ಮರಳು ಪಡೆಯೋದಿನ್ನು ಸುಲಭ; ಗ್ರಾ.ಪಂನಲ್ಲಿ ಟನ್‌ಗೆ 300 ರೂ, ಇತರ ಕಡೆ 700 ರೂ.!
ಒಮ್ಮೆಗೆ ಗರಿಷ್ಠ 3 ಟನ್‌ ಮರಳು ಸಾಗಣೆಗಷ್ಟೇ ಅವಕಾಶವಿರಲಿದೆ. ತಾಲೂಕನ್ನು ಒಂದು ಘಟಕವೆಂದು ಗುರುತಿಸಲಾಗಿದೆ. ತಾಲೂಕಿನ ಗ್ರಾ.ಪಂ ವ್ಯಾಪ್ತಿಯಲ್ಲಷ್ಟೇ ಈ ಮರಳು ಬಳಸಬೇಕು. ಇತರೆ ತಾಲೂಕು, ಜಿಲ್ಲೆಗೆ ಸಾಗಿಸಲು ಅವಕಾಶವಿರುವುದಿಲ್ಲ. ಇದರಿಂದ ಸ್ಥಳೀಯ ಬಳಕೆಗೆ ಕಡಿಮೆ ದರದಲ್ಲಿ ಸುಲಭವಾಗಿ ಮರಳು ಸಿಗಲಿದೆ ಎಂದು ಸರಕಾರದ ಮೂಲಗಳು ಹೇಳಿವೆ.
Admin
0
6
ಬೆಂಗಳೂರು: ಮಾಫಿಯಾ ಭೀತಿ ಮತ್ತು ನಿರಂತರ 'ಅರಳು ಮರಳು' ನೀತಿಯ ಗೊಂದಲದಿಂದಾಗಿ ಜನಸಾಮಾನ್ಯರು ಬವಣೆ ಪಡುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಸರಕಾರ ಕಡಿಮೆ ದರದಲ್ಲಿ ಮರಳು ಸಿಗುವ ಹೊಸ ಯೋಜನೆ ರೂಪಿಸಿದೆ. ಹೊಸ ಜಾರಿಗಾಗಿ ಮಾಡಿರುವ ತಿದ್ದುಪಡಿ ನಿಯಮಾವಳಿಗಳಿಗೆ ಸಭೆ ಸೋಮವಾರ ಅನುಮೋದನೆ ನೀಡಿದೆ.
ಸರಕಾರದ ಅಧೀನ ಸಂಸ್ಥೆಗಳಾದ ಹಟ್ಟಿ ಚಿನ್ನದ ಗಣಿ ಸಂಸ್ಥೆ (ಎಚ್‌ಜಿಎಂಎಲ್‌) ಹಾಗೂ ಕರ್ನಾಟಕ ರಾಜ್ಯ ಖನಿಜಗಳ ನಿಗಮದಿಂದ (ಕೆಎಸ್‌ಎಂಸಿ- ಹಿಂದಿನ ಎಂಎಂಎಲ್‌) ಮರಳು ನಿಕ್ಷೇಪ ತೆಗೆದು ಪಾರದರ್ಶಕವಾಗಿ ಸಾಗಿಸಿ ಗ್ರಾಹಕರಿಗೆ ಪೂರೈಸಲು ಪೂರಕವಾದ ನಿಯಮಾವಳಿಗಳಿಗೆ ಸಂಪುಟ ಅಸ್ತು ಎಂದಿದೆ. ಸದ್ಯ ಹರಾಜಿನಲ್ಲಿ ಮರಳು ಗಣಿಗಾರಿಕೆಗೆ ಗುತ್ತಿಗೆ ಪಡೆದ ಸಂಸ್ಥೆಗಳ ಅವಧಿ ಮುಗಿದ ಬಳಿಕ ಸರಕಾರದ ಉಭಯ ಸಂಸ್ಥೆಗಳು ಮರಳು ಗಣಿಗಾರಿಕೆ ಹಾಗೂ ಸಾಗಣೆಯ ಜವಾಬ್ದಾರಿ ವಹಿಸಿಕೊಳ್ಳಲಿವೆ.
