ಆರೋಗ್ಯ ಸಂಸ್ಥೆಗಳಿಗೆ ₹50,000 ಕೋಟಿ ಆದ್ಯತೆಯ ಸಾಲ, RBI ಗವರ್ನರ್‌ ಪತ್ರಿಕಾಗೋಷ್ಠಿಯ 7 ಪ್ರಮುಖ ಅಂಶಗಳು
ಕೋವಿಡ್‌ ವಿರುದ್ಧದ ಹೋರಾಟವನ್ನು ತೀವ್ರಗೊಳಿಸಲು, ಬಿಕ್ಕಟ್ಟಿನ ಸಂದರ್ಭದಲ್ಲಿ ಸಾಮಾನ್ಯ ಜನರು, ಬ್ಯಾಂಕ್‌ಗಳು, ಉದ್ದಿಮೆಗಳು ಮತ್ತು ಇತರರಿಗೆ ನೆರವಾಗಲು ಆರ್‌ಬಿಐ ಗವರ್ನರ್‌ ಹಲವು ಕ್ರಮಗಳನ್ನು ಘೋಷಿಸಿದ್ದಾರೆ. ಅವುಗಳ ವಿವರ ಇಲ್ಲಿದೆ.
Admin
0
6
ಹೊಸದಿಲ್ಲಿ: ದೇಶದಲ್ಲಿ ಕೊರೊನಾ ಎರಡನೇ ಅಲೆಯ ಅಬ್ಬರ ಜೋರಾಗಿರುವಾಗಲೇ ಭಾರತೀಯ ರಿಸರ್ವ್‌ ಬ್ಯಾಂಕ್‌ () ಗವರ್ನರ್‌ ಬುಧವಾರ ಪತ್ರಿಕಾಗೋಷ್ಠಿ ನಡೆಸಿ ಹಲವು ಮಹತ್ವದ ಪ್ರಕಟಣೆಗಳನ್ನು ಮಾಡಿದ್ದಾರೆ.
ಕೋವಿಡ್‌ ವಿರುದ್ಧದ ಹೋರಾಟವನ್ನು ತೀವ್ರಗೊಳಿಸಲು ಮತ್ತು ಈ ಸಂದರ್ಭದಲ್ಲಿ ಸಾಮಾನ್ಯ ಜನರು, ಬ್ಯಾಂಕ್‌ಗಳು, ಉದ್ದಿಮೆಗಳು ಮತ್ತು ಇತರರಿಗೆ ನೆರವಾಗಲು ಅವರು ಕೆಲವು ಕ್ರಮಗಳನ್ನು ಘೋಷಿಸಿದ್ದಾರೆ. ಅವುಗಳು ಇಂತಿವೆ.
- ಕೋವಿಡ್‌ ವಿರುದ್ಧದ ಹೋರಾಟವನ್ನು ತೀವ್ರಗೊಳಿಸಲು, ಆರೋಗ್ಯ ವಲಯದ ಮೂಲಸೌಕರ್ಯ ಮತ್ತು ಸೇವೆಗಳನ್ನು ಮೇಲ್ದರ್ಜೆಗೇರಿಸಲು, ಈ ಮೂಲಕ ತುರ್ತು ಆರೋಗ್ಯ ಸೇವೆಗಳು ಲಭ್ಯವಾಗುವಂತೆ ಮಾಡಲು ಆರ್‌ಬಿಐ ಕೆಲವು ವಿಶೇಷ ಯೋಜನೆಗಳನ್ನು ಜಾರಿಗೆ ತಂದಿದೆ. ಆರೋಗ್ಯ ಕ್ಷೇತ್ರಕ್ಕೆ ಹಣಕಾಸಿನ ಲಭ್ಯತೆಯನ್ನು ಖಚಿತಪಡಿಸಲು 50,000 ಕೊಟಿ ರೂ. ಯೋಜನೆಯನ್ನು ಶಕ್ತಿಕಾಂತ್‌ ದಾಸ್‌ ಪ್ರಕಟಿಸಿದ್ದಾರೆ. 2022ರ ಮಾರ್ಚ್‌ 31ರವರೆಗೆ ಈ ಯೋಜನೆ ಲಭ್ಯವಿದ್ದು, ರೆಪೋ ದರದಲ್ಲಿ ಬಡ್ಡಿ ಇರಲಿದೆ.ಇದರ ಅಡಿಯಲ್ಲಿ ಬ್ಯಾಂಕ್‌ಗಳಿಗೆ ಲಸಿಕೆ ಉತ್ಪಾದಕರು, ಪೂರೈಕೆದಾರರು, ವೈದ್ಯಕೀಯ ಸಲಕರಣೆಗಳ ಖರೀದಿಗೆ, ಆಸ್ಪತ್ರೆಗಳು, ಲ್ಯಾಬ್‌ಗಳು, ಔಷಧಗಳ ಉತ್ಪಾದಕರು, ಆಮ್ಲಜನಕ ಮತ್ತು ವೆಂಟಿಲೇಟರ್‌ ಉತ್ಪಾದಕರು ಮತ್ತು ಪೂರೈಕೆದಾರರು, ಕೊರೊನಾಕ್ಕೆ ಸಂಬಂಧಿಸಿದ ಔಷಧ ಮತ್ತು ಲಸಿಕೆಗಳ ಆಮದುದಾರರು ಮತ್ತು ರೋಗಿಗಳ ಚಿಕಿತ್ಸೆಗೆ ಸಾಲ ಸೌಲಭ್ಯ ನೀಡುವಂತೆ ಆರ್‌ಬಿಐ ಹೇಳಿದೆ.
