ಮಳೆಗೆ ನೆಲ ಕಚ್ಚಿದ ಬೆಳೆ, ಗಗನಕ್ಕೇರಿದ ತರಕಾರಿ ಬೆಲೆ: ಗ್ರಾಹಕರ ಜೇಬಿಗೆ ಕತ್ತರಿ; ಇಲ್ಲಿದೆ ದರಪಟ್ಟಿ!

ಮಂಜುನಾಥ ದಾಸಣ್ಣನವರ ಹಾವೇರಿ ಹಾವೇರಿ: ಜಿಲ್ಲೆಯಲ್ಲಿ ಕೆಲ ದಿನಗಳಿಂದ ಸುರಿಯುತ್ತಿರುವ ಅಕಾಲಿಕ ಮಳೆಗೆ ಬೆಳೆಗಳು ನೆಲಕಚ್ಚಿವೆ. ಅಳಿದುಳಿದ ತರಕಾರಿಗೆ ಭಾರೀ ಬೆಲೆ ಬಂದಿದೆ. ಮಾರುಕಟ್ಟೆಗಳಲ್ಲಿ ತರಕಾರಿ ಬೆಲೆಗಳು ಗಗನಮುಖಿಯಾಗಿವೆ. ಈ ನಡುವೆ, ಮತ್ತು ವ್ಯಾಪಾರಿಗಳಿಗೆ ಈರುಳ್ಳಿ ಬೆಲೆ ಕಣ್ಣೀರು ತರಿಸಿದರೆ, ಟೊಮೇಟೊ ರೇಟು ಕೂಡ ಜನಸಾಮಾನ್ಯರ ಹೊಟ್ಟೆ ಕಿವುಚುವಂತಿದೆ. ತೋಟಗಾರಿಕಾ ಇಲಾಖೆ ಮಾಹಿತಿ ಪ್ರಕಾರ, ಜಿಲ್ಲಾದ್ಯಂತ ನವೆಂಬರ್‌ 20ರವರೆಗೆ ಸುರಿದ ಅಕಾಲಿಕ ಮಳೆಗೆ ಬರೋಬ್ಬರಿ 621.45 ಹೆಕ್ಟೇರ್‌ ಪ್ರದೇಶದಲ್ಲಿ ಬೆಳೆಯಲಾಗಿದ್ದ ತೋಟಗಾರಿಕಾ ಬೆಳೆಗಳು ಸಂಪೂರ್ಣ ನಾಶವಾಗಿವೆ. ಪ್ರಮುಖ ತರಕಾರಿ ಬೆಳೆಗಳಾದ ಹಿರೇಕಾಯಿ, ಬೆಂಡೆಕಾಯಿ, ಸೌತೆಕಾಯಿ, ಈರುಳ್ಳಿ, ಟೊಮೇಟೊ, ಚವಳೆಕಾಯಿ, ಹಾಗಲಕಾಯಿ, ಬೀನ್ಸ್‌, ಕ್ಯಾರೆಟ್‌, ಹಸಿ ಮೆಣಸಿನಕಾಯಿ, ಕ್ಯಾಬೇಜ್, ಮೂಲಂಗಿ, ಮೆಂತೆ ಸೇರಿದಂತೆ ಇನ್ನಿತರ ತರಕಾರಿ ಹಾಗೂ ಸೊಪ್ಪುಗಳು ಮಳೆ ಹೊಡೆತಕ್ಕೆ ನಲುಗಿದ್ದು, ಮಣ್ಣಿನಲ್ಲಿ ಕೊಳೆತು ಹಾಳಾಗಿವೆ. ಈ ಹಿನ್ನೆಲೆ ಜಿಲ್ಲೆ ಸೇರಿದಂತೆ ಹೊರ ಜಿಲ್ಲೆ, ಹೊರ ರಾಜ್ಯಗಳಿಂದ ಬರುವ ತರಕಾರಿಗಳು ನಿರೀಕ್ಷಿತ ಪ್ರಮಾಣದಲ್ಲಿ ಮಾರುಕಟ್ಟೆಗೆ ಬರುತ್ತಿಲ್ಲ. ಇದರಿಂದ ವ್ಯಾಪಾರಿಗಳು ಹಾಗೂ ಗ್ರಾಹಕರು ಪರದಾಡುವಂತಾಗಿದೆ. ತರಕಾರಿ ವಸ್ತುಗಳ ದರ (ಕೆಜಿ.ಗೆ) ತರಕಾರಿ ಹಿಂದಿನ ದರ- ಈಗಿನ ದರ

