ಮೂರು ವರ್ಷಗಳ ಹಿಂದೆಯೂ ಕಾದಿತ್ತು ಅಪಾಯ: 'ಜಸ್ಟ್ ಮಿಸ್' ಆಗಿದ್ದ ಸಂಚಾರಿ ವಿಜಯ್!

ಕೋವಿಡ್ ಪ್ರಕರಣಗಳು ಕಡಿಮೆ ಆಗುತ್ತಿವೆ.. ಇನ್ನೇನು ರಾಜ್ಯ ಅನ್‌ಲಾಕ್ ಆಗಲಿದೆ ಎಂಬ ಭರವಸೆಯ ಬೆಳಕನ್ನು ಎದುರು ನೋಡುತ್ತಿದ್ದ ಕನ್ನಡಿಗರಿಗೆ ಬರಸಿಡಿಲಿನಂತೆ ಬಡಿದಿದ್ದು ಕುರಿತಾದ ಆಘಾತಕಾರಿ ಸುದ್ದಿ. ಕೋವಿಡ್ ಲಾಕ್‌ಡೌನ್ ಸಮಯದಲ್ಲಿ ಫ್ರಂಟ್ ಲೈನ್ ವಾರಿಯರ್ ಆಗಿ ಅನೇಕರಿಗೆ ಸಹಾಯ ಮಾಡಿದ್ದ ''ಸಂಚಾರಿ ವಿಜಯ್‌ಗೆ ಒಳ್ಳೇಯದಾಗಲಿ'' ಅಂತಲೇ ಹಲವರು ಹಾರೈಸಿದ್ದರು. ಆದರೆ, ವಿಧಿಲಿಖಿತವೇ ಬೇರೆ ಆಗಿತ್ತು..! ಸಮಾಜಮುಖಿ ಕೆಲಸಗಳ ಬಗ್ಗೆಯೇ ಚರ್ಚೆ ಮಾಡಲು ಗೆಳೆಯ ನವೀನ್ ಮನೆಗೆ ತೆರಳಿದ್ದ ಸಂಚಾರಿ ವಿಜಯ್‌ರನ್ನ ಕರೆದುಕೊಂಡು ಹೋಗಲು ದಾರಿ ಮಧ್ಯದಲ್ಲೇ ಜವರಾಯ ಕಾದು ಕುಳಿತಿದ್ದ. ಬೈಕ್ ಅಪಘಾತದಿಂದಾಗಿ ಸಂಚಾರಿ ವಿಜಯ್‌ ತಲೆಗೆ ತೀವ್ರ ಪೆಟ್ಟು ಬಿತ್ತು. ಪ್ರಜ್ಞೆ ತಪ್ಪಿದ ಸಂಚಾರಿ ವಿಜಯ್ ಮತ್ತೆ ಕಣ್ತೆರೆಯಲೇ ಇಲ್ಲ. ಶಸ್ತ್ರಚಿಕಿತ್ಸೆ ಮಾಡಿದರೂ ಪ್ರಯೋಜನವಾಗಲಿಲ್ಲ. ಬ್ರೇನ್ ಫೇಲ್ಯೂರ್ ಮತ್ತು ಬ್ರೇನ್ ಡೆಡ್ ಆದ ಪರಿಣಾಮ ಸಂಚಾರಿ ವಿಜಯ್ ಕೊನೆಯುಸಿರೆಳೆದರು. ಮೊನ್ನೆ ಬೈಕ್‌ನಲ್ಲಿ ಹಿಂಬದಿ ಕುಳಿತಿದ್ದ ಸಂಚಾರಿ ವಿಜಯ್ ತಲೆಗೆ ಹೆಲ್ಮೆಟ್ ಧರಿಸಿದಿದ್ದರೆ ಪ್ರಾಣಾಪಾಯ ಉಂಟಾಗುತ್ತಿರಲಿಲ್ಲ ಎಂದು ವೈದ್ಯರು ಅಭಿಪ್ರಾಯ ಪಟ್ಟಿದ್ದಾರೆ. ಹೆಲ್ಮೆಟ್ ಧರಿಸದೆ, ರಾತ್ರಿ ಹೊತ್ತಿನಲ್ಲಿ ಬೈಕ್ ಸವಾರಿ ಮಾಡುವ ರಿಸ್ಕ್‌ಅನ್ನು ಸಂಚಾರಿ ವಿಜಯ್ ಯಾಕೆ ತೆಗೆದುಕೊಂಡ್ರೋ, ಗೊತ್ತಿಲ್ಲ. ಆದರೆ ''ರಿಸ್ಕ್ ತೆಗೆದುಕೊಳ್ಳುವ ಮುನ್ನ ಜಾಗೃತಿ ವಹಿಸಿ.. ಲೈಫ್ ಈಸ್ ಪ್ರೆಷಿಯಸ್'' ಎಂಬ ಮಾತು ಇದೇ ಸಂಚಾರಿ ವಿಜಯ್ ಬಾಯಿಂದಲೇ ಮೂರು ವರ್ಷಗಳ ಹಿಂದೆ ಬಂದಿತ್ತು..! ಯಾಕೆ ಅಂದ್ರೆ.. ಮೂರು