ಒಮ್ಮೆಗೆ ಗರಿಷ್ಠ 3 ಟನ್‌ ಮರಳು ಸಾಗಣೆಗಷ್ಟೇ ಅವಕಾಶವಿರಲಿದೆ. ತಾಲೂಕನ್ನು ಒಂದು ಘಟಕವೆಂದು ಗುರುತಿಸಲಾಗಿದೆ. ತಾಲೂಕಿನ ಗ್ರಾ.ಪಂ ವ್ಯಾಪ್ತಿಯಲ್ಲಷ್ಟೇ ಈ ಮರಳು ಬಳಸಬೇಕು. ಇತರೆ ತಾಲೂಕು, ಜಿಲ್ಲೆಗೆ ಸಾಗಿಸಲು ಅವಕಾಶವಿರುವುದಿಲ್ಲ. ಇದರಿಂದ ಸ್ಥಳೀಯ ಬಳಕೆಗೆ ಕಡಿಮೆ ದರದಲ್ಲಿ ಸುಲಭವಾಗಿ ಮರಳು ಸಿಗಲಿದೆ ಎಂದು ಸರಕಾರದ ಮೂಲಗಳು ಹೇಳಿವೆ.
ನದಿ ಪಾತ್ರ, ಹೊಳೆ, ನದಿ ಸಮುದ್ರ ಸೇರುವ ಪ್ರದೇಶ, ಜಲಾಶಯ, ಅಣೆಕಟ್ಟಿನ ಹಿನ್ನೀರು ಪ್ರದೇಶದಲ್ಲಿ ಮರಳು ನಿಕ್ಷೇಪವನ್ನು ಸರಕಾರಿ ಸಂಸ್ಥೆಗಳೇ ಗಣಿಗಾರಿಕೆ ನಡೆಸಿ ಹಂಚಿಕೆ ಮಾಡಲಿವೆ. ಉಪ ವಿಭಾಗಾಧಿಕಾರಿ ಅಧ್ಯಕ್ಷತೆಯ ತಾಲೂಕು ಸಮಿತಿ ಮರಳು ನಿಕ್ಷೇಪ ಸ್ಥಳಗಳನ್ನು ಗುರುತಿಸಲಿದ್ದು, ಜಿಲ್ಲಾಧಿಕಾರಿಗಳ ಅಧ್ಯಕ್ಷತೆಯ ಸಮಿತಿ ಅಂತಿಮವಾಗಿ ನೋಟಿಫೈ ಮಾಡಲಿದೆ ಎಂದು ಮೂಲಗಳು ವಿವರಿಸಿವೆ.
ಈ ಎರಡು ಸಂಸ್ಥೆಗಳನ್ನು ಹೊರತುಪಡಿಸಿ ಯಾರೊಬ್ಬರೂ ಮರಳು ಗಣಿಗಾರಿಕೆ ನಡೆಸಲು ಅವಕಾಶವಿರುವುದಿಲ್ಲ. ಒಂದೊಮ್ಮೆ ಸರಕಾರದ ಯಾವುದೇ ಇಲಾಖೆ ಸ್ವಂತ ಬಳಕೆಗೆ ಮರಳು ಬಳಸಲು ಬಯಸಿದರೆ ಪ್ರತ್ಯೇಕವಾಗಿ ಮರಳು ಬ್ಲಾಕ್‌ ಹಂಚಿಕೆಗೂ ನಿಯಮಾವಳಿಯಲ್ಲಿ ಅವಕಾಶವಿದೆ. ಹಾಗೆಯೇ ಸರಕಾರ ಬಯಸಿದರೆ ಯಾವುದೇ ನಿಗಮ, ಮಂಡಳಿ, ಇಲಾಖೆಗೂ ಮರಳು ಗಣಿಗಾರಿಕೆ ನಡೆಸಲು, ಮಾರಾಟ ಮಾಡಲು ಅನುಮತಿ ನೀಡಲು ನಿಯಮಾವಳಿಯಲ್ಲಿ ಅವಕಾಶ ನೀಡಲಾಗಿದೆ.