• ಈರುಳ್ಳಿ 30 - 40- 40 - 70
• ಆಲೂಗಡ್ಡೆ 30 - 40 -40 - 60
• ಕ್ಯಾರೆಟ್‌ 40 - 60 -60 - 80
• ಬೀಟ್‌ರೂಟ್‌ 30 - 50- 50 - 80
• ಮೆಣಸಿನಕಾಯಿ 20 - 40 -40 - 60
• ಹಿರೇಕಾಯಿ 30 - 40- 60 - 80
• ಬದನೆಕಾಯಿ 30 - 40 -30 - 60
• ಸೌತೆಕಾಯಿ 30 - 40- 60 - 80
• ಬೆಂಡೆಕಾಯಿ 30 - 50 -40 - 60
• ಹಾಗಲಕಾಯಿ 20 - 40- 50 - 70
• ಹಸಿಶುಂಠಿ 50 - 60- 60 - 80
• ಟೊಮೇಟೊ 20 - 40 -40 - 70
• ಚವಳೆಕಾಯಿ 30 - 40- 50 - 60
• ಕ್ಯಾಬೇಜ್ 20 - 40 -40 - 60
• ಬೀನ್ಸ್‌ 30 - 50-60 - 80

ಸೊಪ್ಪಿನ ಹೆಸರು ಸಿವುಡು ಒಂದಕ್ಕೆ ಬೆಲೆ ಕೊತಂಬರಿ ಸೊಪ್ಪು 6 - 10 ಮೆಂತೆ ಸೊಪ್ಪು 8 - 12 ಸಬ್ಬಸಗಿ ಸೊಪ್ಪು 5 - 12 ತಿರಕಸಾಲಿ ಸೊಪ್ಪು 5 - 12 ಪಾಲಕ್‌ ಸೊಪ್ಪು 8 - 15 ಪುದಿನಾ ಸೊಪ್ಪು 10 - 20 ಅಕಾಲಿಕ ಮಳೆಯಿಂದಾಗಿ ತರಕಾರಿ ಬೆಳೆಗಳೆಲ್ಲ ಹಾಳಾಗಿವೆ. ಉಳ್ಳಾಗಡ್ಡಿ, ಸೌತೆಕಾಯಿ, ಟೊಮೇಟೊ ಎಲ್ಲ ಹೊಲದಾಗ ಕೊಳೆತು ಹೋಗ್ತಾ ಇವೆ. ಮಳೆಯಿಂದ ಹಾನಿಯಾಗಿ ಯಾವ ಕಡೆನೂ ಮಾಲು ಸಿಗುತ್ತಿಲ್ಲ. ಆದ್ದರಿಂದ ಸದ್ಯ ಇರೋ ತರಕಾರಿ ಬೆಳೆಗಳಿಗೆ ಬಂಗಾರ ಬೆಲೆ ಬಂದಂತಾಗಿದೆ. ಜಾಫರ್‌ಸಾಬ್‌ ಹತ್ತಿಕಾಳ, ಬೀದಿಬದಿ ವ್ಯಾಪಾರಿ, ಹಾವೇರಿ ಕಳೆದ 4-5 ದಿನಗಳ ಹಿಂದೆ ಸುರಿದ ಅಕಾಲಿಕ ಮಳೆಗೆ ಹೊಲದಾಗ ಬೆಳೆ ಕೆಟ್ಟು ಹೋಗಿದ್ದಕ್ಕೆ ಎಲ್ಲಿಯೂ ತರಕಾರಿ ಸಿಗುತ್ತಿಲ್ಲ. ಮಾರುಕಟ್ಟೆಯೊಳಗೂ ತರಕಾರಿ ರೇಟು ಜಾಸ್ತಿ ಆಗೇವ್ರಿ, ಏನ್‌ ಮಾಡೋದ್ರಿ ಹೊಟ್ಟಿ ಐತಿ ಬಿಡಾಕ ಬರಲ್ಲ, ರೇಟು ಜಾಸ್ತಿ ಆದ್ರು ತಗೊಳ್ಳೋದ ಕಡಿಮೆಯಾದ್ರೂ ತಗೊಳ್ಳೋದರಿ ಸರ್ರಾ. ಸುಶ್ಮಿತಾ ಕೆ.ಎಲ್‌, ಗ್ರಾಹಕರು