ವರ್ಷಗಳ ಹಿಂದೆಯೂ ನಟ ಸಂಚಾರಿ ವಿಜಯ್ ಅಪಾಯಕ್ಕೆ ಸಿಲುಕಿದ್ದರು. ಬೇಡ.. ಬೇಡ ಅಂದರೂ ಉದ್ದಟತನದಿಂದ ನೀರಿಗಿಳಿದು ಕಾಲಿಗೆ ಏಟು ಮಾಡಿಕೊಂಡಿದ್ದರು. ಅಂದು ಸ್ವಲ್ಪದರಲ್ಲಿಯೇ ಸಂಚಾರಿ ವಿಜಯ್ ಅಪಾಯದಿಂದ ಪಾರಾಗಿದ್ದರು. ''ದೇವರ ದಯೆಯಿಂದ ಜಸ್ಟ್ ಮಿಸ್'' ಎಂದು ಸಂಚಾರಿ ವಿಜಯ್ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದರು. ಸಂಚಾರಿ ವಿಜಯ್ ಅವರ ಅವತ್ತಿನ ಸೋಷಿಯಲ್ ಮೀಡಿಯಾ ಪೋಸ್ಟ್ ''JUST MISS!! ಒಂದೊಂದ್ಸಾರಿ ಎಷ್ಟು ಉದ್ದಟತನ ಮಾಡೋಕೋಗ್ತೀನಿ ಅನ್ನೋದಕ್ಕೆ ಈ ಪಿಕ್ಚರ್ ಸಾಕು. ನೋಡಿ ಇವತ್ತು ಮಲಯಾಳಂ ಸಿನಿಮಾ ಶೂಟಿಂಗ್ ಮಾಡೋ ಟೈಮ್‌ನಲ್ಲಿ ನಾನಾಗಿ ನಾನೇ ಮಾಡಿಕೊಂಡ ಎಡವಟ್ಟು. ಡೈರೆಕ್ಟರ್ ಬೇಡ.. ಬೇಡ ಅಂದರೂ.. ತುಂಬಾ ರಿಸ್ಕ್ ತಗೊಂಡು ನೀರಿಗಿಳಿದಿದ್ದರ ಪರಿಣಾಮ. ದೇವರ ದಯೆಯಿಂದ ಏನೂ ಆಗ್ಲಿಲ್ಲ. ಯಾಕೆ ಈ ಪೋಸ್ಟ್ ಹಾಕಿದ್ದೀನಿ ಅಂದ್ರೆ ನನ್ನಂಥ ಕೆಲವರು ಈ ತರಹ ರಿಸ್ಕ್ ಬೇಡ ಅಂದರೂ ಕೇಳೋದಿಲ್ಲ. ಮಾಡೇ ಮಾಡ್ತೀನಿ ಅಂತಾರೆ. ಅಂಥವ್ರಿಗೆ ಅರ್ಥ ಆಗ್ಲಿ ಅಂತ ಅಷ್ಟೇ. ಹಾಗೇ ನಮ್ಮ ಲಿಮಿಟ್ಸ್ ನಮ್ಗೆ ಗೊತ್ತಿದ್ದರೆ ಒಳ್ಳೆಯದು. ತುಂಬಾ ರಿಸ್ಕ್ ತಗೊಂಡು ಕೆಲಸ ಮಾಡ್ತೀನಿ ಅನ್ನೋವ್ರು ಜಾಗೃತರಾಗಿ ಕೆಲಸ ಮಾಡಿ. ಲೈಫ್ ಈಸ್ ಪ್ರೆಷಿಯಸ್'' ಎಂದು ಫೆಬ್ರವರಿ 9, 2018 ರಂದು ಫೇಸ್‌ಬುಕ್‌ನಲ್ಲಿ ಸಂಚಾರಿ ವಿಜಯ್ ಬರೆದುಕೊಂಡಿದ್ದರು. ಜೊತೆಗೆ ತಮ್ಮ ಕಾಲಿಗೆ ಪೆಟ್ಟಾದ ಫೋಟೋಗಳನ್ನೂ ಹಂಚಿಕೊಂಡಿದ್ದರು. ಇದೀಗ ನೋಡಿದರೆ, ಕೋವಿಡ್ ನಂತಹ ಸಂದರ್ಭದಲ್ಲೂ ರಿಸ್ಕ್ ತಗೊಂಡು ಇನ್ನೊಬ್ಬರಿಗೆ ಸಹಾಯ ಮಾಡಲು ಸಂಚಾರಿ ವಿಜಯ್ ಶ್ರಮ ಪಡುತ್ತಿದ್ದರು. ರಾತ್ರಿ ಬೈಕ್ ಸವಾರಿ ಮಾಡಿದ ಎಡವಟ್ಟಿನಿಂದಾಗಿ ಸಂಚಾರಿ ವಿಜಯ್ ಪ್ರಾಣ ಪಕ್ಷಿಯೇ ಹಾರಿ ಹೋಯ್ತು.