ಹಿಂದುತ್ವದ ಏಣಿ ಬಳಸಿ ಅಧಿಕಾರಕ್ಕೆ ಏರಿದವರಿಂದಲೇ ಹಿಂದುತ್ವ ಅಪಾಯದಲ್ಲಿದೆ: ಬಿಜೆಪಿ ವಿರುದ್ಧ ಠಾಕ್ರೆ ಕಿಡಿ
ಹಿಂದುತ್ವದ ಏಣಿಯನ್ನು ಬಳಸಿಕೊಂಡು ಅಧಿಕಾರಕ್ಕೆ ಏರಿದವರಿಂದಲೇ ಹಿಂದುತ್ವ ಅಪಾಯಕ್ಕೆ ಸಿಲುಕಿದೆ ಎಂದು ಮಹಾರಾಷ್ಟ್ರ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ತಮ್ಮ ಮಾಜಿ ಮಿತ್ರಪಕ್ಷ ಬಿಜೆಪಿ ವಿರುದ್ಧ ವಾಗ್ದಾಳಿ ನಡೆಸಿದರು.
Admin
0
6
ಮುಂಬಯಿ: ಬಿಜೆಪಿಯವರು ವೀರ್ ಸಾವರ್ಕರ್ ಅವರನ್ನೂ ಅರ್ಥ ಮಾಡಿಕೊಂಡಿಲ್ಲ, ಮಹಾತ್ಮಾ ಗಾಂಧಿ ಅವರನ್ನೂ ಅರ್ಥ ಮಾಡಿಕೊಂಡಿಲ್ಲ ಎಂದು ಮುಖ್ಯಮಂತ್ರಿ ಶುಕ್ರವಾರ ಟೀಕಿಸಿದರು. ವಿನಾಯಕ ದಾಮೋದರ ಸಾವರ್ಕರ್ ಅವರ ಕುರಿತು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ನೀಡಿದ ವಿವಾದಾತ್ಮಕ ಹೇಳಿಕೆ ಸೇರಿದಂತೆ ಅನೇಕ ವಿಚಾರಗಳಲ್ಲಿ ಅವರು ತಮ್ಮ ಮಾಜಿ ಮಿತ್ರ ಪಕ್ಷ ವಿರುದ್ಧ ವಾಗ್ದಾಳಿ ನಡೆಸಿದರು.
ತಮ್ಮ ಪಕ್ಷ ಆಯೋಜಿಸಿದ್ದ ವಾರ್ಷಿಕ ದಸರಾ ಸಮಾರಂಭದಲ್ಲಿ ಮಾತನಾಡಿದ ಠಾಕ್ರೆ, ಬ್ರಿಟಿಷರಿಗೆ ಕ್ಷಮಾದಾನದ ಅರ್ಜಿ ಬರೆಯುವಂತೆ ಸಾವರ್ಕರ್ ಅವರಿಗೆ ಮಹಾತ್ಮ ಗಾಂಧಿ ಅವರೇ ಸಲಹೆ ನೀಡಿದ್ದರು ಎಂದು ಹೇಳಿಕೆ ನೀಡಿದ್ದ ರಾಜನಾಥ್ ಸಿಂಗ್ ಅವರನ್ನು ವ್ಯಂಗ್ಯವಾಡಿದರು.
ಕೇಂದ್ರ ಸರ್ಕಾರ ಬಳಸುವ ಸಿಬಿಐ ಹಾಗೂ ಇಡಿ ದಾಳಿಗಳ ಬಗ್ಗೆ ಶಿವಸೇನಾಕ್ಕೆ ಭಯವಿಲ್ಲ. ಬೆದರಿಕೆ ಒಡ್ಡಿದ ಕೂಡಲೇ ಪೊಲೀಸರ ಹಿಂದೆ ಅಡಗಿಕೊಳ್ಳುವ ಹೇಡಿಗಳಲ್ಲ. ನಾವು ಯಾವುದಕ್ಕೂ ಹೆದರಬಾರದು ಎಂಬುದನ್ನು ಶಿವಾಜಿ ಮಹಾರಾಜ್ ಮತ್ತು ಪಕ್ಷದ ಸ್ಥಾಪಕ ಬಾಳಸಾಹೇಬ್ ಠಾಕ್ರೆ ಕಲಿಸಿಕೊಟ್ಟಿದ್ದಾರೆ ಎಂದರು.
'ಹಿಂದುತ್ವ ಅಪಾಯದಲ್ಲಿದೆ. ಬಳಸಿಕೊಂಡು ಅಧಿಕಾರದ ಏಣಿ ಏರಿದವರಿಂದಲೇ ಅದು ಅಪಾಯಕ್ಕೆ ಸಿಲುಕಿದೆ. ಈ ಜನರು ಈಗ ಒಡೆದು ಆಳುವ ಬ್ರಿಟಿಷರ ನೀತಿಯನ್ನು ಅಳವಡಿಸಿಕೊಳ್ಳಲಿದ್ದಾರೆ. ಅವರು ಸಮಾಜದಲ್ಲಿ ಭಿನ್ನಾಭಿಪ್ರಾಯಗಳನ್ನು ಸೃಷ್ಟಿಸಲಿದ್ದಾರೆ. ಅವರ ಮಹಾಪಾತಕದ ನಡೆಗಳ ವಿರುದ್ಧ ನಾವು ರಕ್ಷಣೆ ಒದಗಿಸಬೇಕಿದೆ' ಎಂದು ಬಿಜೆಪಿ ವಿರುದ್ಧ ವಾಗ್ದಾಳಿ ನಡೆಸಿದರು.
ಮಹಾರಾಷ್ಟ್ರವು ಮಾದಕವಸ್ತು ರಾಜಧಾನಿಯಾಗಿದೆ ಎಂದು ಕೇಂದ್ರ ಸರ್ಕಾರ ಬಿಂಬಿಸಿದೆ. ಮುಂದ್ರಾದಲ್ಲಿ ಕೋಟಿಗಟ್ಟಲೆ ಮೌಲ್ಯದ ಡ್ರಗ್ಸ್ ಪತ್ತೆಯಾಗಿತ್ತು. ಆದರೆ ನಿಮ್ಮ ಸಂಸ್ಥೆಗಳು ಚಿಟಿಕೆಯಷ್ಟು ಗಾಂಜಾ ವಶಪಡಿಸಿಕೊಳ್ಳುತ್ತಿವೆ. ಮುಂಬಯಿ ಪೊಲೀಸರು 150 ಕೋಟಿ ರೂ ಮೊತ್ತದ ಮಾದಕವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಅವರು ಸೆಲೆಬ್ರಿಟಿಗಳನ್ನು ಹಿಡಿದು ಅವರ ಫೋಟೋ ತೆಗೆಯುವುದರಲ್ಲಿಯೇ ಆಸಕ್ತಿ ಹೊಂದಿದ್ದಾರೆ ಎಂದು ಕಿಡಿಕಾರಿದರು.
