ಷೇರು ಪೇಟೆಯಲ್ಲಿ ಮೊದಲ ದಿನವೇ ಜೊಮ್ಯಾಟೋಗೆ ಬಂಪರ್‌, 1 ಲಕ್ಷ ಕೋಟಿ ರೂ. ದಾಟಿದ ಮಾರುಕಟ್ಟೆ ಮೌಲ್ಯ

ಹೊಸದಿಲ್ಲಿ: ಭಾರತದ ಮೊದಲ ಯುನಿಕಾರ್ನ್‌ ಶುಕ್ರವಾರ ಪ್ರವೇಶಿಸುವುದರೊಂದಿಗೆ ಹೊಸ ಇತಿಹಾಸ ಸೃಷ್ಟಿಸಿದೆ. ಜತೆಗೆ 115 ರೂಪಾಯಿಗಳ ಷೇರು ಬೆಲೆಯೊಂದಿಗೆ ಬಾಂಬೆ ಷೇರು ವಿನಿಮಯ ಕೇಂದ್ರ (ಬಿಎಸ್‌ಇ) ಪ್ರವೇಶಿಸಿತು. ಇದು ಆರಂಭಿಕ ಕೊಡುಗೆ ಬೆಲೆ 76 ರೂಪಾಯಿಗಳಿಗಿಂತ ಶೇ. 51.32ರಷ್ಟು ಹೆಚ್ಚಾಗಿದೆ. ರಾಷ್ಟ್ರೀಯ ಷೇರು ಮಾರುಕಟ್ಟೆ (ಎನ್‌ಎಸ್‌ಇ)ಯನ್ನು 116 ರೂಪಾಯಿ ಷೇರು ಬೆಲೆಯೊಂದಿಗೆ ಪ್ರವೇಶಿಸಿತು. ಈ ಸಾಧನೆಯೊಂದಿಗೆ ಷೇರು ಮಾರುಕಟ್ಟೆಯಲ್ಲಿ ನೋಂದಣಿಯಾಗಿರುವ ಟಾಪ್‌ 100 ಕಂಪನಿಗಳ ಸಾಲಿಗೆ ಜೊಮ್ಯಾಟೋ ಸೇರಿತು. ಜತೆಗೆ ಕಂಪನಿಯ ಮಾರುಕಟ್ಟೆ ಮೌಲ್ಯವೂ 1 ಲಕ್ಷ ಕೋಟಿ ರೂ. ಗಡಿ ದಾಟಿತು. ಐಪಿಒ ದರದಲ್ಲಿ ಕಂಪನಿಯ ಮಾರುಕಟ್ಟೆ ಮೌಲ್ಯ 65,000 ಕೋಟಿ ರೂ.ಗಳಾಗಿತ್ತು. ಆದರೆ ಮೊದಲ ದಿನವೇ ಷೇರಿಗೆ ಹೂಡಿಕೆದಾರರು ಮುಗಿಬಿದ್ದಿದ್ದರಿಂದ ಏಕಾಏಕಿ ಕಂಪನಿ ಮೌಲ್ಯ 1 ಲಕ್ಷ ಕೋಟಿ ರೂ. ಗಡಿ ದಾಟಿತು. ದಿನದಂತ್ಯಕ್ಕೆ ಜೊಮ್ಯಾಟೋ ಷೇರು 125 ರೂಪಾಯಿಗೆ ವಹಿವಾಟು ಕೊನೆಗೊಳಿಸಿತು. ಜೊಮ್ಯಾಟೋದ 9375 ಕೋಟಿ ರೂ. ಮೊತ್ತದ ಷೇರುಗಳಿಗಾಗಿ 2.13 ಲಕ್ಷ ಕೋಟಿ ರೂ. ಮೌಲ್ಯದಷ್ಟು ಬೇಡಿಕೆ ಬಂದಿತ್ತು. ಇದು ಭಾರತದ ಇತಿಹಾಸದಲ್ಲೇ ಮೂರನೇ ಅತೀ ಹೆಚ್ಚಿನ ಬೇಡಿಕೆಯಾಗಿದೆ. ಜೊಮ್ಯಾಟೋ ಆನ್‌ಲೈನ್‌ ಫುಡ್‌ ಅಗ್ರೆಗೇಟರ್‌ ಅಪ್ಲಿಕೇಷನ್‌ ಆಗಿದ್ದು, 2021ನೇ ಆರ್ಥಿಕ ವರ್ಷದ ಅಂತ್ಯಕ್ಕೆ 3.21 ಕೋಟಿ ಮಾಸಿಕ ಸಕ್ರಿಯ ಬಳಕೆದಾರರನ್ನು ಹೊಂದಿತ್ತು. 525 ನಗರಗಳಲ್ಲಿ ಜೊಮ್ಯಾಟೋ ಅಸ್ತಿತ್ವದಲ್ಲಿದ್ದು, 3,89,932 ರೆಸ್ಟೋರೆಂಟ್‌ಗಳ ಜತೆ ಕಂಪನಿ ಸಂಪರ್ಕ ಹೊಂದಿದೆ. 1,69,802 ಡೆಲಿವರಿ ಪಾರ್ಟ್‌ನರ್‌ಗಳೂ ಸಂಸ್ಥೆ ಜತೆಗಿದ್ದಾರೆ. ಭಾರತ ಮಾತ್ರವಲ್ಲದೆ 23 ದೇಶಗಳಲ್ಲೂ ಕಂಪನಿ ಹೆಜ್ಜೆಯೂರಿದೆ. ಕಂಪನಿ 2018ನೇ ಆರ್ಥಿಕ ವರ್ಷದಿಂದ 2021ರ ಹೊತ್ತಿಗೆ ಶೇ. 65 ರಷ್ಟು ವಾರ್ಷಿಕ ಬೆಳವಣಿಗೆ ದಾಖಲಿಸುತ್ತಾ ಬಂದಿದ್ದರೂ, ಇನ್ನೂ ನಷ್ಟ ಅನಿಭವಿಸುತ್ತಲೇ ಇದೆ. ಆದರೆ ಇದನ್ನು ಹೂಡಿಕೆದಾರರು ಪಕ್ಕಕ್ಕಿಟ್ಟು ಜೊಮ್ಯಾಟೋ ಷೇರುಗಳಿಗೆ ಮುಗಿಬಿದ್ದಿದ್ದಾರೆ. ಜೊಮ್ಯಾಟೋ ಯಶಸ್ಸಿನ ಬೆನ್ನಿಗೆ ಮತ್ತಷ್ಟು ಡಿಜಿಟಲ್‌ ಟೆಕ್ನಾಲಜಿ ಕಂಪನಿಗಳು ಷೇರು ಮಾರುಕಟ್ಟೆ ಪ್ರವೇಶಿಸುವ ಸಾಧ್ಯತೆ ಇದೆ ಎಂದು ತಜ್ಞರು ಅಂದಾಜಿಸಿದ್ದಾರೆ. ಈಗಾಗಲೇ ಪೇಟಿಎಂ, ಪಾಲಿಸಿಬಜಾರ್‌ ಮತ್ತು ಮೊಬಿವಿಕ್‌ ಐಪಿಒಗೆ ಅರ್ಜಿ ಸಲ್ಲಿಸಿವೆ.