ಶೇ 50ರಷ್ಟು ಹೆಚ್ಚಿದ ಬಿಜೆಪಿಯ ಆದಾಯ, ಕಾಂಗ್ರೆಸ್ ಆದಾಯಕ್ಕಿಂತ ಐದು ಪಟ್ಟು ಅಧಿಕ!
ಸಾರ್ವತ್ರಿಕ ಚುನಾವಣೆ ನಡೆದ 2019-20ನೇ ಸಾಲಿನ ಹಣಕಾಸು ವರ್ಷದಲ್ಲಿ ಬಿಜೆಪಿಯ ಆದಾಯ ಅದರ ಹಿಂದಿನ ಸಾಲಿಗೆ ಹೋಲಿಸಿದರೆ ಸುಮಾರು ಶೇ 50ರಷ್ಟು ಹೆಚ್ಚಾಗಿದ್ದರೆ, ವೆಚ್ಚ ಶೇ 64ರಷ್ಟು ಏರಿಕೆಯಾಗಿದೆ.
Admin
0
8
ಹೊಸದಿಲ್ಲಿ: 2019-20ನೇ ಸಾಲಿನಲ್ಲಿ ಬಿಜೆಪಿಯ ಆದಾಯವು 2018-19ಕ್ಕೆ ಹೋಲಿಸಿದರೆ ಶೇ ಸುಮಾರು 50ರಷ್ಟು ಅಂದರೆ, 2,410 ಕೋಟಿ ರೂಪಾಯಿಯಿಂದ 3,623ಕ್ಕೆ ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ ಅದರ ಒಟ್ಟಾರೆ ವೆಚ್ಚ ಶೇ 64ರಷ್ಟು ಹೆಚ್ಚಾಗಿದ್ದು, 1005 ಕೋಟಿ ರೂಪಾಯಿಯಿಂದ 1,651ಕ್ಕೆ ಏರಿಕೆ ಕಂಡಿದೆ.
2019-20ನೇ ಸಾಲಿನ ಬಿಜೆಪಿಯ ವಾರ್ಷಿಕ ಆಯವ್ಯಯ ಲೆಕ್ಕಪತ್ರಗಳ ವಿವರಗಳನ್ನು ಚುನಾವಣಾ ಆಯೋಗ ಸೋಮವಾರ ಬಹಿರಂಗಪಡಿಸಿದೆ. ಆಡಳಿತಾರೂಢ , ಸಾರ್ವತ್ರಿಕ ಚುನಾವಣೆ ನಡೆದ 2019-20ನೇ ಸಾಲಿನಲ್ಲಿ 2,555 ಕೋಟಿ ರೂ ಅನುದಾನವನ್ನು ಚುನಾವಣಾ ಬಾಂಡ್ ಮೂಲಕ ಪಡೆದಿದೆ. ಇದು 2018-19ನೇ ಸಾಲಿಗೆ ಹೋಲಿಸಿದರೆ ಶೇ 76ರಷ್ಟು ಅಧಿಕ. ಹಿಂದಿನ ವರ್ಷ ಅದು 1,450 ಕೋಟಿ ರೂ ಆದಾಯವನ್ನು ಎಲೆಕ್ಟೊರಲ್ ಬಾಂಡ್‌ಗಳಿಂದ ಸಂಪಾದಿಸಿತ್ತು.
ಬಿಜೆಪಿಯ ಚುನಾವಣೆ ವೆಚ್ಚವು 2018-19ರಲ್ಲಿ 792.37 ಕೋಟಿ ರೂ ಇತ್ತು. 2019-20ರಲ್ಲಿ ಸಾರ್ವತ್ರಿಕ ಚುನಾವಣೆ ನಡೆದಾಗ ಅದು 1,352.92 ಕೋಟಿ ರೂ. ವ್ಯಯ ಮಾಡಿತ್ತು.
2019-20ನೇ ಸಾಲಿನಲ್ಲಿ ಕಾಂಗ್ರೆಸ್‌ನ ಒಟ್ಟಾರೆ 682 ಕೋಟಿ ರೂ. ಅಂದರೆ ಬಿಜೆಪಿಯ ಆದಾಯ ಕಾಂಗ್ರೆಸ್‌ಗಿಂತ 5.3ರಷ್ಟು ಅಧಿಕವಾಗಿದೆ. ಅದೇ ವರ್ಷ 998 ಕೋಟಿ ರೂ ವೆಚ್ಚ ಮಾಡಿತ್ತು. ಬಿಜೆಪಿ ಇದಕ್ಕಿಂತ 1.6 ಪಟ್ಟು ಹೆಚ್ಚು ವ್ಯಯಿಸಿತ್ತು. ಮತ್ತೊಂದು ಆಸಕ್ತಿಕರ ಸಂಗತಿಯೆಂದರೆ, ಇತರೆ ರಾಷ್ಟ್ರೀಯ ಪಕ್ಷಗಳಾದ ಕಾಂಗ್ರೆಸ್, ತೃಣಮೂಲ ಕಾಂಗ್ರೆಸ್, ಎನ್‌ಸಿಪಿ, ಬಿಎಸ್‌ಪಿ, ಸಿಪಿಎಂ ಮತ್ತು ಸಿಪಿಐನ ಒಟ್ಟು ಸಂಯೋಜಿತ ಆದಾಯಕ್ಕಿಂತಲೂ ಬಿಜೆಪಿಯ ಆದಾಯ 2019-20ನೇ ಸಾಲಿನಲ್ಲಿ ಮೂರು ಪಟ್ಟು ಅಧಿಕವಾಗಿದೆ.
ಈ ಎರಡು ವರ್ಷಗಳಲ್ಲಿ ಬಿಜೆಪಿ ಆದಾಯ ಶೇ 50ರಷ್ಟು ಹೆಚ್ಚಾಗಿದ್ದರೆ, ಕಾಂಗ್ರೆಸ್ ಆದಾಯ 998 ಕೋಟಿ ರೂ ಇಂದ 682 ಕೋಟಿಗೆ- ಶೇ 25ರಷ್ಟು ಕುಸಿತ ಕಂಡಿದೆ. 2018-19ರಲ್ಲಿ ಎಲೆಕ್ಟೊರಲ್ ಬಾಂಡ್‌ಗಳ ಮೂಲಕ ಕಾಂಗ್ರೆಸ್ 383 ಕೋಟಿ ರೂ ಗಳಿಸಿತ್ತು. 2019-20ರಲ್ಲಿ ಅದು 318 ಕೋಟಿ ರೂ.ಗೆ ಇಳಿದಿದೆ.
ಮಮತಾ ಬ್ಯಾನರ್ಜಿ ಅವರ ಟಿಎಂಸಿ 100.46 ಕೋಟಿ ರೂ, ಶರದ್ ಪವಾರ್ ಅವರ ಎನ್‌ಸಿಪಿ 29.25 ಕೋಟಿ ರೂ., ಶಿವಸೇನಾ 41 ಕೋಟಿ ರೂ., ಡಿಎಂಕೆ 45 ಕೋಟಿ ರೂ, ಆರ್‌ಜೆಡಿ 2.5 ಕೋಟಿ ರೂ. ಮತ್ತು ಆಮ್ ಆದ್ಮಿ ಪಕ್ಷ 18 ಕೋಟಿ ರೂ. ಮೊತ್ತವನ್ನು ಎಲೆಕ್ಟೊರಲ್ ಬಾಂಡ್‌ಗಳ ಮೂಲಕ ಸಂಗ್ರಹಿಸಿದೆ.
