ಮತ್ತೆ ಗಗನಕ್ಕೇರಿದ ಟೊಮೇಟೊ ಬೆಲೆ! ಗ್ರಾಹಕರಿಗೆ ಹೊರೆ, ರೈತರಲ್ಲಿ ಸಂತಸ!

ಚೇಳೂರು: ಟೊಮೇಟೊ ಬೆಲೆ ನವೆಂಬರ್‌ ತಿಂಗಳಲ್ಲಿ ಕಡಿಮೆಯಾಗಿ ಡಿಸೆಂಬರ್‌ ತಿಂಗಳಿಂದ ಏರಿಕೆ ಕಂಡಿದೆ. ಇದೀಗ ಮಾರುಕಟ್ಟೆಯಲ್ಲಿ ಟೊಮೇಟೊ ಬೆಲೆ ದಿನೇ ದಿನೆ ಗಗನಕ್ಕೆ ಏರುತ್ತಿದ್ದು, 14 ಕೆ.ಜಿ. ಬಾಕ್ಸ್‌ 1200 ಗಡಿ ದಾಟಿರುವುದರಿಂದ ಟೊಮೇಟೊ ಬೆಳೆ ಕೈಗೆ ಬಂದಿರುವ ರೈತರಲ್ಲಿ ಸಂಪೂರ್ಣ ಮಂದಹಾಸ ಮೂಡಿದೆ. ಟೊಮೇಟೊ ಬೆಲೆಯಲ್ಲಿ ಏರಿಕೆಯಾಗುತ್ತಲೇ ಇದೆ. ಮಾರುಕಟ್ಟೆಗೆ ಹೋಗುವ ಟೊಮೇಟೊ ಪ್ರಮಾಣದಲ್ಲಿ ಇಳಿಕೆಯಾಗಿರುವ ಹಿನ್ನೆಲೆಯಲ್ಲಿ ಹೆಚ್ಚಾಗುತ್ತಿದೆ. ಇದಲ್ಲದೆ, ಬಿಸಾಡುತ್ತಿದ್ದ ಟೊಮೇಟೊಗೆ ಕೂಡ ಚಿನ್ನದ ಬೆಲೆ ಬಂದಿದೆ. ಇಂದರಿಂದ ರೈತರಿಗೆ ಮತ್ತಷ್ಟು ಸಂತಸ ತಂದಿದೆ. ಪ್ರತಿದಿನ ಮಾರುಕಟ್ಟೆಗೆ 8 ರಿಂದ 10 ಸಾವಿರ ಬಾಕ್ಸ್‌ ಟೊಮೇಟೊ ಹೋದರೆ ಒಂದೊಂದು ದಿನ ಮಾತ್ರ ಹೆಚ್ಚು ಬಾಕ್ಸ್‌ ಟೊಮೇಟೊ ಹೋಗುತ್ತಿದೆ. ಕಡಿಮೆ ಸರಕು ಮಾರುಕಟ್ಟೆಗೆ ಹೋದಾಗ ಅದರಲ್ಲಿ ಉತ್ತಮ ಟೊಮೇಟೊ ಎಂದೇ ಹೆಸರು ಪಡೆದಿರುವ ಸಾಹು ಎಂಬ ಹೈಬ್ರೀಡ್‌ ಟೊಮೇಟೊ 1500 ರೂಗಳಿಂದ 1700 ರೂ ವರೆಗೂ ಮಾರಾಟವಾಗುತ್ತಿದೆ. ಮಾರುಕಟ್ಟೆಯಲ್ಲಿ ಬೇರ್ಪಡಿಸುವಾಗ ಮೂಲೆಗೆ ಬಿಸಾಡುತ್ತಿದ್ದ ಹಾಗೆ ಬೆಲೆ ಇಲ್ಲದಾಗ ಕಸದ ತೊಟ್ಟಿಗೆ ಬಿಸಾಡುತ್ತಿದ್ದು ಟೊಮೇಟೊ ಕ್ರೇಟ್‌ ಬೆಲೆ ಸಹ 1200 ರೂ ಗಳಿಗೂ ಹೆಚ್ಚು ಹಣಕ್ಕೆ ಮಾರಾಟವಾಗಿರುವುದು ವಿಶೇಷ. ಕೆಲವು ಕಡೆ ಮಳೆ ಜಾಸ್ತಿಯಾಗಿ ಬೆಳೆ ಕೈಕೊಟ್ಟ ಹಿನ್ನೆಲೆಯಲ್ಲಿ ಸರಕು ಮಾರುಕಟ್ಟೆಗೆ ಕಡಿಮೆ ಹೋಗುತ್ತಿರುವ ಪರಿಣಾಮ ಟೊಮೇಟೊ ಬೆಲೆ ಏರಿಕೆಯಾಗಿದೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಹೆಚ್ಚಾಗಬಹುದು ಎಂಬ ನಿರೀಕ್ಷೆಯಲ್ಲಿ ರೈತರಿದ್ದಾರೆ. ಬೆಲೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಮಾರುಕಟ್ಟೆಯಲ್ಲಿ ಇದೀಗ ಸಿಗುತ್ತಿರುವ ಬೆಲೆಯಿಂದ ರೈತರು ಮತ್ತು ಕಮೀಷನ್‌ ಏಜೆಂಟರ ಮೊಗದಲ್ಲಿ ಸಂತೋಷ ಅರಳಿದೆ 2020ರ ಜುಲೈ ತಿಂಗಳಲ್ಲಿ ಸಹ ಟೊಮೇಟೋ ಹೇರಳವಾಗಿ ಬಂದು ಬೆಲೆ ಸಿಗದೆ ಪರದಾಡಿದ ರೈತರು ಮಾರುಕಟ್ಟೆಯಲ್ಲಿ ಟೊಮೇಟೋ ರಾಶಿ ರಾಶಿ ಬಿಸಾಡಿ ಹೋಗಿದ್ದ ದಿನಗಳಲ್ಲಿಇದೀಗ ಉತ್ತಮ ಬೆಲೆ ಸಿಕ್ಕಿರುವುದು ರೈತರಿಗೆ ಸಂತಸವನ್ನು ತಂದಿದೆ.