ಹೈಬ್ರಿಡ್ ಮ್ಯೂಚುಯಲ್ ಫಂಡ್ಗಳು ಹೂಡಿಕೆದಾರರಿಗೆ ಹೇಗೆ ಸಹಾಯಕಾರಿ

ಹೆಸರೆ ಸೂಚಿಸುವಂತೆ, ಹೈಬ್ರಿಡ್ ಮ್ಯೂಚುಯಲ್ ಫಂಡ್‌ಗಳು ಎರಡು ವಿಭಿನ್ನ ಅಸೆಟ್‌ ಕ್ಲಾಸ್, ಅಂದರೆ ಡೆಟ್‌ (ಸ್ಥಿರ ಆದಾಯ) ಮತ್ತು ಇಕ್ವಿಟಿಯ ಅಥವಾ ಷೇರುಮಾರುಕಟ್ಟೆಯಲ್ಲಿ, ಸಂಯೋಜಿತ ವಿಧಾನದಲ್ಲಿ ಹೂಡಿಕೆ ಮಾಡುತ್ತವೆ. ಸ್ಥಿರತೆಯನ್ನು ನೀಡುವ ʼಡೆಟ್ʼ ವಿಧಾನವು, ಸರಕಾರಿ ಬಾಂಡ್‌ಗಳು, ಕಾರ್ಪೊರೇಟ್ ಬಾಂಡ್‌ಗಳು, ಡಿಬೆಂಚರ್, ಇತ್ಯಾದಿ ಸ್ಥಿರ ಆದಾಯವನ್ನು ನೀಡುವ ಸಾಧನಗಳಲ್ಲಿ ಹೂಡಿಕೆ ಮಾಡುತ್ತದೆ. ಆದರೆ ʼಈಕ್ವಿಟಿʼ ವಿಧಾನವು, ಹೆಚ್ಚು ಏರಿಳಿತಗಳಿರುವ, ಆದರೆ ಹೆಚ್ಚಿನ ಆದಾಯವನ್ನು ತರುವ, ಷೇರುಮಾರುಕಟ್ಟೆಯಲ್ಲಿ ನೋಂದಾಯಿತ ಉದ್ಯಮಗಳ (listed companies) ಷೇರುಗಳಲ್ಲಿ ಹೂಡಿಕೆ ಮಾಡುತ್ತದೆ. ಈಕ್ವಿಟಿ ಮತ್ತು ಡೆಟ್‌ ಅನುಪಾತವನ್ನು ಅವಲಂಬಿಸಿ, ಈ ನಿಧಿಗಳನ್ನು (ಫಂಡ್ಸ್) ಅಗ್ರೆಸಿವ್‌ (ಪ್ರಬಲ) ಹೈಬ್ರಿಡ್ ಫಂಡ್, ಬ್ಯಾಲೆನ್ಸ್ಡ್ (ಸಮತೋಲಿತ) ಹೈಬ್ರಿಡ್ ಫಂಡ್, ಕನ್ಸರ್ವೇಟಿವ್ (ಕಡಿಮೆ ರಿಸ್ಕ್‌ ಇರುವ) ಹೈಬ್ರಿಡ್ ಫಂಡ್, ಡೈನಾಮಿಕ್ ಅಸೆಟ್‌ ಎಲೋಕೇಶನ್‌ ಫಂಡ್ / ಬ್ಯಾಲೆನ್ಸ್ಡ್ ಅಡ್ವಾಂಟೇಜ್ ಫಂಡ್‌, ಮಲ್ಟಿ-ಅಸೆಟ್‌ ಎಲೋಕೇಶನ್‌ ಫಂಡ್, ಮತ್ತು ಇಕ್ವಿಟಿ ಸೇವಿಂಗ್ ಫಂಡ್‌ ಎಂದು ವರ್ಗೀಕರಿಸಲಾಗಿದೆ. ಸಾಮಾನ್ಯವಾಗಿ, ಷೇರು ಅಥವಾ ಷೇರಿಗೆ ಸಂಬಂಧಿತ ಹೂಡಿಕೆಗಳಲ್ಲಿ, 65%ಕ್ಕಿಂತ ಹೆಚ್ಚು ಹೂಡಿಕೆ ಮಾಡುವ ಫಂಡ್ಗಳನ್ನು ಅಗ್ರೆಸಿವ್‌ ಹೈಬ್ರಿಡ್ ಫಂಡ್ಸ್‌ ಎಂದು ಕರೆಯಲಾಗುತ್ತದೆ. ಸ್ಥಿರ ಆದಾಯ ಸಂಬಂಧಿತ ವಿಧಾನಗಳಲ್ಲಿ 65%ಕ್ಕಿಂತ ಹೆಚ್ಚು ಹೂಡಿಕೆ ಮಾಡುವ ಫಂಡ್ಗಳನ್ನು