ಗ್ರಾಮೀಣ ಪ್ರದೇಶದಲ್ಲಿ ಮರಳು ದಾಸ್ತಾನು ಮಾಡಿ ಮಾರಲು ಜಿಲ್ಲಾ ಖನಿಜ ನಿಧಿ(ಡಿಎಂಎಫ್‌)ಯಡಿ ಶೇ.2ರಷ್ಟು ಸಂಗ್ರಹಕ್ಕೆ ಅವಕಾಶ ನೀಡಲಾಗಿದೆ. ಅದನ್ನು ಗ್ರಾ.ಪಂಗೆ ನೀಡಲಾಗುವುದು. ರಾಯಧನದಲ್ಲಿ ಶೇ.50 ಮೊತ್ತದಲ್ಲಿ ಶೇ.25ರಷ್ಟನ್ನು ಸಂಬಂಧಪಟ್ಟ ಗ್ರಾ.ಪಂ ಹಾಗೂ ಉಳಿದ ಶೇ. 25ರಷ್ಟನ್ನು ಇತರೆ ಗ್ರಾ.ಪಂ ವ್ಯಾಪ್ತಿಯಲ್ಲಿನ ರಸ್ತೆ ದುರಸ್ತಿ ಇತ್ಯಾದಿಗೆ ಬಳಸಬಹುದು.
ಜೆ.ಸಿ. ಮಾಧುಸ್ವಾಮಿ, ಸಚಿವ
ಆನ್‌ಲೈನ್‌ ಮೂಲಕ ಲಭ್ಯ
ಅಂತರ್‌ ಜಿಲ್ಲಾಮರಳು ಸಾಗಣೆಗೆ ಅವಕಾಶವಿದೆ. ಪ್ರತಿ ಟನ್‌ಗೆ 700 ರೂ. ನಿಗದಿ. ರಾಯಧನ, ಜಿಎಸ್‌ಟಿ, ಸಾಗಣೆ ವೆಚ್ಚವೆಲ್ಲ ಸೇರಿ 10 ಟನ್‌ ಮರಳು 10,000 ರೂ.ಗೆ ಸಿಗಬಹುದು. ಆನ್‌ಲೈನ್‌ನಲ್ಲಿ ಬುಕಿಂಗ್‌ ಜತೆಗೆ ಸ್ಟಾಕ್‌ ಯಾರ್ಡ್‌ನಲ್ಲಿ ಮಾರಾಟ ವ್ಯವಸ್ಥೆ ಬರಲಿದೆ.
ದರ ಎಷ್ಟು?
- ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಟನ್‌ಗೆ 300 ರೂ.
- ರಾಜ್ಯಾದ್ಯಂತ ಮರಳು ಮಾರಾಟ ಕೇಂದ್ರಗಳಲ್ಲಿ(ಸ್ಟಾಕ್‌ ಯಾರ್ಡ್‌) ಟನ್‌ಗೆ 700 ರೂ.
- ಗ್ರಾ. ಪಂ ವ್ಯಾಪ್ತಿಯ ಕೆರೆ, ಕುಂಟೆ, ಹಳ್ಳ, ತೊರೆಯಲ್ಲಿನ ಮರಳು ನಿಕ್ಷೇಪವನ್ನು ತೆಗೆದು ಸ್ಥಳೀಯವಾಗಿಯೇ ಬಳಸಲು ಅವಕಾಶ ಕಲ್ಪಿಸಲಾಗಿದೆ.
- ವಾರದಲ್ಲಿ ನಿರ್ದಿಷ್ಟ ದಿನದಂದು ಗ್ರಾಮ ಪಂಚಾಯಿತಿ ಸಿಬ್ಬಂದಿ ಸಮ್ಮುಖದಲ್ಲಿ ಅಗತ್ಯವಿರುವಷ್ಟು ಮರಳು ಪಡೆಯಬಹುದು.
- ಕರಾವಳಿ ಭಾಗದಲ್ಲಿ ನಾನ್‌ ಸಿಆರ್‌ಜಡ್‌ ಪ್ರದೇಶದಲ್ಲಿ ನೀರಿನಲ್ಲಿ ಮುಳುಗಿ ಮರಳು ತೆಗೆಯುವ ಸಾಂಪ್ರದಾಯಿಕ ವೃತ್ತಿ ಮುಂದುವರಿಸಲು ಅವಕಾಶ.
- ಗ್ರಾಮೀಣ ವಸತಿ, ಸರಕಾರಿ ಪ್ರಾಯೋಜಿತ ಯೋಜನೆಗಳಿಗೆ ರಿಯಾಯಿತಿ ದರದಲ್ಲಿ ಮರಳು ಕೊಡಲು ಗ್ರಾ.ಪಂಗೆ ಅವಕಾಶ
