಿರೀಕ್ಷೆ ಇರುವುದು ನಮಗೆ ಅರಿವಿದೆ. ಮತ್ತೊಂದು ಯಶಸ್ವಿ ಚಿತ್ರ ನೀಡಬೇಕೆಂಬ ಯೋಜನೆಯೊಂದಿಗೆ ಇಂದು (ಸೆ.22) ನಮ್ಮ ನಿರ್ಮಾಣದ 12ನೇ ಸಿನಿಮಾವನ್ನು ಘೋಷಣೆ ಮಾಡಿದ್ದೇವೆ. ಕೌಟುಂಬಿಕ ಮನರಂಜನೆಯ ಸಿನಿಮಾ ಇದಾಗಲಿದೆ. ಸಾಮಾಜಿಕ ಸಂದೇಶವಿರುವ ಹಾಸ್ಯ ರಾಜಕೀಯಗಳನ್ನು ಒಳಗೊಂಡ ಹೊಸತನದ ಸಿನಿಮಾವನ್ನು ನಿರ್ಮಿಸಲಿದ್ದೇವೆ. ಕನ್ನಡ ಚಿತ್ರರಂಗದ ಹಿರಿಯ ನಟರಲ್ಲಿ ಒಬ್ಬರಾದ 'ನವರಸ ನಾಯಕ' ಜಗ್ಗೇಶ್ ಚಿತ್ರದಲ್ಲಿ ನಟಿಸುತ್ತಿರುವುದು ಹೆಮ್ಮೆಯ ವಿಷಯ. ಯಶಸ್ವಿ ನಿರ್ದೇಶಕರು ಎಂದು ಕೀರ್ತಿಗಳಿಸಿದ ಸಂತೋಷ್ ಆನಂದ್ ರಾಮ್ ಚಿತ್ರವನ್ನು ನಿರ್ದೇಶಿಸಲಿದ್ದಾರೆ. ಇದೇ ನ.22ರಂದು 'ರಾಘವೇಂದ್ರ ಸ್ಟೋರ್ಸ್' ಸಿನಿಮಾದ ಶೂಟಿಂಗ್ ಪ್ರಾರಂಭಿಸುವ ಯೋಜನೆ ಹಾಕಿಕೊಂಡಿದ್ದೇವೆ' ಎಂದು ಹೇಳಿಕೊಂಡಿದೆ.
'ಜಗ್ಗೇಶ್ ಅವರು ಇದೇ ಮೊದಲ ಬಾರಿಗೆ ನಮ್ಮ ಬ್ಯಾನರ್ ನಲ್ಲಿ ನಟಿಸುತ್ತಿರುವುದು ನಮ್ಮನ್ನು ಪುಳಕಿತರನ್ನಾಗಿ ಮಾಡಿದೆ. ಇದು ನಮಗೆ ಹೆಮ್ಮೆಯ ವಿಷಯವೂ ಹೌದು. ಕನ್ನಡ ಚಲನಚಿತ್ರರಂಗದ ಕೀರ್ತಿಯಲ್ಲಿ ಜಗ್ಗೇಶ್ ಅವರ ಪಾತ್ರ ಅಪಾರವಾದದ್ದು. ಕನ್ನಡ ಚಿತ್ರರಂಗಕ್ಕೆ ಅವರ ಕೊಡುಗೆ ಅವಿಸ್ಮರಣೀಯ, ಅವರು ಚಿತ್ರರಂಗದ ಬಹುದೊಡ್ಡ ಆಸ್ತಿ ಎಂದರೆ ತಪ್ಪಾಗಲಾರದು, ಹೀಗಾಗಿ ಹೊಂಬಾಳೆ ಟೀಮ್‌ಗೆ ಜಗ್ಗೇಶ್ ಅವರ ಸೇರ್ಪಡೆ ನಮ್ಮ ಸೌಭಾಗ್ಯ. ಇನ್ನು, ನಿರ್ದೇಶಕ ಸಂತೋಷ್ ಆನಂದ್ರಾಮ್ ಓರ್ವ ಕ್ರಿಯಾಶೀಲ ನಿರ್ದೇಶಕರಾಗಿದ್ದು, ನಮ್ಮ ಬ್ಯಾನರ್ ನಲ್ಲಿ ಈಗಾಗಲೇ ಎರಡು ಯಶಸ್ವಿ ಚಿತ್ರಗಳನ್ನು ನಿರ್ದೇಶಿಸಿದ್ದಾರೆ. ಅತ್ಯಂತ ಶ್ರದ್ಧೆ ಪ್ರಾಮಾಣಿಕತೆಯಿಂದ ಚಿತ್ರವನ್ನು ರೂಪಿಸುತ್ತಾ ಯಶಸ್ವಿ ನಿರ್ದೇಶಕರಾಗಿ ಖ್ಯಾತಿ ಪಡೆದಿದ್ದಾರೆ. ಸಂತೋಷ್ ಮತ್ತೊಮ್ಮೆ ನಮ್ಮ ಬ್ಯಾನರ್ ಅಡಿಯಲ್ಲಿ ನಿರ್ದೇಶಿಸುತ್ತಿರುವುದು ನನಗೆ ಖುಷಿ ತಂದಿದೆ. ಈ ಹೊಸ ಸಿನಿಮಾವನ್ನು ಚಿತ್ರರಸಿಕರ ನಿರೀಕ್ಷೆಗೆ ತಕ್ಕಂತೆ ರೂಪಿಸಲಿದ್ದಾರೆ ಎಂಬ ಆತ್ಮವಿಶ್ವಾಸ, ನಂಬಿಕೆ ನನಗಿದೆ' ಎಂದು ನಿರ್ಮಾಪಕ ವಿಜಯ್ ಕಿರಗಂದೂರ್ ಹೇಳಿಕೊಂಡಿದ್ದಾರೆ.
'ರಾಯರ ಮಗನಿಗೆ 'ರಾಘವೇಂದ್ರ ಸ್ಟೋರ್ಸ್' ಚಿತ್ರ. ಬದುಕಿನ ಪರಿಪೂರ್ಣ ಆವರ್ಥ ನಗಿಸುತ್ತ ಬಿಡಿಸಿಹೇಳುವ ಅದ್ಭುತ ಕೃತಿ. ಹೊಂಬಾಳೆ ಸಿನಿಮಾದ ಜತೆಗೆ ಇದು ನನ್ನ ಮೊದಲ ಸಿನಿಮಾವಾಗಿದ್ದು, ಈ ಹೊಸ ಪ್ರಯತ್ನವನ್ನು ಪ್ರೇಕ್ಷಕರು ಮೆಚ್ಚಿ ಆಶೀರ್ವದಿಸುತ್ತಾರೆ ಎಂಬ ನಂಬಿಕೆ ಇದೆ' ಎಂದು ಹೇಳಿಕೊಂಡಿದ್ದಾರೆ. ಹಾಗೆಯೇ, 'ಭಾವನೆ, ಮನರಂಜನೆ ಹಾಗು ಸಂವೇದನೆಯ ಪಾಕ ಶಾಲೆ 'ರಾಘವೇಂದ್ರ ಸ್ಟೋರ್ಸ್'. ಹೊಂಬಾಳೆ ಬ್ಯಾನರ್ ಅಡಿಯಲ್ಲಿ ನಟ ಜಗ್ಗೇಶ್ ಅವರ ಜತೆಗೆ ಸಿನಿಮಾ ಮಾಡುವ ಅವಕಾಶ ಸಿಕ್ಕಿದ್ದು ಖುಷಿ ತಂದಿದೆ. ಜಗ್ಗೇಶ್ ಅವರು ಇದುವರೆಗೆ ಮಾಡಿರುವ ಪಾತ್ರಗಳಿಗಿಂತ ವಿಶಿಷ್ಟವಾದ ಪಾತ್ರದಲ್ಲಿ 'ರಾಘವೇಂದ್ರ ಸ್ಫೋರ್ಸ್'ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ' ಎಂದು ನಿರ್ದೇಶಕ ಸಂತೋಷ್ ಆನಂದ್ರಾಮ್ ಹೇಳಿದ್ದಾರೆ.
