ಶ್ರೀಕೃಷ್ಣ ಜನ್ಮಾಷ್ಟಮಿಗೆ ಸಜ್ಜಾಗುತ್ತಿವೆ ಬೆಂಗಳೂರಿನ ದೇವಾಲಯಗಳು..!

: ಮಕ್ಕಳೂ ಸೇರಿದಂತೆ ಎಲ್ಲಾ ವರ್ಗದವರೂ ಭಕ್ತಿ ಮತ್ತು ಸಂಭ್ರಮದೊಂದಿಗೆ ಆಚರಿಸುವ ಶ್ರೀ ಕೃಷ್ಣ ಜನ್ಮಾಷ್ಟಮಿ (ಆಗಸ್ಟ್ 30) ಸಮೀಪಿಸುತ್ತಿದೆ. ಇಸ್ಕಾನ್‌ ಸೇರಿದಂತೆ ನಗರದ ನಾನಾ ದೇವಾಲಯಗಳಲ್ಲಿ ಸಿದ್ಧತೆಗಳು ನಡೆಯುತ್ತಿವೆ. ಇಸ್ಕಾನ್‌ ದೇವಾಲಯದಲ್ಲಿ ಪ್ರತಿ ವರ್ಷದಂತೆ ಈ ಬಾರಿಯೂ ಎರಡು ದಿನ ಶ್ರೀ ಕೃಷ್ಣನ ಜನ್ಮದಿನವನ್ನು ಆಚರಿಸಲಾಗುತ್ತದೆ. ಅದರಂತೆ ಈ ಬಾರಿಯೂ ಆಗಸ್ಟ್ 29ರಂದು ಭಾನುವಾರ ಆನ್‌ಲೈನ್‌ ಮೂಲಕ ಮತ್ತು ಆಗಸ್ಟ್ 30ರಂದು ಸೋಮವಾರ ಭೌತಿಕವಾಗಿ ಆಚರಿಸಲಾಗುವುದು. ಉಳಿದಂತೆ ಅಜ್ಜನಹಳ್ಳಿ 2ನೇ ಹಂತದ ಆನಂದ ಗೋವಿಂದ , ಮಲ್ಲೇಶ್ವರದ ವೇಣುಗೋಪಾಲ ಸ್ವಾಮಿ, ಬಸವನಗುಡಿಯ ಪುತ್ತಿಗೆ ಮಠದ ಶ್ರೀ ಗೋವರ್ಧನಗಿರಿ ಗುಹಾಲಯ ಕ್ಷೇತ್ರ, ಪೂರ್ಣಪ್ರಜ್ಞ ನಗರದ ಪೂರ್ಣಪ್ರಜ್ಞ ವಿದ್ಯಾಪೀಠ ಪ್ರತಿಷ್ಠಾನ ಸೇರಿದಂತೆ ಹಲವೆಡೆ ಸಿದ್ಧತೆಗಳು ನಡೆಯುತ್ತಿವೆ. ಜತೆಗೆ ಮಾರುಕಟ್ಟೆಯಲ್ಲಿ ರಾಧೆ - ಕೃಷ್ಣರ ಮೂರ್ತಿಗಳು ಹಾಗೂ ಮಕ್ಕಳಿಗಾಗಿ ರಾಧೆ - ಕೃಷ್ಣರ ದಿರಿಸುಗಳು ಕೂಡ ಮಾರಾಟವಾಗುತ್ತಿವೆ. ಪುಟಾಣಿ ಮಕ್ಕಳಿಗೆ ಇನ್ನೂ ಭೌತಿಕವಾಗಿ ಶಾಲೆಗಳು ನಡೆಯದ ಕಾರಣ, ನರ್ಸರಿ ಸೇರಿದಂತೆ ನಾನಾ ಶಾಲೆಗಳ ಶಿಕ್ಷಕರು ಮಕ್ಕಳಿಗೆ ಈಗಾಗಲೇ ಆನ್‌ಲೈನ್‌ನಲ್ಲೇ ರಾಧೆ-ಕೃಷ್ಣರ ವೇಷಭೂಷಣ ಸ್ಪರ್ಧೆಗೆ ತಯಾರಿ ನಡೆಸಿಕೊಳ್ಳುವಂತೆ ಸಂದೇಶಗಳನ್ನು ರವಾನಿಸಿವೆ. ಶ್ರಾವಣ ಮಾಸದಲ್ಲಿ ಬರುವ ಪ್ರಮುಖ ಹಬ್ಬಗಳಲ್ಲಿ ಒಂದಾದ ಶ್ರೀ ಕೃಷ್ಣ ಜನ್ಮಾಷ್ಟಮಿಯನ್ನು ನಗರದಲ್ಲಿ ಕೋವಿಡ್‌ ಹಿನ್ನೆಲೆಯಲ್ಲಿ ಈ ವರ್ಷ ಅದ್ಧೂರಿಯಾಗಿ ಆಚರಿಸುತ್ತಿಲ್ಲ. ಜತೆಗೆ ದೇವಾಲಯಗಳಿಗೆ ಹೆಚ್ಚಿನ ಭಕ್ತರೂ ಹೋಗುತ್ತಿಲ್ಲ. ಆದರೂ ಸಾಂಪ್ರದಾಯಿಕವಾಗಿ ಧಾರ್ಮಿಕ ಆಚರಣೆಗಳು ಬೆಳಗ್ಗೆಯಿಂದ ರಾತ್ರಿಯವರೆಗೆ ನಡೆಯುತ್ತವೆ. ಕೃಷ್ಣನಿಗೆ ಅಭಿಷೇಕ, ಪೂಜೆ, ಶೋಡಶೋಪಚಾರ, ಅಲಂಕಾರ, ಭಜನೆ, ಅಘ್ರ್ಯ ಪ್ರದಾನ ಇತ್ಯಾದಿಗಳು ನಡೆಯಲಿವೆ. ಇಸ್ಕಾನ್‌ಗೆ ಭಾನುವಾರ ಪ್ರವೇಶವಿಲ್ಲ: ವೆಸ್ಟ್‌ ಆಫ್‌ ಕಾರ್ಡ್‌ ರಸ್ತೆಯಲ್ಲಿರುವ ಇಸ್ಕಾನ್‌ ದೇವಾಲಯದ ಶ್ರೀರಾಧಾ ಕೃಷ್ಣ ಮಂದಿರದಲ್ಲಿ ಆಗಸ್ಟ್ 29ರಂದು ಭಾನುವಾರ ಭಕ್ತರಿಗೆ ಪ್ರವೇಶ ಇರುವುದಿಲ್ಲ. ಹೀಗಾಗಿ, ಅಂದಿನ ಕಾರ್ಯಕ್ರಮಗಳನ್ನು ಆನ್‌ಲೈನ್‌ನಲ್ಲಿ ವೀಕ್ಷಿಸಬಹುದು. ಮೊದಲ ದಿನ ಬೆಳಗ್ಗೆ ರಾಧಾಕೃಷ್ಣರಿಗೆ ನೌಕಾವಿಹಾರ ನಡೆಯಲಿದೆ. ನಂತರ ಎಲ್ಲಾ ಹಣ್ಣುಗಳ ಅಭಿಷೇಕ, ಔಷಧಿಗಳ ಅಭಿಷೇಕ, ಪಂಚಾಮೃತ - ಪಂಚಗವ್ಯ ಅಭಿಷೇಕ ಮತ್ತು ಎಲ್ಲಾ ಪುಷ್ಪಗಳಿಂದ ಪುಷ್ಪಯಾಗ ನಡೆಯಲಿದೆ. ಬಳಿಕ ತೊಟ್ಟಿಲು ಸೇವೆ, ಶಯನಾರತಿಯೊಂದಿಗೆ ಸಂಪನ್ನಗೊಳ್ಳಲಿದೆ. ಸೋಮವಾರ (ಆ.30) ಭಕ್ತರಿಗೆ ಪ್ರವೇಶವಿರುತ್ತದೆ. ಬೆಳಗ್ಗೆ ಎಂದಿನಂತೆ ಅಭಿಷೇಕ, ಅಲಂಕಾರ, ವಿಶೇಷ ಪೂಜೆಗಳು ನೆರವೇರುತ್ತವೆ. ಮಡಿಕೆ ಒಡೆಯುವ ಕಾರ್ಯಕ್ರಮವೂ ಇರಲಿದೆ. ರಾತ್ರಿ 11ಕ್ಕೆ ಮಹಾಭಿಷೇಕ ನಡೆಯಲಿದೆ ಎಂದು ಬೆಂಗಳೂರು ಇಸ್ಕಾನ್‌ ದೇವಾಲಯದ ಸಾರ್ವಜನಿಕ ಸಂಪರ್ಕಾಧಿಕಾರಿ ಕುಲಶೇಖರ ಚೈತನ್ಯದಾಸ ತಿಳಿಸಿದರು. ಮಂಗಳವಾರ (ಆ.31) ಸಂಜೆ ಶ್ರೀಲ ಪ್ರಭುಪಾದರ 125ನೇ ಜಯಂತಿ ಅಂಗವಾಗಿ 800-900 ಖಾದ್ಯಗಳನ್ನು ಸಿದ್ಧಪಡಿಸಿ ನೈವೇದ್ಯ ಮಾಡಲಾಗುವುದು. ಮೊದಲಿಗೆ ಕೃಷ್ಣನಿಗೆ ನೈವೇದ್ಯಕ್ಕೆ ಅರ್ಪಿಸಿ, ನಂತರ ಶ್ರೀಲ ಪ್ರಭುಪಾದರಿಗೆ ನೈವೇದ್ಯಕ್ಕಿಟ್ಟು ಅದೆಲ್ಲವನ್ನೂ ದೇವಾಲಯಕ್ಕೆ ಬರುವ ಭಕ್ತರಿಗೆ ಪ್ರಸಾದವಾಗಿ ನೀಡಲಾಗುವುದು ಎಂದರು. ಕೃಷ್ಣ-ರಾಧೆಯರಾಗುವ ಪುಟಾಣಿಗಳು: ಮನೆಗಳಲ್ಲಿ ಪುಟಾಣಿ ಮಕ್ಕಳಿಗೆ ಕೃಷ್ಣ-ರಾಧೆಯರ ವೇಷ ತೊಟ್ಟು ಮನೆ ಮಂದಿ ಮಕ್ಕಳಲ್ಲಿ ದೇವರನ್ನು ಕಾಣುತ್ತಾ ಸಂಭ್ರಮಿಸುತ್ತಾರೆ. ಕೆಲವರು ಹೊಸದಾಗಿ ಡ್ರೆಸ್‌ ಖರೀದಿಸಿ ಹಾಕಿಸಿದರೆ, ಮತ್ತೆ ಕೆಲವರು ಕಳೆದ ವರ್ಷ ಖರೀದಿಸಿದ ಉಡುಪನ್ನೇ ಈ ಬಾರಿಯೂ ತೊಡಲಿದ್ದಾರೆ.