- ಈ ಬಾರಿ ಸಾಮಾನ್ಯ ಮುಂಗಾರು ಇರಲಿದೆ ಎಂದು ಆರ್‌ಬಿಐ ಹೇಳಿದೆ. ಹೀಗಾಗಿ ಬೇಡಿಕೆಯಷ್ಟು ಉತ್ಪಾದನೆ ಸಾಧ್ಯವಾಗಲಿದ್ದು, ಆಹಾರ ಹಣದುಬ್ಬರವನ್ನು ನಿಯಂತ್ರಿಸಲು ಸಾಧ್ಯವಾಗಲಿದೆ ಎಂದು ಹೇಳಿದೆ.
- ಆಸ್ಪತ್ರೆಗಳು, ಆಮ್ಲಜನಕ ಪೂರೈಕೆದಾರರು, ಲಸಿಕೆ ಆಮದುದಾರರು, ಕೊರೊನಾ ಔಷಧಗಳಿಗಾಗಿ 2022ರ ಮಾರ್ಚ್‌ 31ರವರೆಗೆ ಬ್ಯಾಂಕುಗಳು ಆದ್ಯತೆಯ ಮೇಲೆ 50,000 ಕೋಟಿ ರೂ. ಸಾಲ ನೀಡಲಿವೆ.
- 25 ಕೋಟಿ ರೂ.ವರೆಗೆ ಸಾಲ ಪಡೆದ ವೈಯಕ್ತಿಕ ಸಾಲಗಾರರು ಮತ್ತು ಸಣ್ಣ ಸಾಲಗಾರರಿಗೆ ತಮ್ಮ ಸಾಲವನ್ನು ಪುನರ್‌ರಚನೆ ಮಾಡಲು ರಿಸರ್ವ್‌ ಬ್ಯಾಂಕ್‌ ಅವಕಾಶ ಕಲ್ಪಿಸಿದೆ. ಈ ಹಿಂದೆ ಸಾಲದ ಪುನರ್‌ರಚನೆ ಮಾಡದವರಿಗೆ ಮಾತ್ರ ಈ ಸೌಲಭ್ಯ ಸಿಗಲಿದೆ.
- ಕೆಲವು ವರ್ಗಗಳಿಗೆ ವಿಡಿಯೋ ಆಧಾರಿತ ಕೆವೈಸಿಯನ್ನು ಸಕ್ರಿಯಗೊಳಿಸುವ ಕೆವೈಸಿ ಅನುಸರಣೆ ಮಾನದಂಡಗಳನ್ನು ಸಡಿಲಗೊಳಿಸಲಾಗಿದೆ.
- ಸೆಪ್ಟೆಂಬರ್ 30, 2021ರವರೆಗೆ ರಾಜ್ಯ ಸರಕಾರಗಳಿಗೆ ಓವರ್‌ಡ್ರಾಫ್ಟ್ ಸೌಲಭ್ಯವನ್ನು ಪಡೆಯಲು ನಿಯಮಗಳನ್ನು ಸರಳಗೊಳಿಸಲಾಗಿದೆ.
- ಎಸ್‌ಎಲ್‌ಟಿಆರ್‌ಒ (SLTRO) ಅಡಿಯಲ್ಲಿ ಸಣ್ಣ ಹಣಕಾಸು ಬ್ಯಾಂಕ್‌ಗಳಿಗೆ 10,000 ಕೋಟಿ ರೂ. ಮೀಸಲಿಡಲಾಗಿದೆ.