ಕನ್ಸರ್ವೇಟಿವ್ ಹೈಬ್ರಿಡ್ ಫಂಡ್ಸ್‌ ಎಂದು ಕರೆಯಲಾಗುತ್ತದೆ. ಯಾವ ಹೂಡಿಕೆದಾರರು ತಮ್ಮ ಷೇರುಮಾರುಕಟ್ಟೆಯ ಹೂಡಿಕೆಯನ್ನು ತಾವೆ ಸಕ್ರಿಯವಾಗಿ ನಿರ್ವಹಿಸಲು ಬಯಸುವುದಿಲ್ಲವೊ ಅವರ ಅಗತ್ಯವನ್ನು ಹೈಬ್ರಿಡ್ ಫಂಡ್‌ಗಳು ಸಮರ್ಪಕವಾಗಿ ಪೂರೈಸುತ್ತದೆ. ಒಮ್ಮೆ ಗಮನಿಸಿ, ಸುಮಾರು 15-20 ವರ್ಷಗಳಿಂದ ಸ್ಥಿರ ಆದಾಯವು (bank interest) ನಿಧಾನವಾಗಿ ಕಡಿಮೆ ಆಗುತ್ತಿದೆ. ಮತ್ತು ಈ ಕಡಿಮೆಯಾಗಿತ್ತಿರುವ ಸ್ಥಿರ ಆದಾಯವು ಅನೇಕರಿಗೆ ಸಂಕಷ್ಟಕರವಾಗಿದೆ. ಸಂಕಷ್ಟಗಳು ಸಾಮಾನ್ಯವಾಗಿ ಮನುಷ್ಯರನ್ನು ನವೀನತೆಯ ಅಥವಾ ಅದರ ಪರ್ಯಾಯಗಳ ಕಡೆಗೆ ಸೆಳೆಯುತ್ತದೆ. ಆದ್ದರಿಂದ, ನಾವೆಲ್ಲರೂ ಉತ್ತಮ ಆದಾಯವನ್ನು ಗಳಿಸಲು ಪರ್ಯಾಯ ಮಾರ್ಗಗಳನ್ನು ಹುಡುಕುತ್ತಿದ್ದೇವೆ. ಹೈಬ್ರಿಡ್ ಫಂಡ್ಗಳು ಇತ್ತೀಚಿನ ಆವಿಷ್ಕಾರಗಳಲ್ಲ. ಸುಮಾರು ಒಂದು ದಶಕದಿಂದ ಈ ಹೂಡಿಕೆಯ ವಿಧಾನವು ಅಸ್ತಿತ್ವದಲ್ಲಿದೆ. ಸಾಮಾನ್ಯವಾಗಿ, ರಿಸ್ಕ್ ಮತ್ತು ಲಾಭ ಜೊತೆಗೂಡಿಯೆ ಇರುತ್ತವೆ ಎನ್ನುವ ಮಾತನ್ನು ಕೇಳುತ್ತಿರುತ್ತೇವೆ. ಆದರೆ ಹೆಚ್ಚಿನ ರಿಸ್ಕ್‌ ತೆಗೆದುಕೊಳ್ಳದೆ ಹೆಚ್ಚಿನ ಲಾಭವನ್ನು ಗಳಿಸಲು ಸಾಧ್ಯವೇ? ಉತ್ತರ ಹೌದು ಮತ್ತು ಅಲ್ಲ, ಎರಡೂ! ಈಕ್ವಿಟಿ ಮಾರುಕಟ್ಟೆಯಲ್ಲಿ ಏರಿಳಿತಗಳಿವೆ ಎಂಬ ಸಾರ್ವತ್ರಿಕ ಸತ್ಯಕ್ಕೆ ನಾವು ಹೇಗೆ ಪ್ರತಿಕ್ರಿಯಿಸುತ್ತೇವೆ ಎಂಬುದರ ಮೇಲೆ ಎಲ್ಲವೂ ಅವಲಂಬಿತವಾಗಿರುತ್ತದೆ. ನೀವು ತೆಗೆದುಕೊಳ್ಳಲು ಇಚ್ಚಿಸುವ ರಿಸ್ಕ್ (ಮಾನಸಿಕ/ಭಾವನಾತ್ಮಕ), ನೀವು ತೆಗೆದುಕೊಳ್ಳಬಹುದಾದ ರಿಸ್ಕ್ (ನಿಮ್ಮ ಒಟ್ಟಾರೆ ಹಣಕಾಸಿನ ಆಧಾರದ ಮೇಲೆ), ಮತ್ತು ನೀವು ತೆಗೆದುಕೊಳ್ಳಬೇಕಾದ ರಿಸ್ಕ್‌ (ಹೆಚ್ಚಿನ ಲಾಭವನ್ನು ಗಳಿಸಲು), ಇವುಗಳ ನಡುವೆ ಸಮತೋಲನವನ್ನು ಸ್ಥಾಪಿಸುವುದು ಅತ್ಯಗತ್ಯ. ಈ ಮೇಲಿನ ಸಮಸ್ಯೆಯನ್ನು ಡೈನಾಮಿಕ್ ಅಸೆಟ್‌ ಎಲೋಕೆಶನ್‌ ಫಂಡ್ಗಳು (DAAF), ಅಥವಾ ಬ್ಯಾಲೆನ್ಸ್ಡ್ ಅಡ್ವಾಂಟೇಜ್ ಫಂಡ್‌ಗಳು (BAF) ಪರಿಹರಿಸುತ್ತವೆ. ಇತರ ಹೈಬ್ರಿಡ್ ಫಂಡ್‌ಗಳಿಗಿಂತ ವಿಭಿನ್ನವಾಗಿ, ಈ ಫಂಡ್ಗಳು ಪೂರ್ವ ನಿರ್ಧಾರಿತ ಮಾದರಿಯ ಸಹಾಯದಿಂದ ಹೂಡಿಕೆಯನ್ನು ಕ್ರಿಯಾತ್ಮಕವಾಗಿ ಮರು ಸಮತೋಲನಗೊಳಿಸುತ್ತದೆ. ಈ ಮಾದರಿಯು ಫಂಡ್ ಮ್ಯಾನೇಜರ್‌ಗಳಿಗೆ ಈಕ್ವಿಟಿ ಮಾರುಕಟ್ಟೆಯ ಏರಿಳಿತ, ಪಿ.ಇ ಅನುಪಾತ, ಪಿ.ಬಿ ಅನುಪಾತ ಮುಂತಾದ ಮೌಲ್ಯಮಾಪನ ಅಂಶಗಳಿಗೆ ಅನುಗುಣವಾಗಿ ಈಕ್ವಿಟಿ ಮತ್ತು ಸ್ಥಿರ ಆದಾಯದ ಪ್ರಮಾಣವನ್ನು ಬದಲಾಯಿಸಲು ಸಂಕೇತಗಳನ್ನು ನೀಡುತ್ತದೆ. ಸರಳವಾಗಿ ಹೇಳುವುದಾದರೆ, ಈಕ್ವಿಟಿ ಮಾರುಕಟ್ಟೆಯ ಮೌಲ್ಯ ಹೆಚ್ಚಾದಾಗ ಈಕ್ವಿಟಿ ಹಂಚಿಕೆಯನ್ನು ಕಡಿಮೆ ಮಾಡಲು, ಮತ್ತು ಮೌಲ್ಯ ಕಡಿಮೆಯಾದಾಗ ಈಕ್ವಿಟಿ ಹಂಚಿಕೆಯನ್ನು ಹೆಚ್ಚು ಮಾಡಲು, ಈ ಮಾದರಿಯು ಫಂಡ್ ಮ್ಯಾನೇಜರ್‌ಗೆ ಸೂಚಿಸುತ್ತದೆ. ಅನೇಕ ಬಾರಿ, ಈ “ಭಾವನಾರಹಿತ ಕಾರ್ಯವಿಧಾನ” ಹೆಚ್ಚಿನ ಲಾಭಗಳಿಸುವ ಅವಕಾಶವನ್ನು ಕುಂಠಿತಗೊಳಿಸುತ್ತದೆ, ಆದರೆ ಷೇರುಮಾರುಕಟ್ಟೆಯ ಏರಿಳಿತದ ಅಪಾಯವನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ. ಈಕ್ವಿಟಿ ಮತ್ತು ಸ್ಥಿರ ಆದಾಯದಲ್ಲಿ ಸಮಯೋಚಿತವಾಗಿ ಹೂಡಿಕೆಮಾಡುವುದರಿಂದ, ಹೂಡಿಕೆದಾರರು ಷೇರುಮಾರುಕಟ್ಟೆಯ ಏರಿಳಿತಗಳ ಬಗ್ಗೆ ಹೆಚ್ಚು ಆತಂಕ ಪಡುವ ಅಗತ್ಯವಿರುವುದಿಲ್ಲ. ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆ ಈ ಕೆಳಕಂಡ ಕಾರಣಗಳಿಗಾಗಿ ಮೇಲೆ ಉಲ್ಲೇಖಿಸಿರುವ ಫಂಡ್ಗಳಲ್ಲಿ ಹೂಡಿಕೆ ಮಾಡಬಹುದು: ಹೂಡಿಕೆಯ ಅವಧಿ ಸುಮಾರು 4ರಿಂದ 6 ವರ್ಷಗಳಾಗಿದ್ದರೆ ಹೂಡಿಕೆಯು ದೀರ್ಘಾವಧಿಯಾಗಿದ್ದು, ಹೂಡಿಕೆದಾರನ ರಿಸ್ಕ್ ತೆಗೆದುಕೊಳ್ಳುವ ಸಾಮರ್ಥ್ಯ ಕಡಿಮೆ ಆಗಿದ್ದರೆ ನಿಯಮಿತ ಆದಾಯ, ಕಡಿಮೆ ರಿಸ್ಕ್‌ ಇರುವ ಹೂಡಿಕೆಗಳಿಗೆ ಹೋಲಿಸಿದರೆ ಆದಾಯದ ನಿರೀಕ್ಷೆ ಸ್ವಲ್ಪ ಹೆಚ್ಚಾಗಿದ್ದರೆ ದೀರ್ಘಾವಧಿಯವರೆಗೆ ನಿಯಮಿತ ಆದಾಯವನ್ನು ಬಯಸುವವರಿಗೆ, ಸಿಸ್ಟೆಮ್ಯಾಟಿಕ್‌ ವಿಡ್ರಾವಲ್‌ ಪ್ಲಾನ್ (‌SWP) ಅತ್ಯುತ್ತಮ ಯೋಜನೆಯಾಗಿದೆ. ಈ ಹೂಡಿಕೆಯ ವರ್ಗದ ಪೂರ್ವಭಾವಿ ಮಾಹಿತಿಯನ್ನು ಗಮನಿಸಿದರೆ, ಸಿಸ್ಟೆಮ್ಯಾಟಿಕ್‌ ವಿಡ್ರಾವಲ್‌ ಪ್ಲಾನ್ ಆದಾಯದ ಮೇಲಿನ ತೆರಿಗೆಯನ್ನು ಗಮನರ್ಹವಾಗಿ ಕಡಿಮೆ ಮಾಡುತ್ತದೆ ಮತ್ತು ದೀರ್ಘಾವಧಿಯಲ್ಲಿ ಹೂಡಿಕೆಯನ್ನು ಗಣನೀಯವಾಗಿ ಪ್ರಗತಿಗೊಳಿಸುತ್ತದೆ. ಎಲ್ಲರು ತಮ್ಮ ಹೂಡಿಕೆಯ ಒಂದು ಭಾಗವನ್ನು ಈ ಯೋಜನೆಯಲ್ಲಿ ಹಂಚಿಕೆ ಮಾಡುವುದು ಸೂಕ್ತ. ಹಣಕಾಸು ಹೂಡಿಕೆ ವಿಧಾನದ ಸೂಕ್ತತೆಯನ್ನು ಅರ್ಥಮಾಡಿಕೊಳ್ಳಲು, ಮತ್ತು ಅದಕ್ಕೆ ಅನುಗುಣವಾಗಿ ಹೂಡಿಕೆ ಮಾಡಲು, ಯಾವಾಗಲೂ ತಜ್ಞರ ಸಲಹೆಯನ್ನು ಪಡೆಯುವುದು ಅತ್ಯವಶ್ಯಕ. Contributed by Mr. Shreedhara R Bhat, Managing Director - Ara Management Solutions Pvt Ltd and an empaneled distribution partner of SBI Mutual Fund. ಮ್ಯೂಚುಯಲ್ ಫಂಡ್ ವಿನಿಯೋಜನೆಗಳು ಮಾರುಕಟ್ಟೆಯ ಅಪಾಯಗಳಿಗೆ ಬದ್ಧವಾಗಿವೆ, ಸ್ಕೀಮ್ ಗೆ ಸಂಬಂಧಿತ ಎಲ್ಲಾ ದಸ್ತಾವೇಜುಗಳನ್ನು ಎಚ್ಚರಿಕೆಯಿಂದ ಓದಿರಿ.