ವಾರಕ್ಕೆ ಏಳೆಂಟು ಕಥೆ ಕೇಳುವ ನಟ ಸತೀಶ್ ನೀನಾಸಂ; ಸದ್ಯ ಐದು ಸಿನಿಮಾಗಳು ರಿಲೀಸ್‌ಗೆ ರೆಡಿ

( ಹರೀಶ್‌ ಬಸವರಾಜ್‌ ) ಸ್ಯಾಂಡಲ್‌ವುಡ್‌ನ ಪ್ರತಿಭಾವಂತ ನಟರಲ್ಲಿನೀನಾಸಂ ಸತೀಶ್‌ ಕೂಡ ಒಬ್ಬರು. ತಮ್ಮ ನೈಜ ನಟನೆಯಿಂದ ಹಲವಾರು ಅಭಿಮಾನಿಗಳನ್ನು ಗಳಿಸಿರುವ ಅವರು ಹೊಸ ರೀತಿಯ ಸ್ಕಿ್ರಪ್ಟ್‌ಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿರುತ್ತಾರೆ. ಈ ಪೈಕಿ ಇವರ ‘ಗೋದ್ರಾ’ ವಿಭಿನ್ನ ಸಬ್ಜೆಕ್ಟ್‌ನ ಸಿನಿಮಾ. ಈಗಾಗಲೇ ಚಿತ್ರೀಕರಣ ಪೂರ್ಣಗೊಂಡಿರುವ ಈ ಸಿನಿಮಾದ ಕೊನೆಯ ಹಾಡಿನ ಚಿತ್ರೀಕರಣ ಸದ್ಯದಲ್ಲೇ ಆರಂಭವಾಗಲಿದೆ. ನೀನಾಸಂ ಸತೀಶ್‌ ಮತ್ತು ಶ್ರದ್ಧಾ ಶ್ರೀನಾಥ್‌ ನಟಿಸಿರುವ ಈ ಸಿನಿಮಾ ಬೇರೆ ರೀತಿಯ ಕಥೆ ಹೇಳಲು ಹೊರಟಿದೆ. ‘ನಂದೀಶ್‌ ನಿರ್ದೇಶನ ಮಾಡಿರುವ ‘ಗೋದ್ರಾ’ ಸಿನಿಮಾದಲ್ಲಿ ಸಮಾಜಕ್ಕೊಂದು ಸಂದೇಶ ಇದೆ. ಇದರಲ್ಲಿ‘ಜೈ ಬೋಲೊ, ಜೈ ಜೈ ಬೋಲೊ ಜೈ ಹನುಮ, ಎಲ್ಲದಕ್ಕಿಂತಲೂ ದೊಡ್ದು ಕಣೋ ಮನುಸನ ಜನುಮ, ಮೇಲುಕೀಳು ಅನ್ನುವ ಮನುಸ ಸ್ವಾರ್ಥದಲ್ಲೇ ಬದುಕುವ ದಿವಸ’ ಎಂಬ ಸಾಲುಗಳಿರುವ ಹಾಡನ್ನು ನಿರ್ದೇಶಕ ಬಹದ್ದೂರ್‌ ಚೇತನ್‌ ಬರೆದಿದ್ದಾರೆ. ‘ಈ ಹಾಡಿನಲ್ಲಿ ಸಮಾಜದ ಸಮಾನತೆಯ ಬಗ್ಗೆ ಮಾತನಾಡುತ್ತಿದ್ದೇವೆ. ಸದ್ಯಕ್ಕೆ ಎಲ್ಲಾಕಡೆಯೂ ಅಸಮಾನತೆ ತಾಂಡವವಾಡುತ್ತಿದೆ. ಇಂತಹ ಸನ್ನಿವೇಶದಲ್ಲಿನಮಗೆ ‘ಕುಲದಲ್ಲಿ ಕೀಳಾವುದೋ’ ಮತ್ತು ‘ಕುಲಕುಲವೆಂದು ಹೊಡೆದಾಡದಿರಿ’ ಎಂಬಂತಹ ಹಾಡುಗಳು ನೆನಪಿಗೆ ಬರುತ್ತವೆ. ಅದನ್ನೇ ತಲೆಯಲ್ಲಿಟ್ಟುಕೊಂಡು ‘ಜೈ ಬೋಲೊ’ ಹಾಡನ್ನು ಬರೆಸಿದ್ದೇವೆ. ಸಮಾನತೆ ಸೃಷ್ಟಿಯಾಗದೇ ಹೋದರೆ ಸಾಮಾನ್ಯ ಮನುಷ್ಯನಿಗೆ ತೊಂದರೆಯಾಗುತ್ತದೆ. ಮಧ್ಯಮ ವರ್ಗದಿಂದ ಕೆಳಗಿರುವವರ ಬದುಕು ತೊಂದರೆಗೆ ಸಿಲುಕಿಕೊಳ್ಳುತ್ತದೆ ಎಂಬುದು ಈ ಹಾಡಿನ ಸಾರಾಂಶ. ಇದು ಈ ಸಿನಿಮಾದ ಪವರ್‌ಫುಲ್‌ ಹಾಡು ಎನ್ನಬಹುದು’ ಎಂದು ಹೇಳಿದ್ದಾರೆ ನೀನಾಸಂ ಸತೀಶ್‌. ‘ಈ ಹಾಡನ್ನು ನವೀನ್‌ ಸಜ್ಜು ಕಂಪೋಸ್‌ ಮಾಡಿ ಹಾಡುತ್ತಿದ್ದಾರೆ. ಮುಂದಿನ ವಾರದಿಂದ ಚಿತ್ರೀಕರಣ ಮಾಡಲು ಪ್ಲ್ಯಾನ್‌ ಮಾಡಿದ್ದೇವೆ. ಇದಕ್ಕಾಗಿ ಸೆಟ್‌ ಹಾಕುತ್ತಿದ್ದೇವೆ. ಸಿನಿಮಾದ ಕೆಲವು ದೃಶ್ಯಗಳನ್ನು ಸಹ ಮಾಂಟೇಜ್‌ನಂತೆ ಬಳಸಿಕೊಳ್ಳುತ್ತೇವೆ’ ಎಂದಿದ್ದಾರೆ ಅವರು. ಜೈ ಬೋಲೊ ಸಮಾಜವನ್ನು ಎಚ್ಚರಿಸುವಂತಹ ಪವರ್‌ಫುಲ್‌ ಹಾಡು. ಇದು ಪ್ರತಿಯೊಬ್ಬರಿಗೂ ಇಷ್ಟವಾಗುತ್ತದೆ ಎಂಬ ನಂಬಿಕೆ ಇದೆ ಎಂದಿದ್ದಾರೆ ನಟ ನೀನಾಸಂ ಸತೀಶ್. ಸಾಲು ಸಾಲು ಚಿತ್ರಗಳಲ್ಲಿ ಸತೀಶ್‌ ನೀನಾಸಂ ಸತೀಶ್‌ ನಟನೆಯ ಐದು ಸಿನಿಮಾಗಳು ಬಿಡುಗಡೆಗೆ ಸಿದ್ಧವಾಗಿವೆ. ಇದರ ಜತೆಗೆ ಅವರು ತಿಂಗಳಿಗೆ ಏನಿಲ್ಲವೆಂದರೂ ಏಳೆಂಟು ಕಥೆಯನ್ನು ಕೇಳುತ್ತಿದ್ದಾರಂತೆ. ಇದರಲ್ಲಿ ನಾಲ್ಕು ಸಿನಿಮಾಗಳನ್ನು ಓಕೆ ಮಾಡಿದ್ದಾರೆ. ಅವುಗಳ ಟೈಟಲ್‌ಗಳು ಒಂದೊಂದಾಗಿ ಸದ್ಯದಲ್ಲೇ ರಿವೀಲ್‌ ಆಗಲಿದೆ. ರಿಲೀಸ್‌ಗೆ ರೆಡಿಯಿರುವ ಅವರ ಸಿನಿಮಾಗಳ ಸಾಲಿನಲ್ಲಿ ತಮಿಳು ಸಿನಿಮಾ ಕೂಡ ಇದೆ. ಎಲ್ಲವೂ ಅಂದುಕೊಂಡಂತೆ ಆದರೆ ಏಪ್ರಿಲ್‌ನಿಂದ ಒಂದರ ಹಿಂದೆ ಒಂದರಂತೆ ಅವರ ಸಿನಿಮಾಗಳು ಬಿಡುಗಡೆಯಾಗಿ ಸತೀಶ್‌ ಚಿತ್ರೋತ್ಸವ ಆಗುವ ಸಾಧ್ಯತೆ ಇದೆ.